Bann pwenn enteresan dan liv Matye
Parol Zeova i vivan
Bann pwenn enteresan dan liv Matye
MATYE ki ti en zanmi pros Zezi e ki avan ti en kolekter taks ti sa premye dimoun pour ekrir en resi eksitan lo lavi Zezi ek son minister. Levanzil Matye ki ti’n ganny ekrir an Ebre e ki plitar ti ganny tradwir an Grek, ti ganny konplete apepre lannen 41 N.L. e i sa lyen ki konekte Lekritir Ebre avek Lekritir Grek.
I paret ki Levanzil Matye ti’n ganny ekrir premyerman pour bann Zwif. Sa Levanzil vreman tousan e enportan, i reprezant Zezi konman sa Mesi, Garson Bondye, ki ti’n ganny promet. Ler nou port byen latansyon lo son mesaz i pou fortifye nou lafwa dan sa vre Bondye, son Garson ek Son promes.—Ebr. 4:12.
“RWAYONM LESYEL I PROS”
Matye i met lanfaz lo sa tenm Rwayonm ek bann lansennyman Zezi, menm si an fezan sa i pa’n prezant sa lenformasyon dapre lord kronolozik. Par egzanp, Sermon lo montanny i ganny rakonte boner dan liv Matye, menm si Zezi ti donn sa sermon apepre en pti pe plis ki enn an edmi apre ki i ti’n konmans son minister.
Pandan son minister Galile, Zezi ti fer en kantite mirak, i ti donn son 12 zapot lenstriksyon konsernan sa travay predikasyon, denons bann Farizyen, e i rakont bann parabol konsernan Rwayonm. Apre i ti kit Galile e al “dan rezyon Zide lo lot kote larivyer Zourden.” (Mat. 19:1) Lo semen anmezir zot ti pe ale, Zezi ti dir son bann disip: ‘Nou pe mont Zerizalenm; e Fis-de-Lonm pou ganny kondann a-mor, me trwazyenm zour i pou resisite.’—Mat. 20:18, 19.
Larepons pour bann kestyon lo Labib:
3:16—Dan ki fason “lesyel ti ouver” ler Zezi ti batize? I paret ki sa pe montre ki Zezi ti reganny son memwar konsernan son lavi dan lesyel avan vin lo later.
5:21, 22—Eski eksprim ou lakoler i pli serye ki ler ou gard li anndan? Zezi ti averti ki en dimoun ki les son lakoler dire kont son frer pe fer en pese grav. Parkont, en dimoun ki eksprim son lakoler par lensilt i pli serye, e sa i fer ki i pou bezwen rann kont avek en lakour ki pli o ki lakour lazistis dan landrwa kot i pe reste.
5:48—Eski i vreman posib pour nou “vin parfe parey [nou] Papa ki dan lesyel i parfe”? A en serten degre, wi. La Zezi ti pe diskit lo lanmour, e i ti dir bann ki ti pe ekoute pour imit Bondye e vin parfe oubyen vin konplet dan zot lanmour. (Mat. 5:43-47) Ki mannyer? Par kontan zot lennmi osi.
7:16—Ki “fri” ki idantifye vre larelizyon? Sa bann fri i enkli plis ki nou kondwit. I osi enplik nou bann krwayans setadir bann lansennyman ki nou atase avek.
10:34-38—Eski sa mesaz dan Labib i responsab pour bann divizyon dan fanmir? Ditou. Sa bann divizyon i plito akoz pozisyon ki bann manm fanmir non krwayan i pran. Zot kapab swazir pour rezet oubyen opoz bann Kretyen ki fer ki bann fanmir i divize.—Lik 12:51-53.
11:2-6—Lefet ki Zan ti deza konnen ki Zezi ti Mesi apre ki i ti’n tann Bondye donn Zezi son laprouvasyon, akoz i ti demande si Zezi ti “sa enn ki devre vini”? Petet Zan ti demann sa kestyon pour ki Zezi i konfirm sa avek li personnelman. Anplis ki sa, Zan ti anvi konnen si i ti annan “en lot” ki ti pou vin avek pouvwar Rwayonm e akonplir tou sa ki bann Zwif ti pe espere. Larepons Zezi ti montre ki ti napa personn apre li.
19:28—Ki “sa douz tribi Izrael” ki pou ganny zize i reprezante? Zot pa reprezant sa 12 tribi Izrael spirityel. (Gal. 6:16; Rev. 7:4-8) Zezi ti pe koz avek bann zapot ki ti pou form par Izrael spirityel, me zot pa ti pou ziz bann manm Israel spirityel. Zezi ti fer en lalyans avek zot pour en ‘rwayonm,’ e zot ti pou vin ‘en rwayonm ek pret’ pour Bondye. (Lik 22:28-30; Rev. 5:10) Se bann ki form parti Izrael spirityel ki pou “ziz lemonn.” (1 Kor. 6:2) Alor, “sa douz tribi Izrael,” ki ganny zize par sa bann lo tronn dan lesyel, evidaman i reprezant bann imen ki pa form parti sa group pret rwayal parey i ti pe ganny reprezante par sa 12 tribi Zour Propisyasyon.—Lev., sapit 16.
Leson pour nou:
4:1-10. Sa resi i ansenny nou ki Satan i en personnaz reel me i pa zis lemal koumsanmenm. I servi “dezir natir imen, dezir atraver nou lizye ek lorgey dan lavi toulezour” pour tant nou. Kantmenm sa, met an pratik bann prensip Labib pou ed nou reste fidel avek Bondye.—1 Zan 2:16.
5:1–7:29. Konsyan ou bezwen spirityel. Fer lape. Rezet bann panse imoral. Gard ou parol. Ler ou pe fer lapriyer donn priyorite bann keksoz spirityel olye konsantre lo sa ki materyel. Vin ris anver Bondye. Rod Rwayonm Bondye ek son ladrwatir premye. Pa bezwen ziz lezot. Fer lavolonte Bondye. Pa sa bann leson dan sa Sermon lo Montanny i vreman pratik!
9:37, 38. Nou devret azir annakor avek nou lapriyer ler nou demann nou Met “pour anvoy zouvriye” pour fer rekolt, par partisip avek devouman dan sa travay pour fer disip.—Mat. 28:19, 20.
10:32, 33. Nou pa devret zanmen per pour koz lo nou lafwa.
13:51, 52. Konpran laverite konsernan Rwayonm i vin avek sa responsabilite pour ansenny lezot e ed zot osi pour konpran sa laverite vreman enportan.
14:12, 13, 23. I tre enportan ki nou met letan dekote kot nou trouv nou tousel pour fer en bon refleksyon.—Mark 6:46; Lik 6:12.
17:20. Nou bezwen annan lafwa pour nou nobou sirmont bann lobstak ki parey en montanny ki enterfer avek nou progre spirityel. Lafwa pou ed nou osi fer fas avek problenm. Nou devret batir e fortifye nou lafwa dan Zeova ek son bann promes, nou pa devret pran sa alalezer.—Mark 11:23; Lik 17:6.
18:1-4; 20:20-28. Lenperfeksyon imen ek lefet ki zot ti’n grandi dan en larelizyon ki ti met lanfaz lo pozisyon ti fer bann disip Zezi tro konsernen avek ganny pozisyon. Nou devret kiltiv limilite anmezir ki nou vey lo nou bann tandans pour fer sa ki mal e gard en bon pwennvi lo nou bann privilez ek responsabilite.
“FIS-DE-LONM POU GANNY LIVRE”
Le 9 Nizan 33 N.L., Zezi i vin Zerizalenm “lo en bourik.” (Mat. 21:5) Son lannmen, i vin dan tanp e i netway li. Le 11 Nizan, i ansenny bann dimoun dan tanp, denons bann profeser lalwa ek Farizyen, e apre sa i dir son bann disip “siny ki pou endik [son] larive ek lafen” sa sistenm. (Mat. 24:3) Lannmen, i dir son bann disip: “Dan de zour, parey zot konnen, i lafet [lapak], e Fis-de-Lonm pou ganny livre ”e ganny kloute.—Mat. 26:1, 2.
I aprezan le 14 Nizan. Apre ki i ti’n entrodwir Memoryal son lanmor ki ti pros pour arive, Zezi ti ganny trai, arete, e ti ganny anmennen devan lakour, e apre i ti ganny met amor. Trwazyenm zour i ti resisite. Avan ki i ti mont dan lesyel, Zezi ti donn son bann disip sa komannman: “Ale e fer tou pep vin mon bann disip.”—Mat. 28:19.
Larepons pour bann kestyon lo Labib:
22:3, 4, 9—Kan ki sa trwa lenvitasyon pour asiste maryaz ti ganny anvoye? Premye lenvitasyon pour rasanble bann ki form parti nouvel marye ti ganny anvoye kan Zezi ek son bann disip ti konmans prese lannen 29 N.L., e i ti kontinyen ziska lannen 33 N.L. Dezyenm lenvitasyon ti ganny anvoye depi ki bann disip ti resevwar lespri sen zour Lapannkot lannen 33 N.L. ziska 36 N.L. Tou le de lenvitasyon ti pour zis bann Zwif, bann ki ti’n konverti dan larelizyon Zwif ek bann Samariten. Parkont, sa trwazyenm lenvitasyon ti ganny anvoye pour bann dimoun lo semen an deor lavil, setadir bann non Zwif ki pa ti’n sirkonsi, e sa ti konmans an lannen 36 N.L. kan Korney en zofisye larme Romen ti konverti e i pe kontinyen dan nou lepok.
23:15—Akoz en dimoun ki ti’n konverti pour vin en Farizyen ti “merit [Zeenn] de fwa plis ki” sa bann Farizyen zot menm? Serten ki ti konverti pour vin Farizyen ti petet bann gran peser dan lepase. Par konverti pour vin bann ekstremis Farizyen, annefe, zot ti vin pli move, petet menm pli terib ki zot bann move ansennyan. Alor, zot ti “merit [“Zeenn,” NW]” menm bokou plis ki bann Farizyen Zwif.
27:3-5—Kwa ki ti fer Zida santi regre? Napa okenn lendikasyon ki montre ki ler Zida ti santi regre i ti vreman repantir. Olye demann Bondye pour pardonn li, i ti konfes son pese avek bann sef pret ek ansyen. Lefet ki i ti’n fer en “pese ki anmenn lanmor,” i ti byen pour li vreman santi li koupab e dezespere. (1 Zan 5:16) I ti santi regre senpleman akoz i ti dan en sitiasyon san okenn lespwar.
Leson pour nou:
21:28-31. Sa ki Zeova i vreman konsider konman enportan se ki nou fer son lavolonte. Par egzanp, nou devret devoue dan sa travay pour fer disip ek predikasyon.—Mat. 24:14; 28:19, 20.
22:37-39. Pa sa de pli gran komannman i montre dan en fason tre presi sa ki Bondye i ekspekte bann ki ador li fer!
[Portre lo paz 23]
Eski ou pe partisip dan sa travay rekolt avek bokou devouman?
[Portre lo paz 23]
Matye i met lanfaz lo Rwayonm Bondye