Ki lavenir i rezerve pour nou?

AKOZ LAREPONS I ENPORTAN? Ekspektasyon ki en dimoun i annan pour demen i annan lefe lo lafason i reazir ozordi. Par egzanp, bann ki napa bokou lespwar pour lavenir i kapab adopte en latitid “annou manze e bwar, parski demen nou pou mor.” (1 Korentyen 15:32) Sa kalite latitid pa fer dimoun annan vre lape lespri, plito souvandfwa i fer dimoun zis manze, bwar, ouswa annan bokou lenkyetid.

Alors, si lavenir ti depan lo imen, nou lespwar ti pou anven. Ler ki nou respire, delo ek later pe ganny polye plis ki zanmen oparavan. Menas nikleer ek latak teroris pe ogmante. Maladi ek lapovrete pe afekte plizyer bilyon dimoun dan lemonn antye. Parkont i annan bon rezon pour nou annan lespwar.

Imen pa kapab dir sa ki pou arive a lavenir, parkont Zeova i dir ki li i “sa Enn ki depi o konmansman i revel konklizyon, e depi byen lontan bann keksoz ki pa ankor arive.” (Izai 46:10) Ki Zeova i dir konsernan sa ki lavenir i rezerve pour nou?

Ki Labib i dir

Zeova pa pou les later ek tou sa ki vivan lo la ganny detrir dan en fason kot i pa pou fasil repare. Anfet, Labib i promet ki Bondye pou “detri bann ki detri later.” (Revelasyon 11:18) Atraver son Rwayonm oubyen son gouvernman dan lesyel, Zeova pou retir tou mesanste lo later e fer later vin parey i ti ete o konmansman. (Zenez 1:26-31; 2:8, 9; Matye 6:9, 10) Sa bann verse Labib ki swiv i donn en avangou lo lavenir. I dekrir bann levennman ki byento pou annan lefe lo tou bann endividi lo later.

Psonm 46:8, 9. “Vini, zot lepep, vin vwar sa ki Zeova in fer, lafason ki i’n met bann keksoz merveye lo later. I pe fer arete lager ziska dan bann landrwa pli lwen lo later. I kas lark e i kas kas lans an morso. I bril bann saret lager dan dife.”

Izai 35:5, 6. “Sa letan lizye bann aveg pou ouver, e zorey bann sourd pou debouse. Sa letan sa enn ki bwate pou grenpe parey en serf, e lalang sa enn ki kozpa pou kriye avek lazwa. Delo pou koule dan landrwa dezer e i pou annan lavalas dan laplenn dezer.”

Izai 65:21, 22. “Zot pou konstri lakaz e zot pou reste ladan; wi, zot pou plant pye rezen e  zot pou manz son fri. Zot pa pou konstri pour en lot reste, e zot pa pou plante pour en lot manze.”

Danyel 2:44. “Bondye lesyel pou etablir en rwayonm ki pa pou zanmen ganny detrir. Sa rwayonm li menm pa pou pas avek okenn lezot pep. I pou kraz e met en lafen avek tou sa bann rwayonm, e li menm i pou dire pour en letan endefini.”

Zan 5:28, 29. “Ler pe arive kan tou bann mor ki dan tonbo pou tann son lavwa, [Zezi] e zot pou sorti dan zot tonbo.”

Revelasyon 21:3, 4. “I pou vin zot Bondye. I pou eswiy tou larm dan zot lizye. Lanmor pou nepli egziste. Pou nepli annan ni dey, ni plere, ni soufrans, parski lemonn ansyen in disparet.”

Konman larepons Labib i donn vre lape lespri?

Sa bann kondisyon ki’n ganny dekrir pli o i kapab paret difisil pour krwar o konmansman. Me se pa zonm ki’n fer sa bann promes, Bondye ki’n fer. E Zeova “pa zanmen manti.”—Tit 1:2.

Si ou aprann pour annan konfyans dan promes Bondye e viv dapre son bann lalwa, ou pou kapab gard ou lape lespri malgre bann sirkonstans difisil. Lager, lapovrete, maladi, menm difikilte ki vin avek lavyeyes ouswa lanmor, tousala pa pou fer ou perdi sa lape lespri. Akoz? Akoz ou konvenki ki Rwayonm Bondye pou retir bann move lefe ki tou sa bann problenm in anmennen.

Ki mannyer ou kapab ganny sa kalite lespwar pour lavenir? Ou bezwen fer “sanzman konplet dan [ou] lentelizans” e annan konviksyon konsernan sa ‘ki bon, sa ki fer plezir’ Bondye. (Romen 12:2) I kapab ki ou pou anvi ganny plis laprev pour ou kapab annan konfyans dan bann promes Labib. Sa kalite resers i vo lapenn. Napa bokou keksoz ki ou fer dan lavi ki kapab fer ou ganny lape lespri.

[Portre lo paz 7]