Kote nou sorti?

AKOZ LAREPONS I ENPORTAN? Bokou dimoun in ganny ansennyen ki lavi lo later ti vin par kwensidans. Zot in ganny dir ki ras imen avek tou son lemosyon, lentelizans ek sa abilite pour rode akoz zot lo later, tousala ti vin atraver evolisyon ki’n arive gradyelman e par azar.

Me reflesir: Si vreman napa en Kreater e nou ti’n vin par evolisyon, dan en sans imen ti pou en orfelen. Limanite ti pou napa personn avek en lasazes pli siperyer pour zot fye lo la. Ti pou napa personn ki ti pou ed nou pour rezourd nou bann problenm. Nou ti pou bezwen depan lo nou prop lasazes pour evit bann problenm ki afekte lanvironnman, rezourd bann konfli politik e donn nou gidans kan nou rankontre bann problenm personnel.

Eski tousala i donn ou lape lespri? Si non, mazin bann lezot alternatif ki pa zis pli atiran, me i osi fer bokou plis sans.

Ki Labib i dir

Labib i ansennyen ki limanite in ganny kree direkteman par Bondye. Nou pa’n vin par evolisyon ki nou pa vwar okenn lanmour oubyen lasazes ladan. O kontrer, nou annan en Papa entelizan ki kontan nou e nou, nou son bann zanfan. Remark sa ki Labib i dir klerman:

Zenez 1:27. “Bondye ti kree zonm dan son resanblans, dan resanblans Bondye i ti kree li. I ti kree zonm ek fanm.”

Psonm 139:14. “Mon pou loue ou parski mon’n ganny fer dan en fason merveye, e sa i fer mwan annan lakrent pour ou. Sa ki ou’n fer i merveye, e mon konn sa byen.”

Matye 19:4-6. “Zot pa’n lir, ki depi okonmansman kreater ti fer zot mal ek femel, e ti dir: ‘Pour sa rezon, en zonm pou kit son papa ek son manman pour ini avek son madanm, e toulede zot vin en sel laser.’ Zot nepli de me en sel. Alor sa ki Bondye in ini ansanm zonm pa devre separe.”

Akt 17:24, 25. “Bondye ki’n fer lemonn ek tou sa ki ladan, i Senyer lesyel ek later, e i pa reste dan bann tanp ki’n konstri par lanmen zonm. I pa ni bezwen okenn keksoz ki zonm i kapab donn li ou fer pour li, parski se limenm ki donn tou dimoun, lavi, respirasyon ek tou keksoz.”

Revelasyon 4:11. “Nou Senyer, nou Bondye, ou merite resevwar laglwar, loner ek pisans, parski ou’n kree tou keksoz, e se par ou lavolonte ki zot egziste e ki zot in ganny kree.”

Konman larepons Labib i donn vre lape lespri?

Kan nou konnen ki Bondye “ki donn tou fanmir lo later son vre non” sa i fer nou get lezot dan en lot fason. (Efezyen 3:15) Kan nou konn sa, sa pou annan en lefe lo lafason nou vwar nou lekor ek nou bann problenm. Nou pou annan menm pwennvi parey pou ganny dekrir pli ba.

Kan nou annan bann desizyon difisil pour fer, nou pa pou tro enkyet konsernan diferan lopinyon ki lezot i annan. Plito, nou pou depan lo konsey Labib avek konfyans. Akoz? Akoz, “tou Lekritir i enspire par Bondye e i itil pour ansennyen, pour koriz lerer, pour remet drwat, e pour formen pour viv byen selon Bondye, pour ki dimoun ki servi Bondye i byen prepare e byen ekipe pour fer tou aksyon ki bon.”—2 Timote 3:16, 17.

 I vre, pour aplik konsey Labib i demann zefor ek kontrol lo nou lekor. Parler atraver son gidans nou kapab realize ki nou bezwen azir dan en fason ki paret lekontrer avek sa ki nou ti a kontan fer. (Zenez 8:21) Parkont, si nou aksepte ki nou’n ganny kree par en Papa ki dan lesyel ki kontan nou, i lozik alor pour konklir ki i konn sa pli meyer direksyon ki nou devret pran. (Izai 55:9) Son Parol li menm i asir nou: “Met ou konfyans dan Zeova avek tou ou leker e pa apiy lo ou prop konprenezon. Dan tou ou semen pran li an konsiderasyon, e li i pou fer drwat ou bann santye.” (Proverb 3:5, 6) Si nou aplik sa konsey, bokou parmi bann lenkyetid ki nou eksperyanse kan nou rankontre problenm oubyen ler nou bezwen pran en desizyon, pou ganny sirmonte.

Kan nou ganny trete dan en fason enzis, nou pa pou trouble par bann santiman ki nou enferyer e mazinen ki nou napa valer konpare avek lezot dimoun en lot ras ouswa kiltir. Plito nou pou devlop en respe pour nou prop lekor ki byen balanse. Akoz? Akoz Zeova nou Papa “pa fer preferans pour personn, me dan nenport ki nasyon tou dimoun ki annan respe pour li e ki fer sa ki byen Bondye i kontan li.”—Akt 10:34, 35.

Kan nou konn sa, sa pou anpes nou vin rasis. Nou pou konpran ki napa okenn bon rezon pour nou santi nou pli siperyer ki bann dimoun ki sorti dan en lot ras, vi ki “apartir en sel zonm [Bondye in] kree tou bann nasyon dan lemonn e etabli zot lo later antye.”—Akt 17:26.

Sirman kan nou konnen ki nou ti ganny kree e ki nou Kreater i enterese avek nou, sa i etablir en fondasyon pour nou ganny sa vre lape lespri. Me i annan lezot keksoz nou bezwen pour nou ganny vre lape.

[Portre lo paz 4]

Eski ras imen ti evolye?