Armagedon​—Lager Bondye ki pou elimin lager

“Zot vwar li vreman terib pour touy en lot dimoun, alors zot vwar li degoutan e difisil pour konpran akoz dimoun i lager. I en keksoz ki napa en mo pour li dan zot langaz.”—LESPLIKASYON BANN ESKIMO GRINLENN PAR EN EKSPLORATER SORTI NORWE, FRIDTJOF NANSEN, AN 1888.

LEKEL ki pa ti pou kontan viv dan en sosyete kot dimoun ti vwar lager “degoutan e difisil pour konpran”? Lekel ki pa ti pou anvi viv dan en lemonn kot napa lager e kot ni menm sa mo pa egziste? En tel lemonn i paret enposib, sirtou si nou annan konfyans ki zonm ki pou fer li.

Parkont, dan profesi Izai, Bondye in promet ki i pou anmenn en tel lemonn: “Zot pou bezwen forz zot lepe an pyos e zot lans an sizay. Nasyon pa pou lev lepe kont nasyon e zot pou nepli aprann lager.”—Izai 2:4.

I kler ki fodre sa lemonn i sanz en kantite pour ki sa promes i ganny akonplir, la ki ozordi i annan apepre 20 milyon solda aktif e en ventenn lager ki pe deroule. I pa merit sirprann nou ki Zeova, Bondye tou pwisan pou bezwen entervenir dan tou sa ki imen in fer. Sa lager ki Labib i apel Armagedon pou konmanse kan Zeova pou entervenir.—Revelasyon 16:14, 16.

Menm si pandan sa detrwa dernyen lannen sa mo “Armagedon” in ganny servi pour dekrir en konfli nikleer ki enplik lemonn antye, en diksyonner i dekrir son sinifikasyon dan sa fason: “Sa landrwa kot pou annan en gran e dernyen konfli ant sa ki bon ek sa ki move.” Eski sa ki bon pou vreman detrir sa ki move, ouswa i zis en rev?

Nou kapab ganny rekonfor kan nou mazinen ki Bondye in souvandfwa koz lo lafen tou move keksoz. En psalmis ti predir: “Bann peser pou ganny retire lo later; e bann mesan zot, zot pou nepli.” (Psonm 104:35) Liv Proverb i dir: “Bann ki drwat pou reste lo later, e bann ki san repros ki pou reste lo la. Bann mesan zot, zot pou ganny retire lo later; e bann tret, zot pou ganny eliminen.”—Proverb 2:21, 22.

Labib i osi fer kler ki bann mesan pa pou abandonn zot pouvwar dan lape, alors i akoz sa ki i pou bezwen annan en dernyen lager ki pou retir tou bann move keksoz enkli lager. (Psonm 2:2) Sa non Armagedon ki Labib i donnen pour sa lager inik i vreman enportan.

 Bann batay obor Megido dan lepase

Sa mo “Armagedon” i vedir “Montanny Megido.” Dan lepase, lavil Megido ensi ki Laplenn Yizreel dan zalantour ti en landrwa kot bokou lager ki’n mark listwar in arive. Dan son liv The Battles of Armageddon, istoryen Eric Cline ti ekrir: “Pandan listwar, Megido ek Vale Yizreel ti sa landrwa kot i ti annan bann lager ki ti annan en lefe lo devlopman sivilizasyon.”

Parey Cline in fer resorti, sa bann batay obor Megido ti souvandfwa bann lager enportan. Larme Mongol ki ti ranvers en gran bout Lazi dan trezyenm syek ti sibir zot premye defet dan sa vale. Pa tro lwen avek Megido, larme Britanik anba konmann Zeneral Edmund Allenby ti defet bann Tirk pandan premye lager mondyal. En istoryen militer ti dekrir laviktwar ki Allenby ti gannyen konman “en batay pli vit, enportan e en defet pli konplet dan listwar.”

Dan Labib, bann gro batay ti ariv obor Megido. Laba, Ziz Barak ti konkerir larme Kananeen sorti Sisera. (Ziz 4:14-16; 5:19-21) Gideonn avek son pti group 300 zonm, ti defet en gran larme Madyanit dan sa landrwa. (Ziz 7:19-22) Lerwa Sail ek son garson Yonatann ti mor, pros avek Montanny Gilboa kan larme Filisten ti defet larme Izraelit.—1 Samyel 31:1-7.

Vi ki i en landrwa ki anmenn bokou lavantaz pour bann larme, Megido ek bann vale dan zalantour i sa landrwa kot bokou batay in pase pandan sa dernyen 4,000 an. En istoryen ti kont omwen 34 batay!

Listwar Megido konman en landrwa ki annan bokou lavantaz lo plan militer i fer li san dout en bon mo pour dekrir “Armagedon” senbolikman. Menm si sa mo i aparet zis en fwa dan Labib, son konteks dan liv Revelasyon i endike ki Armagedon pou annan lefe lo tou zabitan later.

Armagedon dapre Labib

Menm si dan lepase sa kantite lager ki’n ariv obor Megido ti enportan, napa enn ki’n  elimin mesanste. Napa en lager ki’n opoz lebyen ek lemal dan en fason global. Alors definitivman sa kalite lager pou enn ki pou sorti kot Bondye. Parey Zezi ti dir en fwa, “personn pa bon, zis Bondye ki bon.” (Lik 18:19) Deplis, Labib i spesifikman refer avek Armagedon konman lager Bondye.

Dan Labib, liv Revelasyon i dir ki “bann lerwa lo later an antye” pou rasanble ansanm “pour konbat kan sa gran zour Bondye Toupisan pou arive.” (Revelasyon 16:14) Sa resi profetik i azoute: “Bann lespri ti rasanble bann lerwa dan en landrwa ki apel Armagedon dan langaz Ebre.” (Revelasyon 16:16) Pli tar Revelasyon i eksplike, “bann lerwa later, avek zot larme . . . ti’n rasanble pour lager kont sa enn ki’n asiz lo seval ek kont son larme.” (Revelasyon 19:19) Sa kavalye i ganny idantifye konman pa lot ki Zezi Kri.—1 Timote 6:14, 15; Revelasyon 19:11, 12, 16.

Lo ki konklizyon nou pou tonbe kan nou egzamin sa bann verse? Konklizyon i ki Armagedon i en lager ant Bondye ek bann imen dezobeisan. Akoz Zeova ek son Garson Zezi Kri pou konbat dan en tel lager? En rezon i ki, Armagedon pou “detri bann ki detri later.” (Revelasyon 11:18) Deplis, rezilta ki sa pou anmennen i en lemonn anpe akoz ‘nou pe espere dapre promes Bondye en nouvo later’ kot “pou annan lazistis.”—2 Pyer 3:13.

Akoz Armagedon i enportan?

Eski ou vwar li difisil pour mazin Zeova, en “Bondye lanmour” pe swazir son Garson, “Prens Lape,” pour lager dan sa batay?  (2 Korentyen 13:11; Izai 9:6) Keksoz i vin pli kler kan ou konn motif par deryer. Liv Psonm i dekrir Zezi konman en gerye lo son seval. Akoz i lager? En psalmis ti eksplike ki Kris i mont son seval “pour laverite, limilite ek ladrwatir.” I lager akoz i kontan lazistis e i ay mesanste.—Psonm 45:4, 7.

Labib i dekrir reaksyon Zeova anver sa lenzistis ki i vwar dan sa lemonn ozordi, dan menm fason. Profet Izai ti ekrir: “SENYER in vwar sa, e i pa kontan ki napa lazistis. I pou met lazistis konman en lenz batay e pouvwar pour delivre konman en kasket. I pou sanz avek sa gran dezir pour met keksoz drwat e pour pini e revanz kont bann move keksoz ki fer imen soufer.”—Izai 59:15, 17, Today’s English Version.

Tan ki bann move dimoun i o pouvwar, bann bon dimoun pa pou rezwir lape ek sekirite. (Proverb 29:2; Eklezyast 8:9) I vre, pour bann ki pratik koripsyon ek mesanste sa de keksoz i mars ansanm, nou pa kapab separ zot. Alors, pour ki vre lape ek lazistis i arive fodre ki bann move dimoun i ganny retire. Salomon ti ekrir: “Bann mesan i en ranson pour bann dimoun drwat.”—Proverb 21:18.

Vi ki Bondye i en Ziz, nou kapab asire ki dan tou sitiasyon, sa zizman ki i pou pase pou enn ki pou zis. Abraam ti demande: “Eski sa Ziz lo later antye pa pou fer sa ki drwat?” Larepons ki Abraam ti aprann i ki Zeova i touzour drwat! (Zenez 18:25) Deplis, Labib i asir nou ki Zeova pa pran plezir pour detrir bann move; i fer li akoz i sa dernyen opsyon.—Ezekyel 18:32; 2 Pyer 3:9.

Pran Armagedon o serye

Lo ki kote nou pou ete pandan sa lager enportan? Otomatikman, laplipar nou i prezimen ki nou pou parmi sa bann ki bon. Me ki mannyer nou kapab asire? Profet Tsefanya i ankouraz nou: “Rod ladrwatir, rod limilite.” (Tsefanya 2:3) Zapot Pol ti dir ki lavolonte Bondye i ki “tou [sort] dimoun i ganny sove e ganny konnesans laverite.”—1 Timote 2:4.

Premye pa ver nou delivrans i kan nou aprann lo Zeova ek son plan ki i annan pour retir tou mesanste lo later. Pratik ladrwatir i sa dezyenm pa ki pou fer nou ganny faver ek proteksyon Bondye.

Si nou fer tou sa bann pa, nou aktyelman kapab esper avek enpasyans kan Armagedon i vini, sa lager ki pou anmenn en lafen avek tou bann lager ki imen pe fer. Kan sa batay pou fini, dimoun partou lo later pou vwar lager, konman en keksoz ki degoutan e ki difisil pour konpran. “Zot pa pou zanmen aprann lager ankor.”—Izai 2:4, New American Standard Bible.

[Not adisyonnel]

Lentervansyon Bondye dan sa ki imen in fer i apel Armagedon

[Portre lo paz 4]

Gideonn ek son bann zonm ti ranport laviktwar dan en lager enportan Megido

[Portre lo paz 4-5]

Kan Armagedon pou’n fini, tou dimoun pou vwar lager konman en keksoz degoutan e ki difisil pour konpran

[Portre lo paz 6]

Aprann laverite lo Zeova ek son plan i sa premye pa ver delivrans