Maryaz e fer zanfan dan letan lafen

“Letan i kourt.”—1 KOR. 7:29.

1. (a) Tou resaman, ki sanzman ki’n vin enn parmi bann problenm sa “letan difisil”? (b) Akoz nou kapab enkyet ki bann valer familyal pe sanze?

PAROL Bondye ti predir ki dan “letan lafen” ti pou annan lager, tranblemandter, lafamin, ek lepidemi. (Dan. 8:17, 19; Lik 21:10, 11) Labib ti osi averti ki dan sa letan kritik dan listwar imen, i ti pou annan bann gran sanzman dan lasosyete. Boulvers dan lafanmir i enn parmi bann problenm ki  nou bezwen fer fas avek dan “letan difisil” e kritik ki nou pe viv ladan. (2 Tim. 3:1-4) Akoz sa bann sanzman i kapab enkyet nou? Akoz zot telman annan en gran lenfliyans partou kote e sa i kapab enfliyans lafason ki nou konman Kretyen, nou vwar maryaz e si nou pou annan zanfan. Dan ki sans?

2. An zeneral, ki mannyer dimoun i konsider maryaz ek divors konmela?

² Konmela, ou remarke ki i fasil e komen pour divorse, e dan bokou pei lakantite dimoun ki divorse pe vreman ogmante. Parkont, nou bezwen toultan gard an tet ki pwennvi Zeova lo maryaz ek divors i konpletman diferan avek sa ki sa lemonn i konsider konman normal. Alor, ki pwennvi Zeova lo maryaz ek divors?

3. Ki mannyer Zeova ek Zezi i konsider maryaz?

³ Zeova i ekspekte ki bann ki’n marye i gard fidelman zot promes. Ler Zeova ti ini ansanm sa premye zonm ek sa premye madanm dan maryaz, i ti dir ki “en zonm . . . i devret atase avek son madanm e zot devret vin en sel laser.” Pli tar, Zezi Kri ti dir sa menm parol e i ti azout sa bout: “Alor sa ki Bondye in ini ansanm zonm pa devre separe.” I ti osi dir: “Si en zonm i divors son madanm pour okenn rezon, eksepte si i’n tronp li, e i marye avek en lot madanm, i komet adilter.” (Zen. 2:24; Mat. 19:3-6, 9) Pour sa rezon, Zeova ek Zezi i konsider maryaz konman en langazman pour lavi diran ki fini selman ler enn ant sa de dimoun i mor. (1 Kor. 7:39) Vi ki maryaz i en laranzman sakre, deside pour divorse i en keksoz tre serye. Anfet, Parol Bondye i dir ki Zeova i ay divors si napa en rezon dapre Labib. *—Lir Malaki 2:13-16; 3:6.

Maryaz i en responsabilite serye

4. Akoz serten zenn Kretyen i regrete ki zot in taye pour marye?

⁴ Sa lemonn koronpi ki nou pe viv ladan i zis mazin seks. Tou le zour, nou ganny bonbarde avek bann portre ki annan pour fer avek seksyalite. I evidan ki sa i kapab annan en lefe lo nou, e spesyalman lo nou bann zenn ki nou kontan dan kongregasyon. Ki mannyer bann zenn Kretyen i devret reazir anba sa move lenfliyans ki kapab eksit zot bann dezir seksyel, menm si zot pe sey reziste? Serten in esey rezourd sa sitiasyon par marye ler zot ankor byen zenn. Zot mazinen ki dan sa fason, zot pa pou tonm dan limoralite seksyel. Selman, i pa’n pran bokou letan pour ki serten i regret zot desizyon. Akoz? Ler zot in konmans abitye avek lavi maryaz, zot realize ki zot napa bokou keksoz ki zot tonm dakor lo la dan lavi tou le zour avek zot nouvo msye oubyen madanm. Alors, nou kapab konpran akoz sa bann koup i kapab vwar lavi maryaz difisil.

5. Kwa ki pou ed bann koup reste fidel avek zot ve maryaz? (Vwar osi sa not anba lo paz.)

⁵ Si nou’n marye avek en dimoun, menm en Kretyen parey nou, ki vreman diferan avek sa ki nou ti ekspekte, nou pou kapab vwar nou lavi maryaz byen difisil. (1 Kor. 7:28) Selman, menm si i vreman en defi, bann vre Kretyen i konnen ki en divors ki napa en rezon dan Labib pa en solisyon akseptab si zot maryaz pa ere. Alors, bann ki kontinyen fer bokou zefor pour ki zot maryaz pa kase akoz zot anvi reste fidel avek zot ve maryaz, i merit respe, lasistans ek lanmour kongregasyon Kretyen. *

6. Ki mannyer bann zenn Kretyen i devret vwar sa posibilite pour marye en zour?

⁶ Eski ou ankor en zenn selibater? Si i leka, ki mannyer ou devret vwar sa posibilite pour marye? Ou kapab evit en kantite latet fermal si ou espere ziska ler ou fizikman, mantalman e spirityelman pare pour  marye avan ou konmans pwente avek en lot Kretyen. I vre ki Labib pa dir ki laz nou devret marye. * Parkont, Labib i dir ki i byen pour espere ziska ki sa moman lazenes kot bann dezir seksyel i tre for in pase. (1 Kor. 7:36, NW) Akoz? Akoz en dezir seksyel ki for i kapab anpes nou pour annan en bon zizman e fer nou fer en move desizyon ki nou kapab regrete pli tar. Zis mazinen ki konsey Zeova lo maryaz i saz e i pour nou prop benefis ek boner.—Lir Izai 48:17, 18.

Annan zanfan i en keksoz serye

7. Ki arive avek serten zenn koup e akoz sa i kapab afekte zot maryaz?

⁷ Serten zenn koup ki fek sorti dan ladolesans pe deza vin paran. Zot pa’n ganny ase letan pour byen konn kanmarad e la zot pe ekspekte en pti baba ki demann latansyon 24 lo 24. I tou natirel ki sa manman i donn bokou latansyon sa pti baba e la sa msye ki ankor zenn li osi i kapab vin zalou. Deplis, zot mank sonmey akoz zot bezwen pran swen avek sa pti baba e sa i kapab met sa koup anba bokou presyon ki kapab anmenn problenm dan zot relasyon. Zot konmans realize ki zot nepli osi lib. Zot nepli kapab al kot zot anvi e fer sa ki zot anvi osi libreman parey avan sa pti baba ti ne. Ki mannyer zot devret vwar zot nouvo sitiasyon?

8. Ki mannyer en dimoun i devret konsider son responsabilite ler i’n vin paran, e akoz?

⁸ Zis parey de dimoun i bezwen konsider maryaz konman en keksoz serye, annan zanfan i devret ganny konsidere konman en responsabilite ek privilez sorti kont Bondye. En koup Kretyen i devret pare pour fer nenport ki azisteman ki neseser apre nesans en pti baba e fer zot mye pour vin bann nouvo paran responsab. Vi ki se Zeova ki ti donn imen sa abilite pour fer zanfan, paran i devret konsider sa pti baba konman “en leritaz sorti kot Zeova.” (Ps. 127:3) En manman ek en papa Kretyen pou fer zefor pour desarz zot responsabilite konman paran “dan Senyer.”—Efe. 6:1.

9. (a) Kwa ki enplike avek elve zanfan? (b) Ki sa msye i kapab fer pour ed son madanm reste for spirityelman?

⁹ Elve en zanfan i demann plizyer lannen kot paran i bezwen fer sakrifis. I demann bokou letan ek lenerzi. En mari Kretyen i bezwen konpran ki plizyer lannen apre ki sa pti baba in ne, son madanm pa pou kapab konsantre parey avan dan bann renyon e i pou annan pli ptigin letan pour etidye e medite lo Labib. Sa i kapab afekte son spirityalite. En papa responsab pou fer sa ki i kapab pour ede pran swen avek sa pti baba. I kapab esey ed li kot i manke dan bann renyon par diskit avek li sa progranm kot lakour. I osi kapab ede par pran swen avek sa pti baba pour ki son madanm i kapab annan en sans pour byen partisip dan predikasyon.—Lir Filipyen 2:3, 4.

10, 11. (a) Ki mannyer zanfan i ganny elve dan “lenstriksyon” Zeova? (b) Akoz nou bezwen felisit bokou paran?

¹⁰ Vin en paran responsab i enplik plis  ki senpleman nouri, donn lenz ek landrwa reste e osi pran swen avek lasante son zanfan. E spesyalman dan sa letan danzere ki nou pe viv ladan, depi byen boner bann zanfan i bezwen aprann bann prensip moral ki pou gid zot dan zot lavi. Zanfan i devret ganny elve dan “ledikasyon ek lenstriksyon Senyer.” (Efe. 6:4) Sa “lenstriksyon” i enplik fer antre bann panse Zeova dan lespri en zanfan depi ler i en pti baba e osi ler i vin en adolesan ki kapab en letan bokou pli difisil.—2 Tim. 3:14, 15.

¹¹ Ler Zezi ti demann bann ki oule swiv li pour ‘fer tou pep vin son bann disip,’ i evidan ki sa ti osi enplik paran pour ed zot zanfan vin disip Kris. (Mat. 28:19, 20) Sa i pa fasil akoz sa bann presyon ki sa lemonn pe met lo bann zenn. Alors, bann paran ki arive ed zot zanfan vin bann Kretyen batize i merit bokou felisitasyon delapar kongregasyon. Zot in “ganny laviktwar” lo lenfliyans lemonn par zot lafwa ek zot fidelite konman bann paran Kretyen responsab.—1 Zan 5:4.

Koup ki napa zanfan oubyen bann ki selibater pour en bon rezon

12. Akoz serten Kretyen i deside pour reste selibater pour en serten letan?

¹² Vi ki “letan i kourt” e sitiasyon lemonn pe sanze, Parol Bondye pe ankouraz nou pour egzamin bann lavantaz en selibater. (1 Kor. 7:29-31) Pour sa rezon, serten Kretyen i deside pour reste selibater pour lavi oubyen pour detrwa lannen avan zot marye. I byen ki zot pa servi zot liberte pour rod zot lentere personnel. Bokou i reste selibater pour servi Zeova “san rezerv.” (Lir 1 Korentyen 7:32-35.) Serten sa bann Kretyen selibater i pionye oubyen Betelit. Lezot i anvi vin pli itil dan lorganizasyon Zeova par asiste Lekol Formasyon Ministeryel. Anfet, bann ki ti dan servis aplentan ler zot ti selibater e ki ti deside pour marye apre, i santi ki zot maryaz i ankor pe benefisye avek bann bon leson ki zot ti aprann pandan sa bann lannen ki zot ti selibater.

13. Akoz serten Kretyen i deside pour pa fer zanfan?

¹³ Dan serten pei, i’n annan en lot sanzman, plizyer koup i deside pour pa fer zanfan. Serten i napa zanfan pour bann rezon ekonomik, lezot i fer sa swa pour zot kapab pli lib pour pourswiv en karyer e ganny bokou larzan. Parmi bann Kretyen i annan serten koup osi ki deside pour pa fer zanfan. Souvandfwa sa i permet zot pour zot pli lib dan zot servis pour Zeova. Sa pa vedir ki sa bann koup napa en lavi maryaz normal. Me  selman, zot deside pour met Rwayonm avan serten privilez ki vin avek lavi maryaz. (1 Kor. 7:3-5) Serten sa bann koup i servi Zeova ek zot bann frer ek ser konman sirveyan rezyonal e distrik oubyen dan Betel. Lezot i pionye oubyen misyonner. Zeova pa pou oubliy zot travay ek lanmour ki zot in demontre pour son non.—Ebr. 6:10.

‘Problenm dan lavi’

14, 15. Ki “problenm” serten paran Kretyen i rankontre?

¹⁴ Zapot Pol ti dir bann Kretyen ki ti’n marye ki zot ti pou rankontre bann ‘problenm dan lavi.’ (1 Kor. 7:28) Sa i kapab enplik bann problenm lasante ki sa koup, zot zanfan oubyen zot paran aze i rankontre. I kapab osi bann difikilte ek latristes ki relye avek elve zanfan. Parey i ti ganny mansyonnen okonmansman sa lartik, Labib ti predir ki dan “bann dernyen zour” ti pou annan “letan difisil”. Parmi sa bann keksoz difisil ti pou annan bann zanfan ki “dezobeisan anver zot paran.”—2 Tim. 3:1-3.

¹⁵ Elve zanfan i en gro defi pour bann ­paran Kretyen. Nou pa ganny eparnyen avek bann move konsekans sa “letan difisil” konmela. Alors, paran i bezwen kontinyelman lalit avek sa lenfliyans tre danzere ki sa “lemonn” i kapab annan lo zot zanfan. (Efe. 2:2, 3) E pa touzour ki ou ranport laviktwar dan sa lalit! Si en garson oubyen en fiy dan en fanmir Kretyen i deside pour aret servi Zeova, sa i vreman en “problenm” oubyen soufrans pour sa paran ki’n esey elve li dan laverite selon Bondye.—Prov. 17:25.

“Sa pou en lepok gran soufrans”

16. Ki sa “gran ladetres” ki Zezi ti predir?

¹⁶ Nenport ki “problenm” ki nou kapab rankontre dan lavi maryaz oubyen avek zanfan, pa pou parey sa gran ladetres ­oubyen “gran soufrans” ki pou bokou pli grav. Dan son profesi konsernan son prezans ek konklizyon sa move sistenm, Zezi ti dir: “Sa pou en lepok gran soufrans [oubyen “gran ladetres,” NW], pli terib ki tou sa ki’n deza annan avan, depi konmansman lemonn ziska konmela, e pa pou zanmen ariv ankor.” (Mat. 24:3, 21) Zezi ti dir pli tar ki en gran lafoul dimoun ti pou pas atraver sa “gran ladetres.” Parkont, lemonn Satan pou lans en gran latak final kont bann ­Temwen Zeova. I evidan alor ki sa letan pou difisil pour nou tou, adilt konman zanfan.

17. (a) Akoz nou devret get lavenir avek konfyans? (b) Kwa ki devret ed nou fer bann desizyon an sa ki konsern maryaz e fer zanfan?

¹⁷ Toudmenm, nou pa devret sitan enkyet konsernan lavenir. Bann paran ki fidel avek Zeova i annan lespwar ki zot pou ganny proteze avek zot zanfan ki ankor ptipti. (Lir Izai 26:20, 21; Tsef. 2:2, 3; 1 Kor. 7:14) Alor pour la konmela, vi ki nou ­konsyan ki nou pe viv dan letan difisil, annou byen reflesir lo konman nou pe konsider maryaz e annan zanfan dan sa letan lafen. (2 Pyer 3:10-13) Dan sa fason, ki swa nou selibater ouswa marye, ki nou annan oubyen napa zanfan, nou pou anmenn ­loner e loue Zeova ek kongregasyon Kretyen.

[Not anba lo paz]

Revizyon

• Akoz bann zenn Kretyen pa devret taye pour marye?

• Kwa ki enplike avek elve zanfan?

• Akoz bokou Kretyen i selibater, oubyen si zot marye zot napa zanfan?

• Ki “problenm” bann paran Kretyen i kapab rankontre?

[Kestyon]

[Portre lo paz 25]

Akoz i saz pour bann zenn Kretyen pa taye pour marye

[Portre lo paz 26]

En mari i kapab fer bokou pour ed son madanm annan en bon partisipasyon dan bann aktivite spirityel