Bann ki “annan sa bon kondisyon leker” pe reazir

“Tou bann ki ti annan sa bon kondisyon leker pour lavi eternel ti vin krwayan.”—AKT 13:48, NW.

1, 2. Ki mannyer bann premye Kretyen ti reazir anver sa profesi Zezi konsernan sa bon nouvel ki ti pou ganny anonse dan lemonn antye?

LIV Akt ki ganny trouve dan Labib i prezerv bann resi eksitan lo lafason ki bann premye Kretyen ti reazir anver sa profesi ki Zezi ti dir konsernan sa bon nouvel ki ti pou ganny anonse lo later antye. (Mat. 24:14) Dan en sans sa bann proklanmater devoue ti tras sa larout pour bann ki ti pou swiv zot. Bann disip Zezi ti vreman devoue dan predikasyon Zerizalenm e an rezilta sa bokou dimoun enkli “en gran kantite pret ti aksepte lafwa” e zot ti zwenn avek kongregasyon dan premye syek.—Akt 2:41; 4:4; 6:7.

² Bann misyonner dan premye syek ti ed bokou dimoun pour vin Kretyen. Filip ti enn parmi, i ti al Samari e laba en gran lafoul ti port byen latansyon lo sa ki i ti pe dir. (Akt 8:5-8) Pol ti vwayaz en kantite avek diferan konpanyon, i ti anons sa mesaz Sip, serten bout dan Lazi Miner, Masedwann, Lagres ek Itali. Dan bann lavil kot i ti prese bokou Zwif ek Grek ti vin krwayan. (Akt 14:1; 16:5; 17:4) Tit li ti akonplir son minister Kret. (Tit 1:5) Pyer ti okipe dan sa travay Babilonn e ler i ti ekrir son premye let ki ti tonm apepre lannen 62-64 N.L., sa travay predikasyon ki bann Kretyen ti pe fer ti ganny byen rekonnet Pon, Galat, Kapados, Lazi, ek Bitini. (1 Pyer 1:1; 5:13) Sa ti vreman bann moman eksitan! Sa bann premye Kretyen ti telman devoue dan zot travay ki zot lennmi ti dir ki zot ti pe “met dezord partou.”—Akt 17:6; 28:22.

3. Ki rezilta bann proklanmater Rwayonm pe gannyen denozour dan predikasyon e ki mannyer ou santi anver sa?

³ Dan letan modern osi kongregasyon Kretyen pe eksperyans bann ogmantasyon remarkab, e sa i en benediksyon. Eski ou pa ganny ankouraze kan ou lir rapor bann Temwen Zeova tou le-z-an e vwar bann rezilta ki bokou pe gannyen dan lemonn antye? Eski ou pa vreman kontan pour konnen ki bann proklanmater Rwayonm ti kondwir plis ki sis milyon letid Labib pandan lannen servis 2007? Deplis, lasistans pour Memoryal lanmor Zezi Kri pour lannen pase i endike ki apepre dis milyon dimoun ki pa Temwen Zeova ti montre ase lentere dan sa bon nouvel pour asiste sa komemorasyon enportan. Sa i montre ki i ankor annan bokou travay pour fer.

4. Lekel ki pe reazir anver sa mesaz Rwayonm?

⁴ Parey ti leka dan premye syek, ozordi osi tou bann ki “annan sa bon kondisyon leker pour lavi eternel” pe aksepte sa mesaz laverite. (Akt 13:48, NW) Zeova pe atir sa bann kalite dimoun ver  son lorganizasyon. (Lir Agai 2:7.) Ki latitid nou merit mentenir an rapor avek nou minister Kretyen pour ki nou kapab toultan korpere dan sa travay rasanbleman?

Prese san fer lapliferans

5. Ki kalite dimoun ki annan laprouvasyon Zeova?

⁵ Bann Kretyen dan premye syek ti konpran ki “Bondye pa fer preferans pour personn, me dan nenport ki nasyon tou dimoun ki annan respe pour li e ki fer sa ki byen Bondye i kontan li.” (Akt 10:34, 35) En dimoun ki anvi annan en bon relasyon avek Zeova i devret demontre lafwa dan sakrifis Zezi. (Zan 3:16, 36) Lavolonte Bondye se ki “tou dimoun i ganny sove e ganny konnesans laverite.”—1 Tim. 2:3, 4.

6. Ki bann proklanmater Rwayonm pa devret fer e akoz?

⁶ I pou mal pour bann proklanmater sa bon nouvel ziz en dimoun dapre son ras, ran sosyal, laparans, larelizyon oubyen dapre lezot karakteristik ankor. Mazinen: Eski ou pa vreman rekonesan ki sa premye dimoun ki ti koz avek ou lo laverite dan Labib pa ti demontre okenn prezidis anver ou? Pareyman nou pa devret ezite partaz sa mesaz ki kapab sov lavi avek nenport dimoun ki pare pour ekoute.—Lir Matye 7:12.

7. Akoz nou devret evite ziz bann ki nou pres avek?

⁷ Zeova in apwent Zezi konman Ziz alors nou napa drwa pour ziz personn. Sa i apropriye vi ki kontrerman avek Zezi nou kapab ziz en dimoun “selman dapre sa ki nou vwar avek nou lizye” ouswa dapre “sa ki [nou’n] tande avek [nou] zorey.” Me Zezi li i kapab konn panse pli profon en dimoun ek rezonnman ki en dimoun i fer dan son leker.—Iza. 11:1-5; 2 Tim. 4:1.

8, 9. (a) Ki kalite dimoun Sol ti ete avan i ti vin en Kretyen? (b) Ki leksperyans zapot Pol i devret ansenny nou?

⁸ Diferan kalite dimoun in vin serviter Bondye. Legzanp Sol sorti Tars ki plitar ti ganny rekonnet konman zapot Pol i en legzanp vreman remarkab. Sol ti en Farizyen e i ti severman opoz bann vre Kretyen. Sa konviksyon ferm ki i ti annan konmkwa sa bann Kretyen pa ti bann vre adorater Zeova ti fer li persekit kongregasyon Kretyen. (Gal. 1:13) Dapre pwennvi en imen, i ti preski enposib pour Sol vin en Kretyen. Parkont, Zezi ti vwar en bon keksoz dan leker Sol e se pour sa ki i ti swazir li pour akonplir en travay spesyal. An rezilta sa, Sol ti vin enn parmi bann manm pli aktif e devoue dan kongregasyon Kretyen dan premye syek.

⁹ Ki leksperyans zapot Pol i ansenny nou? Petet dan nou teritwar i annan bann group dimoun ki opoz sa bon nouvel. Nou pa devret aret esey rezonn avek zot menm si nou annan dout lo si vreman serten pou vin en vre Kretyen. Parfwa i arive ki sanmenm sa bann ki ou ti panse pa pou enterese zot menm ki ekout sa mesaz. Nou travay se pour kontinyen pres avek tou dimoun “san arete.”—Lir Akt 5:42, NW.

Benediksyon pour bann ki prese “san arete”

10. Akoz nou pa devret ezite pres avek bann dimoun ki paret fer nou per? Rakont leksperyans lokal.

¹⁰ Laparans i kapab fer nou tonm lo en move konklizyon. Annou pran legzanp Ignacio. * I ti konmans etidye Labib avek bann Te mwen Zeova kan i ti dan prizon dan en pei Sid Lanmerik. Dimoun ti per li akoz i ti brit. Alors lezot kanmarad prizonnyen ki ti fer e vann bann lobze avek lezot prizonnyen ti servi li pour reklanm zot det avek bann ki pa ti ankor peye. Parkont, kan Ignacio ti konmans progrese spirityelman e aplik sa ki i ti pe aprann, li ki oparavan ti brit e kontan fer ditor lezot ti’n vin en dimoun zantiy. Aprezan zot nepli servi li pour al reklanm zot det, e Ignacio i kontan ki laverite dan Labib ek lespri sen in transform son personnalite. I vreman rekonesan ki sa bann proklanmater ki ti fer zefor pour etidye avek li pa ti fer lapliferans.

11. Akoz nou kontinyen retournen pour vizit bann dimoun?

¹¹ Sirkonstans ek latitid en dimoun i kapab sanze e i menm sanze, e se pour sa rezon ki nou kontinyen vizit bann ki nou’n deza pres avek oparavan. Petet depi nou dernyen vizit serten dimoun in kapab ganny afekte par en maladi grav, perdi travay ouswa perdi en dimoun ki zot kontan dan lanmor. (Lir Eklezyast 9:11.) Bann levennman mondyal i kapab motiv dimoun pour mazin seryezman konsernan zot lavenir. Sa bann tel devlopman i kapab fer en dimoun ki oparavan pa ti enterese ouswa ki ti opoz nou, azir dan en bon fason anver nou. Alors nou pa devret ezite pour partaz sa bon nouvel avek lezot dan tou lokazyon apropriye.

12. Ki mannyer nou merit vwar bann dimoun ki nou pres avek e akoz?

¹² Bann imen i annan sa tandans pour kategoriz e ziz lezot. Me Zeova i vwar sak dimoun endividyelman. I vwar potansyel ki sakenn antre nou i annan. (Lir 1 Samyel 16:7.) Dan nou minister nou merit fer zefor pour fer parey. Bokou leksperyans i montre bon rezilta ki nou gannyen ler nou annan en pwennvi pozitif anver sa bann ki nou pres avek.

13, 14. (a) Akoz en pionye ti reazir dan en fason negatif anver en madanm ki i ti zwenn dan predikasyon? (b) Ki nou kapab aprann atraver sa leksperyans?

¹³ En ser pionye ki apel Sandra ti pe prese portanport lo en zil Karaib kan i ti zwenn Ruth ki ti vreman enplike dan selebrasyon karnaval. Ruth ti’n deza ganny kouronnen de fwa konman larenn karnaval lo nivo nasyonal. I ti demontre en lentere ki pa souvan ou vwar, dan sa ki Sandra ti pe dir li, alors zot fer plan pour fer en letid Labib. Sandra i rakonte: “Pandan ki mon ti antre dan son salon, mon ti vwar en gran portre kot Ruth ti dan en gro kostim karnaval en pe spesyal e osi bann lakoup ki i ti’n gannyen. Mon ti mal ler mon ti panse ki en dimoun ki sitan popiler e enplike dan bann festival karnaval avek letan pou perdi lentere dan laverite. Alors mon ti aret vizit li.”

¹⁴ En pe letan plitar, Ruth ti vin lasal Rwayonm e kan renyon ti fini i ti demann Sandra: “Akoz ou’n aret vin etidye avek mwan?” Sandra ti demann li lekskiz e fer laranzman pour kontiny son letid. Ruth ti fer progre vitman e i ti retir tou son bann portre karnaval. I ti konmans partisip dan bann aktivite kongregasyon e dedye son lavi avek Zeova. Byensir Sandra ti realize plitar ki son premye reaksyon ti mal.

15, 16. (a) Ki rezilta en proklanmater ti gannyen apre ki i ti’n pres avek enn son fanmir? (b) Akoz fason viv enn nou fanmir pa devret dekouraz nou pour pres avek li?

¹⁵ Bokou in ganny bon rezilta kan zot in pres avek manm zot fanmir ki pa ti annan menm krwayans avek zot, menm kan i ti paret ki zot pa ti pou enterese. Pran par egzanp Joyce, en ser Leta-z-ini. Son bofrer in antre sorti dan prizon depi ler i ti adolesan. Joyce ti dir: “Dimoun ti dir ki i ti pe zis viv koumsan menm, akoz i ti enplike dan drog, en voler, e fer plizyer keksoz mal ankor. Menm si i ti ­annan tou sa bann defo, pour 37 an mon ti kontinyen koz lo laverite dan Labib avek li.” Joyce ti ganny rekonpanse en kantite pour son zefor ki i ti fer avek pasyans pour ed son bofrer, akoz finalman i ti konmans etidye Labib avek Temwen Zeova, e fer bann gran  sanzman dan son lavi. Pa tro lontan a laz 50 an bofrer Joyce ti batize dan en lasanble distrik Kaliforni, Leta-z-ini. Joyce ti dir: “Mon ti plere avek lazwa. Mon vreman kontan ki mon pa ti abandonn li!”

¹⁶ Petet ou ezite pour koz avek serten ou fanmir lo laverite dan Labib akoz zot fason viv. Me pourtan, sa pa ti anpes Joyce koz avek son bofrer. Apre tou, ki mannyer en dimoun i kapab konn sa ki dan leker en lot? I kapab ki sa dimoun pe senserman rod laverite. Alors, pa ezite pour donn lezot sa loportinite pour trouv laverite.—Lir Proverb 3:27.

En led efikas pour fer letid Labib

17, 18. (a) Ki bann rapor sorti dan bokou pei i endike lo valer sa liv Ki Labib i vreman dir? (b) Ki leksperyans ankourazan ou’n gannyen par servi sa liv?

¹⁷ Bann rapor ki’n ganny fer dan plizyer pei i montre ki bokou dimoun senser pe byen aksepte sa liv Ki Labib i vreman dir? ki ganny servi pour etidye Labib. En ser pionye Leta-z-ini ki apel Penni ti konmans plizyer letid an servan sa piblikasyon. De parmi ti de dimoun aze ki ti devoue dan zot legliz. Penni pa ti asire lo lafason ki zot ti pou reakte anver laverite ki sorti dan sa liv Ki Labib i dir. Toudmenm i ekrir: “Lafason ki lenformasyon in ganny donnen i kler, lozik e direk san gran leksplikasyon, sa ti fer ki zot ti fasilman aksepte sa ki zot ti pe aprann konman laverite, san argimante ouswa konfize.”

¹⁸ Pat i en proklanmater Langleter, i ti konmans en letid Labib avek en madanm ki ti en refizye sorti dan en pei Lazi. Sa madanm ti bezwen kit son pei apre ki bann solda rebel ti pran son msye ek son bann garson e sa i fer ki i pa ti zanmen vwar zot ankor. Son lavi ti an danze, son lakaz ti’n ganny brile e i ti’n ganny vyole par en group zonm. Tousala ti fer li santi ki i ti napa okenn bi dan lavi e plizyer fwa i ti mazin pour komet swisid. Parkont, letid Labib ti donn li lespwar. Pat ti ekrir: “Sa leksplikasyon senp ek bann ilistrasyon dan sa liv Ki Labib i dir in annan en gro lenpak lo li.” Sa madanm ti fer bann progre vitman, i ti kalifye pour vin en proklanmater non batize e i’n dir ki i ti a kontan batize pandan prosen lasanble. Pa i vreman en lazwa pour ed bann dimoun senser konpran e apresye sa lespwar ki Lekritir i donnen!

“Annou pa aret fer sa ki byen”

19. Akoz travay predikasyon i irzan?

¹⁹ Avek sak zour ki pase, i vin deplizanpli irzan pour nou fer nou travay pour pres sa bon nouvel e fer disip. Bokou dimoun ki annan sa bon kondisyon leker i aksepte sa mesaz sak lannen. Parkont “gran zour Zeova i pros,” e sa i vedir ki bann ki reste dan fernwanr spirityel “pe ale an drivan pour ganny touye.”—Tsef. 1:14; Prov. 24:11.

20. Ki sakenn antre nou i devret determinen pour fer?

²⁰ Nou ankor kapab ed sa bann kalite dimoun. Me pour ki nou kapab fer li i enportan ki nou imit bann Kretyen dan premye syek ki ti “kontinyen prese [san arete] . . . e anons Zezi konman Mesi.” (Akt 5:42) Swiv zot legzanp par persevere kantmenm ou rankontre lopozisyon, port latansyon lo ou “lar pour ansennyen” e pres avek tou dimoun san fer lapliferans! “Annou pa aret fer sa ki byen” akoz si nou persevere, nou pou ganny bokou benediksyon ki vin avek laprouvasyon Bondye.—2 Tim. 4:2, NW; lir Galat 6:9.

[Not anba lo paz 18]

Ki ou pou reponn?

• Lekel ki pe reazir anver sa bon nouvel?

• Akoz nou pa devret ziz bann ki nou pres avek?

• Ki rezilta nou pe gannyen avek sa liv Ki Labib i vreman dir?

[Kestyon]

[Portre lo paz 17]

Bokou dimoun senser pe reazir anver sa bon nouvel