Konpasyon dan en lemonn kriyel

EN ZONM Burundi i tonm gravman malad avek malarya. I bezwen ganny anmennen lopital deswit. Me ki mannyer i pou ariv lopital? Napa en loto ki disponib pour anmenn li. Son de zanmi i vin ed li. Zot met li lo en bisiklet e pandan senk erdtan byen fatigan zot pous li dan en rezyon kot i annan bokou montanny. Zot met li dan en bis ki anmenn li kot en lopital pli pros. De trwa zour plitar, i santi li bokou pli mye.

Lo lot kote later, en group volonter i trouv en lakaz ki’n ganny kraze anba bann pye dibwa apre ki Siklonn Katrina, ti’n devaste bann rezyon dan Golf Meksiko an Out 2005. Sa bann volonter ki pa ti konn ditou met sa lakaz ti pas en zournen antye pour tir bann pye dibwa ek debri an servan masin koup dibwa. Met lakaz i dir: “Mon pa pou kapab fini remersye sa bann [dimoun].”

Bann rapor medya i tant pour met lanfaz lo bann akt atrosite ek kriyote. Bann akt konpasyon ek labonte ki ganny fer toulezour i souvan ganny maske par sa bann resi. Parkont, sa pa sanz lefet ki dimoun partou dan lemonn i vreman santi sa bezwen pour lezot demontre lanmour, lafeksyon, ek senpati anver zot. Nou vreman anvi ki dimoun i demontre konpasyon anver nou! Bann tel santiman i kapab pli komen pandan letan Nwel ler bokou i koz oubyen sant lo ‘lape ek bonn volonte anver tou dimoun.’—Lik 2:14, King James Version.

Dan en lemonn ki paret pli ganny dominen  par laenn ek ostilite i kapab pa fasil pour demontre konpasyon. Pour bokou dimoun en latitid dir e ensansib i sa mwayen ki fer zot reisi e ganny laglwar dan lavi. I paret ki bokou i viv dapre sa prensip ki dir ki i pli pridan pour en dimoun azir dan en fason kriyel ki demontre konpasyon. Vorasite ek legoism i fasilman anpes en dimoun annan konpasyon.

Sa i fer ki bokou i mazin zot lekor avan tou menm si zot bezwen inyor santiman oubyen lentere lezot dimoun. Souvandfwa bann msye ki en vedet dan sport ek divertisman i ganny konsidere konman bann “vre zonm” akoz zot pa demontre lafeksyon ek ladouser. Serten sef politik i azir dan sa menm mannyer.

Alor, i byen pour nou demande: Akoz nou devret demontre konpasyon? Eski konpasyon i enfliyans nou pour fer sa ki bon? E kwa ki kapab ed nou pour demontre konpasyon? Lartik swivan pou diskit sa bann kestyon.

[Box on page 3]

•Eski demontre konpasyon i en febles?

•Eski demontre konpasyon i anmenn okenn byenfe?

•Dan ki fason pratik ou kapab demontre konpasyon?