Delivrans par Rwayonm Bondye i pros!
Delivrans par Rwayonm Bondye i pros!
“Ki ou Renny i ganny etabli; Ki ou lavolonte i ganny akonpli lo later parey dan lesyel.”—MAT. 6:10.
1. Ki ti lansennyman prensipal Zezi?
LER Zezi ti donn son Sermon lo montanny, i ti enkli en model lapriyer ki ti rezim son lansennyman prensipal. I ti ansenny son bann disip pour priy Bondye: “Ki ou Renny i ganny etabli; Ki ou lavolonte i ganny akonpli lo later parey dan lesyel.” (Mat. 6:9-13) Zezi “ti vwayaz dan plizyer lavil ek vilaz pour pres Bonn Nouvel Rwayonm Bondye.” (Lik 8:1) Kris ti ankouraz son bann disip: ‘Rod plito Rwayonm ek lazistis Bondye.’ (Mat. 6:33) Anmezir ki ou etidye sa lartik, rode ki mannyer pour servi sa lenformasyon dan ou predikasyon. Par egzanp, vwar ki mannyer ou pou kapab reponn sa bann kestyon: Ki kantite enportan sa mesaz Rwayonm i enportan? Akoz imen i bezwen ganny delivre? E ki mannyer Rwayonm Bondye pou anmenn delivrans?
2. Akoz sa mesaz Rwayonm i vreman enportan?
2 Zezi ti predir: “Sa Bonn Nouvel Rwayonm pou ganny anonse partou dan lemonn pour tou dimoun konnen; e apre sa, lafen pou arive.” (Mat. 24:14) Sa bon nouvel konsernan Rwayonm Bondye i vreman enportan. Anfet, i sa mesaz pli enportan dan lemonn! I annan apepre set milyon serviter Bondye dan plis ki 100,000 kongregasyon Temwen Zeova lo later ki partisip dan sa gran travay predikasyon, pour dir avek lezot dimoun ki sa Rwayonm in ganny etablir. Lefet ki sa Rwayonm in ganny etablir i en bon nouvel e i vedir ki Bondye in met an plas son gouvernman dan lesyel pour pran kontrol total lo later. Anba dominasyon Rwayonm, lavolonte Zeova pou ganny akonplir lo later parey dan lesyel.
3, 4. Ki pou arive ler lavolonte Bondye pou ganny fer lo later?
3 Ki pou arive avek bann imen ler lavolonte Bondye pou ganny akonplir lo later? Zeova pou “eswiy tou larm dan zot lizye. Lanmor pou nepli egziste. Pou nepli annan ni dey, ni plere, ni soufrans.” (Rev. 21:4) Dimoun pa pou tonm malad oubyen mor akoz pese ek lenperfeksyon ki zot in erite. Bann dimoun ki’n mor, ki dan memwar Bondye pou ganny sa loportinite pour viv pour touzour, akoz Labib i promet: ‘Dimoun bon konman move pou resisite.’ (Akt 24:15) Pou nepli annan lager, maladi oubyen lafamin, e later pou vin en paradi. Menm bann zannimo ki danzere ozordi, pou anpe avek bann imen e antre zot.—Ps. 46:9; 72:16; Iza. 11:6-9; 33:24; Lik 23:43.
4 Akoz sa bann benediksyon merveye ki dominasyon Rwayonm pou anmennen, i pa etonan ki profesi Labib i koz konsernan lavi dan sa letan par sa bann parol ki donn rekonfor: “Me bann dimoun ki annan limilite pou reste lo later, e zot pou vreman tir bokou plezir dan labondans lape.” Be ki pou arive avek bann ki pe fer problenm? Labib i predir: “Dan ankor en ptigin letan, bann dimoun mesan pou nepli la.” Me, “sa bann ki esper Zeova, zot pou posed later.”—Ps. 37:9-11.
5. Ki pou arive avek sa lemonn ki nou pe viv ladan?
5 Pour ki tousala i arive, sa lemonn ki nou pe viv ladan enkli son bann gouvernman, larelizyon ek sistenm komersyal pou bezwen ganny retire. E se sanmenm ki sa gouvernman dan lesyel pou fer. Profet Danyel ti ganny enspire pour predir: “Dan bann zour sa bann lerwa [ki egziste konmela], Bondye lesyel pou etabli en rwayonm [dan lesyel] ki pa pou zanmen ganny detrir. Sa rwayonm li menm pa pou pas avek okenn lezot pep. I pou kraz e met en lafen avek tou sa bann rwayonm, e li menm i pou dire pour en letan endefini.” (Dan. 2:44) Rwayonm Bondye setadir sa nouvo gouvernman dan lesyel pou alor domin lo en nouvo sosyete lo later. I pou annan “en nouvo lesyel ek en nouvo later kot pou annan lazistis.”—2 Pyer 3:13.
I vreman neseser pour ganny delivre ozordi
6. Ki mannyer Labib i dekrir mesanste dan sa move lemonn?
6 Kan Satan, Adan ek Ev ti rebel kont Bondye e ti anvi desid pour zot menm ant sa ki byen ek sa ki mal, sa ti en move konmansman pour lafanmir imen. Plis ki 1,600 z-an avan deliz sa “kantite mesanste ki zonm ti pe fer lo later e tou sa ki i ti panse dan son leker ti toultan move.” (Zen. 6:5) Apepre 1,300 z-an pli tar, Salomon ti vwar bann kondisyon telman move ki i ti ekrir: “Mon ti felisit bann mor ki ti’n deza mor plito ki bann vivan ki ti ankor pe viv. Pli byen ki sa de, i sa enn ki pa ankor vin an egzistans, ki pa’n vwar sa bann keksoz deplorab ki pe ganny fer lo later.” (Ekle. 4:2, 3) Apepre 3,000 an pli tar nou ariv dan nou letan, kot mesanste pe kontinyen ogmante.
7. Akoz i vreman neseser pour ganny delivre par Bondye ozordi?
7 Menm si mesanste in egziste pour en bon pe letan, i vreman neseser ozordi plis ki nenport ki lezot moman, pour ganny delivre par Rwayonm Bondye. Bann kondisyon ki’n egziste dan sa 100 lannen ki’n pase ti pli pir ki’n deza egziste, e zot pe kontinyen deteryore. Par egzanp, Lenstiti Worldwatch i dir: “Dan lager ventyenm syek ti annan trwa fwa plis viktim ki tou sa lager ki’n annan depi premye syek apre Zezi Kri ziska 1899.” Depi 1914 plis ki 100 milyon dimoun in mor dan lager. En ansiklopedi i estimen ki ziska 60 milyon dimoun in mor dan Dezyenm Lager Mondyal. Vi ki serten nasyon i annan bann zarm nikleer, sa i fer ki imen i annan sa kapasite pour detrir en gran kantite popilasyon lemonn. E kantmenm i annan progre dan domenn syantifik ek medikal, apepre senk milyon zanfan i mor sak lannen akoz lafamin ek maladi.—Vwar Sapit 9 dan liv Ki Labib i vreman dir?
8. San okenn dout, ki sa plizyer milye lannen anba dominasyon imen in prouve?
8 Bann zefor ki imen in fer pa’n arive met en lafen avek mesanste. Bann lorganizasyon politik, komersyal e relizye pa’n arive satisfer bezwen bann imen pour lape, prosperite, ek lasante. Olye rezourd sa bann gro problenm ki imen pe fer fas avek ozordi, sa bann lorganizasyon in anmenn plis problenm. Definitivman, sa plizyer milye lannen anba dominasyon imen in prouve ki sa bann parol i vre: “Mon konnen, O Zeova, ki semen en imen pa pour li. I pa pour en imen ki pe marse pour diriz son lepa.” (Zer. 10:23) Wi, “zonm in domin zonm e sa in fer ditor zot menm.” (Ekle. 8:9) Deplis, “tou lakreasyon Bondye pe soupire e soufer.”—Rom. 8:22.
9. Ki kondisyon bann vre Kretyen i ekspekte vwar dan “bann dernyen zour”?
9 Konsernan nou letan, Labib ti predir: “Dan bann dernyen zour pou annan letan difisil.” Apre ki kondisyon bann dernyen zour anba dominasyon imen ti’n ganny dekrir, sa profesi ti dir: “Bann move dimoun ek bann anbeter, zot pou fer touzour plis progre dan sa ki mal.” (Lir 2 Timote 3:1-5, 13.) Bann Kretyen pe espekte sanmenm, akoz “lemonn antye i dan pouvwar dyab.” (1 Zan 5:19) Me nou annan en bon nouvel, byento Bondye pou delivre sa bann ki kontan li. Zot pou ganny delivre dan sa lemonn ki avek en lavites pe fer touzour plis progre dan sa ki mal.
Sa pli bon delivrans
10. Akoz sa pli bon delivrans i sorti kot Zeova?
10 Letan ou pres sa bon nouvel, eksplik avek sa bann ki ekout ou ki sa pli bon delivrans i sorti kot Zeova. Zis li tousel ki annan sa pouvwar e sa dezir pour delivre son bann serviter dan okenn move sitiasyon. (Akt 4:24, 31; Rev. 4:11) Nou kapab annan sa lasirans ki Zeova pou touzour delivre son pep e akonplir son plan, akoz i ti fer sa promes: “Sirman zis parey mon’n deside, alors san fot sanmenm ki pou arive.” Son parol “pa pou retourn kot [li] san rezilta.”—Lir Izai 14:24, 25; 55:10, 11.
11, 12. Ki lasirans Zeova i donn son bann serviter?
11 Zeova in donn nou sa lasirans ki i pou delivre son bann serviter ler i pou anmenn son zizman lo bann move dimoun. Ler i ti anvoy profet Zeremi pour koz dan en fason fran avek bann ki ti’n komet bann pese grav, Bondye ti dir: “Pa per.” Akoz? “Mon avek ou pour delivre ou.” (Zer. 1:8) Pareyman, zis avan ki Zeova ti detrir bann move dimoun Sodonm ek Gomor, i ti anvoy de lanz kondir Lot ek son fanmir dan en lot landrwa kot zot ti pou an sekirite. “Apre Zeova ti fer tonbe lapli souf ek dife . . . lo Sodonm ek Gomor.”—Zen. 19:15, 24, 25.
12 Zeova i menm kapab delivre sa bann ki fer son lavolonte, dan lemonn antye. Ler i ti detrir sa move lemonn ansyen par Deliz, i ti “prezerv lavi set dimoun ansanm avek Noe.” (2 Pyer 2:5) Ankor enn fwa, Zeova pou delivre sa bann ki drwat ler i pou detrir sa move lemonn. Alors son Parol i dir: “Rod Zeova, zot tou ki annan limilite lo later. . . . Rod ladrwatir, rod limilite, e petet zot a kapab ganny kasyet zour lakoler Zeova.” (Tsef. 2:3) Akoz sa destriksyon ki pou arive dan lemonn antye, ‘bann ki drwat pou reste lo later, me bann mesan zot, zot pou ganny retire lo later.’—Prov. 2:21, 22.
13. Ki mannyer bann serviter Zeova ki’n mor pou ganny delivre?
13 Me, bokou serviter Bondye in deza mor akoz maladi, persekisyon e lezot fakter ankor. (Mat. 24:9) Alors, ki mannyer zot tou zot pou ganny delivre? Parey ti ganny mansyonnen pli boner, bann ‘bon dimoun pou resisite.’ (Akt 24:15) Pa i en soulazman pour konnen ki nanryen pa kapab anpes Zeova delivre son bann serviter!
En bon gouvernman
14. Akoz nou annan konfyans ki Rwayonm Bondye i en gouvernman drwat?
14 Dan predikasyon, ou kapab eksplike ki Rwayonm Zeova ki dan lesyel i en gouvernman drwat. Sa i leka akoz i reflekte bann kalite merveye Bondye, tel parey lazistis, ladrwatir ek lanmour. (Det. 32:4; 1 Zan 4:8, 16) Bondye in donn sa Rwayonm avek Zezi Kri, sa enn ki pli kalifye pour diriz later. Zeova in osi swazir 144,000 Kretyen lo later ki pou ganny resisite dan lesyel konman zeritye ansanm avek Kris pour renny lo later.—Rev. 14:1-5.
15. Ki diferans i annan ant dominasyon Rwayonm Bondye ek dominasyon imen?
15 Pa i pou annan en gran diferans ant dominasyon Zezi enkli sa 144,000 ek dominasyon bann imen enparfe! Bann dirizan dan sa lemonn in souvan azir dan en fason kriyel par ankouraz zot pep pour fer lager e sa in koz lanmor plizyer milyon dimoun. I pa etonan ki Labib i konsey nou pour pa met nou konfyans dan zonm, “ki pa kapab sov nou.” (Ps. 146:3) Me dominasyon Kris pou reflekte son bon leta lespri. Zezi ti dir: “Vin kot mwan zot tou ki fatige e ki pe anmenn en fardo e mwan, mon a donn zot repo. Pran mon zoug e aksepte mon legzanp akoz mon dou e mon annan limilite dan mon leker e zot a ganny repo. Akoz mon zoug i fasil e mon fardo i leze.”—Mat. 11:28-30.
Bann dernyen zour pou fini byento!
16. Ki mannyer sa bann dernyen zour pou terminen?
16 Sa lemonn i dan son bann dernyen zour oubyen “konklizyon sa sistenm,” depi lannen 1914. (Mat. 24:3, NW) Tre Byento, sa ki Zezi ti apel “gran soufrans” oubyen gran ladetres pou arive. (Lir Matye 24:21.) Sa ladetres ki pa’n zanmen arive oparavan pou met en lafen avek lemonn Satan. Me ki mannyer sa gran ladetres pou konmanse? E ki mannyer i pou fini?
17. Dapre Labib ki pou arive o konmansman sa gran ladetres?
17 Sa gran ladetres pou konmans en sel kou. Wi, “zour Zeova” pou arive san ekspekte “kan dimoun i ava pe dir: ‘Tou i an-pe e an sekirite.’” (Lir 1 Tesalonisyen 5:2, 3.) Sa ladetres ki’n ganny predir pou arive ler tou nasyon pou krwar ki zot pres pour rezourd serten parmi zot bann gro problenm. Destriksyon “Gran Babilonn,” savedir tou fo larelizyon, ki pou arive en sel kou pou sirprann sa lemonn. Bann lerwa ek lezot pou etonnen ler zizman pou ganny anmennen lo Gran Babilonn.—Rev. 17:1-6, 18; 18:9, 10, 15, 16, 19.
18. Ki mannyer Zeova pou reazir ler Satan pou atak son pep?
18 Epi pou vin sa moman enportan, kot pou “annan siny dan soley, dan lalin ek dan zetwal” e “Fis-de-Lonm pou aparet dan lesyel.” Alors, nou kapab ‘dres nou e lev nou latet anler, akoz nou delivrans i ava pe aprose.’ (Lik 21:25-28; Mat. 24:29, 30) Satan oubyen Gog, pou fer sa bann ki pe siport li tourn kont pep Bondye. Me konsernan sa bann ki pe atak son bann serviter fidel Zeova i dir: “Sa ki pe tous ou, pe tous mon kannet lizye.” (Zeka. 2:8) Alors, tou zefor Satan pour detrir zot pa pou reisi. Akoz? Akoz Souvren Senyer Zeova pou azir deswit pour delivre son bann serviter.—Ezek. 38:9, 18.
19. Akoz nou kapab annan konfyans ki bann lanz Bondye pou detrir sistenm Satan?
19 Kan Bondye pou pran aksyon kont bann nasyon, ‘zot pou konnen ki li i Zeova.’ (Ezek. 36:23) I pou anvoy son bann lanz, setadir plizyer dizenn milye lanz ki pou ganny dirize par Zezi Kri pour detrir larestan sistenm Satan lo later. (Rev. 19:11-19) Ler nou mazin sa ki ti pase enn fwa zis dan en lannwit, kot en sel lanz ti “touy san katreven senk mil zonm” ki ti lennmi Bondye, nou kapab annan konfyans ki i pou fasil pour sa plizyer dizenn milye lanz detrir tou lorganizasyon Satan lo later ler ki sa gran ladetres i fini par Armagedon. (2 Rwa. 19:35; Rev. 16:14, 16) Satan ek son bann demon pou ganny anprizonnen pour mil an. Finalman, zot pou ganny detrir.—Rev. 20:1-3.
20. Ki Zeova pou akonplir par lentermedyer son Rwayonm?
20 Alors pou nepli annan mesanste dan lesyel ek lo later, e bann imen drwat pou viv lo later pour touzour. Zeova pou prouve ki i sa enn ki anmenn sa pli gran delivrans. (Ps. 145:20) Par lentermedyer son Rwayonm, i pou zistifye son drwa pour dirize, sangtifye son non sen e akonplir son plan merveye pour later. Fotespere ou eksperyans bokou lazwa dan ou predikasyon ler ou anons sa bon nouvel e ed bann “ki annan sa bon kondisyon leker pour lavi eternel” realize ki delivrans par Rwayonm Bondye pe aprose!—Akt 13:48, NW.
Eski ou rapel?
• Ki mannyer Zezi ti montre ki sa Rwayonm i vreman enportan?
• Akoz i vreman enportan pour ganny delivre ozordi plis ki zanmen oparavan?
• Ki bann levennman nou kapab ekspekte pandan sa gran ladetres?
• Ki mannyer Zeova i prouve ki i pou anmenn sa pli gran delivrans?
[Kestyon]
[Portre lo paz 16-17]
Labib ti predir en gran travay predikasyon pour nou letan
[Portre lo paz 18]
Parey Zeova ti delivre Noe ek son fanmir, I kapab delivre nou
[Portre lo paz 20]
Zeova “pou eswiy tou larm . . . , lanmor pou nepli egziste.”—Rev. 21:4