Zeova i tann nou lapel o sekour
Zeova i tann nou lapel o sekour
“Lizye Zeova i lo bann ki drwat e son zorey i tann zot lapel o sekour.”—PS. 34:15.
1, 2. (a) Ki mannyer bokou dimoun i santi zot ozordi? (b) Akoz nou pa sirprann par sa?
ESKI ou annan bokou problenm ek lenkyetid? Si wi, ou pa tousel. Bokou dimoun pe lite pour fer fas avek problenm dan lavi ki sa move lemonn i anmenn lo zot sak zour. I vreman difisil parfwa pour serten andire. Zot santi preski parey psalmis David ki ti ekrir: “Mon santi mwan angourdi e konmsi mon’n vreman ganny kraz kraze; Mon’n gronnyen akoz mon leker pe zemir. Mon’n ganny bokou palpitasyon leker, mon nepli annan lafors, mon lizye i konmans vwar sonm.”—Ps. 38:8, 10.
2 Konman Kretyen nou pa sirprann par sa bann lenkyetid lavi. Nou konpran ki sa bann “douler lanfantman” i form parti siny ki endik prezans Kris. (Mark 13:8; Mat. 24:3) Sa mo Grek ki’n ganny tradwir “douler lanfantman” pe refer avek tou sort kalite soufrans ek lenkyetid. Pa sa mo pe byen dekrir lentansite soufrans ki imen pe pas ladan la konmela pandan sa letan “difisil” e “kriyel” ki “difisil pour fer fas avek”!—2 Tim. 3:1; Kingdom Interlinear.
Zeova i konpran nou lenkyetid
3. Ki pep Bondye i konsyan?
3 Pep Zeova i konsyan ki zot osi zot ganny afekte avek sa bann soufrans e i tre probab ki sa sitiasyon pou vin pli pir. Anplis ki sa ki limanite pe eksperyanse an zeneral, konman serviter Zeova nou osi fer fas avek nou “lennmi, Dyab” ki determinen pour fer nou perdi nou lafwa. (1 Pyer 5:8) Pa i vreman fasil alors pour santi parey David ki ti dir: “Akoz zot malparl mwan sa in kas mon leker, e sa blesir napa gerizon. Mon ti pe swete ki en dimoun i vin senpatiz avek mwan, me ti napa personn, mon ti pe swete ganny rekonforte, me mon pa ti vwar personn”!—Ps. 69:20.
4. Ki rekonfor nou gannyen kan nou pe eksperyans soufrans?
4 Eski David ti pe dir ki i ti napa ditou lespwar? Non. Remark kontinyasyon son parol dan sa Psonm: “Zeova pe ekout bann ki pov e byensir i pa pou mepriz son bann prizonnyen” ouswa “bann parmi son prop pep ki prizonnyen.” (Ps. 69:33; not anba paz.) Parfwa nou kapab santi nou konman prizonnyen ki’n ganny anprizonnen par problenm ek lenkyetid. I arive osi ki nou krwar ki lezot pa konpran nou sitiasyon, e i kapab vre. Me nou ganny rekonforte parey David kan nou konnen Zeova i konpran tou nou soufrans.—Ps. 34:15.
5. Ki konfyans Lerwa Salomon ti annan?
5 Salomon, garson David ti met lanfaz lo sa fe kan i ti dedye tanp Zerizalenm. (Lir 2 Kronik 6:29-31.) I ti sipliy Zeova pour ekout lapriyer tou sa ki ti annan leker senser kan sakenn ant zot ti apros Li konsernan “son fleo ek son soufrans.” Ki mannyer Bondye ti pou reazir anver lapriyer bann ki ti dan sitiasyon difisil? Salomon ti annan konfyans ki Bondye pa ti pou zis ekout zot lapriyer me i ti pou fer keksoz pour ed zot. Akoz? Akoz i konn sa ki dan “leker garson bann imen.”
6. Ki mannyer nou kapab fer fas avek lenkyetid e akoz?
6 Pareyman nou osi nou kapab apros Zeova dan lapriyer konsernan nou lenkyetid personnel, ‘nou fleo ek nou soufrans.’ Nou ganny rekonfor kan nou konnen Zeova i konpran nou soufrans e i enterese avek nou. Zapot Pyer ti konfirm sa kan i ti dir: “Desarz tou zot sousi lo li, parski limenm ki pran swen avek zot.” (1 Pyer 5:7) Zeova i konsernen avek sa ki ariv nou. Zezi ti met lanfaz lo swen ranpli avek lanmour ki Zeova i demontre kan i ti dir: “Eski de pti sren pa i vann pour en sou? Me en sel pa tonm ater san lavolonte zot Papa oubyen [“san ki zot Papa i konnen,” NW], Me menm, bann bren seve lo zot latet in konte. Alor pa bezwen per, zot vo bokou plis ki en kantite sren!”—Mat. 10:29-31.
Depan lo led Zeova
7. Ki kalite sipor nou konnen Zeova i kapab donn nou?
7 Nou kapab asire ki Zeova i kapab e i anvi ed nou kan nou tourmante avek nou ta lenkyetid. “Bondye i en refiz ek lafors pour nou, en led ki fasilman ganny trouve pandan ladetres.” (Ps. 34:15-18; 46:1) Ki mannyer Bondye i fourni sa led? Remarke ki 1 Korentyen 10:13 i dir: “Bondye i fidel dan son promes, e i pa pou permet ki nou ganny tante plis ki nou kapab siporte, me avek tantasyon i osi donn mwayen pour sorti pour ki ou kapab siporte.” Zeova i kapab aranz keksoz pour retir sa leprev oubyen i kapab donn nou lafors ki nou bezwen pour andire. Dan tou le de fason nou ganny led.
8. Ki mannyer nou kapab benefisye avek led ki Bondye i donnen?
8 Ki mannyer nou kapab benefisye avek sa led? Remark sa ki nou ganny konseye pour fer: ‘Desarz tou zot sousi lo li.’ Sa i vedir ki nou donn Zeova responsabilite lo tou nou lenkyetid ek konsern. Nou esey aret enkyet e avek pasyans nou depan lo li pour pran swen avek nou bann bezwen. (Mat. 6:25-32) Olye apiy lo nou prop lasazes ek lafors, sa kalite konfyans i demann bokou limilite. Kan nou abes nou lekor “anba kontrol pisans Bondye,” nou rekonnet ki nou pli enferyer devan li. (Lir 1 Pyer 5:6.) Bondye i permet serten keksoz arive, e an retour sa i ed nou pour fer fas avek sa bann sitiasyon ki Bondye i permet. Nou kapab annan sa gran lanvi pour ganny soulazman vitman, me nou annan konfyans ki Zeova i konn egzakteman kan e dan ki fason i pou azir pour nou.—Ps. 54:7; Iza. 41:10.
9. Ki kalite fardo David ti bezwen larg lo Zeova?
9 Parol David dan Psonm 55:22 i dir: “Larg ou fardo lo Zeova li menm, e li i pou soutenir ou. Zanmen i pou les sa enn ki drwat drive.” Kan David ti ekrir sa parol, i ti dan en gran lenkyetid. (Ps. 55:4) I paret ki sa psonm ti ganny ekrir kan son garson Absalonm ti pe fer konplo pour vol son rwayote. Aitofel, sa konseye ki David ti annan gran konfyans ladan ti donn lanmen dan sa konplo. Pour sov son lavi David ti bezwen sove Zerizalenm. (2 Sam. 15:12-14) Malgre sa sirkonstans enkyetan ki i ti ladan, David ti kontinyen annan konfyans dan Bondye e i pa ti dezapwente.
10. Ki nou devret fer kan nou annan lenkyetid?
10 Parey David, i vreman enportan ki nou apros Zeova par lapriyer an rapor avek nenport ki lenkyetid nou pe fer fas avek. Annou vwar ki zapot Pol ti ankouraz nou pour fer lo sa size. (Lir Filipyen 4:6, 7.) Ki nou pou gannyen si nou fer en tel siplikasyon? “Lape Bondye ki depas tou konpreansyon imen i ava gard [nou] leker ek [nou] lespri dan Kris-Zezi.”
11. Ki mannyer “lape Bondye” i protez nou leker ek lespri?
11 Eski lapriyer pou anmenn en sanzman dan nou sitiasyon? Sa i posib. Me toudmenm nou merit realize ki Zeova pa touzour egzos nou lapriyer dan lafason nou ti ava kontan. Toudmenm, lapriyer i ed nou pour ki nou lespri pa sitan fatige e i ed nou arive kontrol nou lenkyetid. “Lape Bondye” i kapab kalme nou kan nou annan problenm emosyonnel. Parey en latroup solda ki annan sa responsabilite pour protez lavil kont okenn latak avek lennmi, “lape Bondye” pou protez nou leker ek nou lespri. I pou osi permet nou pour sirmont dout, lafreyer ek panse negatif e osi anpes nou reakte vitman e san okenn lasazes.—Ps. 145:18.
12. Donn en legzanp lo konman en dimoun i kapab annan lape lespri.
12 Ki mannyer nou kapab annan lape lespri kan nou latet i fatige? Annou vwar en legzanp ki kapab reprezant nou sitiasyon. En travayer i kapab pe travay par anba en manedyer ki vreman brit. Parkont, sa travayer i annan sa loportinite pour eksprim son santiman avek sef sa lakonpannyen ki li i en zonm zantiy e rezonnab. Sef sa lakonpannyen i asir sa travayer ki i konpran son sitiasyon e dir li ki byento i pou retir sa manedyer dan son pozisyon. Ki mannyer sa travayer pou santi li? Par annan konfyans dan son sef e konn aksyon ki pe al ganny pran, tousala pou donn li lafors pour kontinyen travay menm si antretan i pou bezwen fer fas avek lezot difikilte. Pareyman, nou konnen Zeova i konpran nou sitiasyon e i asir nou ki byento “sef sa lemonn pou ganny zet deor.” (Zan 12:31) Pa sa i vreman rekonfortan!
13. Apard priye, ki lezot keksoz nou devret fer?
13 Alor eski i ase zis pour larg tou nou problenm lo Zeova atraver lapriyer? Non. I annan lezot keksoz ki enplike. Nou bezwen azir an armoni avek nou lapriyer. Kan Lerwa Sail ti anvoy bann zonm pour touy David se li, David ti priye: “O mon Bondye! Delivre mwan kont mon bann lennmi. Protez mwan kont bann ki vir kont mwan. Delivre mwan kont bann ki pratik sa ki fer ditor e sov mwan kont bann zonm ki koupab pour vers disan.” (Ps. 59:1, 2) An rapor avek son lapriyer, David ti ekout son madanm e pran aksyon neseser pour li sove. (1 Sam. 19:11, 12) Pareyman, nou kapab priye pour ganny lasazes pratik e sa pou ed nou sirmont oubyen petet amelyor sirkonstans enkyetan ki nou ladan.—Zak 1:5.
Ki mannyer nou kapab annan lafors pour andire?
14. Kwa ki ed nou andire kan nou rankontre problenm?
14 Petet, nou problenm pa pou ganny rezourd deswit. Zot kapab menm kontinyen pour en pe letan. Si sa i leka, kwa ki ed nou pour andire? Premyerman, mazinen ki ler nou kontinyen servi Zeova fidelman malgre difikilte, nou prouv nou lanmour pour li. (Akt 14:22) Gard antet sa lakizasyon ki Satan ti fer an rapor avek Zob: “Eski Zob pou ador ou si i pa ganny nanryen an retour? Ou’n touzour protez son fanmir e tou sa ki i annan. Ou beni tou sa ki i fer e ou’n donn li ase bef pour ranpli pei antye. Zis fer konmsi ou pran tou sa ki i annan, i pou modi ou dan ou figir!” (Zob 1:9-11, Today’s English Version) Atraver son fidelite Zob ti prouve ki sa lakizasyon ti konpletman fo. Kan nou andire anba bann tel sirkonstans nou osi nou annan sa loportinite pour prouv Satan konman en manter. Deplis, nou landirans pou ranforsi nou lespwar ek nou konfyans.—Zak 1:4.
15. Ki legzanp ki kapab fortifye nou?
15 Dezyenmman, gard antet “ki tou zot bann frer dan lemonn antye pe pas par menm soufrans.” (1 Pyer 5:9) Wi, “tou tantasyon ki’n ariv zot i arive normalman avek en dimoun.” (1 Kor. 10:13) Alors olye konsantre zis lo ou difikilte personnel ou kapab medit lo legzanp lezot e sa i kapab donn ou kouraz ek lafors. (1 Tesa. 1:5-7; Ebr. 12:1) Pran letan pour mazin lo legzanp bann dimoun ou konnen ki pe andire fidelman malgre zot sibir bann gro difikilte. Eski ou’n fer resers dan bann leksperyans ki’n ganny pibliye lo lezot ki’n pas dan menm difikilte ki kapab parey avek sa ki pour ou? Tousala i kapab fortifye ou en kantite.
16. Ki mannyer Bondye i donn nou lafors kan nou rankontre diferan leprev?
16 Trwazyenmman, mazinen ki Zeova i en “Papa ki ranpli avek labonte, Bondye ki touzour donn konsolasyon. I konsol nou dan nou bann soufrans pour ki nou osi nou a kapab konsol tou bann ki dan soufrans, par sa konsolasyon ki nou menm nou’n gannyen avek li.” (2 Kor. 1:3, 4) I paret konmsi Bondye pe debout dan nou kote pour ankouraz nou e donn nou lafors, pa zis dan soufrans nou eksperyanse la konmela me dan tou “nou bann soufrans.” Sa i permet alors ki nou osi nou kapab rekonfort lezot ki pas dan tou sort “soufrans.” Pol li menm ti eksperyans ki sa parol i vre.—2 Kor. 4:8, 9; 11:23-27.
17. Ki mannyer Labib i kapab ed nou fer fas avek lenkyetid dan lavi?
17 Katriyenmman, nou annan Parol Bondye ki “itil pour ansennyen, pour koriz lerer, pour remet drwat, e pour formen pour viv byen selon Bondye, pour ki dimoun ki servi Bondye i byen prepare e byen ekipe pour fer tou aksyon ki bon.” (2 Tim. 3:16, 17) Parol Bondye pa zis fer nou “prepare” e “ekipe pour fer tou aksyon ki bon.” I osi ed nou pour fer fas avek bann lenkyetid dan lavi. I fer nou ‘byen prepare’ e ‘byen ekipe.’ Langaz orizinal ki’n ganny tradwir “byen ekipe” oubyen konpletman ekipe i literalman vedir “annan tou lekipman.” Dan letan lontan, sa mo ti ganny servi pour dekrir en bato ki ti annan tou son lekipman pour al en vwayaz, oubyen en masin ki ti kapab fer tou sa ki i ti merit fer. Pareyman, atraver son Parol, Zeova i fourni nou avek tou sa ki nou bezwen pour fer fas avek nenport sitiasyon ki nou kapab rankontre. An rapor avek sa, nou kapab dir, “Si Bondye i permet, avek son led mon kapab siporte.”
Delivrans dan tou nou lenkyetid
18. Lo kwa nou devret konsantre ki pou ed nou pour andire fidelman?
18 Senkyenmman, reste touzour konsantre lo sa laverite merveye ki Zeova pou byento delivre limanite avek tou bann lenkyetid, soufrans ek problenm. (Ps. 34:19; 37:9-11; 2 Pyer 2:9) Kan tousala pou’n ganny akonplir, nou delivrans ki nou pou gannyen avek nou Bondye pa pou zis avek lenkyetid ek problenm denozour me nou pou osi annan sa loportinite pour ganny lavi eternel ki swa dan lesyel avek Zezi ouswa dan paradi lo later.
19. Dan ki fason nou kapab annan landirans avek fidelite?
19 Ziska ki sa i arive, nou pou kontinyen rankontre bann kondisyon enkyetan dan sa lemonn mesan. Nou pe vreman esper avek enpasyans sa letan kan sa bann keksoz pou nepli egziste! (Ps. 55:6-8) Annou gard antet ki sa landirans ki nou demontre avek fidelite i prouve ki Dyab i en manter. Fotespere ki nou ganny lafors atraver nou lapriyer, lasosyasyon frer ek ser, e par gard antet ki i annan lezot ki pe rankontre lezot leprev parey nou menm. Kontinyen reste byen prepare e konpletman ekipe par byen servi Parol Bondye. Pa les ou konfyans ki ou annan dan sa “Bondye ki touzour donn konsolasyon” perdi. Mazinen ki “lizye Zeova i lo bann dimoun drwat, e son zorey i tann zot bann lapel o sekour.”—Ps. 34:15.
Eski ou kapab reponn?
• Ki mannyer David ti santi anver bann lenkyetid i ti fer fas avek?
• Ki konfyans Lerwa Salomon ti annan?
• Kwa ki ed nou fer fas avek sa ki Zeova i permet?
[Kestyon]
[Portre lo paz 19]
Salomon ti asire ki Zeova ti pou azir an faver Son pep ki ti annan bokou lenkyetid