Ki si sa Rwayonm Bondye?

KWA ki Zezi ti koz lo la prensipalman ler i ti pe prese? Dapre Zezi li menm, se Rwayonm Bondye. (Lik 4:43) Kan bann dimoun ti ekout li koze, sirman zot ti’n bezwen tann li pe refer avek sa Rwayonm. Eski zot ti konfize? Eski zot ti demann li ki si sa sa Rwayonm? Non. Levanzil pa rikord bann kestyon parey. Alors, eski Rwayonm Bondye ti en krwayans ki ti popiler parmi sa bann dimoun?

An realite, bann Lekritir dan letan lontan ki bann Zwif ti vwar konman sen ti dekrir sa Rwayonm. I ti revel li dan en fason kler e servi bann term spesifik lo ki si sa sa Rwayonm e ki i pou akonplir. Ozordi nou kapab aprann plis lo sa Rwayonm plizoumwen dan menm fason e sa se atraver Labib. Annou konsider set fe ki Labib i ansenny nou lo sa Rwayonm. Sa trwa premye ti disponib pour bann Zwif avan e dan letan Zezi. Lezot trwa ti ganny revele par Kris oubyen son bann disip dan premye syek. E sa enn dernyen in vin aparan dan nou letan.

1. Rwayonm Bondye i en gouvernman ki reel e i pou reste pour touzour. Premye profesi Labib ti revele ki Bondye ti pou anvoy en sover pour bann dimoun fidel. I ti pou ganny apele en “desandans,” sa Enn ki ti pou retir tou sa bann problenm ki ti konmanse par rebelyon Adan, Ev ek Satan. (Zenez 3:15) Plitar, Lerwa David ki ti fidel ti ganny enformen lo en keksoz enteresan konsernan sa “desandans” ouswa Mesi. I ti pou vin Lerwa dan en Rwayonm. Sa gouvernman ti pou diferan avek lezot. E i ti pou reste pour touzour.—2 Samyel 7:12-14.

2. Rwayonm Bondye pou met en lafen avek tou gouvernman lo later. Profet Danyel ti ganny en vizyon kot i ti vwar bann pouvwar mondyal ki ti pou dirize enn apre lot e dire pandan listwar ziska nou letan. Remark lakonplisman eksitan sa vizyon: “Dan bann zour sa bann [dernyen] lerwa [imen], Bondye lesyel pou etabli en rwayonm ki pa pou zanmen ganny detrir. Sa rwayonm li menm pa pou pas avek okenn lezot pep. I pou kraz e met en lafen avek tou sa bann rwayonm, e li menm i pou dire pour en letan endefini.” Alors tou bann rwayonm oubyen gouvernman sa lemonn, enkli zot lager, lopresyon ek koripsyon pou ganny detrir pour touzour. Parey profesi Danyel i montre, Rwayonm Bondye pou byento domin lo later antye. (Danyel 2:44, 45) Sa Rwayonm pa pou zis en realite me i pou osi sa sel gouvernman ki pou egziste lo later. *

3. Rwayonm Bondye pou met en lafen avek lager, maladi, lafamin e menm lanmor. Bann profesi eksitan dan Labib i revel sa ki Rwayonm Bondye pou fer isi lo later. Sa gouvernman pou akonplir sa ki bann gouvernman imen pa’n kapab e pa pou zanmen kapab fer. Zis mazinen, tou zouti lager pou ganny detrir pour touzour! “I pe fer arete lager ziska dan bann landrwa pli lwen lo later.” (Psonm 46:9) Pou nepli annan dokter, lopital ek tou sort maladi. “Okenn zabitan pa pou dir: ‘Mon malad.’” (Izai 33:24) Pou nepli annan lafamin, mankman manze, malnitrisyon oubyen dimoun ki pou mor lafen. “Legren pou an abondans lo later.” (Psonm 72:16) Pou nepli annan lanterman, simityer, lakaz mor, oubyen sa soufrans apre ki nou’n perdi en dimoun dan lanmor. Nou pli gran lennmi lanmor pou finalman ganny detrir. Bondye “pou anval lanmor pour touzour, e Souvren Senyer Zeova pou sirman eswiy larm lo tou figir.”—Izai 25:8.

 4. Rwayonm Bondye i annan en Dirizan ki’n ganny swazir par Bondye. Mesi pa ti apwent son lekor, ni menm ganny swazir par bann imen enparfe. Zeova ki’n swazir li. Sa tit Mesi ouswa Kris i dir pour zot menm ki i’n ganny swazir par Bondye. Tou le de mo i vedir “Sa enn ki’n ganny swazir.” Alors sa Lerwa in ganny swazir oubyen dezinyen pour son travay spesyal par Zeova. Bondye i dir sa konsernan li: “Gete! Mon serviter ki mon pe siporte! Sa enn ki mon’n swazir, [e ki] mon’n aprouve! Mon’n met mon lespri dan li. I pou anmenn lazistis lo tou nasyon.” (Izai 42:1; Matye 12:17, 18) Eski i annan enn ki pli konnen ki nou Kreater ki kalite Dirizan nou bezwen?

5. Dirizan Rwayonm Bondye i’n demontre son valer dan lizye tou imen. Zezi sorti Nazaret ti prouve ki i ti sa Mesi ki ti’n ganny promet. I ti ne atraver sa desandans ki Bondye ti’n swazir. (Zenez 22:18; 1 Kronik 17:11; Matye 1:1) Kan i ti lo later, i ti akonplir bokou bann profesi konsernan Mesi ki ti’n ganny ekrir plizyer syek davans. En lavwa dan lesyel ti osi idantifye li konman Mesi. Ki mannyer sa ti arive? Bon, lavwa Bondye ti rezonnen sorti dan lesyel kot i ti idantifye li konman Son prop Garson. Bann lanz ti montre ki Zezi ti sa Mesi ki ti’n ganny promet e souvandfwa Zezi ti fer bann mirak devan plizyer santenn oubyen menm plizyer mil temwen e sa ti posib atraver pouvwar Bondye. * Zezi ti kontinyelman montre ki kalite Dirizan i ti pou ete. I pa ti zis annan pouvwar pour ed bann dimoun me i ti annan sa lanvi osi. (Matye 8:1-3) I pa ti egois, i ti annan konpasyon, kouraz ek limilite. Bann resi lo son lavi lo later i dan Labib pour tou dimoun lir.

6. Rwayonm Bondye i annan 144,000 endividi ki dirize avek Kris. Zezi ti dir ki lezot, enkli son bann zapot ti pou diriz ansanm avek li dan lesyel. I ti apel sa group “pti troupo.” (Lik 12:32) Plitar, zapot Zan ti dir ki ti pou annan en total 144,000 dimoun ki ti pou form par sa pti troupo. Zot pou ganny en travay vreman eksitan dan lesyel kot zot pou dirize konman lerwa e servi konman pret ansanm avek Kris.—Revelasyon 5:9, 10; 14:1, 3.

7. Rwayonm Bondye pe deza dirize dan lesyel e i pare pour konmans son dominasyon lo later antye. Sa dernyen laverite i sa enn pli enteresan ki nou kapab aprann. Labib i donn bokou levidans ki Zezi in ganny lotorite konman Lerwa dan lesyel. I deza pe dirize dan nou letan, e byento i pou agrandi son dominasyon lo later antye e i pou akonplir tou sa bann zoli profesi ki nou’n deza mansyonnen oparavan. Me ki mannyer nou kapab asire ki Rwayonm Bondye pe deza dirize? E kan i pou konmans son dominasyon lo later?

[Not anba lo paz]