‘Fer byen sa travay ki ou’n ganny konfye dan servis Senyer’

“Fer sir ki [ou] fer byen sa travay ki [ou’n] ganny konfye dan servis Senyer.”—KOL. 4:17.

1, 2. Ki responsabilite bann Kretyen i annan anver bann imen?

NOU annan en responsabilite serye anver bann dimoun ki viv otour nou. Sa desizyon ki zot pou fer la konmela pou vedir lavi ouswa lanmor pandan letan “gran ladetres.” (Rev. 7:14, NW) Sa ekriven ki ti ganny enspire pour ekrir liv Proverb ti dir: “Delivre bann ki pe ganny anmennen ver lanmor; ek bann ki pe ale an drivan pour ganny touye, O eparny zot!” Pa sa bann parol i vreman for! Si nou pa reisi pran nou responsabilite pour averti bann dimoun lo sa swa ki zot bezwen fer, nou pou kapab responsab pour zot lanmor. Anfet, sa lot verse ki swiv i dir: “Si ou dir: ‘Gete! Nou pa ti konn sa nou,’ eski pa sa enn li menm ki pe evalye leker pou konpran, e sa enn li menm ki pe obzerv ou pa i konnen, e byensir pa i pou rann imen tire dan later dapre sa ki i’n fer?” Klerman, bann serviter Zeova pa kapab dir ki zot ‘pa konn konsernan’ sa danze ki imen pe rankontre.—Prov. 24:11, 12.

² Lavi i presye pour Zeova. I ankouraz son bann serviter pour fer tou sa ki zot kapab pour ede sov otan kantite lavi. Sak minis Bondye i devret fer konnen sa mesaz ki sov lavi ki ganny trouve dan Parol Bondye. Nou travay i parey travay en gardyen ki averti lezot kan i vwar en lennmi ki pe vin atake. Nou pa anvi responsab lanmor bann ki dan danze. (Ezek. 33:1-7) Alors, i vreman enportan ki nou persevere dan nou zefor pour “anons Laparol”!—Lir 2 Timote 4:1, 2, 5.

3. Ki topik sa lartik ek sa de lartik ki swiv pou diskite?

³ Dan sa lartik nou pou aprann ki mannyer ou pou kapab sirmont bann lobstak ki ou rankontre dan sa travay ki sov lavi, e ki mannyer ou pou kapab ed plis dimoun. Lot lartik ki swiv pou egzaminen ki mannyer ou pou devlop sa lar pour ansenny sa mesaz laverite tre enportan. Trwazyenm lartik letid pou mansyonn serten rezilta ankourazan ki bann proklanmater Rwayonm pe gannyen dan lemonn antye. Parkont, avan nou egzamin sa bann topik i bon pour revwar akoz sa letan ki nou pe viv ladan i kritik.

Akoz bokou napa lespwar

4, 5. Ki limanite pe eksperyanse e ki mannyer bokou dimoun i reazir?

⁴ Bann levennman sa lemonn i endike ki nou pe viv dan letan “lafen” e ki i tre pros. Limanite pe eksperyans bann levennman ek kondisyon ki Zezi ek son bann disip ti dir pou arive dan “bann dernyen zour.” Bann “douler” parey lager, lafanmin, tranblemandter, ek lezot maler i afekte limanite. Bandisite, legoism e mank respe pour Bondye i partou. I vreman en “letan difisil,” menm pour bann ki pe esey zot mye pour viv dapre bann standar Labib.—Mat. 24:3, 6-8, 12; 2 Tim. 3:1-5.

⁵ Parkont, lamazorite dimoun dan le monn pa konn vre sinifikasyon sa bann levennman. An rezilta sa, bokou i enkyet konsernan zot prop sekirite ek sekirite zot fanmir. Perdi en dimoun ki zot kontan dan lanmor oubyen lezot trazedi i anmenn soufrans pour bokou dimoun. San okenn konnesans egzakt lo akoz sa bann keksoz pe arive e kote zot kapab trouv solisyon, sa bann dimoun i reste san lespwar.—Efe. 2:12.

6. Akoz “Gran Babilonn” pa’n kapab ed bann ki swiv li?

⁶ “Gran Babilonn,” setadir tou bann fo larelizyon pa’n anmenn bokou rekonfor pour bann imen. O kontrer, atraver “diven son limoralite” in fer bokou dimoun drive dan konfizyon spirityel. Deplis, par azir konman en prostitye, fo larelizyon in sedwir e kontrol “bann lerwa later” par servi bann fo doktrin ek bann pratik grigri afen ki lamazorite imen i ava aksepte pour fer tou pour zot gouvernman. Fo larelizyon i annan kontrol ek lenfliyans lo lezot, e an menm tan in konpletman rezet laverite.—Rev. 17:1, 2, 5; 18:23.

7. Ki pou arive avek lamazorite imen, me ki mannyer serten i kapab ganny ede?

⁷ Zezi ti ansennyen ki laplipar imen pe mars lo sa semen larz ki anmenn ver destriksyon. (Mat. 7:13, 14) Serten endividi i lo sa semen larz akoz zot in volonterman swazir pour rezet sa ki Labib i ansennyen, me bokou lezot i lo la akoz zot in ganny anbete, ouswa ganny avegle lo sa ki Zeova i vreman ekspekte avek zot. Petet serten ti pou sanz zot fason viv si zot ti ganny bann bon rezon dapre Labib pour fer li. Me bann ki reste dan Gran Babilonn e ki kontinyen rezet bann standar Labib pa pou ganny sove pandan letan “gran ladetres.”—Rev. 7:14, NW.

“Kontinyen prese”

8, 9. Ki mannyer bann Kretyen dan premye syek ti reazir kan zot ti rankontre lopozisyon e akoz?

⁸ Zezi ti dir ki son bann disip ti pou pres sa bon nouvel lo Rwayonm e fer disip. (Mat. 28:19, 20) Alors, bann vre Kretyen in toultan konsider partisip dan predikasyon konman en fason pour demontre zot lwayote ouswa fidelite anver Bondye, e ki en lobligasyon fondamantal dan zot lafwa. Anfet, bann premye disip Zezi ti kontinyen prese menm si zot ti rankontre lopozisyon. Zot ti depan lo Zeova pour ganny lafors e priye ki i permet zot kontinyen “anons [son] mesaz avek lasirans san okenn lafreyer.” E Zeova ti reponn zot par donn zot son lespri sen, e sa ti fer zot koz lo Parol Bondye avek lardyes.—Akt 4:18, 29, 31.

⁹ Kan lopozisyon ti konmans vin vyolan,  eski bann disip Zezi ti aret prese? Pa ditou. Bann sef relizye Zwif pa ti dakor avek sa travay predikasyon ki bann zapot ti pe fer, alor zot ti aret sa bann zapot, menas zot e fwet zot. Kantmenm sa, bann zapot “ti kontinyen prese . . . e anons Zezi konman Mesi.” Zot ti konnen ki zot devret “obei Bondye plito ki zonm.”—Akt 5:28, 29, 40-42.

10. Ki problenm bann Kretyen i fer fas avek ozordi, me ki rezilta zot bon kondwit i kapab anmennen?

¹⁰ Laplipar serviter Bondye ozordi pa’n ganny bate, ouswa met dan prizon akoz zot pe prese. Parkont tou vre Kretyen i fer fas avek diferan tes ek leprev. Ou konsyans ki’n byen ganny antrennen par Labib i fer ou ­aksepte en fason viv ki pa popiler oubyen en fason viv ki fer ou diferan avek lezot. Ou ­koleg travay, kanmarad lekol, ouswa ­vwazen i kapab panse ki ou drol akoz ou baz ou ­desizyon lo bann prensip Labib. Toutfwa, zot repons negatif pa devret dekouraz ou. Lemonn i dan fernwanr spirityel, me bann Kretyen i devret “briye konman lalimyer.” (Fili. 2:15) Petet bann dimoun senser ki pe obzerv ou pou vwar e apresye ou bon ­travay e an rezilta zot onor Zeova.—Lir Matye 5:16.

11. (a) Ki mannyer serten i kapab reakte anver sa travay predikasyon? (b) Ki kalite lopozisyon zapot Pol ti rankontre e ki mannyer i ti reazir anver sa?

¹¹ Ou bezwen annan kouraz pour ou kontinyen pres sa mesaz lo Rwayonm. Serten dimoun, menm ou fanmir i kapab sikann ou oubyen dan en fason ou en lot esey dekouraz ou. (Mat. 10:36) Zapot Pol ti ganny bate plis ki en fwa akoz i ti akonplir son minister avek fidelite. Remarke, ki mannyer i ti reazir anver lopozisyon. I ti dir: “Malgre ki nou ti soufer e ganny maltrete, . . . nou ti annan kouraz dan nou Bondye pour anons zot Levanzil Bondye devan gran lopozisyon.” (1 Tesa. 2:2) Pol ti bezwen pran kouraz pour li kontinyen koz lo sa bon nouvel apre ki i ti’n ganny tyonbo, depouye, bate avek baton e met dan prizon. (Akt 16:19-24) Kwa ki ti donn li sa lardyes pour kontinyen? Son gran dezir ki i ti annan pour fer sa travay ki Bondye ti’n donn li ti pli for ki li.—1 Kor. 9:16.

12, 13. Ki problenm serten i rankontre e ki mannyer zot esey sirmont zot?

¹² Pour nou mentenir nou devouman i kapab en defi dan bann teritwar kot dimoun pa touzour kot zot lakour ouswa kot napa bokou ki enterese avek sa mesaz. Ki nou kapab fer dan bann tel sirkonstans? Nou kapab vwar li neseser pour fer zefor pour devlop plis lardyes ankor pour kapab fer temwannyaz enformel. Nou kapab osi aziste nou progranm ouswa fer plis zefor pour pres dan bann landrwa kot nou kapab zwenn plis dimoun.—Konpar Zan 4:7-15; Akt 16:13; 17:17.

¹³ Lezot difikilte ki bokou i bezwen aksepte se lavyeyes ek move lasante ki kapab redwir lakantite ki en dimoun i kapab fer dan  predikasyon. Si sa i leka pour ou, pa bezwen dekouraze. Zeova i konn ou limit e i apresye sa ki ou kapab fer. (Lir 2 Korentyen 8:12.) Nenport difikilte ki ou kapab pe rankontre, ki swa lopozisyon, bann ki pa enterese, oubyen maladi, fer tou sa ki ou sirkonstans i permet ou fer pour partaz sa bon nouvel avek lezot.—Prov. 3:27; konpar Mark 12:41-44.

‘Fer byen ou travay’

14. Ki legzanp zapot Pol ti kite pour son frer ek ser Kretyen, e ki konsey i ti donnen?

¹⁴ Zapot Pol ti pran son minister vreman oserye, e i ti ankouraz lezot krwayan pour fer parey. (Akt 20:20, 21; 1 Kor. 11:1) Arsip ti en Kretyen dan premye syek ki Pol ti swazir pour donn lankourazman spesyal. Dan son let pour bann Kolosyen, Pol ti ekrir: “Dir Arsip, fer sir ki i fer byen sa travay ki i’n ganny konfye dan servis Senyer.” (Kol. 4:17) Nou pa konnen lekel Arsip ouswa dan ki sirkonstans i ti ladan, me i evidan ki i ti’n aksepte sa travay pour prese. Si ou en Kretyen ki’n dedye ou lavi avek Zeova, ou osi ou’n aksepte sa travay pour prese. Eski ou pe kontinyen vey ou minister pour ki ou kapab akonplir li?

15. Ki dedikasyon en Kretyen i enkli, e ki kestyon sa i fer nou demande?

¹⁵ Avan nou ti batize nou ti dedye nou lavi avek Zeova dan en lapriyer senser. Sa ti vedir ki nou ti determinen pour fer son lavolonte. Alors la konmela i bon demann nou lekor, ‘Eski fer lavolonte Bondye i vreman sa keksoz pli enportan dan mon lavi?’ I posib ki nou annan plizyer responsabilite ki Zeova i ekspekte nou desarze. Par egzanp pran swen avek nou fanmir. (1 Tim. 5:8) Me ki mannyer nou depans larestan nou letan ek lenerzi? Kwa ki nou priyorite dan lavi?—Lir 2 Korentyen 5:14, 15.

16, 17. Ki posibilite en zenn Kretyen ouswa enn ki annan mwens responsabilite i kapab konsidere?

¹⁶ Eski ou en zenn Kretyen batize ki’n termin ouswa pros pour fini segonder? I tre probab ki ou napa bann gro responsabilite familyal. Alors, ki ou anvizaze fer avek ou lavi? Ki desizyon ou pou pran ki pou ed ou pli byen akonplir ou promes ki ou’n fer avek Zeova pour fer son lavolonte? Bokou in organiz zot progranm pour fer pionye e konman rezilta zot in eksperyans bokou lazwa ek satisfaksyon.—Ps. 110:3; Ekle. 12:1.

¹⁷ Petet ou en zenn adilt, ou anploye aplentan me ou napa bokou responsabilite eksepte pour pran swen avek ou lekor. San dout ou kontan partisip dan bann aktivite kongregasyon otan ki ou progranm i permet ou. Me eski ou krwar ou pou kapab annan plis lazwa ankor? Eski ou’n deza mazin partisip plis dan predikasyon? (Ps. 34:8; Prov. 10:22) Dan serten teritwar i annan bokou travay ki bezwen ganny fer pour arive zwenn tou dimoun avek sa mesaz laverite ki donn lavi. Eski ou kapab fer bann azisteman dan ou lavi, petet pour ede dan bann landrwa kot i annan plis demann pour proklanmater?—Lir 1 Timote 6:6-8.

18. Ki azisteman en zenn koup ti fer, e avek ki rezilta?

¹⁸ Annou egzamin legzanp Kevin ek Elena, sorti Leta-z-ini. * Parey i leka avek bann koup ki fek marye dan zot rezyon, zot ti santi ki zot ti devret aste en lakaz. Zot tou le de ti anploye e annan en lavi konfortab. Parkont, zot progranm travay ek louvraz lakour pa ti  les bokou letan pour zot al predikasyon. Zot ti realize ki zot ti pe depans preski tou zot letan ek lenerzi avek zot bann posesyon materyel. Parkont, kan zot ti obzerv lavi senp e ere ki en koup pionye ti pe rezwir, Kevin ek Elena ti deside pour sanz zot priyorite dan zot lavi. Apre ki zot ti’n rod led avek Zeova dan lapriyer, zot ti vann zot lakaz e al reste dan en apartman. Elena ti redwir lakantite letan i ti travay e vin en pionye. Byen ankouraze par bann leksperyans ki son madanm ti pe gannyen dan minister, Kevin ti kit son louvraz e konmans fer pionye. En pe letan plitar, zot ti al dan en pei dan Sid Lanmerik pour servi dan en landrwa kot i annan plis bezwen pour bann proklanmater. Kevin ti dir: “Nou’n touzour annan en lavi maryaz ere, me nou’n ganny plis lazwa kan nou’n fer zefor pour agrandi nou servis pour Bondye.”—Lir Matye 6:19-22.

19, 20. Akoz pres sa bon nouvel i sa travay pli enportan denozour?

¹⁹ Pres sa bon nouvel i sa travay pli enportan ki pe ganny fer lo later ozordi. (Rev. 14:6, 7) I kontribye pour non Zeova ganny sangtifye. (Mat. 6:9) Sa mesaz dan Labib in amelyor lavi plizyer milyon dimoun ki’n aksepte li sak lannen, e sa i kapab anmenn zot ver delivrans. Me zapot Pol ti demande: “Ki mannyer zot pou tann koz lo li si personn pa anons li?” (Rom. 10:14, 15) Ki ­mannyer alors? Akoz ou pa determinen pour fer tou ou posib pour akonplir ou minister?

²⁰ En lot fason ou kapab ed dimoun konpran lenportans sa letan difisil ek konsekans zot desizyon se kan ou amelyor ou abilite pour ansennyen. Lafason ki ou kapab fer sa pou ganny diskite dan lot lartik.

[Not anba lo paz 11]

Ki ou pou reponn?

• Ki responsabilite bann Kretyen i annan anver limanite?

• Ki mannyer nou devret fer fas avek bann lobstak dan predikasyon?

• Ki mannyer nou kapab akonplir nou minister ki nou’n aksepte?

[Kestyon]

[Portre lo paz 9]

Nou bezwen kouraz pour pres sa bon nouvel kan nou rankontre lopozisyon

[Portre lo paz 10]

Ki ou kapab fer si ou pres dan teritwar kot dimoun i rarman kot zot?