Diny pour ganny gide kot sours delo ki donn lavi
Diny pour ganny gide kot sours delo ki donn lavi
“Lanyo . . . pou gid zot kot sours delo ki donn lavi.”—REV. 7:17.
1. Ki mannyer bann Kretyen swazir i ganny idantifye dan Labib e ki responsabilite Zezi ti donn zot?
PAROL Bondye i idantifye bann Kretyen swazir ki pran swen avek bann byen Zezi lo later konman “sa lesklav fidel e pridan.” Kan Kris ti enspekte sa “lesklav” an 1918, i ti trouv sa bann Kretyen swazir lo later pe fidelman donn “manze kan i ler.” Alors, apre sa Zezi, sa met, ti kontan pour fer zot ansarz “tou son byen.” (Lir Matye 24:45-47, NW.) Dan sa fason, bann Kretyen swazir pe servi lezot adorater Zeova isi lo later avan ki zot resevwar zot leritaz dan lesyel.
2. Dekrir bann byen Zezi.
2 En met i annan lotorite lo son bann byen, oubyen posesyon e i kapab servi zot dan sa fason ki i oule. Bann byen Zezi Kri, sa Lerwa ki Zeova in kouronnen, i enkli tou keksoz ki annan pour fer avek sa Rwayonm ek bann lo later ki siport sa Rwayonm. Sa i enkli sa “gran lafoul” ki zapot Zan ti vwar dan en vizyon. La ki mannyer Zan ti dekrir sa gran lafoul: “Mon ti war en gran lafoul, ki personn pa ti kapab konte, sorti dan tou nasyon, tribi, pep ek lalang. Zot ti debout devan tronn e devan Lanyo, dan rob blan e avek brans palm dan lanmen.”—Rev. 7:9.
3, 4. Ki gran privilez bann ki form parti sa gran lafoul i annan?
3 Bann manm sa gran lafoul i parmi sa bann ki Zezi ti refer avek konman son bann “lezot mouton.” (Zan 10:16, NW) Zot annan sa lespwar pour viv pour touzour dan en paradi lo later. Zot annan konfyans ki Zezi “pou gid zot kot sours delo ki donn lavi, e Bondye pou eswiy tou larm dan zot lizye.” Avek sa lespwar antet, zot in “lav zot rob e blansi li dan disan Lanyo.” (Rev. 7:14, 17) Zot demontre lafwa dan sakrifis Zezi e alors dan lizye Bondye zot ‘rob in blansi.’ Zot ganny konsidere drwat konman bann zanmi Bondye parey Abraam.
4 Deplis, vi ki sa gran lafoul ki pe miltipliye i ganny vwar drwat par Bondye, zot kapab annan sa lespwar pour sirviv destriksyon sa move lemonn zour sa gran ladetres. (Zak 2:23-26) Zot kapab apros avek Zeova e konman en group, zot annan sa lespwar merveye pour sirviv Armagedon. (Zak 4:8; Rev. 7:15) Zot pa fonksyonn konman en group endepandan, me zot volonterman travay anba direksyon sa Lerwa dan lesyel ek son bann frer swazir ki lo later.
5. Ki mannyer bann manm sa gran lafoul i ganny sipor bann frer Kris ki’n ganny swazir?
5 Bann Kretyen swazir in rankontre e pou kontinyen rankontre lopozisyon kriyel par sa lemonn Satan. Malgre tousala, zot kapab depan lo sipor zot bann konpanyon ki form parti sa gran lafoul. Tandis ki i pa reste bokou bann Kretyen swazir, sa gran lafoul pe ogmante par plizyer santenn milye sak lannen. Personnelman bann Kretyen swazir pa kapab pran swen avek sa apepre 100,000 kongregasyon ki egziste dan lemonn antye. Enn parmi plizyer sipor ki bann Kretyen swazir i resevwar sorti kot lezot mouton se bann zonm kalifye dan sa gran lafoul ki servi konman bann ansyen dan kongregasyon. Zot ede pour pran swen avek sa plizyer milyon Kretyen ki’n ganny konfye avek “sa lesklav fidel e pridan.”
6. Ki mannyer sipor ki bann Kretyen swazir ti pou gannyen avek lezot mouton ti’n ganny profetize?
6 Sa sipor ki lezot mouton i volonterman donn bann Kretyen swazir ti’n ganny predir par profet Izai. I ti ekrir: “La sa ki Zeova in dir: ‘Bann labourer ki pa ganny peye sorti Lezip ek bann marsan Letyopi ek bann dimoun Seba, bann gran zonm, pou pas kot ou, e zot pou vin pour ou. Zot pou marse deryer ou.’” (Iza. 45:14) Dan en sans senbolik, ozordi bann Kretyen ki annan sa lespwar pour viv lo later pe mars deryer sa lesklav ki’n ganny swazir ek son Konsey Direkter, par swiv zot gidans. Konman “bann labourer ki pa ganny peye,” lezot mouton pe volonterman depans zot lenerzi ek zot bann resours avek tou zot leker pour siport sa travay predikasyon mondyal ki Kris in konfye avek son bann disip ki i’n swazir lo later.—Akt 1:8; Rev. 12:17.
7. Pour ki rezon sa gran lafoul pe ganny formen?
7 Anmezir ki zot donn zot sipor zot bann frer ki’n ganny swazir, bann manm sa gran lafoul pe ganny formen pour vin fondasyon sa nouvo sosyete imen ki pou egziste apre Armagedon. Sa fondasyon i bezwen enn ki solid e stab e son bann manm i bezwen pare e kapab swiv gidans ki Met i donnen. Sak Kretyen pe ganny sa loportinite pour demontre ki i kapab ganny servi par sa Lerwa, Zezi Kri. Par annan lafwa e par demontre fidelite ozordi, en Kretyen i montre ki i pou byen reazir kan sa Lerwa pou donn li gidans dan sa nouvo lemonn.
Sa gran lafoul i prouv zot lafwa
8, 9. Ki mannyer bann ki form parti sa gran lafoul pe prouv zot lafwa?
8 Lezot mouton ek bann Kretyen swazir i prouv zot lafwa dan plizyer fason. Premyerman, zot siport bann Kretyen swazir pour anons sa bon nouvel lo Rwayonm Bondye. (Mat. 24:14; 28:19, 20) Dezyenmman, zot pare pour soumet anba gidans ki Konsey Direkter i donnen.—Ebr. 13:17; lir Zekarya 8:23.
9 Trwazyenmman, bann manm sa gran lafoul i siport zot bann frer swazir par viv an armoni avek bann prensip drwat Zeova. Zot fer zefor pour devlop “lanmour, lazwa, lape, pasyans, labonte, [“lafwa,” NW] ladouser, kontrol lo son prop lekor.” (Gal. 5:22, 23) Ozordi, demontre sa bann tel kalite, olye ki prodwir “bann aktivite natir imen,” i kapab pa en keksoz komen. Me kantmenm sa, bann manm sa gran lafoul i determinen pour evit “aksyon imoral, lenpirte, vis, ladorasyon zidol, siperstisyon, laenn, diskord, zalouzi, lakoler, egois, divizyon an diferan parti opoze, groker, soulezon, parti bwar, ek lezot bann tel aksyon ankor.”—Gal. 5:19-21.
10. Ki manm sa gran lafoul i determinen pour fer?
10 Vi ki nou bann imen enparfe i kapab en defi pour demontre sa bann kalite Kretyen e evite komet sa bann aktivite natir imen e reziste presyon sa lemonn Satan. Malgre tousala, nou determinen pour pa les nou ganny dekouraze akoz nou prop febles, fot, oubyen limit fizik, ki kapab afeblir nou lafwa oubyen nou lanmour pour Zeova. Nou konnen ki Zeova pou tenir son promes, setadir ki sa gran lafoul i sorti vivan dan sa gran ladetres.
11. Ki taktik Satan in servi dan son zefor pour afeblir lafwa bann Kretyen?
11 Me kantmenm sa, nou konstaman reste vizilan akoz nou konnen ki nou vre lennmi i Dyab e i pa abandonn fasilman. (Lir 1 Pyer 5:8.) I’n esey servi bann aposta ek lezot pour fer nou krwar ki sa lansennyman ki nou pe swiv i fo. Me lapliparditan sa taktik pa’n reisi. Pareyman, menm si persekisyon defwa i ralanti sa travay predikasyon, souvandfwa i’n ede pour ranforsi lafwa sa bann ki ti pe ganny persekite. Anfet, Satan pe kontinyen servi en metod ki i santi pou fer li pli fasil pour afeblir nou lafwa. Ler nou dekouraze i kapab kapitaliz lo sa. Bann Kretyen dan premye syek ti ganny averti konsernan sa danze ler zot ti ganny dir: “Mazin en pe, ki mannyer [Kris] i’n siport sitan lopozisyon delapar bann peser.” Akoz? Pour ki ou “pa dekouraze, ni dezespere.”—Ebr. 12:3.
12. Ki mannyer konsey Labib i donn lafors bann ki dekouraze?
12 Eski ou’n deza santi sa lanvi pour abandonn ou servis pour Zeova? Eski defwa ou santi ki ou pa vo nanryen? Si sa i leka, pa les Satan servi sa bann santiman pour anpes ou servi Zeova. Ou pou ganny lafors e kontinyen pour pa les ou “dekouraze, ni dezespere” si ou etidye Labib oprofon, sipliy Zeova dan lapriyer, asiste renyon regilyerman e frekant ou bann frer ek ser Kretyen. Zeova in promet ki i pou ed bann ki pe servi li pour reganny lafors e nou kapab annan konfyans dan son promes. (Lir Izai 40:30, 31.) Reste konsantre lo ou bann aktivite Kretyen. Evit bann distraksyon ki fer ou perdi bokou letan e konsantre lo led ki ou kapab ofer lezot. Alors ou pou ganny lafors pour andire malgre dekourazman.—Gal. 6:1, 2.
Sorti dan sa gran ladetres e antre dan sa nouvo lemonn
13. Ki travay bann ki pou sirviv Armagedon pou annan pour fer?
13 Apre Armagedon, en gran kantite move dimoun ki pou resisite pou bezwen ganny ansennyen dan semen Zeova. (Akt 24:15) Zot pou bezwen aprann konsernan sakrifis ki Zezi ti fer; anplis ki sa, zot pou bezwen ganny ansennyen pour demontre lafwa dan sa sakrifis pour zot kapab resevwar son bann byenfe. Zot pou bezwen rezet bann fo krwayans relizye ki zot ti annan avan e osi abandonn fason ki zot ti viv oparavan e aprann pour met sa nouvo personnalite ki idantifye bann vre Kretyen. (Efe. 4:22-24; Kol. 3:9, 10) Lezot mouton ki pou’n sirviv Armagedon pou annan bokou travay pour fer. Pa i pou gou pour servi Zeova san okenn presyon e san ganny distrer par lenfliyans sa move lemonn!
14, 15. Kwa ki bann sirvivan sa gran ladetres ek bann ki drwat ki pou resisite pou kapab diskite antre zot?
14 Bann serviter fidel Zeova ki’n mor avan minister Zezi lo later pou osi annan en kantite pour aprann dan sa letan. Zot pou konnen lekel sa Mesi promiz ki zot ti pe espere me ki zot pa’n zanmen vwar. Ler zot ti vivan, zot ti’n deza montre ki zot ti anvi ganny ansennyen par Zeova. Mazin sa lazwa ek loner ki ou pou annan pour ed zot, par egzanp pour eksplik Danyel lakonplisman bann profesi ki i ti ekrir me ki i pa ti konpran!—Dan. 12:8, 9.
15 Byensir, menm si sa bann ki pou ganny resisite pou annan en kantite pour aprann avek nou, nou pou annan en kantite kestyon pour demann zot. Zot pou kapab donn nou bann lenformasyon an detay lo bann levennman ki’n ganny mansyonnen dan Labib me ki pa’n ganny ekrir an detay. Mazinen ki mannyer i pou eksitan pour konn pour ou menm bann detay lo Zezi par son kouzen Zan Batis! Bann keksoz ki nou pou aprann direkteman avek sa bann temwen fidel pou san dout donn nou en pli bon konprenezon lo Parol Bondye ki nou annan ozordi. Bann serviter fidel Zeova ki’n mor, setadir enkli bann ki sorti dan gran lafoul ki’n mor pandan letan lafen, pou “resisite pour en lavi meyer.” Zot ti konmans zot servis pour Zeova dan en lemonn dominen par Satan. Pa i pou en lazwa pour zot kontinyen zot servis dan bann sirkonstans bokou pli favorab dan sa nouvo lemonn!—Ebr. 11:35; 1 Zan 5:19.
16. Dapre profesi ki mannyer Zour Zizman pou konmanse?
16 Pandan Zour Zizman i pou annan en letan kot bann roulo pou ganny ouver. Tou sa bann roulo ansanm avek Labib pou ganny servi pour ziz tou bann ki vivan pour vwar si zot merite ganny lavi eternel. (Lir Revelasyon 20:12, 13.) Ver lafen Zour Zizman, sak dimoun pou’n ganny ase letan pour montre kote i debout vizavi sa kestyon ki ti leve konsernan sa drwa ki Zeova i annan pour dirize. Eski i pou soumet avek Rwayonm Bondye e les Lanyo gid li kot “sours delo ki donn lavi”? Oubyen eski i pou reziste par refize pour soumet anba Rwayonm Bondye? (Rev. 7:17; Iza. 65:20) Apartir sa letan tou dimoun lo later pou annan sa loportinite pour fer en desizyon personnel, ki pa pou ganny enfliyanse par pese ki nou’n erite oubyen en move lanvironnman. Napa personn ki pou kapab kestyonn drwa ki Zeova i annan pour anmenn sa zizman final. Zis bann move dimoun ki pou ganny detrir pour touzour.—Rev. 20:14, 15.
17, 18. Avek ki lazwa bann Kretyen swazir ek lezot mouton pe esper Zour Zizman?
17 Bann Kretyen swazir ozordi ki’n ganny konsidere diny pour resevwar sa Rwayonm i enpasyan pour konmans rennyen pandan Zour Zizman. Pa zot pou ganny en gran privilez! Zis sa lespwar tousel i motiv zot pour swiv sa konsey ki Pyer ti donn zot bann frer dan premye syek: “Fer en pli gro zefor pour reste atase avek Bondye ki’n apel zot, e swazir zot. Si zot fer sa, zot pa pou zanmen tonm dan sa ki move. Koumsanmenm ki zot pou ganny drwa antre libreman dan Rwayonm eternel nou Senyer e Sover Zezi-Kri.”—2 Pyer 1:10, 11.
18 Lezot mouton i kontan ki zot bann frer swazir i annan en tel lespwar. Zot determinen pour siport zot. Konman bann zanmi Bondye ozordi, zot motive pour fer zot mye dan servis Bondye. Pandan Zour Zizman, zot pou eksite pour siport avek tou zot leker laranzman Bondye anmezir ki Zezi i gid zot kot sours delo ki donn lavi. Apre, a lafen de fen zot pou ganny konsidere diny pour vin bann serviter Zeova lo later pour leternite!—Rom. 8:20, 21; Rev. 21:1-7.
Eski ou rapel?
• Kwa ki ganny enkli parmi bann byen Zezi?
• Ki mannyer sa gran lafoul i siport zot bann frer swazir?
• Ki privilez ek lespwar merveye sa gran lafoul i annan?
• Ki mannyer ou konsider Zour Zizman?
[Kestyon]
[Portre lo paz 29]
Sa gran lafoul in lav zot rob e blansi li dan disan Lanyo
[Portre lo paz 31]
Ki ou ti a kontan aprann avek bann fidel ki pou resisite?