Prezans Kris—Ki sa i vedir pour ou?

“Ki siny ki pou endik ou prezans ek konklizyon sa sistenm?”—MAT. 24:3, NW.

1. Ki kestyon enteresan bann zapot Zezi ti demann li?

APEPRE de mil an pase dan en konversasyon prive avek zot Met lo Montanny Zolivye, kat parmi bann zapot Zezi ti demann en kestyon. Zot ti demande: “Kan tousala pou arive e ki siny ki pou endik ou prezans ek konklizyon sa sistenm?” (Mat. 24:3, NW) Dan sa kestyon bann zapot ti servi de lekspresyon vreman enteresan, “ou prezans” ek “konklizyon sa sistenm.” Ki sinifikasyon sa de lekspresyon?

2. Ki sa lekspresyon “konklizyon” i vedir?

² An premye nou pou egzamin sa mo Grek syn·teʹlei·a ki’n ganny tradwir “lafen” oubyen “konklizyon.” Dan New World Translation, sa term in toultan ganny tradwir konman “konklizyon,” tandis ki en lot mo Grek sorti dan menm fanmir, te’los, i ganny tradwir konman “lafen.” Pour eksplik ladiferans ant sinifikasyon sa de term nou kapab servi legzanp en diskour ki ganny donnen kot Lasal Rwayonm. Dernyen parti sa diskour i sa konklizyon, kot sa orater i pran en ptigin letan pour rapel lodyans lo sa ki’n ganny diskite e apre i montre ki mannyer sa lenformasyon i aplik pour zot. Lafen sa diskour i ler sa orater i kit lestrad. Pareyman, dapre Labib sa term, “konklizyon sa sistenm” pe refer avek sa peryod letan ki anmenn ver lafen, e lafen i osi enkli dan sa konklizyon.

3. Ki serten keksoz ki pe deroule pandan prezans Zezi?

³ Be ki sa lekspresyon “prezans” ki bann zapot ti demande i vedir? Sa mo Grek pa·rou·siʹa in ganny tradwir konman “larive” oubyen “prezans.” * Prezans Kris oubyen pa·rou·siʹa, ti konmanse ler Zezi ti ganny etablir konman Lerwa dan lesyel an 1914 e pe kontinyen ziska sa letan kot i pou detrir bann move dimoun pandan “gran  ladetres.” (Mat. 24:21, NW) En kantite diferan keksoz pe deroule pandan prezans Zezi, sa i enkli “bann dernyen zour” sa move sistenm, rasanbleman bann ki’n ganny swazir ek zot rezireksyon dan lesyel. (2 Tim. 3:1; 1 Kor. 15:23; 1 Tesa. 4:15-17; 2 Tesa. 2:1) Nou kapab dir ki sa peryod letan ki form “konklizyon sa sistenm” (syn·te·leiʹa) i koresponn avek en peryod letan ki apel prezans Kris (pa·rou·siʹa).

En bon pti pe letan

4. Ki i annan an komen ant prezans Zezi ek bann levennman ki ti arive dan lepok Noe?

⁴ Sa mo pa·rou·siʹa pe refer avek en gran peryod letan plito ki en ptigin letan, sa i an armoni avek sa ki Zezi ti dir konsernan son prezans. (Lir Matye 24:37-39.) Remarke ki Zezi pa ti konpar son prezans avek sa ptigin letan kan Deliz ti arive dan lepok Noe. O kontrer, i ti konpar son prezans avek en pli gran peryod letan ki ti ariv ziska Deliz. Sa i enkli sa letan kot lars ti ganny konstrir e travay predikasyon ki ti ganny fer ziska Deliz ti arive. Sa bann levennman ti deroule pandan plizyer dizenn lannen. Pareyman, prezans Kris i enkli bann levennman ki pou ariv ziska sa gran ladetres e osi enkli sa gran ladetres.—2 Tesa. 1:6-9.

5. Ki mannyer sa bann parol ki ganny rikorde dan Revelasyon sapit 6 i montre ki prezans Zezi i dir pandan en gran peryod letan?

⁵ Lezot profesi Labib i montre klerman ki prezans Kris pe refer avek en gran peryod letan e pa zis sa letan ler i vini pour detrir bann mesan. Dan liv Revelasyon nou vwar Zezi pe mont en seval blan e kot i ganny donnen en kouronn. (Lir Revelasyon 6:1-8.) Apre ki i ti ganny kouronnen konman Lerwa an 1914, Zezi ti ganny reprezante pe “ale konman en venker e pour ganny laviktwar.” Apre, sa resi i montre lezot kavalye lo bann seval diferan kouler ki ti pe swiv li. Dan en fason profetik zot ti pe reprezant lager, lafamin, lepidemi, tou sa bann keksoz in arive pandan sa gran peryod letan ki ganny apele “bann dernyen zour.” Nou pe vwar lakonplisman sa profesi dan nou letan.

6. Ki Revelasyon sapit 12 i ed nou konpran konsernan prezans Kris?

⁶ Revelasyon sapit 12 i donn nou plis detay lo Rwayonm Bondye ki ti ganny etablir dan lesyel. Dan sa sapit i koz konsernan en lager ki ti arive dan lesyel. Misel setadir Zezi Kri dan son pozisyon dan lesyel ansanm avek son bann lanz ti lager avek Dyab ek son bann demon. Sa ti fer ki Satan ek son bann demon ti ganny zete lo later. Se sa moman la ki sa resi i dir nou ki Dyab i annan en gran lakoler “akoz i konnen ki i reste li ankor zis en pti pe letan.” (Lir Revelasyon 12:7-12.) Alors i kler, ki apre ki Rwayonm Kris ti ganny etablir dan lesyel, ti annan en gran peryod letan kot “maler” ti ogmante pour later ek son bann zabitan.

7. Ki sa dezyenm psonm pe koz lo la e ki loportinite ki ganny dekrir ladan?

⁷ Sa dezyenm psonm i osi koz dan en fason profetik konsernan Zezi ki ganny etablir Lerwa dan lesyel lo Montanny Siyon. (Lir Psonm 2:5-9; 110:1, 2.) Me sa psonm i osi montre ki i annan en peryod letan kot bann dirizan later, enkli bann ki siport zot, pou ganny sa loportinite pour soumet anba dominasyon Kris. Zot ganny ankouraze pour “servi zot bon zizman” e pour les zot ganny “korize.” Wi, “byennere tou bann ki pran refiz dan li [Bondye]” dan sa letan par servi Zeova ek son Lerwa ki i’n swazir. Alors, bann dirizan ek bann ki siport zot pou ganny sa loportinite pour fer bann sanzman neseser  pandan prezans Zezi dan son pozisyon konman en Lerwa.—Ps. 2:10-12.

Rekonnet sa siny

8, 9. Lekel ki ti pou rekonnet siny prezans Kris e konpran son sinifikasyon?

⁸ Kan bann Farizyen ti demann Zezi konsernan lepok ki sa Rwayonm pou ganny etablir, i ti reponn zot ki i pa ti pou ganny etablir avek “bann siny ki ou kapab war.” (Lik 17:20, 21) Bann ki pa krwayan pa ti pou konpran. I enposib! Zot pa ti menm rekonnet Zezi konman sa enn ki ti pou vin Lerwa. Alors lekel ki pou kapab rekonnet siny prezans Kris e an menm tan konpran son sinifikasyon?

⁹ Zezi ti kontinyen par dir ki son bann disip ti pou vwar sa siny sitan kler parey ler zot ti pou vwar “zekler i klate e [ki] ekler lesyel depi en bout ziska lot.” (Lir Lik 17:24-29.) I enteresan pour note ki Matye 24:23-27 i montre ki Zezi ti pe koz konsernan siny son prezans.

Sa zenerasyon ki pe vwar sa siny

10, 11. (a) Ki leksplikasyon ti ganny donnen oparavan konsernan sa “zenerasyon” dan Matye 24:34? (b) Pour bann disip Zezi lekel ki form parti sa “zenerasyon”?

¹⁰ Oparavan, sa magazin ti eksplike ki dan premye syek, ‘sa zenerasyon’ ki ganny mansyonnen dan Matye 24:34 ti vedir “sa zenerasyon Zwif ki pa ti krwayan ki ti pe viv dan menm lepok.” * Sa leksplikasyon ti paret rezonnab akoz tou lezot fason ki Zezi ti servi sa term “zenerasyon” ti transmet en lide negatif e dan laplipar ka Zezi ti servi en lot mo negatif avek sa mo zenerasyon, tel parey “en zenerasyon move.” (Mat. 12:39; 17:17; Mark 8:38) Alors, nou ti konpran ki dan lakonplisman sa profesi dan nou letan, Zezi ti pe refer avek sa move “zenerasyon” bann ki pa ti krwayan ki ti pou vwar an menm tan levidans “konklizyon sa sistenm” (syn·teʹlei·a) e osi lafen sa sistenm (teʹlos).

¹¹ I vre ki ler Zezi ti servi sa mo “zenerasyon” dan en fason negatif, i ti pe koz avek oubyen lo bann move dimoun dan son letan. Me eski sa term zenerasyon dan Matye 24:34 ti pe vreman refer avek bann move dimoun dan son letan? Pa bliye ki kat parmi bann disip Zezi ti apros li an “prive.” (Mat. 24:3) Ler Zezi ti koz avek zot konsernan “sa zenerasyon,” dan sa ka i pa ti servi sa lekspresyon en move zenerasyon, alor bann zapot ti san dout konpran ki se zot menm ek bann lezot disip ki ti pou form parti sa “zenerasyon” ki pa ti pou mor “avan ki tousala i arive.”

12. Kwa ki sa konteks i montre konsernan bann dimoun ki Zezi ti pe refer avek ler i servi sa term “zenerasyon”?

¹² Kwa ki fer nou tonm lo sa konklizyon?  Par egzamin atantivman son konteks. Parey i’n ganny rikorde dan Matye 24:32, 33, Zezi ti dir: ‘Pran legzanp lo pye fig: De ki son brans i vin ver e tann, ki son bann fey i konmans pouse, zot konnen ki lete i pros. De menm, kan zot pou war tou sa bann keksoz arive, zot a konnen ki Fis-de-Lonm i pros, i devan laport.’ (Konpar Mark 13:28-30; Lik 21:30-32.) Apre, dan Matye 24:34, nou lir: ‘An verite mon dir zot, sa zenerasyon pa pou fini avan ki tousala i arive.’

13, 14. Akoz nou kapab dir ki sa “zenerasyon” ki Zezi ti pe refer avek ti bezwen son bann disip?

¹³ Zezi ti dir ki son bann disip, ki ti pou byento ganny swazir par lespri sen, ki ti devret kapab ariv lo sa konklizyon ler zot vwar “tousala” arive. Alors Zezi ti bezwen pe refer avek son bann disip ler i ti dir: “Sa zenerasyon pa pou fini avan ki tousala i arive.”

¹⁴ Kontrerman avek bann ki pa krwar laverite, bann disip Zezi pa ti pou zis vwar sa siny me zot ti pou osi konpran son sinifikasyon. Zot ti pou “aprann” dapre bann laspe sa siny e “konnen” ki zot vreman vedir. Zot ti pou konpran plennman ki “Fis-de-Lonm i pros, i devan laport.” I vre ki tou le de bann Zwif ki pa ti krwar laverite ek bann Kretyen swazir ki ti fidel, ti vwar lo en pti degre lakonplisman parol Zezi dan premye syek, me zis son bann disip dan sa letan ki ti kapab aprann atraver sa bann levennman setadir ki ti kapab konpran vre sinifikasyon sa ki zot ti vwar.

15. (a) Ozordi lekel sa zenerasyon ki Zezi ti pe refer avek? (b) Akoz nou pa kapab kalkil sa letan egzakt ki sa “zenerasyon” pou dire? (Vwar sa bwat lo paz 25.)

¹⁵ Bann dimoun ozordi ki napa en konprenezon spirityel i santi ki napa okenn “siny ki ou kapab war” an rapor avek siny prezans Zezi. Zot dir ki tou keksoz i reste parey dan lepase. (2 Pyer 3:4) De lot kote, bann frer fidel Kris dan nou letan in rekonnet sa siny ki parey laklerte zekler e zot in konpran son vre sinifikasyon. Konman en group, sa bann Kretyen swazir i sa “zenerasyon” dan nou letan ki pa pou mor “avan ki tousala i arive.” * Sa i montre nou ki serten parmi bann frer Kris ti pou ankor vivan lo later ler sa gran ladetres ki’n ganny predir i konmanse.

Kontinyen “Veye”

16. Kwa ki tou disip Kris i bezwen fer?

¹⁶ Me nou bezwen fer plis ki rekonnet sa  siny. Zezi ti kontinyen an dizan: “Sa ki mon dir avek zot, mon dir avek tou dimoun: Veye.” (Mark 13:37; nou ki’n met an italik.) Sa i sa keksoz pli enportan pour nou tou ozordi ki swa nou Kretyen swazir oubyen manm sa gran lafoul. Plis ki katreven di-z-an in pase depi ki Zezi in ganny etablir konman Lerwa dan lesyel an 1914. Menm si i kapab difisil, nou bezwen montre ki nou pare e kontinyen veye. Vi ki nou’n arive konpran ki Kris i prezan pe rennyen dan en fason envizib, sa pou ed nou pour fer sa. Sa i osi fer nou konnen ki byento i pou vini pour detrir son bann lennmi “en ler ki [nou] pa pe espere.”—Lik 12:40.

17. Ki mannyer nou devret santi vi ki nou annan sa konprenezon e ki nou devret determinen pour fer?

¹⁷ Nou konprenezon lo sinifikasyon prezans Kris i ed nou pour vin pli konsyan ki letan i kourt. Nou konnen ki Zezi i deza prezan e pe rennyen konman Lerwa dan en fason envizib dan lesyel depi 1914. Byento i pou vini pour detrir bann mesan e anmenn en kantite sanzman lo later antye. Alors, nou devret pli determinen ki zanmen pour partisip aktivman dan sa travay ki Zezi ti predir kan i ti dir: “Sa Bonn Nouvel Rwayonm pou ganny anonse partou dan lemonn pour tou dimoun konnen; e apre sa, lafen [teʹlos] pou arive.”—nou ki’n met an italik; Mat. 24:14.

[Not anba lo paz]

Ki ou pou reponn?

• Ki mannyer nou konnen ki prezans Zezi i dir en gran peryod letan?

• Lekel ki rekonnet siny prezans Zezi e konpran son sinifikasyon?

• Lekel ki form parti sa zenerasyon dan nou letan ki ganny mansyonnen dan Matye 24:34?

• Akoz nou pa kapab kalkil sa kantite letan egzakt ki “sa zenerasyon” pou dire?

[Kestyon]

[Bwat lo paz 29]

Eski nou kapab kalkile konbyen letan “sa zenerasyon” pou dire?

Sa mo “zenerasyon” i souvan pe refer avek bann dimoun diferan laz ki pe viv en serten lepok oubyen pandan letan ki serten levennman ti arive. Par egzanp, Egzod 1:6 i dir nou: “Finalman Zozef ti mor, e osi tou son frer ek tou sa zenerasyon.” Zozef ek son bann frer ti annan diferan laz, me zot ti fer fas avek menm leksperyans dan menm letan. Serten parmi bann frer Zozef ki ti ne avan li ti form parti “sa zenerasyon.” Serten ti viv pli lontan ki Zozef. (Zen. 50:24) Lezot, parmi “sa zenerasyon” tel parey Benzamen, ti ne apre Zozef e petet ti touzour vivan apre lanmor Zozef.

Alors ler sa term “zenerasyon” i ganny servi an rapor avek dimoun ki pe viv dan en serten lepok, nou pa kapab dir egzakteman ki kantite letan sa zenerasyon pou dire, zis nou konnen ki i pou annan en lafen e i pa pou dir pour tro bokou letan. Alors, ler nou servi sa term “sa zenerasyon” parey i’n ganny rikorde dan Matye 24:34, Zezi pa ti donn son bann disip en teknik pour zot konnen kan “bann dernyen zour” ti pou terminen. O kontrer Zezi ti met lanfaz lo lefet ki zot pa ti pou konn “sa zour e sa ler.”—2 Tim. 3:1; Mat. 24:36.

[Portre lo paz 27]

Apre ki i ti ganny kouronnen konman Lerwa an 1914, Zezi i ganny reprezante konman en “venker”

[Portre lo paz 28]

“Sa zenerasyon pa pou fini avan ki tousala i arive”