Imit sa pli gran misyonner
Imit sa pli gran misyonner
“Imit mwan parey mwan mon imit Kris.”—1 KOR. 11:1.
1. Akoz nou devret imit Zezi Kri?
ZAPOT Pol ti imit sa pli gran Misyonner, Zezi Kri. I ti ankouraz bann Kretyen: “Imit mwan parey mwan mon imit Kris.” (1 Kor. 11:1) Avek limilite Zezi ti donn en legzanp son bann zapot lo konman pour demontre limilite par lav zot lipye. Apre i ti dir zot: “Mon’n donn zot en legzanp pour ki zot osi, zot a fer parey mon’n fer pour zot.” (Zan 13:12-15) Konman bann Kretyen ozordi, nou annan sa lobligasyon pour imit Zezi Kri dan nou parol ek aksyon e dan bann kalite ki nou demontre dan nou lavi.—1 Pyer 2:21.
2. Menm si ou pa’n ganny apwente par Konsey Direkter konman en misyonner, ki latitid ou kapab annan?
2 Dan lartik presedan nou ti aprann ki misyonner i en dimoun ki’n ganny anvoye konman en evanzelizater, setadir enn ki anmenn bon nouvel pour lezot. An rapor avek sa, Pol ti demann bann kestyon enteresan. (Lir Romen 10:11-15.) Remarke ki sa zapot ti demande: “Ki mannyer zot pou tann koz lo li si personn pa anons li?” Apre sa i ti sit en parol sorti dan profesi Izai: “Pa i zoli pour vwar lipye sa enn ki pe anmenn bon nouvel . . . konsernan en keksoz meyer!” (Iza. 52:7) Menm si ou pa’n deza ganny apwente ouswa anvoye konman misyonner dan en pei etranze, ou kapab annan sa leta lespri evanzelizater par imit Zezi konman en proklanmater devoue pour pres sa bon nouvel. Lannen pase 6,957,852 proklanmater Rwayonm ‘ti fer sa travay predikater levanzil’ dan 236 pei.—2 Tim. 4:5.
Nou’n “kit tou keksoz pour swiv ou”
3, 4. Ki Zezi ti kit deryer dan lesyel e ki nou devret fer pour vin son disip?
3 Pour akonplir son travay ki i ti’n ganny anvoye pour fer, Zezi “ti renons tou sa ki i posede pour pran kondisyon lesklav” e les deryer son lavi dan lesyel ek son pozisyon. (Fili. 2:7) Nenport kwa nou fer pour imit Zezi pa kapab ganny konpare avek sa ki Zezi ti fer kan i ti vin lo later. Me nou kapab reste fidel konman son disip san regret sa ki nou’n kit deryer dan sa lemonn Satan.—1 Zan 5:19.
4 En fwa zapot Pyer ti dir Zezi, nou’n “kit tou keksoz pour swiv ou.” (Mat. 19:27) Pyer, Andre, Zak ek Zan ti deswit abandonn zot lasenn kan Zezi ti envit zot pour swiv li. Zot ti kit deryer zot biznes lapes e fer predikasyon konman zot travay prensipal. Dapre Levanzil Lik, Pyer ti dir: “Nou, nou’n kit [“nou prop keksoz,” NW] pour swiv ou.” (Lik 18:28) Laplipar nou pa’n bezwen kit “tou keksoz” deryer pour swiv Zezi. Parkont nou ti bezwen ‘aret mazin zis nou menm’ pour vin en disip Zezi e avek tou nou leker vin en serviter Zeova. (Mat. 16:24) Ler nou fer sa nou ganny bokou benediksyon. (Lir Matye 19:29.) Parey Zezi, kan nou annan sa leta lespri evanzelizater sa pou anmenn lazwa dan nou leker, espesyalman si nou annan en pti rol pour zwe pour ed en dimoun pour apros avek Bondye ek son Garson byenneme.
5. Rakont en leksperyans ki montre ki en imigran i kapab fer apre ki i’n konn laverite dan Labib.
5 Valmir i en msye Brezilyen ki viv dan sant Suriname e i ti en miner ki ti rod lor. I ti en alkolik ki ti anmenn en lavi dezord. En fwa kan i ti dan en lavil, bann Temwen Zeova ti konmans etidye Labib avek li. I ti etidye tou le zour, fer bann sanzman e plitar batize. Kan i ti vwar ki son travay ti pe anpes li viv an armoni avek lansennyman Labib, i ti vann son biznes ki ti pe byen fer profi e retourn Brezil pour ed son fanmir trouv sa trezor spirityel. Kan zot aprann laverite dan Labib, bokou imigran i volonterman kit zot louvraz dan bann pei ris e retourn dan zot pei natal avek sa lobzektif pour ed zot fanmir ek lezot pour apros avek Bondye. Sa bann proklanmater Rwayonm zot vreman demontre sa leta lespri evanzelizater.
6. Ki nou kapab fer si nou pa kapab al dan bann pei kot demann pour proklanmater i bokou?
6 En kantite Temwen in al dan bann landrwa kot i annan bokou demann pour proklanmater Rwayonm. Serten in menm al aletranze pour prese. Personnelman nou kapab pa dan sa pozisyon pour fer sa kalite deplasman, me nou kapab imit Zezi par fer nou mye dan minister.
Zeova i donn formasyon neseser
7. Ki lekol ki disponib pour donn formasyon bann ki anvi devlop zot abilite konman en proklanmater Rwayonm?
7 Zis parey Zezi ti resevwar formasyon sorti kot son Papa, nou kapab tir profi avek sa ledikasyon ki Zeova in met an plas pour nou. Zezi li menm ti dir: “Bann profet in ekri, ‘Zot tou zot pou ganny ansennyen par Bondye limenm.’” (Zan 6:45; Iza. 54:13) Ozordi, i annan bann lekol ki’n ganny dedye espesyalman pour prepar nou konman bann proklanmater Rwayonm. San dout nou tou nou’n benefisye dan en fason ou en lot avek Lekol Minister Teokratik dan nou kongregasyon lokalman. Bann pionye i annan sa privilez pour asiste Lekol Pionye. Bokou bann pionye eksperyanse ti vreman kontan pour asiste sa lekol en dezyenm fwa. Bann ansyen ek asistan ministeryel in asiste Lekol Minister Rwayonm pour amelyor zot abilite pour ansennyen ek servis ki zot donn zot bann konpanyon Kretyen. Bokou ansyen ek asistan ministeryel selibater in asiste sa Lekol Formasyon Ministeryel ki form zot pour ed lezot dan travay predikasyon. E bokou frer ek ser ki’n ganny apwente konman misyonner aletranze in ganny formasyon dan Lekol Gilead.
8. Ki serten frer in pare pour sakrifye pour zot ganny sa formasyon ki Zeova i donnen?
8 Bokou Temwen Zeova in fer bann sanzman pour zot kapab asiste sa bann lekol. Pour kapab asiste Lekol Formasyon Ministeryel Kanada, Yugu ti kit son travay profann akoz son anplwayer pa ti oule donn li konze. Yugu ti dir: “Mon pa regrete. Anfet, si zot ti’n donn mwan konze konman en faver zot ti pou ekspekte ki mon fidel avek zot par travay avek lakonpannyen lo en baz permanan. Me la mon disponib pour fer nenport ki latas mon kapab gannyen avek Zeova.” Pour benefisye avek sa formasyon ki nou’n gannyen avek Bondye, bokou in volonterman sakrifye bann keksoz ki pour zot ti annan bokou valer oparavan.—Lik 5:28.
9. Donn en legzanp pour montre akoz lansennyman lo Labib ek gran zefor i efikas.
9 Lansennyman lo Labib ek gran zefor i vreman efikas. (2 Tim. 3:16, 17) Annou egzamin legzanp Saulo an Gwatemala. I ti ne avek en pti problenm mantal e enn son ansennyan ti dir son manman ki i pa ti devret fors son garson pour aprann lir, parski sa pou zis fer li fristre. Saulo ti kit lekol san konn lir. Parkont en Temwen ti ansenny Saulo pour lir par servi sa brosir Apply Yourself to Reading and Writing. Finalman Saulo ti progrese ziska ki i ti menm fer size dan Lekol Minister Teokratik. Plitar manman Saulo ti zwenn son ansennyan dan predikasyon portanport. Apre ki i ti’n aprann ki Saulo ti’n aprann lir, son ansennyan ti demann son manman pour anmenn Saulo ansanm avek li son semenn apre. Kan Saulo ti al kot sa ansennyan son semenn apre, i ti demann Saulo, “Ki ou pou ansenny mwan?” Saulo ti konmans lir en paragraf dan sa liv Ki Labib i vreman dir? Sa ansennyan ti dir: “Mon pa kapab krwar ki la prezan ou ki pe ansenny mwan.” Sa ansennyan ti konmans plere e may Saulo.
Lansennyman ki tous leker
10. Ki zouti efikas nou annan pour ansenny laverite dan Labib?
10 Zezi ti baz son lansennyman lo sa ki Zeova ti ansenny li direkteman e lo bann lenstriksyon ki’n ganny ekrir dan Parol Bondye. (Lik 4:16-21; Zan 8:28) Nou imit Zezi par aplik son konsey e toultan ansenny sa ki dan Labib. Nou tou nou partaz menm krwayans e sa i promot linite parmi nou. (1 Kor. 1:10) Pa nou vreman rekonesan ki “lesklav fidel e pridan” i fourni nou avek bann piblikasyon baze lo Labib ki ed nou tou pour ansenny menm keksoz e akonplir nou travay konman evanzelizater! (Mat. 24:45, NW; 28:19, 20) Enn parmi sa bann piblikasyon se sa liv Ki Labib i dir ki disponib dan 179 langaz.
11. Ki mannyer en ser Etyopi ti sirmont lopozisyon par servi sa liv Ki Labib i dir?
11 Leker bann ki opoz nou i kapab sanze kan zot etidye Labib par mwayen sa liv Ki Labib i dir. En fwa, Lula en ser pionye Etyopi ti pe kondwir en letid Labib kan enn fanmir sa etidyan ti antre dan en fason brit e dir zot ki zot pa ti devret fer sa letid. Byen kalm Lula ti rezonn avek li par servi bann legzanp konsernan fo biye dan sapit 15 sa liv Ki Labib i dir. Sa madanm ti konmans pez tansyon e sa ti donn zot sans pour kontiny zot letid. Anfet, i ti la pour letid son semenn answit, i ti demann Lula pour li ganny son prop letid Labib, e i ti menm ofer pour li peye tou! Pa bokou letan apre i ti konmans etidye trwa fwa par semenn e fer bon progre.
12. Donn en legzanp pour montre konman bann zenn i kapab ansenny laverite dan Labib avek lefikasite.
12 Bann zenn osi i kapab ed lezot par servi sa liv Ki Labib i dir. Kan Keanu ki ti annan 11 an e ki reste Awai ti pe lir sa liv kot lekol, en manrmay dan menm laklas avek li ti demann li, “Akoz ou pa fete ou?” Keanu ti lir larepons direkteman dan lezot lenformasyon lo topik “Eski nou devret partisip dan sa bann lafet?” Apre sa i ti tourn son liv lo konteni e demann sa pti garson ki size ki pli enteres li. En letid Labib ti konmanse. Pour lannen servis lannen pase Temwen Zeova ti kondwir 6,561,426 letid Labib e bokou parmi ti dan sa liv Ki Labib i dir. Eski ou pe servi sa zouti dan ou bann letid Labib?
13. Dan ki fason en letid Labib i kapab annan en gran lefe lo dimoun?
13 Etidye Labib par servi sa liv Ki Labib i dir i kapab annan en gran lefe lo bann ki anvi fer lavolonte Bondye. En koup pionye spesyal Lanorvez ti konmans en letid Labib avek en fanmir sorti Zanbi. Sa koup Zanbyen ti annan trwa fiy e zot pa ti oule ankor zanfan. Alors kan sa madanm ti tonm ansent zot ti deside pour fer avortman. Detrwa zour plitar avan konsilte dokter zot ti etidye sa sapit ki annan pour tit, “Vwar lavi parey Bondye i vwar li.” Dan sa sapit i annan portre en pti baba ki pa ankor ne e sa ti vreman tous sa koup ki zot ti deside pour pa fer sa avortman. Zot ti kontinyen fer bann bon progre e zot ti apel zot pti garson menm non avek sa frer ki ti pe kondwir zot letid.
14. Donn en legzanp konman ler nou viv an armoni avek sa ki nou ansennyen i kapab prodwir bann bon rezilta.
14 En laspe vreman enportan dan lafason Zezi ti ansennyen se ki i ti viv an armoni avek sa ki i ti ansennyen. Bokou dimoun i enpresyonnen par bon kondwit bann Temwen Zeova ki pe imit Zezi dan sa laspe ki nou’n fek mansyonnen. An Nouvel Zelann voler ti’n kas loto en biznesmenn e zot ti vol son sak ki ti annan tou son bann dokiman ladan. I ti raport son ka avek en lapolis, ki ti dir li: “Sel sans ki ou annan pour ganny sa ki ou’n perdi se si en Temwen Zeova ti vwar li.” En Temwen ti vwar sa sak. Kan son met ti aprann ki sa ser ti’n vwar son sak i ti al kot lakour sa ser. I ti soulaze ler i ti vwar ki en dokiman tre enportan ti ankor la. Sa ser ti dir li, “I ti sa bon keksoz pour mwan fer, sirtou ki mon en Temwen Zeova.” Sa biznesmenn ti reste ebete akoz i ti mazin sa ki sa lapolis ti’n dir li pli boner sa menm zour. Sa i klerman montre ki vre Kretyen i viv dapre bann lansennyman dan Labib e zot osi imit Zezi.—Ebr. 13:18.
Imit lafason ki Zezi ti tret lezot
15, 16. Ki mannyer nou kapab atir dimoun anver sa mesaz ki nou prese?
15 Latitid Zezi anver bann dimoun ti fer zot kontan son mesaz. Par egzanp, son lanmour ek limilite ti fer bann pov vin ver li. I ti demontre konpasyon pour bann ki ti vin kot li e rekonfort zot avek bon parol e i ti geri bokou dimoun. (Lir Mark 2:1-5.) Nou pa kapab fer mirak, me nou kapab demontre lanmour, limilite ek konpasyon ki bann kalite ki ede pour atir lezot ver laverite.
16 Konpasyon ti zwe en gran rol kan en pionye spesyal ki apel Tariua ti pres avek en zonm aze se li ki ti apel Beere, e ki ti reste lo enn bann zil pli elwannyen dan Kiribati, Sid Pasifik. Menm si sa zonm ti montre ki i pa ti enterese, Tariua ti remarke ki i ti en pe paralize e i ti pran pitye pour li. I ti demann li: “Eski ou’n deza tann promes ki Bondye in fer konsernan bann dimoun ki malad e ki vye?” Apre sa i ti lir en verse dan profesi Izai. (Lir Izai 35:5, 6.) Avek lentere sa zonm ti dir: “Mon’n lir Labib pour bokou lannen e en misyonner dan mon larelizyon ti vin vizit mwan, mon pa’n zanmen vwar sa dan mon Labib.” Beere ti konmans etidye e i ti fer bann bon progre. Wi, i ti annan en dezabilite grav, me i’n batize, e i pe pran swen avek en pti group izole e i kapab mars otour zil antye pour pres sa bon nouvel.
Kontinyen imit Kris
17, 18. (a) Ki mannyer ou kapab vin en bon evanzelizater? (b) Kwa ki pe esper bann ki pran zot minister oserye?
17 Parey bann leksperyans dan minister ki anmenn lazwa i montre, nou kapab trouv sikse konman bann evanzelizater ki pres sa bon nouvel si nou devlop e demontre bann kalite ki Zezi ti annan. Alors, pa i byen pour nou imit Zezi sa evanzelizater devoue!
18 Dan premye syek kan serten ti vin disip Zezi, Pyer ti demande: “Ki nou pou gannyen?” Zezi ti reponn: “Tou bann ki’n kit zot lakaz, zot frer, zot ser, zot papa, zot manman, zot zanfan, zot propriyete akoz mwan pou ganny san fwa plis e pou erit lavi eternel.” (Mat. 19:27-29) Nou pou sirman eksperyans sa si nou kontinyen imit sa pli gran Misyonner, Zezi Kri.
Ki ou pou reponn?
• Ki mannyer Zeova pe form nou pour vin bann evanzelizater?
• Akoz sa liv Ki Labib i dir i vreman efikas dan nou minister?
• Ki mannyer nou kapab imit Zezi dan nou latitid anver lezot dimoun?
[Kestyon]
[Portre lo paz 21]
Kan Zezi ti envit Pyer, Andre, Zak ek Zan pour swiv li zot ti azir san tarde
[Portre lo paz 22]
Bann piblikasyon tel parey sa liv “Ki Labib i dir” i ed nou tou pour ansenny menm keksoz