Bann pwen enteresan dan liv Zan
Parol Zeova i vivan
Bann pwen enteresan dan liv Zan
ZAN, “sa disip ki Zezi ti kontan” i sa dernyen dimoun ki ti ganny enspire pour ekrir en resi lo lavi ek minister Kris. (Zan 21:20) Levanzil Zan ti ganny ekrir an 98 N.L., e laplipar keksoz ki i ti ekrir pa ganny mansyonnen dan lezot Levanzil.
Zapot Zan ti ekrir son Levanzil avek en lobzektif kler antet. Konsernan bann keksoz ki i ti ekrir, i ti dir: “Sa bann keksoz ki la in ganny ekri pour ki zot krwar ki Zezi i limenm Mesi, Garson Bondye e ki avek sa lafwa dan li zot a ganny lavi.” (Zan 20:31) Son mesaz i vreman annan en gran valer pour nou.—Ebr. 4:12.
“LA LANYO BONDYE”
Lemoman ki i ti vwar Zezi, Zan Batis ti dir avek konfyans: “La Lanyo Bondye ki efas pese lemonn.” (Zan 1:29) Anmezir ki Zezi ti travers Samari, Galile, Zide ek bann rezyon dan les avek Zourden pour prese, ansennyen e fer bann mirak, ‘bokou dimoun ti vin kot li e zot ti krwar dan li.’—Zan 10:41, 42.
Rezireksyon Lazar ti enn parmi bann mirak pli ekstraordiner ki Zezi ti fer. Kan zot ti vwar sa zonm ki ti’n mor pour kat zour revin vivan, bokou ti annan lafwa dan Zezi. Parkont, bann sef pret ek Farizyen ti fer konplo pour touy Zezi. Alors Zezi ti sorti laba e al “dan en landrwa pre avek dezer dan en lavil ki ti apel Efraim.”—Zan 11:53, 54.
Larepons pour bann kestyon lo Labib:
1:35, 40—Apard Andre, lekel sa disip ki ti pe debout ansanm avek Zan Batis? Ekriven sa Levanzil pa zanmen servi son non pour idantifye son lekor o kontrer i touzour pe refer avek Zan Batis konman “Zan.” Alors, sa disip ki pa ganny idantifye i evidaman ekriven sa Levanzil li menm e sa se Zan.
2:20—Ki tanp ki’n “pran karannsis an pour konstrir”? Bann Zwif ti pe refer avek rekonstriksyon tanp Zorobabel par Lerwa Erod sorti Zida. Dapre istoryen Josephus, sa travay ti konmans pandan dizwityenm lannen ki Lerwa Erod ti pe rennyen oubyen an 18/17 A.N.L. I ti pran wit an pour konstrir landrwa sen dan tanp e lezot striktir prensipal. Parkont, travay lo lezot batiman dan tanp ti kontinyen ziska apre Lapak 30 N.L. kan bann Zwif ti dir ki i ti pran 46 an pour konstrir li.
5:14—Eski pese ki fer nou malad? Pa neseserman. Sa zonm ki Zezi ti geri ti’n malad pour 38-t-an akoz lenperfeksyon ki i ti’n erite. (Zan 5:1-9) Sa ki Zezi ti oule dir i ki mizerikord ti’n ganny demontre anver sa zonm e aprezan i ti devret swiv semen delivrans e aret fer pese volonterman akoz si i pa fer li i ti pou ganny en keksoz ki pli move ki sa maladi. Sa zonm ti pou kapab koupab pour komet en pese ki pa kapab ganny pardonnen kot i ti pou merit lanmor san ganny okenn rezireksyon.—Mat. 12:31, 32; Lik 12:10; Ebr. 10:26, 27.
5:24, 25—Lekel sa bann ‘ki pe sorti dan lanmor e pas dan lavi’? La Zezi pe koz lo bann ki ti’n deza mor spirityelman e ki apre ki zot in tann son parol, zot ti met zot lafwa dan li e aret fer bann move keksoz ki zot ti pe fer oparavan. Zot “sorti dan lanmor e pas dan lavi” dan le sans ki sa kondannasyon lanmor i ganny retire lo zot e zot aprezan annan sa lespwar pour ganny lavi eternel akoz lafwa ki zot annan dan Bondye.—1 Pyer 4:3-6.
5:26; 6:53—Ki savedir annan ‘lavi dan nou menm’? Pour Zezi Kri, sa ti vedir ganny de abilite avek Bondye e sa se abilite pour donn imen posibilite pour annan en bon relasyon avek Zeova e sa pouvwar pour donn lavi par resisit bann mor. Pour son bann disip, ‘annan lavi dan zot’ ti vedir annan lavi dan en sans konplet. Bann Kretyen swazir i ganny sa kan zot ganny resisite pour viv dan lesyel. Bann ki fidel e ki annan lespwar pour viv lo later pou eksperyans sa lavi konplet selman apre ki zot pas tes final ki ariv zis apre Renny Milener Kris.—1 Kor. 15:52, 53; Rev. 20:5, 7-10.
6:64—Eski lemoman ki Zezi ti swazir Zida Iskaryot i ti konnen ki Zida ti pou trai li? Aparaman non. Parkont, dan en lokazyon pandan lannen 32 N.L., Zezi ti dir son zapot ki enn parmi zot ti en manter. I tre probab ki se dan sa moman ki Zezi ti remarke ki ti annan “konmansman” en move latitid dan Zida Iskaryot.—Zan 6:66-71.
Leson pour nou:
2:4. Zezi ti pe fer Mari vwar ki konman Garson Byenneme Bondye, i devret swiv gidans ki son Papa ki dan lesyel i donn li vi ki i’n batize e ganny swazir par Li. Menm si Zezi ti fek konmans son minister, i ti konsyan sa ler oubyen letan ki i ti pou fer sa travay ki i ti’n ganny dezinyen pour fer, enkli son lanmor konman en sakrifis. Ni menm Mari ki ti enn parmi son fanmir pros pa ti pou kapab anpes li fer lavolonte Bondye. Nou osi nou devret servi Bondye avek menm determinasyon.
3:1-9. Legzanp en dirizan Zwif ki apel Nikodenm i ansenny nou de leson. Premyerman, Nikodenm ti demontre limilite, bon zizman, e i ti konsyan son prop bezwen spirityel ler i ti rekonnet senp garson en sarpantye konman en ansennyan ki ti’n ganny anvoye par Bondye. Ozordi bann vre Kretyen i devret annan limilite. Dezyenmman, Nikodenm ti ezite pour vin en disip kan Zezi ti ankor lo later. Petet sa ti akoz i ti annan lafreyer pour zonm e osi pozisyon ki i ti annan dan Sannedren oubyen lanmour ki i ti annan pour son larises. Atraver sa nou kapab aprann en leson enportan: Nou pa devret les sa bann tandans anpes nou ‘pran nou poto martir e swiv Zezi.’—Lik 9:23.
4:23, 24. Pour ki nou ladorasyon i akseptab devan Bondye, fodre ki i an akor avek laverite ki sorti dan Labib e i devret ganny gide par lespri sen.
6:27. Travay pour “nouritir ki dir pour lavi eternel” i vedir fer zefor pour satisfer nou bezwen spirityel. Nou pou ere si nou fer sa.—Mat. 5:3.
6:44. Zeova i personelman pran swen avek nou. I atir nou ver son Garson par tous nou endividyelman atraver sa travay predikasyon e par ed nou pour sezi e aplik laverite ki sorti dan Labib par mwayen Son lespri sen.
11:33-36. Eksprim nou santiman pa en siny febles.
‘KONTINYEN SWIV LI’
Pandan ki Lapak lannen 33 N.L. ti aprose, Zezi ti retourn Betani. Le 9 Nizan, i ti vin Zerizalenm lo ledo en bourik. Le 10 Nizan, Zezi ti vin kot tanp ankor enn fwa. Pour reponn son lapriyer an rapor avek sanktifikasyon non son Papa, en lavwa sorti dan lesyel ti dir: “Mon’n deza glorifye li e mon pou glorifye li ankor.”—Zan 12:28.
Pandan ki zot ti manz repa Lapak, Zezi ti donn son bann disip bann konsey enportan avan ki i ti ale e priy pour zot. Apre ki i ti ganny arete, zize e kloute lo en poto, Zezi ti ganny resisite.
Larepons pour bann kestyon lo Labib:
14:2—Dan ki fason Zezi ti pou “prepar en plas” dan lesyel pour son bann disip fidel? Sa ti pou enplik al devan Bondye e prezant Li valer son disan, sa ti pou konfirm sa nouvo lalyans. Sa preparasyon ti pou osi enplik sa moman kot Kris ti pou ganny son pouvwar konman lerwa e ki apre sa bann Kretyen swazir ti pou konmans ganny resisite pour zot al dan lesyel.—1 Tesa. 4:14-17; Ebr. 9:12, 24-28; 1 Pyer 1:19; Rev. 11:15.
19:11—Eski Zezi ti pe koz lo Zida Izkaryot kan i ti pe koz avek Pilat konsernan sa zonm ki ti livre Li? Olye refer direkteman avek Zida oubyen en dimoun spesifik, i paret ki Zezi ti pe mazin tou sa bann ki ti koupab pour fer li ganny touye. Sa ti enkli Zida, “bann sef pret ek konsey an antye,” e menm “lafoul” ki ti ganny persyade pour demande ki Barabas i ganny large dan son plas.—Mat. 26:59-65; 27:1, 2, 20-22.
20:17—Akoz Zezi ti dir Mari Magdalenn pa tous li? I kler ki Mari ti tyonbo Zezi akoz i ti krwar ki Zezi ti pe deswit al mont dan lesyel e ki i pa ti pou vwar li ankor. Me pour asir li ki pa ti ankor ler pour li ale, Zezi ti dir li pa tous li me plito ale e dir son bann disip ki in resisite.
Leson pour nou:
12:36. Pour nou kapab vin “zanfan lalimyer” oubyen bann ki annan lalimyer, nou bezwen ganny konnesans egzakt lo Parol Bondye, Labib. E apre sa nou bezwen servi sa konnesans pour retir lezot dan fernwanr spirityel e anmenn zot dan lalimyer Bondye.
14:6. Napa lezot fason nou kapab ganny laprouvasyon Bondye apard ki atraver Zezi Kri. Sel fason pour nou apros avek Zeova se zis ler nou demontre lafwa dan Zezi e swiv son legzanp.—1 Pyer 2:21.
14:15, 21, 23, 24; 15:10. Lobeisans anver Bondye pou ed nou pour reste dan lanmour Bondye e dan lanmour son Garson.—1 Zan 5:3.
14:26; 16:13. Lespri sen Zeova i azir konman en ansennyan e i fer nou rapel bann keksoz ki nou’n deza aprann oparavan. I osi travay pour revel laverite. Anplis ki sa, i kapab ed nou pour ganny plis konnesans, lasazes, konprenezon, bon zizman e annan sa abilite pour reflesir. Alors nou devret persevere dan nou lapriyer, e priy spesifikman pour ganny lespri sen.—Lik 11:5-13.
21:15, 19. Zezi ti demann Pyer si i ti kontan li plis ki “sa bann ki la,” setadir sa bann pwason ki ti devan li. La Zezi ti pe met lanfaz lo lenportans pour Pyer swazir pour toultan swiv li olye pourswiv son karyer dan lapes. Apre ki nou’n lir sa resi dan sa Levanzil, fotespere ki nou ogmant nou determinayon pour kontan Zezi plis ki lezot keksoz ki kapab atrakte nou. Wi, annou kontinyen swiv li avek tou nou leker.
[Portre lo paz 9]
Ki nou kapab aprann atraver legzanp Nikodenm?