Rod gidans Bondye dan tou keksoz
Rod gidans Bondye dan tou keksoz
“Sa Bondye i nou Bondye pour en letan endefini, wi pour touzour. Li menm ki pou gid nou ziska nou lanmor.”—PS. 48:14.
1, 2. Akoz nou devret swiv gidans Zeova plito ki annan konfyans dan nou prop lasazes e ki kestyon ki’n ganny souleve?
I FASIL pour nou konsider bann keksoz ki napa valer oubyen danzere konman bann bon keksoz. (Prov. 12:11) Si nou vreman anvi fer en keksoz ki pa byen pour en Kretyen fer, nou leker pou souvan envant bann bon rezon pour fer li. (Zer. 17:5, 9) Me, sa psalmis ti demontre lasazes ler i ti priy Zeova: “Anvoy ou lalimyer ek laverite pour ki zot diriz mwan.” (Ps. 43:3) I ti annan konfyans dan Zeova, me pa dan son prop lasazes ki ti limite e i pa ti kapab trouv en pli bon gidans ki gidans Zeova. Parey sa psalmis, nou devret rod gidans Zeova.
2 Me, akoz nou devret annan konfyans dan gidans Zeova plis ki tou lezot gidans? Kan eski nou devret rod son gidans? Ki latitid nou devret devlope pour nou benefisye avek son gidans e ki mannyer Zeova i gid nou ozordi? Nou pou diskit lo sa bann kestyon enportan dan sa lartik.
Akoz nou devret annan konfyans dan gidans Zeova?
3-5. Akoz nou kapab annan konfyans total dan gidans Zeova?
3 Zeova i nou Papa dan lesyel. (1 Kor. 8:6) I annan en konnesans byen aprofondi lo nou tou e i kapab lir sa ki dan nou leker. (1 Sam. 16:7; Prov. 21:2) Lerwa David ti dir avek Bondye: “Ou’n arive konnen ler mon asize e ler mon leve. Depi dan lwen ou’n egzamin mon panse. Tou parol ki ankor lo mon lalang, ou’n deza konnen ki mon pe al dir, O Zeova.” (Ps. 139:2, 4) Vi ki Zeova i konn nou tou tre byen, ki mannyer nou kapab doute ki i konnen kwa ki pli bon pour nou? Anplis ki sa, Zeova i sa enn ki pli saz. I vwar tou keksoz, menm pli o profon ki okenn imen e depi o konmansman i konnen ki pou arive alafen. (Iza. 46:9-11; Rom. 11:33) Zis Bondye tousel ki “posed lasazes.”—Rom. 16:27.
4 Deplis, Zeova i kontan nou e i touzour anvi sa ki pli bon pour nou. (Zan 3:16; 1 Zan 4:8) Konman en Bondye lanmour, i zenere anver nou. Disip Zak ti ekrir: “Tou don ekselan, tou kado parfe i sorti lao, kot Bondye, Papa tou lalimyer ki pa zanmen sanze, e kot ki napa menm lonbraz en sanzman.” (Zak 1:17) Bann ki les zot ganny gide par Bondye i benefisye en kantite atraver son zenerozite.
5 Pour fini, Zeova i tou pwisan. An rapor avek son pwisans, sa psalmis ti dir: “Nenport dimoun ki reste dan landrwa sekre sa enn Tre O pou reste anba lonbraz sa Enn Tou Pwisan. Mon pou dir avek Zeova: ‘Ou mon landrwa refiz ek mon landrwa proteksyon, mon Bondye dan ki mon pou met konfyans.’” (Ps. 91:1, 2) Ler nou swiv gidans Zeova, nou pe rod refiz kot sa Bondye ki toultan reisi. Menm si nou rankontre lopozisyon, Zeova pou siport nou. I pa pou dezapwent nou. (Ps. 71:4, 5; Lir Proverb 3:19-26.) Wi, Zeova i konnen kwa ki pli bon pour nou, i anvi sa ki pli bon pour nou e i annan sa pouvwar pour donn nou sa ki pli bon pour nou. Pa i ti pou bet pour nou rezet son gidans! Alors, kan eski nou bezwen sa gidans?
Kan eski nou bezwen gidans Bondye?
6, 7. Kan eski nou bezwen gidans Zeova?
6 An realite, nou bezwen gidans Bondye tou dilon nou lavi depi dan nou zenes ziska dan nou vye zour. Sa psalmis ti dir: “Parski sa Bondye i nou Bondye pour en letan endefini, wi pour touzour. Li menm ki pou gid nou ziska nou lanmor.” (Ps. 48:14) Parey sa psalmis, bann Kretyen ki saz pa pou zanmen aret rod gidans Bondye.
7 Byensir, i annan letan kot nou santi ki nou vreman bezwen ganny led deswit. Parfwa nou trouv nou dan bann “sitiasyon difisil,” petet akoz nou pe andir persekisyon, en maladi grav oubyen nou fek perdi en plas travay. (Ps. 69:16, 17) Dan bann ka parey, nou pou ganny rekonforte si avek konfyans nou tourn ver Zeova pour li donn nou lafors pour andire e gid nou pour fer bann bon desizyon. (Lir Psonm 102:17.) Me, nou osi bezwen son led dan lezot sirkonstans. Par egzanp, ler nou koz avek lezot konsernan sa bon nouvel Rwayonm, nou bezwen gidans Zeova si nou oule ki nou predikasyon i efikas. E sak fwa ki nou annan en desizyon pour fer, ki swa konsernan divertisman, labiyman ek nou laparans, frekantasyon, travay, ledikasyon oubyen lezot keksoz ankor, nou pou azir dan en fason saz selman si nou swiv bann gidans Zeova. An realite, nou bezwen gidans dan tou laspe nou lavi.
Danze ki i annan ler nou pa rod gidans Bondye
8. Kwa ki ti enplike ler Ev ti manz sa fri ki Bondye ti defann manze?
8 Parkont, pa bliye ki nou bezwen pare pour swiv gidans Zeova. Bondye pa pou fors nou pour swiv son gidans si nou pa anvi. Ev ti sa premye imen ki ti swazir pour pa swiv gidans Zeova e son legzanp i montre ki mannyer en move desizyon i kapab vin danzere. Mazin osi, kwa ki son aksyon ti enplike. Ev ti manz sa fri ki Bondye ti defann manze akoz i ti anvi “vin parey Bondye . . . [pour] konn sa ki bon ek sa ki move.” (Zen. 3:5) Par fer sa, i ti montre ki i ti oule pran plas Bondye, fer son prop desizyon konsernan sa ki byen ek sa ki mal olye swiv gidans Zeova. Alors, i ti rezet souvrennte Zeova. I ti oule vin son prop met. Son msye Adan ti swiv sa menm move semen.—Rom. 5:12.
9. An realite ki nou pe fer ler nou rezet gidans Zeova e akoz i vreman pa saz pour fer sa?
9 Ozordi, si nou pa swiv gidans Zeova, parey Ev nou montre ki nou pa pe rekonnet souvrennte Bondye. Par egzanp, zis mazin en dimoun ki devlop sa labitid pour get bann keksoz ki annan pour fer avek pornografi. Si i pe asosye avek kongregasyon i konn bann konsey Zeova konsernan sa topik. Nou pa devret menm mansyonn sa bann keksoz imoral alor en Kretyen pa pou zanmen anvi get sa bann keksoz pour resanti okenn plezir seksyel. (Efe. 5:3) Si en dimoun i rezet gidans Zeova, i pa pe aksepte son souvrennte e pe menm rezet Son lotorite. (1 Kor. 11:3) I vreman pa saz pour azir dan sa fason, akoz Zeremi ti dir: “I pa pour en imen ki pe marse pour diriz son lepa.”—Zer. 10:23.
10. Akoz nou devret servi nou liberte pour swazir dan en fason responsab?
10 Serten i kapab pa dakor avek parol Zeremi e santi ki lefet ki Zeova in donn nou sa liberte pour swazir, i pa devret kritik nou akoz nou pe servi sa liberte. Me pa bliye ki sa liberte pour swazir i en kado, an menm tan en responsabilite. Nou pour rann kont pour bann keksoz ki nou swazir pour dir e fer. (Rom. 14:10) Zezi ti dir: “Labous i koz sa ki deborde dan leker.” I ti osi dir: “Dan leker i sorti move panse ki fer dimoun touye, fer adilter, e fer bann move laksyon, vole, kalonmni, e malparl dimoun.” (Mat. 12:34; 15:19) Alors, nou parol ek aksyon i revel sa ki annan dan nou leker. Zot montre sa ki nou vreman ete. I pour sa rezon ki en Kretyen saz i rod gidans Zeova dan tou keksoz. Dan sa fason, Zeova i vwar ki sa dimoun i “annan leker drwat” e I pou “fer [li] dibyen.”—Ps. 125:4.
11. Ki nou aprann atraver listwar nasyon Izrael?
11 Mazin sa resi konsernan listwar nasyon Izrael. Kan sa nasyon ti fer bann bon swa par obeir komannman Zeova, Zeova ti protez zot. (Zoz. 24:15, 21, 31) Me laplipar ditan zot ti mal servi zot liberte pour swazir. Dan letan Zeremi, Zeova ti dir sa bann parol swivan konsernan nasyon Izrael: “Zot pa ti ekout mwan, zot pa ti ni menm ouver zot zorey, me zot ti mars dapre zot desizyon, dapre lanvi zot move leker, ki ti fer zot al an aryer e pa an avan.” (Zer. 7:24-26) Pa i tris! Fotespere nou pa zanmen rezet gidans Zeova akoz nou lantetman oubyen dezir egois pour mars dan nou prop konsey ki pour fer nou “al an aryer e pa an avan”!
Kwa ki neseser pour swiv gidans Bondye?
12, 13. (a) Ki sa kalite ki fer nou anvi swiv gidans Zeova? (b) Akoz i enportan pour annan lafwa?
12 Nou lanmour pour Zeova i fer nou anvi swiv son gidans. (1 Zan 5:3) Me, Pol ti met lanfaz lo en lot keksoz ki nou bezwen ler i ti dir: “Nou pe mars dan lafwa non pa avek nou prop lizye.” (2 Kor. 5:6, 7) Akoz lafwa i enportan? Bon, Zeova i gid nou dan “bann santye ladrwatir,” me sa bann santye pa gid ver larises oubyen privilez dan sa lemonn. (Ps. 23:3) I pour sa rezon ki nou lizye lafwa i bezwen konsantre lo bann rekonpans spirityel ki nou gannyen ler nou servi Zeova e ki pa kapab ganny konpare avek okenn keksoz. (Lir 2 Korentyen 4:17, 18.) E lafwa i ed nou pour kontant nou zis avek keksoz debaz ki nou annan lo plan materyel.—1 Tim. 6:8.
13 Zezi ti endike ki sa vre ladorasyon i enplik sakrifis e pour annan sa lespri sakrifis i neseser annan lafwa. (Lik 9:23, 24) Serten adorater fidel in fer bann gran sakrifis par egzanp, andir lapovrete, labi pouvwar, prezidis, menm bann persekisyon kriyel. (2 Kor. 11:23-27; Rev. 3:8-10) Se zis zot lafwa for ki ti permet zot pour fer sa bann sakrifis avek lazwa. (Zak 1:2, 3) Annan en lafwa for, i kapab permet nou annan konfyans total ki i touzour mye pour swiv gidans Zeova e sa i touzour pour nou prop dibyen. Nou totalman asire ki sa rekonpans pour bann ki andir leprev fidelman i pli gran ki okenn soufrans ki zis pour en pe letan.—Ebr. 11:6.
14. Akoz Agar ti bezwen demontre limilite?
14 Annou vwar akoz i neseser pour annan limilite ler nou pe swiv gidans Zeova. Nou kapab vwar sa atraver legzanp Agar ki ti servant Sara. Kan Sara ti realize ki i pa ti kapab fer zanfan, i ti donn Agar avek Abraam e Agar ti tonm ansent pour Abraam. Me, Agar ti vin arogan vizavi son met Sara ki pa ti kapab fer zanfan. Sa ti fer Sara “konmans imilye li,” e Agar ti sove. En lanz sorti kot Zeova ti al koz avek Agar e i ti dir li: “Retourn kot ou met Sara e abes ou devan li.” (Zen. 16:2, 6, 8, 9) Petet Agar ti pou prefere ganny en lot kalite gidans. Pour azir dapre gidans sa lanz, Agar ti pou bezwen rezet son latitid arogan. Alors, avek limilite i ti fer sa ki sa lanz ti dir e son garson Yismael ti ne an sekirite kot son papa ti pe kanpe.
15. Dekrir serten sitiasyon ozordi kot petet nou bezwen annan limilite pour swiv gidans Zeova.
15 Pour swiv gidans Zeova i kapab vedir ki nou osi nou bezwen abes nou. Petet serten i bezwen aksepte ki serten detant ki zot kontan pa fer plezir Zeova. I kapab en Kretyen in ofans en dimoun e i bezwen demann leskiz. Oubyen i kapab in fer en fot e i bezwen admet son fot. Be si en dimoun i komet en pese grav? I bezwen abes li e konfes son pese avek bann ansyen. En dimoun i menm kapab ganny ekskli. Pour li reganny aksepte dan kongregasyon, i bezwen repantir avek limilite e sanz son lavi. Dan sa bann sitiasyon ek lezot ankor, Proverb 29:23 i rekonfort nou: “Imen pou ganny abese akoz son lorgey, me sa enn ki annan limilite pour ganny laglwar.”
Ki mannyer Zeova i gid nou?
16, 17. Ki mannyer nou kapab pli byen benefisye avek Labib konman sa gidans ki sorti kot Bondye?
16 Sa pli gran gidans ki Bondye i donnen i Son Parol enspire, Labib. (Lir 2 Timote 3:16, 17.) Nou pou azir dan en fason saz e pli byen benefisye avek Parol Bondye, si nou pa esper difikilte arive avan rod led atraver son Parol. O kontrer, nou devret fer li en labitid pour lir Labib sak zour. (Ps. 1:1-3) Dan sa fason nou pou konn byen nou Labib. Nou pou annan menm fason panse ki Bondye, e nou pou menm pare pour fer fas avek bann problenm ki nou pa ti pe ekspekte.
17 Anplis, i enportan pour nou medite e priye an rapor avek sa ki nou lir dan Labib. Ler nou reflesir lo bann verse, nou vwar konman zot kapab ganny aplike dan bann sitiasyon spesifik. (1 Tim. 4:15) Ler nou fer fas avek bann problenm grav, nou priy Zeova pour demann li led pour ganny sa gidans ki nou bezwen. Lespri Zeova pou ed nou rapel bann konsey itil ki nou’n lir dan Labib oubyen dan nou bann piblikasyon.—Lir Psonm 25:4, 5.
18. Dan ki fason Zeova i servi nou bann frer ek ser pour gid nou?
18 Nou bann frer ek ser Kretyen i en lot mwayen presye ki nou annan pour rod gidans Bondye. Sa lesklav fidel e pridan avek son Konsey Direkter ki pe reprezant sa lesklav i form en parti vreman enportan sa lasosyasyon frer ek ser, ki donn nou nouritir spirityel atraver bann piblikasyon ek progranm pour bann renyon ek lasanble. (Mat. 24:45-47; konpar Akt 15:6, 22-31.) Anplis, parmi bann frer ek ser nou annan bann Kretyen matir, espesyalman bann ansyen ki kalifye pour donn led ek konsey baze lo Labib dan en fason personnel. (Iza. 32:1) Bann zenn dan bann fanmir Kretyen i benefisye avek en lot led presye. Si zot paran i Temwen, Bondye i demann zot pour transmet son gidans avek zot zanfan e bann zenn i devret rod gidans zot paran.—Efe. 6:1-3.
19. Ki benediksyon nou’n gannyen akoz nou pe kontinyen rod gidans Zeova?
19 Wi, Zeova i ofer nou gidans dan plizyer fason e nou devret byen servi sa bann provizyon. Kan nasyon Izrael ti fidel, Lerwa David ti dir: “Nou bann zanset ti met konfyans dan ou, zot ti annan konfyans, e ou ti kontinyen delivre zot. Zot ti kriy ou, e zot ti sorti sen e sof; zot ti met konfyans dan ou, e zot pa ti onte.” (Ps. 22:3-5) Si nou swiv gidans Zeova avek konfyans, nou osi “nou pa [pou] onte.” Nou lespwar pa pou dezapwent nou. Si nou ‘met nou lavi ek son bann fardo dan lanmen Zeova,’ olye depan lo nou prop lasazes, nou pou ganny en kantite benediksyon depi konmela menm. (Ps. 37:5) E si nou kontinyen obeir e reste fidelman atase avek Zeova, sa bann benediksyon pou dire pour touzour. Lerwa David ti ekrir: “Zeova i kontan lazistis, e i pa pou kit son bann fidel. Sirman zot pou ganny garde pour en letan endefini . . . Bann dimoun drwat pou posed later, E zot pou reste lo la pour touzour.”—Ps. 37:28, 29.
Eski ou kapab eksplike?
• Akoz nou annan konfyans dan gidans Zeova?
• Kwa ki enplike ler nou rezet gidans Zeova?
• Dan ki serten sitiasyon kot bann Kretyen i bezwen annan limilite?
• Ki mannyer Zeova i gid nou ozordi?
[Kestyon]
[Portre lo paz 16]
Eski ou rod gidans Zeova dan tou laspe ou lavi?