Eski ou vwar lezot parey Zeova i vwar zot?
Eski ou vwar lezot parey Zeova i vwar zot?
“Napa divizyon dan lekor . . . bann parti lekor i ganny en swen egal enn a lot.”—1 KOR. 12:25.
1. Ki mannyer ou ti santi premye fwa ki ou ti antre dan sa paradi spirityel?
PREMYE fwa ler nou ti separe avek sa move lemonn e konmans frekant pep Zeova, petet nou ti vreman kontan pour eksperyans sa lanmour ek lentere ki egziste parmi zot. Pa zot vreman diferan avek bann dimoun ki anba kontrol Satan, ki brit, annan laenn e kontan dispit! Nou’n antre dan sa paradi spirityel kot lape ek linite i annabondans.—Iza. 48:17, 18; 60:18; 65:25.
2. (a) Kwa ki kapab afekte fason ki nou vwar lezot? (b) Si sa i leka ki nou bezwen fer?
2 Me anmezir ki letan i pase, akoz nou lenperfeksyon petet nou konmans vwar nou bann frer ek ser dan en move fason. Nou lenperfeksyon i kapab fer nou vwar defo nou bann frer ek ser dan en fason egzazere olye vwar zot bann kalite spirityel. Andotmo, nou oubliye pour vwar zot parey Zeova i vwar zot. Si sa i ariv avek nou, i lemoman pour egzamin lafason ki nou vwar lezot e aziste li avek lafason ki Zeova i vwar zot.—Egz. 33:13.
Ki mannyer Zeova i vwar nou bann frer ek ser
3. Labib i konpar kongregasyon Kretyen avek kwa?
3 Parey i’n ganny rikorde dan 1 Korentyen 12:2-26, zapot Pol ti konpar kongregasyon bann Kretyen swazir konman en lekor avek “plizyer manm.” Zis parey bann manm en lekor i diferan avek kanmarad, bann manm kongregasyon i annan personnalite ek abilite diferan. Pourtan, Zeova i aksepte sa bann diferan manm dan kongregasyon. I kontan e apresye sak manm. Alors Pol ti osi donn nou sa konsey ki bann manm kongregasyon “i ganny en swen egal enn a lot.” Sa i kapab difisil akoz personnalite lezot i kapab diferan avek sa ki pour nou.
4. Akoz i kapab neseser ki nou sanz lafason ki nou vwar nou bann frer ek ser?
4 Nou kapab menm annan sa tandans pour konsantre lo febles nou bann frer ek ser. An realite ler nou fer sa, i konmsi nou pe servi en kamera e pe konsantre lo zis en keksoz. Zeova pa konsantre zis lo en keksoz ler i get nou bann frer ek ser me i pran an konsiderasyon tou lezot fakter, ki kapab enkli sa dimoun li menm ek tou lezot keksoz ki annan pour fer avek li. Nou kapab annan sa tandans pour konsantre lo zis en laspe ki nou pa kontan dan en dimoun, tandis ki Zeova i vwar sa dimoun parey i vreman ete enkli tou bann bon kalite ki i annan. Pli nou fer zefor pour imit Zeova, pli nou kapab kontribye pour promot lanmour ek linite dan kongregasyon.—Efe. 4:1-3; 5:1, 2.
5. Akoz i pa byen pour ziz lezot?
5 Zezi ti byen konsyan ki imen enparfe i souvan annan sa tandans pour kritik lezot. I ti donn sa konsey: ‘Aret zize e ou pa ava ganny zize.’ (Mat. 7:1) Remarke ki Zezi pa ti dir: “Pa zize”; i ti dir: ‘Aret zize.’ I ti konnen ki bokou parmi bann ki ti pe ekout li ti deza annan sa labitid pour kritik lezot. Eski i kapab ki nou’n devlop sa menm labitid? Si nou annan sa tandans, fodre nou fer bokou zefor pour sanze afen ki nou pa ganny zize dan en move fason an retour. An realite, ki nou ete pour ziz en dimoun ki Zeova pe servi pour desarz serten responsabilite oubyen pour dir ki sa dimoun pa devret form parti kongregasyon? En frer i kapab annan serten defo, me si Zeova i kontinyen aksepte li, eski pa i ti pou mal pour rezet li? (Zan 6:44) Eski nou vreman krwar ki Zeova pe diriz son lorganizasyon e ki si i annan bann sanzman ki bezwen ganny fer, i pou fer li dan son letan apropriye?—Lir Romen 14:1-4.
6. Ki mannyer Zeova i vwar son bann serviter?
6 Sa ki remarkab avek Zeova se ki i kapab vwar kwa ki sak Kretyen i kapab vini enn fwa ki zot pou vin parfe dan sa nouvo lemonn. I osi konnen ki progre spirityel zot in deza fer. Alors, pour li i napa okenn rezon pour konsantre lo sak defo ki zot annan. Nou lir dan Psonm 103:12: “Parey kot soley i leve i lwen avek kot soley i kouse, pareyman i’n met tou nou bann lofans lwen avek nou.” Pa nou kapab rekonesan pour sa!—Ps. 130:3.
7. Ki nou aprann lo fason Zeova ti vwar David?
7 Nou annan levidans dan Labib konsernan abilite remarkab ki Zeova i annan pour konsantre lo sa ki byen dan en dimoun. Bondye ti dekrir David konman “mon serviter David, ki ti gard mon bann komannman e ki ti swiv mwan avek tou son leker par fer zis sa ki ti byen dan mon lizye.” (1 Rwa. 14:8) Byensir, nou konnen ki David ti fer serten keksoz mal. Kantmenm sa, Zeova ti prefere konsantre lo bann bon kalite ki David ti annan akoz i ti konnen ki David ti annan en leker drwat.—1 Kron. 29:17.
Vwar ou bann frer ek ser parey Zeova i vwar zot
8, 9. (a) Dan ki fason nou kapab vin parey Zeova? (b) Donn en legzanp e ki leson nou aprann atraver sa legzanp?
8 Zeova i kapab lir leker me i pa leka pour nou. Zis sa rezon i sifi pour nou pa ziz lezot. Nou pa konn tou konsernan motivasyon en dimoun. Nou devret esey imit Zeova pour pa fikse nou latansyon lo lenperfeksyon lezot, ki pou finalman disparet en zour. Pa i ti pou en bon lobzektif pour vin parey Zeova dan sa domenn? An fezan sa nou pou kontribye en kantite pour annan sa bon relasyon avek nou bann frer ek ser.—Efe. 4:23, 24.
9 Annou pran en legzanp, mazin en lakaz ki’n deteryore, son bann dalo pe tonbe, bann lafnet in kase e son plafon in abimen avek delo. Laplipar dimoun i kapab get sa lakaz e dir dan zot menm ki sa lakaz i merit ganny kraze akoz i vilenn letan ou get li. Me en lot dimoun i kapab vwar sa lakaz e annan en pwennvi konpletman diferan. Olye zis konsantre lo sa bann defo, ki aparan, i kapab vwar ki striktir sa lakaz i ankor for e ki sa lakaz i kapab ganny repare. I aste sa lakaz, repar son bann defo e finalman sa lakaz i vin pli zoli. Apre sa, dimoun ki pase i sirprann pour vwar konman sa lakaz in vin zoli. Eski nou kapab resanble sa dimoun ki’n fer zefor pour repar oubyen aranz sa lakaz? Olye konsantre zis lo defo nou bann frer ek ser ki nou vwar, eski nou kapab rekonnet bann bon kalite ek potansyel ki zot annan pour fer plis progre spirityelman? Si nou fer sa, nou pou arive kontan nou bann frer ek ser pour zot zoli kalite, parey Zeova i kontan zot.—Lir Ebre 6:10.
10. Ki mannyer sa konsey trouve dan Filipyen 2:3, 4 i kapab ed nou?
10 Zapot Pol ti donn serten konsey ki kapab ed nou annan en bon relasyon avek tou dimoun dan kongregasyon. I ti ankouraz bann Kretyen: “Pa fer nanryen par lespri egois e vantar, me avek limilite konsider lezot pli enportan ki ou. Zot pa devre pran ka zis avek zot prop lentere, me osi avek lentere lezot.” (Fili. 2:3, 4) Limilite pou ed nou annan sa bon pwennvi lo lezot. Ler nou demontre lentere dan lezot e rod sa ki byen dan zot, sa pou osi ed nou vwar zot parey Zeova i vwar zot.
11. Ki lefe sa bann sanzman dan lemonn in annan lo serten kongregasyon?
11 Bann sanzman ki pe arive dan lemonn antye ozordi in fer bokou dimoun kit zot pei pour al reste dan en lot. Aprezan i annan en kantite lavil ki annan dimoun sorti dan plizyer diferan pei. Serten parmi bann dimoun ki’n fek ariv dan nou rezyon in enterese avek laverite, e zot in vin ador Zeova ansanm avek nou. Zot “sorti dan tou nasyon, tribi, pep ek lalang.” (Rev. 7:9) Se pour sa ki bokou kongregasyon i melanze avek dimoun sorti dan tou kwen lemonn.
12. Ki pwennvi nou bezwen touzour annan lo kanmarad e akoz parfwa sa i kapab en defi?
12 Dan nou kongregasyon, nou bezwen veye ki nou gard en bon pwennvi lo kanmarad. Sa i fer ki nou bezwen mazin sa konsey zapot Pyer, pour ‘kontan nou bann frer senserman’ e pour ‘kontan kanmarad bokou avek tou nou leker.’ (1 Pyer 1:22) I kapab difisil pour devlop lanmour ek lafeksyon senser dan en kongregasyon kot i annan dimoun diferan nasyonalite. Kiltir nou bann frer ek ser i kapab byen diferan avek sa ki pour nou, sa i kapab leka osi pour zot ledikasyon, sitiasyon ekonomik ek landrwa kot zot in grandi. Eski ou vwar li en defi pour konpran fason panse ek reaksyon serten frer ek ser ki annan en lot kiltir? Zot kapab santi parey anver ou. Malgre tou sa, nou tou nou ganny demande pour: ‘Kontan tou bann frer dan lafwa.’—1 Pyer 2:17.
13. Ki sanzman i kapab neseser nou fer konsernan nou fason panse?
13 Petet nou pou bezwen fer serten sanzman dan nou fason panse pour ouver gran nou leker anver tou nou bann frer ek ser. (Lir 2 Korentyen 6:12, 13.) Eski parfwa nou trouv nou pe dir, “Mon pa rasis mwan, me ou konnen . . . ” apre nou konmans koz lo serten keksoz negatif ki nou vwar i komen parmi serten group etnik. Si nou annan en tel santiman sa i kapab montre ki nou bezwen rezet net rasis, akoz i ankor dan nou leker. Nou kapab demann nou lekor, ‘Eski mon regilyerman fer zefor pour aprann konn dimoun ki annan en kiltir diferan avek sa ki pour mwan?’ Par egzamin nou lekor dan sa fason, sa i kapab ed nou pour aksepte e kontan nou bann frer ek ser dan lemonn antye plis ankor.
14, 15. (a) Donn legzanp bann dimoun ki ti bezwen sanz sa pwennvi ki zot ti annan lo lezot? (b) Ki mannyer nou kapab imit zot?
14 Labib i donn nou bon legzanp bann dimoun ki ti sanz zot pwennvi, enn parmi ti zapot Pyer. Lefet ki i ti en Zwif, Pyer ti pou evite antre dan lakaz en dimoun ki pa ti Zwif. Zis mazinen ki mannyer i ti santi ler i ti ganny demande pour rann vizit Korney, en zonm ki pa ti Zwif e ki pa ti’n sirkonsi! Pyer ti fer bann sanzman, akoz i ti konpran ki Bondye ti oule ki dimoun dan tou nasyon i vin manm kongregasyon Kretyen. (Akt 10:9-35) Sol, ki pli tar ti ganny apele zapot Pol, li osi ti bezwen fer bann sanzman e rezet sa tandans pour vin rasis. I ti admet ki i ti vreman ay bann Kretyen, ki “[i] ti persekit avek vyolans [“kongregasyon,” NW] Bondye e [i] ti esey detri li.” Me ler Senyer Zezi ti koriz Pol, i ti fer bann gran sanzman e i ti menm konmans aksepte gidans sorti kot bann ki i ti persekite oparavan.—Gal. 1:13-20.
15 San okenn dout nou kapab fer bann sanzman dan nou latitid avek led lespri sen Zeova. Si nou remarke ki nou ankor annan sa bann pti tandans dan nou pour vin rasis, annou fer zefor pour rezet zot pour “prezerv linite ki Sent-Espri i donnen par lape.” (Efe. 4:3-6) Labib i ankouraz nou pour “annan lanmour ki soud tou keksoz parfetman ansanm dan larmoni.”—Kol. 3:14.
Imit Zeova dan nou predikasyon
16. Ki lavolonte Bondye pour bann imen?
16 Zapot Pol ti ekrir, “Bondye pa fer preferans pour personn.” (Rom. 2:11) I lavolonte Zeova ki dimoun dan tou nasyon i kapab zwenn ansanm pour ador li. (Lir 1 Timote 2:3, 4.) Pour kapab arive fer sa, i’n fer laranzman pour ki “levanzil eternel” i ganny anonse avek “tou zabitan later, tou nasyon, tribi, lalang ek pep.” (Rev. 14:6) Zezi ti dir: “Zarden i lemonn.” (Mat. 13:38) Ki sa i vedir pour ou ek ou fanmir?
17. Ki mannyer nou kapab ed tou sort kalite dimoun?
17 Pa tou dimoun ki kapab al dan en lot pei pour anons sa mesaz Rwayonm avek lezot. Me kantmenm sa, i kapab posib pour nou anmenn sa mesaz kot dimoun sorti dan tou kwen lemonn ki reste dan nou prop teritwar. Eski nou sezi tou loportinite pour rann temwannyaz avek tou sort dimoun, pa zis avek bann ki nou’n touzour pres avek depi plizyer lannen? Akoz ou pa pran linisyativ pour pres avek dimoun ki pa ankor resevwar en bon temwannyaz?—Rom. 15:20, 21.
18. Ki lentere Zezi ti demontre anver tou dimoun?
18 Zezi ti vreman annan sa dezir pour ed lezot. I pa ti pres zis dan en teritwar. En resi Labib i dir nou ki i “ti al partou dan bann lavil ek dan bann vilaz.” E sa resi i azoute ki “son leker ti ranpli avek konpasyon pour lafoul ki i ti war” e i ti eksprim son dezir pour ed zot.—Mat. 9:35-37.
19, 20. Dan ki fason nou kapab demontre menm lentere parey Zeova ek Zezi i annan pour tou sort dimoun?
19 Ki serten fason ou kapab demontre sa menm latitid? Serten in fikse sa lobzektif pour pres dan bann landrwa dan zot teritwar ki pa’n souvan ganny prese. Sa i kapab enkli bann teritwar biznes, bann zarden piblik, kot terminal bis oubyen bann apartman kot i difisil zwenn dimoun. Lezot in fer sa zefor pour aprann en nouvo langaz pour kapab pres avek serten group etnik ki aprezan pe reste dan zot rezyon oubyen bann group etnik ki pa’n souvan tann sa mesaz dan lepase. Aprann ki mannyer pour dir bonzour sa bann dimoun dan zot langaz i kapab montre ki ou vreman enterese avek zot byennet. Si i pa posib pour nou aprann en lot langaz, eski nou kapab ankouraz bann ki pe fer li? Sirman nou pa pou anvi dekouraz oubyen kestyonn motivasyon bann ki pe fer en tel zefor pour pres avek dimoun sorti dan en lot pei. Lavi tou dimoun i presye dan lizye Bondye e nou anvi vwar keksoz parey li.—Kol. 3:10, 11.
20 Annan menm pwennvi avek Bondye lo lezot i osi vedir pres avek tou dimoun, dan nenport ki sirkonstans zot ladan. Serten i kapab napa landrwa reste, sal, oubyen pe viv en lavi dezord. Si serten dimoun pa azir byen anver nou, sa pa devret fer nou annan bann move lopinyon lo nasyonalite oubyen lo tou dimoun ki sorti dan sa menm group etnik. Menm si serten ti bat Pol, sa pa ti anpes li pres avek lezot dimoun ki ti annan menm nasyonalite avek sa bann ki ti bat li. (Akt 14:5-7, 19-22) I ti annan lespwar ki serten dimoun ti pou ekout li.
21. Ki mannyer ler ou annan menm pwennvi avek Zeova lo lezot sa pou ed ou?
21 I vreman kler pour nou aprezan ki nou bezwen annan en bon pwennvi setadir menm pwennvi avek Zeova dan nou relasyon avek nou bann frer ek ser dan nou kongregasyon, enkli lezot dan lemonn antye, e osi avek dimoun ki nou zwenn dan predikasyon. Pli nou vwar lezot parey Zeova i vwar zot, pli nou pou promot lape ek linite. E nou pou pli byen kapab ed lezot pour apresye Zeova, sa Bondye “ki pa fer lapliferans,” me ki demontre lanmour ranpli avek lentere dan tou dimoun, “parski zot tou zot travay son lanmen.”—Zob 34:19.
Ki ou pou reponn?
• Ki pwennvi nou devret fer zefor pour evite annan lo nou bann frer ek ser?
• Ki mannyer nou kapab imit Zeova dan lafason ki nou vwar nou bann frer ek ser?
• Ki leson ou’n aprann konsernan lafason ki nou merit vwar nou bann frer ek ser dan lemonn antye?
• Ki mannyer nou kapab imit lafason ki Zeova i vwar lezot dimoun ler nou dan predikasyon?
[Kestyon]