Pare pour sede e an menm tan annan en bon balans

“Kontinyen rapel zot . . . pour pare pour sede.”—TIT 3:1, 2, not dan NW.

1, 2. Ki Labib i dir konsernan pare pour sede, e akoz sa i en bon keksoz pour fer?

NAPA personn ki pli saz ki nou Papa dan lesyel, Zeova. I nou Kreater alor nou al ver li pour ganny gidans dan lavi. (Ps. 48:14) Dapre disip Zak, “lasazes ki sorti dan lesyel i premyerman pir, answit i kontan lape, i modere [oubyen “pare pour sede,” not dan NW], pare pour met dakor, i ranpli avek pitye ek bon laksyon, san fer preferans e san lipokrizi.”—Zak 3:17.

² Zapot Pol ti donn bann Kretyen sa konsey: “Montre zot bon [oubyen “pare pour sede,” Kingdom Interlinear] anver tou dimoun.” * (Fili. 4:5) Kris Zezi i Senyer e Sef kongregasyon Kretyen. (Efe. 5:23) Pa i enportan alor pour nou tou azir dan en bon fason, swiv direksyon Kris e pare pour sede dan nou relasyon avek lezot!

3, 4. (a) Montre ki byenfe nou gannyen ler nou pare pour sede. (b) Ki nou pou egzaminen?

³ Nou ganny bokou byenfe ler nou pare pour sede dan en fason balanse. Annou pran de legzanp: En fwa Langleter zot ti dekouver ki bann teroris ti pe al esey lans en latak. Depi sa zour, preski tou pasaze ki vwayaze ti pare pour swiv lord pour pa anmenn bann keksoz avek zot dan avyon ki avan sa zot ti kapab anmennen. Kan nou pe dray, nou bezwen pare pour les pase lezot drayver, par egzanp kan nou’n ariv kot en ronpwen trafik, sa i egziste pour anpes annan aksidan e anpes blok trafik.

⁴ Pour sede, sa i pa en keksoz ki fasil pour bokou nou fer. Me pour ed nou, annou vwar trwa fason ki nou demontre ki nou pare pour sede. Sa i annan pour fer avek nou motivasyon, lafason nou azir anver bann ki annan lotorite, e ziska ki degre nou pare pour sede.

Akoz pare pour sede?

5. Kwa ki ti kapab pous en lesklav pour kontinyen servi son met?

⁵ Annou pran en legzanp ki ti arive avan lepok Kretyen, pour montre nou akoz nou bezwen annan sa bon motivasyon pour pare pour sede. Anba Lalwa Moiz, bann Izraelit ki ti lesklav ti bezwen ganny large apre ki zot in servi zot met pandan set an, oubyen lannen Zibile, e sa ti pou tou depan lo lekel ki ti ariv avan. Me en lesklav ti kapab swazir pour kontinyen servi son met osi lontan ki i ti a kontan. (Lir Egzod 21:5, 6.) Me akoz en lesklav ti pou anvi kontinyen servi son met menm si i ti lib pour ale? Se lanmour ki ti pou pous li pour fer sa, akoz son met ti tret li byen.

6. Ki mannyer lanmour i enplike ler nou pare pour sede oubyen met lezot avan nou?

⁶ I menm zafer pour nou ozordi, nou dedye nou lavi avek Zeova akoz nou kontan li e apre sa nou viv annakor avek nou dedikasyon. (Rom. 14:7, 8) Zapot Zan ti ekrir: “Annefe, la lanmour Bondye: ki nou obei son konmannman; e son bann konmannman i pa en fardo.” (1 Zan 5:3) En dimoun ki annan sa kalite lanmour pa rod zis sa ki dan son lentere. (1 Kor. 13:4, 5) Dan nou relasyon avek lezot, lanmour pour nou prosen i pous nou pour sede oubyen met lezot avan nou. Olye zis mazin ou lekor, nou mazin nou kanmarad avan.—Fili. 2:2, 3.

7. Ler nou pare pour sede ki rol sa i annan dan nou minister?

 ⁷ Nou pa devret fer lezot tonbe ki swa par nou parol oubyen aksyon. (Efe. 4:29) Anfet, lanmour pou pous nou pour evite fer okenn keksoz ki kapab anpes nenport dimoun avek diferan lorizin ek kiltir progrese pour servi Zeova. E pour kapab fer sa nou pou bezwen pare pour sede. Par egzanp bann ser ki misyonner pa pou ensiste ki zot met bann makiyaz oubyen leba dan bann pei kot lezot i konsider bann dimoun ki met tousala konman bann ki imoral, akoz sa i kapab fer lezot tonbe.—1 Kor. 10:31-33.

8. Ki mannyer lanmour pour Bondye pou ed nou azir konman sa enn “ki pli pti”?

⁸ Nou lanmour pour Zeova i anpes nou vin orgeye. Apre ki bann disip ti pe dispit pour rode lekel ki pli gran parmi zot, Zezi ti anmenn en zanfan parmi zot. I ti eksplik zot: “Sa ki resevwar sa zanfan an mon non, i resevwar mwanmenm, e sa ki resevwar mwan, i resevwar sa enn ki’n anvoy mwan. Sa ki pli pti parmi zot, limenm ki pli enportan.” (Lik 9:48; Mark 9:36) Personnelman, nou kapab vwar li vreman difisil pour azir konman sa enn “ki pli pti.” Me akoz lenperfeksyon ki nou’n erite ek sa tandans pour vin orgeye, nou kapab vwar nou pe anvi rod pozisyon, me limilite pou ed nou pour abes nou.—Rom. 12:10.

9. Pour nou kapab sede oubyen soumet ki nou bezwen pran an konsiderasyon?

⁹ Pour kapab sede oubyen soumet, en dimoun i bezwen respekte sa bann ki Zeova in donn lotorite. Tou vre Kretyen i konnen ki sa prensip konsernan lotorite i enportan. Zapot Pol ti byen fer sa resorti kan i ti dir bann Korentyen: “Sepandan, mon oule ki zot konpran ki Kris i sef tou zonm, ki en mari i sef son madanm e Bondye i sef Kris.”—1 Kor. 11:3.

10. Ki sa i montre ler nou soumet anba lotorite Zeova?

¹⁰ Kan nou soumet anba lotorite Bondye, sa pou montre ki nou annan konfyans dan li konman nou Papa ki kontan nou. I konn tou sa ki pase e parey nou fer pour lezot i pou fer menm zafer pour nou. I byen ki nou mazin sa, akoz menm ler lezot pa tret nou byen oubyen zot ankoler e mank pasyans, nou pou pare pour soumet. Zapot Pol ti ekrir: “Fer tou sa ki depann lo ou pour viv anpe avek tou dimoun.” Pol ti met lanfaz lo sa konsey kan i ti dir: “Pa vanze, me les lakoler Bondye azir. Parski Senyer i dir dan Lekritir: ‘Mwan ki pou fer vanzans, Mwan ki pou fer peye.’”—Rom. 12:18, 19.

11. Konman nou montre ki nou pe soumet anba lotorite Kris?

¹¹ Zeova in osi donn serten lotorite dan Kongregasyon Kretyen. Dan Revelasyon sapit 1, Kris Zezi i ganny dekrir konman sa enn ki pe tyonbo bann “zetwal” dan son lanmen drwat. (Rev. 1:16, 20) Nou osi kapab dir ki sa bann “zetwal” i reprezant bann ansyen oubyen sirveyan dan kongregasyon. Sa bann ansyen ki’n ganny apwente i soumet anba direksyon Kris e zot  imit sa bon fason ki i azir avek lezot. Tou dimoun dan kongregasyon i pare pour soumet avek sa “lesklav fidel e pridan” ki’n ganny apwente pour donn nouritir spirityel dan letan apropriye, akoz sa i en laranzman ki Zezi in met an plas. (Mat. 24:45-47, NW) Ozordi, lefet ki nou pare pour etidye e aplik sa lartik, sa i montre ki personnelman nou pe soumet avek lotorite Kris e sa i ed nou pour viv anpe e dan linite.—Rom. 14:13, 19.

Ziska ki degre nou bezwen sede?

12. Akoz i annan en serten degre ziska ki zistans nou bezwen sede?

¹² Kan nou pare pour sede, sa pa vedir ki nou pou fer konpromi an sa ki konsern nou lafwa ek bann prensip Bondye. Ki bann premye Kretyen ti fer kan bann sef relizye ti donn zot lord pour aret ansenny lansennyman ki Zezi ti’n kite? Avek lardyes, Pyer ek lezot zapot ti dir: “Nou devre obei Bondye plito ki zonm.” (Akt 4:18-20; 5:28, 29) Pareyman ozordi, kan gouvernman i esey fors nou pour aret pres sa bon nouvel, nou pa arete. Nou pou kontinyen fer li menm si fodre sanz lafason ki nou prese pour ki nou pridan dan en sitiasyon parey. Si i annan lalwa ki dir nou napa drwa al prese portanport, nou pou esey rod lezot fason ki nou kapab zwenn sa bann dimoun dan teritwar e koumsa nou pou kontinyen fer sa travay ki Bondye in donn nou. Nou pou azir dan menm fason kan “bann lotorite ki gouvernen” i defann nou fer nou renyon, savedir nou pou zwenn par pti group an sekre.—Rom. 13:1; Ebr. 10:24, 25.

13. Ki Zezi ti dir konsernan soumet avek bann ki annan lotorite?

¹³ Dan son Sermon lo Montanny, Zezi ti fer resorti akoz nou bezwen soumet avek lotorite: “Si en dimoun i anmenn ou an-kour akoz ou semiz, les li pran ou palto osi. E si en dimoun i fors ou marse en kilomet avek li, mars de kilomet.” (Mat. 5:40, 41) * Kan nou pran konsiderasyon pour lezot e nou anvi ed zot, sa pou pous nou pour mars de kilomet anplis avek zot, savedir pour fer plis ki sa ki zot in demande.—1 Kor. 13:5; Tit 3:1, 2.

14. Akoz nou pa devret pare pour sede ler nou fer fas avek bann ki koz kont laverite?

¹⁴ Menm si nou pare pour sede oubyen soumet, zanmen nou devret fer konpromi avek bann ki kont laverite. Pour fer ki laverite i reste touzour laverite, nou bezwen ferm e montre klerman nou pozisyon e si nou fer sa kongregasyon pou reste ini. Get sa ki zapot Pol ti ekrir konsernan “bann fo frer.” I ti dir: “Nou pa ti sede avek zot pour en sel moman, pour ki laverite levanzil i mentenir parmi zot.” (Gal. 2:4, 5) Menm si i pa souvan ki nou bezwen fer fas avek bann ki koz kont laverite, me kan sa i arive bann Kretyen ki devoue pou reste atase avek sa ki byen.

Bann sirveyan i bezwen pare pour sede

15. Konman bann sirveyan i kapab pare pour sede kan zot zwenn ansanm pour diskite?

¹⁵ Pare pour sede, i en kriter ki bann sirveyan ki ganny apwente i bezwen annan. Zapot Pol ti ekrir: “En sirveyan i bezwen . . . rezonnab [oubyen “pare pour sede,” not].” (1 Tim. 3:2, 3, NW) Sa i vreman enportan sirtou kan zot zwenn pour diskit bann keksoz ki konsern kongregasyon. Avan ki zot pran en desizyon, tou dimoun i lib pour klerman donn son pwennvi, menm si tou ansyen pa oblize koze. Pandan ki zot pe diskite, petet en ansyen i kapab sanz son pwennvi anmezir ki lezot i enkli bann prensip Labib ki enplike. Olye ensiste ki i annan rezon, en ansyen ki matir pou sede. Petet o konmansman sakenn ti annan diferan pwennvi, me apre ki zot in priye sa i ed bann ansyen ki modes, rezonnab e pare pour sede, reste anpe avek kanmarad.—1 Kor. 1:10; Lir Efezyen 4:1-3.

16. Ki latitid en ansyen i devret annan?

¹⁶ Dan tou sa ki i fer en ansyen i devret fer bokou zefor pour swiv bann laranzman teokratik. Sa i devret evidan menm ler i pe pran swen avek troupo, sa pou ed li montre konsiderasyon e zantiy avek lezot. Zapot Pyer ti ekrir:  “Pran byen swen troupo Bondye ki’n ganny konfye avek zot konman berze; pa fer li kontre-ker me avek bonn volonte, konman Bondye i oule. Pa fer li pour ganny larzan me avek devouman.”—1 Pyer 5:2.

17. Ki mannyer tou dimoun dan kongregasyon i kapab pare pour sede?

¹⁷ Bann Kretyen aze dan kongregasyon i apresye kan lezot ki pli zenn i ed zot, e bann aze i tret byen sa bann zenn. An retour, bann zenn i respe sa bann ki annan en kantite leksperyans akoz zot in servi Zeova pour en kantite lannen. (1 Tim. 5:1, 2) Bann ansyen i esey rod bann frer ki kapab kalifye pour zot desarz serten responsabilite dan kongregasyon, zot form sa bann frer pour zot pran swen avek troupo Bondye. (2 Tim. 2:1, 2) Sakenn ant nou, nou devret apresye sa konsey ki zapot Pol ti ekrir ler i ti ganny enspire: “Obei zot bann dirizan e swiv zot lord [oubyen “pare pour sede,” not dan NW]; parski zot pe kontinyelman vey lo zot lam, konman bann dimoun ki bezwen rann kont lo zot size. Les zot fer zot travay dan lazwa, e non pa dan lapenn ki pa pou anmenn okenn lavantaz pour zot.”—Ebr. 13:17.

Pare pour sede dan fanmir

18. Akoz i byen ki tou dimoun dan fanmir i pare pour soumet?

¹⁸ Tou dimoun dan fanmir i bezwen pare pour sede oubyen soumet. (Lir Kolosyen 3:18-21.) Labib i montre ki responsabilite sak dimoun dan lafanmir i annan. Sa msye i sef son madanm e se li ki premyerman responsab pour ansenny son zanfan. En madanm i bezwen rekonnet lotorite son msye e zanfan i devret fer bokou zefor pour obeir, akoz sa i fer plezir Senyer. Tou dimoun dan fanmir i kapab ede pour gard linite ek lape dan fanmir kan zot byen balanse dan lafason ki zot montre zot soumisyon. Dan Labib nou vwar serten legzanp ki demontre sa.

19, 20. (a) Montre ladiferans dan lafason ki Eli ek Zeova ti azir. (b) Ki leson paran i kapab tire dan sa de legzanp?

¹⁹ Eli ki ti gran pret an Izrael kan Samyel ti ankor en pti garson. Me Ofni ek Fineas, sa de garson Eli, ti bann “bon nanryen” ki pa ti “pran kont Zeova” dan zot lavi. Eli ti’n tande ki son de garson ti pe fer sa ki mal. I ti’n menm tande ki zot ti pe fer aksyon imoral avek bann madanm ki ti pe servi kot larantre tabernak. Ki ti son reaksyon? Eli ti dir zot ki si zot ti’n fer sa ki mal dan lizye Zeova, ti pou napa personn ki ti pou priy pour zot. Sanmenm tou, i pa ti koriz e disiplin zot. Pour fini kont, Ofni ek Fineas ti kontinyen pratik sa ki mal. Finalman Zeova ti  vwar ki zot ti merite ganny en santans lanmor. Apre ki i ti’n tande ki son de garson ti’n mor, li osi i ti mor. Pa sa i fer lapenn! I kler ki lefet ki Eli ti sede, setadir aksepte oubyen soutir ki zot kontinyen fer sa ki mal, sa pa ti byen.—1 Sam. 2:12-17, 22-25, 34, 35; 4:17, 18.

²⁰ Me annou vwar konman ki Zeova li i ti azir dan en bon fason kan i ti demann son bann lanz zot lopinyon. Profet Mikaya ti ganny en vizyon ekstraordiner kot i ti vwar Zeova ek Son bann lanz pe fer en renyon. Zeova ti demande lekel lanz ki ti pou kapab anbet Lerwa Aab an Izrael, pour fer sa move lerwa tonbe konpletman. Zeova ti ekout sizesyon plizyer lanz. Apre en lanz ti dir ki i pare pour fer li. Zeova ti demann li konman ki i pou fer li. Apre ki i ti dakor avek larepons, Zeova ti donn sa lanz lord pour fer sa ki i ti’n plàn. (1 Rwa. 22:19-23) Antre nou imen, eski bann manm fanmir pa i kapab imit sa legzanp par pare pour sede oubyen aksepte pwennvi lezot? I byen kan en msye Kretyen ki osi en papa i pran an konsiderasyon nide ek sizesyon son madanm ek zanfan. De lot kote, bann madanm ek zanfan i bezwen realize ki apre ki zot in donn zot sizesyon e dir sa ki zot ti a plifere ganny fer, petet zot pou bezwen aksepte e soumet avek desizyon ki ganny pran par sa enn ki Labib in donn lotorite.

21. Ki nou pou egzaminen dan lartik swivan?

²¹ Pa nou vreman apresye sa bann bon rapel avek lanmour ki Zeova in donn nou konsernan sa nesesite pour sede oubyen soumet! (Ps. 119:99) Lartik swivan pou montre nou konman ki ler nou pare pour sede dan en fason balanse sa i kontribye pour anmenn lazwa dan maryaz.

[Not anba lo paz]

Ki ou pou reponn?

• Ki bon rezilta nou kapab gannyen ler nou pare pour sede oubyen soumet?

• Konman bann sirveyan i kapab montre ki zot pare pour sede?

• Akoz i enportan pour pare pour sede dan lafanmir?

[Kestyon]

[Portre lo paz 10]

Bann ansyen i imit sa bon fason ki Kris i azir avek lezot

[Portre lo paz 12]

Kan bann ansyen i zwenn pour diskite, lapriyer e kan zot pare pour sede sa i ed zot pour reste anpe