Nou bezwen ganny libere!

EN MIN obor lavil Pittsburgh, Pennslyvania Leta-z-ini, ti en sel kou ranpli avek en kantite delo. Nef miner ti’n pri dan en trou, 73 met anba later. Trwa zour pli tar, zot ti ganny tire dan sa min, sen e sof. Kote ki zot ti ganny sekour?

Par servi en map pour sa min ek en lenstriman ki apel Global Positioning System, (en lenstriman ki ganny servi pour konn pozisyon) en lekip sovtaz ti fouy en trou 65 santimet larzer e fer desann en bwat, ki en dimoun ti kapab antre ladan, kot sa bann zonm ti ete. Enn par enn zot ti ganny anmennen anler dan sa bwat lo sirfas, an deor sa trou kot zot ti’n kapab perdi zot lavi. Zot ti byen kontan, soulaze e rekonesan anver bann ki ti vin sekour zot?

Petet laplipar nou pa pou zanmen pri anba later parey sa nef miner oubyen trouv nou dan en sitiasyon danzere, fas a fas avek lanmor. Kantmenm sa, nou tou nou bezwen ganny libere, vi ki nou pa kapab evit sa bann move lefe ki maladi, lavyeyes ek lanmor i anmennen. Patrias Zob, en zonm fidel ti fer resorti: “Zonm, ki fanm in donn nesans, i viv en ptigin letan e son lavi i ranpli avek problenm. Parey en fler ki’n fleri epi i ganny koupe, i disparet parey en lonbraz e i aret egziste.” (Zob 14:1, 2) Ozordi, apepre 3,500-z-an apre, sa parol i ankor vre, parski lekel antre nou ki kapab evit lanmor? Nenport ki landrwa nou ete oubyen nenport ki kantite swen nou pran avek nou lasante, nou tou nou bezwen ganny libere avek soufrans, lavyeyes ek lanmor.

Bann syantis ek lezot pe travay dir pour kapab fer dimoun viv pli lontan ki normalman imen i viv. En lorganizasyon in fer resorti ki zot bi se “pour anpes dimoun mor” e “pour ed son bann manm reisi dan zot zefor pour trouv en posibilite pour fer imen viv pour touzour.” Ziska prezan, menm avek bokou progre dan lasyans ek zot gran determinasyon pour zot resi, zot pa’n arive fer dimoun viv pli lontan ki 70-z-an oubyen 80-z-an, parey Moiz ti mansyonnen apepre 3,500 an pase.—Psonm 90:10.

Menm si ou santi parey Zob oubyen non, lo size lavi ek lanmor, nou pa kapab evit lanmor. O firamezir ki lannen i pase, ou osi ou pou ‘disparet zis parey en lonbraz,’ lwen avek ou bann zanmi, ou fanmir, ou lakour, ek tou sa ki ou’n akonplir. Lerwa Salomon ti ekrir: “Bann vivan i konnen ki zot pou mor, me bann mor, pa konn nanryen ditou, zot nepli annan saler, parski zot souvenir in ganny oubliye.”—Eklezyast 9:5.

Malerezman, parey Labib i eksplike se lanmor ki “pe dominen, konman en lerwa” zis parey en dirizan kriyel ki pe diriz limanite. Wi, lanmor i sa dernyen lennmi kont ki limanite i bezwen ganny libere. (Romen 5:14; 1 Korentyen 15:26) Nenport ki pli meyer lekip sovtaz avek sa pli bon formasyon ek lekipman dan lemonn pa pou kapab fer nanryen pour liber ou pour touzour. Parkont, Zeova, nou Kreater, in fer en tel laranzman pour liber limanite.