Rezet bann keksoz ki “napa valer”
Rezet bann keksoz ki “napa valer”
“Sa enn ki pe tay deryer bann keksoz ki napa valer i napa en bon motivasyon.”—PROV. 12:11.
1. Ki serten keksoz valer nou annan e ki sa pli bon fason pour servi zot?
KONMAN Kretyen, nou tou nou posed bann keksoz ki annan valer. Lo en serten degre sa i kapab enkli nou lasante ek lafors, nou kapasite entelektyel oubyen nou larzan. Akoz sa lanmour ki nou annan pour Zeova nou kontan pour servi sa bann keksoz dan son servis e pour swiv sa lankourazman: “Onor Zeova avek ou bann keksoz valer.”—Prov. 3:9.
2. Ki lavertisman Labib i donnen konsernan bann keksoz ki napa valer e ki mannyer sa lavertisman i ganny aplike dan son vre sans?
2 De lot kote, Labib i osi koz lo bann keksoz ki napa valer e i averti nou pour evite gaspiy nou letan ek lenerzi pour tay deryer sa bann keksoz. An rapor avek sa, annou egzamin sa parol dan Proverb 12:11: “Sa enn ki pe kiltiv son later pou rasazye avek dipen, me sa enn ki pe tay deryer bann keksoz ki napa valer i napa en bon motivasyon.” I fasil pour vwar ki mannyer sa Proverb i ganny aplike dan son vre sans. Si en zonm i depans son letan ek lenerzi par travay dir pour siport son fanmir, i tre probab ki li ek son fanmir pou santi zot ase an sekirite lo plan finansyel. (1 Tim. 5:8) Parkont, si i gaspiy son letan ek lenerzi pour tay deryer bann keksoz ki napa valer i demontre ki “i napa en bon motivasyon,” ni en bon zizman. I tre probab, ki en zonm koumsa pou trouv li dan bezwen.
3. Ki mannyer lavertisman ki Labib i donnen konsernan bann keksoz ki napa valer i aplik avek nou ladorasyon?
3 Be si nou aplik sa prensip dan proverb avek nou ladorasyon? Alors nou vwar ki en Kretyen ki fidelman travay dir dan servis Zeova i santi ki annan sa vre sekirite. I kapab annan konfyans ki i pour ganny benediksyon Bondye konmela menm e annan lasirans total konsernan son lespwar pour lavenir. (Mat. 6:33; 1 Tim. 4:10) Me, en Kretyen ki les li ganny distrer par bann keksoz ki napa valer i met son relasyon avek Zeova ek sa posibilite pour viv pour touzour an danze. Ki mannyer nou kapab evit sa? Nou bezwen rekonnet bann keksoz dan nou lavi ki “napa valer” e devlop sa determinasyon pour rezet zot.—Lir Tit 2:11, 12.
4. An zeneral, ki si sa bann keksoz ki napa valer?
4 Alors, ki sa bann keksoz ki napa valer? An zeneral, zot kapab nenport keksoz ki anpes nou servi Zeova avek tou nou leker. Sa i kapab enkli par egzanp, plizyer kalite detant. Byensir, detant i annan son plas dan nou lavi. Me ler nou pas tro bokou letan dan “lanmizman” e negliz nou bann aktivite an rapor avek nou ladorasyon, detant i vin en keksoz ki napa valer, e sa i kapab afekte nou relasyon avek Bondye. (Ekle. 2:24; 4:6) Pour evit sa, en Kretyen i devret aprann annan en balans, par vey byen ki mannyer i servi son letan, enn parmi son bann keksoz ki annan valer. (Lir Kolosyen 4:5.) Me, i annan bann keksoz ki bokou pli danzere ki detant. Parmi sa bann keksoz i bann fo bondye.
Rezet bann bondye ki napa valer
5. Ki mannyer sa mo “napa valer” i souvan ganny aplike dan Labib?
5 I enteresan pour note ki dan laplipar verse Labib kot sa mo “napa valer” i aparet, i’n ganny aplike avek bann fo bondye. Par egzanp, Zeova ti dir avek nasyon Izrael: “Zot pa devret fer pour zot bann fo bondye ki napa valer, ni fer en stati, ni kolonn sakre, e zot pa devret ekspoz e prostern devan okenn ros dan zot pei.” (Lev. 26:1) Lerwa David ti ekrir: “Zeova i gran e merit ganny loue pour touzour e nou devret annan lakrent pour li plis ki tou lezot bondye. Akoz tou lezot bondye bann nasyon zot bann bondye ki napa valer. Me Zeova, li i’n fer lesyel.”—1 Kron. 16:25, 26.
6. Akoz bann fo bondye napa valer?
6 Parey David ti endike, nou antoure avek bann laprev ki montre grander Zeova. (Ps. 139:14; 148:1-10) Pa i ti en privilez pour bann Izraelit ki ti dan sa lalyans avek Zeova! Pa zot ti bet pour rezet li e prostern devan bann stati ek pilye! Ler zot ti dan problenm, zot bann fo bondye ti vreman napa okenn valer, ni okenn pouvwar pour sov zot, ni zot bann adorater.—Ziz 10:14, 15; Iza. 46:5-7.
7, 8. Ki mannyer larises i kapab vin en bondye?
7 Dan bokou pei ozordi, dimoun i ankor prostern devan bann stati ki ganny fer par zonm e zis parey zot ti initil dan letan pase zot touzour initil ozordi. (1 Zan 5:21) Me, i annan lezot keksoz apard bann stati ki Labib i dekrir konman bann bondye. Par egzanp, annou egzamin sa parol ki Zezi ti dir: “Personn pa kapab servi de met; parski swa i pou deteste enn e kontan lot; swa i pou devoue anver enn e mepriz lot. Ou pa kapab servi Bondye ek larises an menm-tan.”—Mat. 6:24.
8 Ki mannyer “larises” i kapab vin parey en bondye? Pour pran en legzanp, mazin en ros ater dan en laplenn dan ansyen Izrael. Sa ros i kapab itil pour konstriksyon en lakaz oubyen en miray. De lot kote, si i ti ganny met dan sa landrwa konman en “kolonn sakre” oubyen konman en “stati,” i ti vin en lobstak pour pep Zeova. (Lev. 26:1) Pareyman nou bezwen larzan me i annan en fason apropriye pour servi li. Nou bezwen larzan pour viv e nou kapab byen servi li dan servis Zeova. (Ekle. 7:12; Lik 16:9) Me si tay deryer larzan i pas avan nou servis Kretyen, an realite larzan i vin en bondye pour nou. (Lir 1 Timote 6:9, 10.) Dan sa lemonn kot dimoun i vwar li telman enportan pour tay deryer larises, nou bezwen fer sir ki nou gard en pwennvi balanse lo sa size.—1 Tim. 6:17-19.
9, 10. (a) Ki mannyer en Kretyen i konsider ledikasyon? (b) Ki danze letid avanse i kapab anmennen?
9 En lot keksoz itil ki kapab vin en keksoz ki napa valer i ledikasyon. Nou anvi ki nou zanfan i ganny en bon ledikasyon pour ki zot kapab ganny zot lavi. Pli enportan ankor, en Kretyen byen edike i pli byen kapab lir Labib avek konprenezon, rezonn lo sa ki i’n lir e ariv lo en bon konklizyon. I osi ansenny laverite lo Labib avek konviksyon e dan en fason kler. I pran letan pour ganny en bon ledikasyon, me i pa en letan perdi.
10 Be ki nou pou dir lo letid avanse, ki ganny ofer dan en kolez oubyen liniversite? Bokou i konsider sa nivo ledikasyon konman tre enportan pour reisi dan lavi. Pourtan bokou parmi bann ki pourswiv sa bann letid i fini par ranpli zot lespri avek lasazes sa lemonn ki danzere. En tel ledikasyon i fer bann zenn gaspiy zot zenntan, en letan presye ki ti’n kapab ganny pli byen servi dan servis Zeova. (Ekle. 12:1) Petet i pa sirprann nou ki dan bann landrwa kot en kantite in resevwar en tel ledikasyon, i annan plis dimoun ki zanmen oparavan ki pa krwar dan Bondye. Olye depan lo sistenm ledikasyon sa lemonn pour ganny sekirite, en Kretyen pou met son konfyans dan Zeova.—Prov. 3:5.
Pa les dezir imen vin konman ou bondye
11, 12. Akoz Pol ti dir ki serten: “Zot vant i zot bondye”?
11 Dan son let pour bann Filipyen zapot Pol ti fer resorti en lot keksoz ki kapab vin en bondye. I ti koz konsernan serten ki ti oparavan adorater Bondye parey li e i ti dir: “Mon’n deza dir zot sa souvan, e la mon repet li ankor an pleran: bokou i viv en lavi konman lennmi [“poto,” NW] Kris. Zot pou ganny detrir, zot vant i zot bondye, . . . zot mazin zis keksoz sa later.” (Fili. 3:18, 19, nou ki’n met an italik.) Ki mannyer vant en dimoun i kapab vin en bondye?
12 I paret ki pour sa bann dimoun ki Pol ti konnen, sa lanvi pour satisfer zot bann dezir imen ti’n vin pli enportan ki servi Zeova ansanm avek Pol. Petet serten ti vreman manz tro bokou ziska zot ti vin gourman oubyen abiz lo lalkol ziska vin soular. (Prov. 23:20, 21; konpar Deterononm 21:18-21.) Petet lezot dimoun ti’n swazir pour profit omaksimonm bann loportinite ki zot ti annan dan lemonn ki zot ti pe viv ladan dan premye syek e ti nepli pe servi Zeova. Fotespere nou pa zanmen les sa lanvi pour en swadizan bon lavi fer nou ralanti dan nou servis ki nou ofer Zeova avek tou nou leker.—Kol. 3:23, 24.
13. (a) Ki si sa groker, e ki mannyer Pol ti dekrir li? (b) Ki mannyer nou kapab evite groker?
13 Pol ti mansyon en lot laspe fo ladorasyon. I ti ekrir: “Met an-mor bann dezir materyel ki dan zot: limoralite seksyel, lenpirte, pasyon, move dezir, move dezir pour akapar keksoz dimoun, [oubyen “groker,” NW] ki en form ladorasyon zidol.” (Kol. 3:5, nou ki’n met an italik.) Groker i sa lanvi pour ganny en keksoz ki pa pour nou. I kapab pour ganny keksoz materyel. I kapab enkli menm bann move dezir seksyel. (Egz. 20:17) Lefet ki en tel lanvi i parey avek komet idolatri oubyen ladorasyon en fo bondye, eski pa sa i devret fer nou reflesir? Zezi ti servi en deskripsyon kler pour montre akoz i enportan pour a tou pri kontrol en tel lanvi.—Lir Mark 9:47; 1 Zan 2:16.
Fer atansyon konsernan bann parol ki napa valer
14, 15. (a) Ki parol ki ti napa valer ti fer tonbe bokou Izraelit dan letan Zeremi? (b) Akoz sa bann parol ki Moiz ti dir ti annan valer?
14 Parol i kapab ganny enkli parmi bann keksoz ki napa valer. Par egzanp, Zeova ti dir avek Zeremi: “Bann profet i profetiz bann mansonz an mon non. Mon pa’n anvoy zot, ni donn zot lord oubyen koz avek zot. Zot in profetiz en fo vizyon, devinen, en keksoz ki napa valer, zot leker i ranpli avek riz.” (Zer. 14:14) Sa bann fo profet ti dir ki zot in koz o non Zeova, me zot ti pe promot zot prop lide ek lasazes. Alors, zot bann parol ti “en keksoz ki [ti] napa valer.” Zot parol pa ti vo nanryen e ti en vre danze pour pep Bondye. An 607 A.N.L., en kantite parmi bann dimoun ki ti pran aker sa bann parol ki ti napa valer ti ganny touye par bann larme Babilonnyen.
15 De lot kote, Moiz ti dir avek bann Izraelit: “Sa bann parol lavertisman ki mon pe dir zot ozordi i bezwen dan zot leker . . . Akoz sa bann parol pa bann parol ki napa valer pour zot me i vedir lavi pour zot, e par sa bann parol zot kapab viv lontan dan sa pei ki zot pe travers larivyer Zourden pour pran posesyon.” (Det. 32:46, 47) Wi, sa bann parol ki Moiz ti dir ti’n ganny enspire par Bondye. Alors, zot ti annan valer e ti vreman enportan pour byennet sa nasyon. Sa bann ki ti pran aker sa bann parol ti viv lontan e zot ti prospere. Fotespere nou touzour rezet bann parol ki napa valer e reste atase avek bann parol laverite ki annan valer.
16. Ki pwennvi nou annan konsernan sa bann parol ki bann syantis i dir ki kont Parol Bondye?
16 Eski nou tann dimoun koz lo bann keksoz ki napa valer ozordi? Wi. Par egzanp, serten syantis i dir ki teori lo evolisyon ek bann dekouvert syantifik dan lezot domenn i demontre ki i nepli enportan pour krwar dan Bondye, ki tou keksoz i kapab ganny eksplike par en prosesis natirel. Eski nou devret enterese par sa bann parol arogan? Byensir ki non! Lasazes imen i diferan avek lasazes Bondye. (1 Kor. 2:6, 7) Me, nou konnen ki ler lansennyman imen i kont sa ki Bondye in dir, i touzour bann lansennyman imen ki mal. (Lir Romen 3:4.) Malgre progre ki lasyans in fer dan serten domenn, lopinyon Labib lo lasazes imen i touzour en realite: “Parski lasazes dapre lemonn i en lafoli devan Bondye.” Konpare avek lasazes Bondye ki napa limit, sa ki bann imen i mazinen, napa okenn valer.—1 Kor. 3:18-20.
17. Ki mannyer nou devret konsider parol bann ki pretann Kretyen ek bann aposta?
17 Nou vwar en lot legzanp bann parol ki napa valer parmi bann sef relizye ki pretann zot Kretyen. Zot dir ki zot koz o non Bondye, me laplipar keksoz ki zot dir i pa baze lo Labib e i senpleman napa valer. Bann aposta osi i koz bann parol ki napa valer, par dir ki zot annan plis lasazes ki sa bann ki’n ganny apwente konman “lesklav fidel e pridan.” (Mat. 24:45-47) Me, bann aposta i koz konsernan zot prop lasazes e zot parol napa valer. Nenport dimoun ki ekout sa bann parol i kapab tonbe. (Lik 17:1, 2) Ki mannyer nou kapab evite ganny anbete par sa bann parol?
Ki mannyer pour rezet bann parol ki napa valer
18. Dan ki fason nou kapab aplik sa konsey ki trouve dan 1 Zan 4:1?
18 Zapot Zan ki ti byen a laz ti donn en bon konsey lo ki mannyer pour rezet bann keksoz ki napa valer. (Lir 1 Zan 4:1.) An rapor avek sa konsey ki Zan ti donnen, nou devret touzour ankouraz bann dimoun ki nou zwenn dan predikasyon pour teste bann lansennyman ki zot in gannyen par konpar li avek lansennyman Labib. Nou osi nou devret swiv sa prensip. Si nou tann okenn kritik konsernan laverite oubyen remark ki sali repitasyon kongregasyon, bann ansyen oubyen nenport ki parmi nou bann frer ek ser, nou pa devret deswit aksepte sa bann remark. Plito, nou devret demann nou lekor: “Eski sa enn ki pe fann sa parol pe azir an armoni avek sa ki Labib i dir? Eski sa bann parol oubyen lakizasyon i promot plan Zeova? Eski zot promot lape dan kongregasyon?” Nenport ki keksoz ki nou tande ki kapab detrir nou bann frer ek ser olye batir zot, i bann keksoz ki napa valer.—2 Kor. 13:10, 11.
19. Ki mannyer bann ansyen i fer sir ki zot parol pa bann parol ki napa valer?
19 Konsernan parol ki napa valer, bann ansyen osi i aprann en leson enportan. Kan zot bezwen donn konsey zot pa devret oubliye ki zot annan bann limit e zot pa devret donn konsey dapre zot konnesans personnel ki baze lo leksperyans ki zot in gannyen tou dilon zot lavi. Zot devret touzour refer avek sa ki Labib i dir. I annan en bon prensip ki ganny trouve dan sa parol ki zapot Pol ti dir: “Fodre pa al pli lwen ki sa ki’n ekrir.” (1 Kor. 4:6) Ansyen fodre pa ki zot al pli lwen ki sa ki’n ganny ekrir dan Labib. E deplis, zot pa devret al pli lwen ki sa bann konsey baze lo Labib dan bann piblikasyon sorti kot lesklav fidel e pridan.
20. Dan ki fason nou ganny ede pour rezet bann keksoz ki napa valer?
20 Ki swa sa bann keksoz ki napa valer i bann “bondye” parol oubyen lezot keksoz, tousala i vreman danzere. I pour sa rezon ki nou toultan bezwen priy Zeova pour ganny led pour rekonnet sa bann keksoz ki napa valer e rod son gidans lo ki mannyer pour rezet zot. Ler nou fer sa, i konmsi nou pe dir ansanm avek sa psalmis: “Fer mwan pa vwar sa ki initil e gard mwan vivan dan ou prop fason.” (Ps. 119:37) Dan sa lot lartik nou pou diskit plis lo lenportans pour aksepte gidans Zeova.
Eski ou kapab eksplike?
• An zeneral, ki keksoz “napa valer” nou devret rezete?
• Ki mannyer nou kapab evite ki larzan i vin parey en bondye?
• Dan ki fason bann dezir imen i kapab vin idolatri?
• Ki mannyer nou kapab rezet bann parol ki napa valer?
[Kestyon]
[Portre lo paz 13]
Pa zanmen les sa lanvi pour ganny keksoz materyel fer ou ralanti dan ou servis pour Zeova