Bann pwen enteresan dan liv Akt
Parol Zeova i vivan
Bann pwen enteresan dan liv Akt
LIV Akt i donn lenformasyon kler lo formasyon kongregasyon Kretyen e osi lafason ki i ti agrandi pli tar. I ti ganny ekrir par en dokter ki ti apel Lik e i rakont bann resi eksitan lo aktivite ki ti pe ganny fer par bann Kretyen pour en peryod letan ki tonm apepre 28 an e sa i ant 33 N.L. ziska 61 N.L.
Premye parti liv Akt i koz lo aktivite zapot Pyer e son lot parti i koz lo sa ki pour zapot Pol. Par servi sa pronon “nou,” Lik i endike ki li osi i ti la kan serten levennman ti arive. Si nou port byen latansyon lo sa mesaz ki dan liv Akt, sa pou ogmant nou lapresyasyon pour sa pwisans ki Parol Bondye i annan ek son lespri sen. (Ebr. 4:12) I pou osi motiv nou pour fer bann sakrifis personnel e ranforsi nou lafwa dan lespwar pour sa Rwayonm.
PYER I SERVI “LAKLE RWAYONM”
Apre ki zot ti’n ganny lespri sen, bann zapot ti rann en temwannyaz avek kouraz. Pyer ti servi premye “lakle Rwayonm lesyel” pour ouver laport pour konnesans ek loportinite pour bann Zwif ek bann ki ti’n konverti dan larelizyon Zwif ki “ti krwar dan sa mesaz” pour antre dan sa Rwayonm. (Mat. 16:19; Akt 2:5, 41) En sel kou ti annan en ogmantasyon dan lakantite persekisyon ki bann disip ti sibir alor zot ti bezwen separe me an rezilta sa, travay predikasyon ti agrandir.
Lemoman ki zot ti tande ki bann zabitan Samari ti’n aksepte parol Bondye, bann zapot Zerizalenm ti anvoy Pyer ek Zan laba. Pyer ti servi sa dezyenm lakle kan i ti donn loportinite bann Samariten pour antre dan Rwayonm lesyel. (Akt 8:14-17) Petet i kapab ki se apre enn an ki Zezi ti’n resisite ki Sol sorti Tars ti sanz son personnalite e vin en Kretyen. An 36 N.L., Pyer ti servi sa trwazyenm lakle e lespri sen, sa don gratwit ti ganny verse lo bann non Zwif ki pa ti sirkonsi.—Akt 10:45.
Larepons pour bann kestyon lo Labib:
2:44-47; 4:34, 35—Akoz bann krwayan ti vann zot bann byen e partaz zot reveni? Bokou parmi bann ki ti vin krwayan ti sorti dan bann pei ki ti vreman lwen e zot ti napa ase provizyon pour zot kapab reste en pti pe pli lontan Zerizalenm. Me kantmenm sa zot ti anvi reste plis letan pour aprann plis lo zot nouvo krwayans e pour rann temwannyaz avek lezot. Pour ed sa bann dimoun, serten Kretyen ti vann zot propriyete e partaz sa ki zot ti gannyen avek bann ki ti dan bezwen.
4:13—Eski Pyer ek Zan ti bann senp dimoun ki ti napa ledikasyon? Non. Zot ti ganny apele bann zonm “senp e san gran ledikasyon” akoz zot pa ti’n asiste lekol bann gran profeser lalwa.
5:34-39—Ki mannyer Lik ti konn sa ki Gamalyel ti’n dir dan en rankont prive avek bann Sannedren? I annan apepre trwa posibilite: (1) Pol ki ti enform Lik, vi ki i ti deza en etidyan Gamalyel; (2) Lik ti koz avek en manm Sannedren parey Nikodenm; (3) Lik ti ganny lenformasyon atraver lenspirasyon sorti kot Bondye.
7:59—Eski Etyenn ti pe priy avek Zezi? Non. Ladorasyon ek lapriyer en dimoun i devret al zis kot Zeova tousel. (Lik 4:8; 6:12) Normalman, Etyenn ti pou’n bezwen priy Zeova onon Zezi. (Zan 15:16) Me dan sa ka Etyenn ti ganny en vizyon kot i ti vwar “Fis-de-Lonm pe debout lo kote drwat Bondye.” (Akt 7:56) I ti konsyan ki Zezi ti’n ganny pouvwar pour resisit bann mor alors i pa ti pe priy avek li me plito i ti pe koz direkteman avek Zezi par demann Li pour mazin li zour rezireksyon.—Zan 5:27-29.
Leson pour nou:
1:8. Sa travay predikasyon ki bann adorater Zeova pe fer dan lemonn antye pa kapab ganny akonplir san led lespri sen.
4:36–5:11. Sa non Barnabas ki vedir “Garson Konsolasyon” ti ganny donnen avek Zozef sorti Sip. Petet bann zapot ti donn li sa non akoz i ti bon, zantiy, e kontan ed lezot. Olye vin parey Ananyas ek Safira ki ti rize, ipokrit e annan move lentansyon, nou devret vin parey Barnabas.
9:23-25. Si nou sov lwen avek nou lennmi pour ki nou kapab kontinyen prese sa pa vedir ki nou napa kouraz.
9:28-30. Si nou pe pres dan serten kanton ouswa avek bann dimoun ki menas nou fizikman, moralman ouswa spirityelman, nou devret pridan e byen swazir kan e kote pour prese.
9:31. Pandan bann moman ki ase favorab nou devret travay dir pour fortifye nou lafwa atraver letid ek meditasyon. Sa pou kapab ed nou pour annan lakrent pour Zeova ler nou aplik sa ki nou aprann e pour devoue dan nou minister.
DEVOUMAN POL DAN MINISTER
An 44 N.L., Agabis ti vin Antyos kot Barnabas ek Sol ti pe ansennyen pour “enn an.” Agabis ti predir “en gran lafamin” ki ti arive de-z-an pli tar. (Akt 11:26-28) “Kan Barnabas ek Sol ti’n termin zot misyon Zerizalenm” zot ti retourn Antyos. (Akt 12:25) An 47 N.L., par lespri sen Barnabas ek Sol ti ganny anvoye dan en vwayaz misyonner e sa ti apepre 12 an apre ki Sol ti’n konverti. (Akt 13:1-4) An 48 N.L., zot ti retourn Antyos “kot zot ti ganny konsakre par lagras Bondye.”—Akt 14:26.
Apepre nef mwan pli tar, Pol (osi koni konman Sol) ti swazir Silas konman son konpanyon e zot ti al lo son dezyenm vwayaz misyonner. (Akt 15:40) Timote ek Lik ti zwenn Pol dan semen. Lik ti reste Filip pandan ki Pol ti kontiny son vwayaz pour al Atenn e apre Korent kot i ti zwenn Akilas ek Prisil e reste laba pour enn an e sis mwan. (Akt 18:11) O konmansman lannen 52 N.L., Pol ti kit Timote ek Silas Korent e ansanm avek Prisil ek Akilas i ti pran bato pour al Siri. (Akt 18:18) Akilas ek Prisil ti akonpanny Pol ziska Efez e apre sa zot, zot ti reste Efez.
Apre ki i ti’n pas en pe letan Antyos, an Siri Pol ti konmans son trwazyenm vwayaz an 52 N.L. (Akt 18:23) An Efez, “Parol Senyer ti [kontinyen] fannen avek gran pisans e konverti bokou dimoun.” (Akt 19:20) Pol ti pas apepre trwa-z-an laba. (Akt 20:31) Ver Lapannkot 56 N.L., Pol ti Zerizalenm. Apre ki i ti’n ganny arete, i ti donn en temwannyaz san okenn lafreyer devan lotorite. An Ronm, Pol ti ganny detenir pour de-z-an (59-61 N.L.) e laba i ti rod fason pour li pres lo Rwayonm e ansenny bann keksoz “konsernan Senyer Zezi-Kri.”—Akt 28:30, 31.
Larepons pour bann kestyon lo Labib:
14:8-13—Akoz bann dimoun Lis ti apel “Barnabas non zot bondye Zeis, e Pol li zot ti donn li non bondye Ermes”? Zeis ti sef bann bondye dan lezann Grek e son garson Ermes ti ganny byen rekonnet par lafason ki i ti eksprim li. Vi ki Pol ti portparol, bann zabitan Lis ti apel li Ermes e Barnabas zot ti apel li Zeis.
16:6, 7—Akoz lespri sen ti anpes Pol ek son bann asosye pres dan distrik Lazi ek Bitini? Ti napa bokou travayer. Alors, lespri sen ti anvoy zot dan en landrwa kot ti annan plis rekolt.
18:12-17—Akoz Gouverner Galyon pa ti enterfer kan bann dimoun ti konmans bat Sostenn? Sa ti petet akoz Galyon ti panse ki sa zonm ki ti paret sef sa group dimoun ki ti kont Pol ti pe ganny sa ki i ti merite. Annefe, i paret ki sa lensidan ti annan en bon lefe akoz apre sa Sostenn ti konverti e vin en Kretyen. Pli tar Pol ti koz lo Sostenn konman “nou frer.”—1 Kor. 1:1.
18:18—Ki ve Pol ti fer? Serten spesyalis i sizere ki Pol ti’n fer en ve Nazireen. (Nom. 6:1-21) Parkont, Labib pa dir ki kalite ve Pol ti fer. Deplis, Lekritir pa dir si Pol ti fer sa ve avan oubyen apre ki i ti’n konverti ouswa si i ti pe konmans oubyen termin sa ve. Antouleka, sa kalite ve pa ti en pese.
Leson pour nou:
12:5-11. Nou kapab e devret priy pour nou bann frer ek ser.
12:21-23; 14:14-18. San ezitasyon Erod ti aksepte sa laglwar ki zis Bondye ki devret gannyen. Pa sa ti vreman diferan avek Pol ek Barnabas ki ti toudswit rezet sa loner ek louanz ki zot pa ti merite! Nou pa devret anvi ganny loner pour nenport kwa ki nou kapab akonplir dan servis Zeova.
14:5-7. Kan en dimoun i pridan, sa i kapab ed li pour reste aktif dan servis.—Mat. 10:23.
14:22. Bann Kretyen i ekspekte ki zot pou rankontre problenm oubyen difikilte. Zot pa esey sov zot par fer konpromi avek zot lafwa.—2 Tim. 3:12.
16:1, 2. Bann zenn Kretyen i devret travay dir dan servis ki zot ofer Zeova dan kongregasyon e rod led avek Li pour zot ganny en bon repitasyon.
16:3. Pour ki lezot i aksepte sa bon nouvel, nou devret fer tou sa ki nou kapab an armoni avek bann prensip Labib.—1 Kor. 9:19-23.
20:20, 21. Temwannyaz portanport i en laspe enportan dan nou minister.
20:24; 21:13. Gard nou fidelite anver Bondye i pli enportan ki prezerv nou lavi.
21:21-26. Nou devret touzour anvi e pare pour aksepte bann bon konsey.
25:8-12. Bann Kretyen ozordi i kapab e devret servi bann prosedir legal pour “defann e konsolid levanzil.”—Fili. 1:7.
26:24, 25. Nou devret anons sa ki “vre e rezonnab” menm si i en lafoli pour “zonm natirel [oubyen fizik].”—1 Kor. 2:14.
[Portre lo paz 30]
Kan ki Pyer ti servi “lakle Rwayonm”?
[Portre lo paz 31]
Sa travay predikasyon ki pe ganny fer dan lemonn antye pa ti pou kapab ganny fer san led lespri sen