Fer progre sprirityel par imit legzanp Pol
Fer progre sprirityel par imit legzanp Pol
“Mon’n konbat en bon konba, mon’n fini sa lakours, mon’n gard lafwa.”—2 TIM. 4:7.
1, 2. Ki sanzman Sol sorti Tars ti fer dan son lavi e ki travay enportan i ti konmans fer?
I TI en zonm ki ti enportan e entelizan. Parkont, i ti ‘viv dapre pasyon son prop natir.’ (Efe. 2:3) Pli tar i ti dekrir son lekor konman en dimoun ki ti ‘blasfenm, persekit e ensilte’ lezot. (1 Tim. 1:13) Sa zonm ti apel Sol sorti Tars.
2 Avek letan Sol ti fer bann gran sanzman dan son lavi. I ti abandonn lafason ki i ti pe viv oparavan e travay dir pour ‘pa rod son prop lentere, me plito lentere en gran kantite dimoun.’ (1 Kor. 10:33) I ti vin en dimoun dous e demontre en gran lafeksyon anver bann ki oparavan ti viktim sa laenn ki i ti annan kont zot. (Lir 1 Tesalonisyen 2:7, 8.) I ti ekrir: “Mon’n vin serviter levanzil. . . . Mon pli pti ki pli pti parmi manm pep Bondye, pourtan Bondye in donn mwan sa privilez pour anons bann non-Zwif Levanzil larises san limit Kris.”—Efe. 3:7, 8.
3. Dan ki fason etidye bann let Pol ek bann resi lo son minister i kapab ed nou?
3 Sol ki ti osi ganny rekonnet konman Pol ti fer en gran progre spirityelman. (Akt 13:9) Si nou etidye bann let ki Pol in ekrir ek bann rapor lo son minister e imit legzanp sa lafwa ki i ti annan, nou kapab asire ki nou pou akseler nou progre dan laverite. (Lir 1 Korentyen 11:1; Ebre 13:7.) Annou vwar ki mannyer ler nou fer sa, sa pou motiv nou pour annan en bon labitid letid personnel, devlop sa vre lanmour pour lezot e annan en bon pwennvi lo nou lekor.
Labitid etidye ki Pol ti annan
4, 5. Ki byenfe Pol ti gannyen atraver letid personnel?
4 Konman en Farizyen i ti deza annan serten konnesans lo Lekritir akoz li menm i ti dir: “Mon’n ganny konman profeser Gamalyel ki’n ansenny mwan byen Lalwa nou bann zanset.” (Akt 22:1-3; Fili. 3:4-6) Zis apre ki i ti’n ganny batize, i ti “al deswit an Arabi.” Sa ti kapab swa dan Dezer Siri ouswa dan en landrwa trankil dan rezyon Arabi kot i ti pou konvenab pour li medite. (Gal. 1:17) I paret ki i ti anvi reflesir lo bann Lekritir ki ti prouve ki Zezi ti Mesi. Deplis, Pol ti anvi prepar li pour sa travay ki ti pe esper li. (Lir Akt 9:15, 16, 20, 22.) I ti pran letan pour li medit lo bann keksoz spirityel.
5 Pol ti ganny konnesans ek konprenezon atraver letid personnel ki i ti fer lo Lekritir e sa ti ed li pour ansenny laverite avek lefikasite. Par egzanp, i ti sit omwen senk verse dan Lekritir Ebre pour prouve ki Zezi ti Mesi kan i ti dan sinagog Antyos dan Pisidi. Pol ti osi refer avek lekritir sen plizyer fwa. Bann largiman baze lo Labib ki i ti fer ti sitan konvenkan ki “bokou parmi bann Zwif, ek bann ki’n konverti dan larelizyon Zwif, ti swiv Pol ek Barnabas” pour zot kapab aprann plis. (Akt 13:14-44) En pe letan pli tar, kan en group Zwif ki ti an Ronm ti vin kot Pol ti pe reste, i ti eksplik zot bann keksoz par “anons zot Rwayonm Bondye e esey konvenk zot konsernan Zezi atraver Lalwa Moiz ek liv bann Profet.”—Akt 28:17, 22, 23.
6. Kwa ki ti ed Pol pour reste for spirityelman ler i ti pe rankontre bann leprev?
6 Kan i ti pe fer fas avek bann leprev, Pol ti kontinyen etidye Lekritir e sa mesaz enspire ti donn li lafors. (Ebr. 4:12) Pandan ki i ti dan prizon an Ronm avan son egzekisyon, Pol ti demann Timote pour anmenn “bann liv” ek “roulo” pour li. (2 Tim. 4:13) I tre probab ki sa bann dokiman ti bann porsyon dan Lekritir Ebre ki Pol ti abitye servi pour li etidye oprofon ladan. Pol ti ganny konnesans lo Lekritir par devlop en labitid pour etidye Labib e sa ti vreman enportan pour li kapab reste ferm dan lafwa.
7. Nonm serten byenfe ki ou kapab gannyen kan ou etidye Labib regilyerman.
7 En letid Labib regilye ek meditasyon pou ed nou progrese spirityelman. (Ebr. 5:12-14) An rapor avek valer ki Parol Bondye i annan, en psalmis ti sante: “Lalwa ou labous i bon pour mwan, plis ki plizyer milye pyes lor ek larzan. Ou komannman i fer mwan pli saz ki mon bann lennmi, akoz i pour mwan pour en letan endefini. Mon’n anpes mon lipye al dan okenn move semen, pour ki mon kapab gard ou parol.” (Ps. 119:72, 98, 101) Eski ou regilyerman fer en letid Labib personnel? Eski ou pe lir Labib tou le zour e reflesir lo sa ki ou lir pour ki pli tar ou ava kapab akonplir lezot keksoz dan servis Bondye?
Sol ti aprann kontan lezot
8. Ki mannyer Sol ti tret bann dimoun ki pa ti Zwif?
8 Avan vin en Kretyen, Sol ti en dimoun ki ti vreman devoue pour son larelizyon me i pa ti tro enterese avek lezot dimoun ki pa ti Zwif. (Akt 26:4, 5) I ti pe obzerve avek laprouvasyon kan bann Zwif ti saboul Etyenn avek ros. I kapab ki sa ki Sol ti pe vwar ti donn li plis konfyans ki sa ki i ti pe fer ti byen e petet i ti krwar ki Etyenn ti pe ganny sa pinisyon ki i ti merite. (Akt 6:8-14; 7:54–8:1) Sa resi enspire i dir: ‘Sol ti konmans detri [“kongregasyon,” NW] i ti al dan tou bann lakaz, enn apre lot, e tir bann krwayan, zonm konman fanm e zet zot dan prizon.’ (Akt 8:3) I ti “al ziska dan bann lavil etranze pour persekit zot.”—Akt 26:11.
9. Ki Sol ti eksperyanse ki ti fer li re egzamin lafason i ti tret lezot?
9 Kan Sol ti pe al Damas pour persekit bann disip Kris laba, Senyer Zezi ti aparet avek li. Sa laparans ekstraordiner Garson Bondye ti sitan briyan ki ti fer Sol pa vwar kler e bezwen depan lo lezot. Latitid Sol anver bann dimoun ti’n fini sanze pour touzour avan menm ki Zeova ti servi Ananyas pour fer li revwar kler. (Akt 9:1-30) Apre ki i ti’n vin en disip Kris, i ti travay dir pour tret tou dimoun parey Zezi ti tret zot. E sa ti enkli met vyolans dekote e “vin anpe avek tou dimoun.”—Lir Romen 12:17-21.
10, 11. Ki mannyer Pol ti demontre sa vre lanmour anver bann dimoun?
10 Pol pa ti zis kontant li avek vin anpe avek lezot. I ti anvi demontre sa vre lanmour anver lezot e i ti ganny sa loportinite dan son minister Kretyen. Lo son premye vwayaz misyonner, i ti pres sa bon nouvel Lazi Miner. Malgre lopozisyon sever, Pol ek son bann konpanyon ti pas plis letan pour ed bann dimoun ki ti annan limilite pour vin Kretyen. Zot ti revizit Lis ek Ikonyonm, menm si bann adverser dan sa bann lavil ti’n esey touy Pol.—Akt 13:1-3; 14:1-7, 19-23.
11 Pli tar, Pol ek son group ti al dan lavil Masedwann an Filip pour zot rod bann dimoun ki ti anvi annan en bon relasyon avek Bondye. Laba en madanm ki ti’n konverti dan larelizyon Zwif ti ekout sa bon nouvel e i ti vin en Kretyen. Lotorite sivil ti bat Pol ek Silas avek fwet e zet zot dan prizon. Toudmenm, Pol ti pres avek en gard prizon e an rezilta sa, sa msye ek son fanmir ti batize konman bann adorater Zeova.—Akt 16:11-34.
12. Kwa ki ti motiv Sol pour vin en zapot Zezi?
12 Akoz Sol ki avan sa ti persekit bann Kretyen ti aprezan adopte lafwa son bann viktim? Oparavan Sol ti kontan ensilte lezot, me kwa ki ti motiv li pour vin sa zapot ki ti zantiy e annan lanmour anver lezot e menm pare pour riske son lavi pour ki lezot dimoun ti pou kapab aprann laverite konsernan Bondye ek Kris? Pol li menm i eksplike: “Bondye par son lagras ti swazir mwan . . . e i [ti] apel mwan pour servi li. I ti trouv bon pour revel mwan son Garson.” (Gal. 1:15, 16) Pol ti ekrir Timote: “I’n fer mwan gras pour ki par mwan, pli gran peser, Zezi-Kri i montre tou son pasyans pour servi en legzanp pour tou bann ki pou krwar pli tar e resevwar lavi eternel.” (1 Tim. 1:16) Lefet ki Zeova ti pardonn Pol par demontre son gran labonte ek mizerikord, sa ti pous li pour demontre lanmour anver lezot par pres sa bon nouvel avek zot.
13. Kwa ki devret pous nou pour demontre lanmour anver lezot e ki mannyer nou kapab fer sa?
13 Pareyman, Zeova i pardonn nou bann fot ek pese. (Ps. 103:8-14) En psalmis ti demande: “Si ou ti vey bann fot, O Ya, O Zeova, lekel ki ti pou kapab debout devan ou?” (Ps. 130:3) San mizerikord Bondye, napa personn parmi nou ki ti pou trouv lazwa dan servis sakre, ni menm kapab esper avek enpasyans pour ganny lavi eternel. Bondye in demontre son gran labonte anver nou tou. Alors, parey Pol nou osi nou devret annan sa gran dezir pour demontre plis lanmour anver lezot. Nou kapab fer sa par pres avek zot, ansenny zot laverite e osi par fortifye nou bann frer ek ser Kretyen.—Lir Akt 14:21-23.
14. Ki mannyer nou kapab fer plis dan nou minister?
14 Pol ti anvi progrese konman en minis sa bon nouvel e legzanp Zezi ti tous son leker. Parmi bann fason ki Garson Bondye ti demontre lanmour ki pa kapab ganny konpare anver lezot ti atraver sa travay predikasyon. Zezi ti dir: “I annan en gran rekolt ki’n pare me napa ase zouvriye. Pour sa rezon, sipliy met rekolt pour anvoy zouvriye.” (Mat. 9:35-38) Par vin en travayer devoue, Pol li menm ti azir an armoni avek nenport ki demann ki i ti’n kapab fer an rapor avek ganny plis zouvriye. Be ou? Eski ou kapab amelyor kalite ou predikasyon? Oubyen eski ou kapab ogmant ou partisipasyon dan travay predikasyon, petet menm par fer laranzman pour fer servis pionye? Annou demontre sa vre lanmour anver lezot par ed zot pour “atas zot for avek parol lavi.”—Fili. 2:16.
Fason Pol ti konsider son lekor
15. Ki mannyer Pol ti konsider son lekor konpare avek lezot Kretyen?
15 Konman en minis Kretyen, Pol in kit en bon legzanp pour nou dan en lot fason. Menm si i ti ganny en kantite privilez dan kongregasyon Kretyen, Pol ti konsyan ki sa bann privilez ki i ti pe gannyen pa ti akoz son abilite. I ti realize ki i ti pe ganny sa bann benediksyon par lagras Bondye. Pol ti rekonnet ki lezot Kretyen osi ti bann minis efikas sa bon nouvel. Malgre responsabilite ki i ti annan parmi pep Bondye, i ti annan limilite.—Lir 1 Korentyen 15:9-11.
16. Ki mannyer Pol ti demontre limilite ek modesti an rapor avek sa size lo sirkonsizyon?
16 Remarke ki mannyer Pol ti regle en problenm ki ti leve dan lavil Antyos an Siri. Laba kongregasyon ti divize akoz pwennvi ki sakenn ti annan lo sirkonsizyon. (Akt 14:26–15:2) Vi ki Pol ti’n ganny apwente pour diriz sa travay predikasyon avek bann non Zwif ki pa ti sirkonsi, alor i ti’n kapab panse ki i pli kalifye pour regle sa problenm avek bann non Zwif. (Lir Galat 2:8, 9.) Parkont, kan i ti remarke ki son zefor pa ti pe rezourd sa sitiasyon, avek limilite ek modesti i ti swiv laranzman ki ti an plas pour apros konsey direkter Zerizalenm pour diskit sa problenm. I ti korpere pandan ki bann manm ti ekout sa problenm, pran en desizyon e swazir li konman enn zot portparol. (Akt 15:22-31) Alors Pol ti ‘premye pour demontre respe’ pour lezot son bann frer ek ser spirityel.—Rom. 12:10b.
17, 18. (a) Ki santiman Pol ti devlope pour bann dimoun dan kongregasyon? (b) Ki nou aprann konsernan Pol par lafason ki bann ansyen Efez ti reazir anver son depar?
17 Pol ki ti annan limilite pa ti gard zistans avek son bann frer ek ser dan kongregasyon. Plito, i ti atase avek zot. Ver lafen son let pour bann Romen, i ti anvoy salitasyon pour 20 dimoun par mansyonn zot non. Laplipar zot pa ganny mansyonnen okenn par dan Lekritir e zis en ptigin parmi ki ti annan bann privilez spesyal. Me zot ti bann serviter Zeova ki ti fidel e Pol ti kontan zot en kantite.—Rom. 16:1-16.
18 Limilite ek lanmitye senser ki Pol ti annan ti fortifye bann kongregasyon. Apre ki i ti’n zwenn avek bann ansyen Efez pour dernyen fwa, zot ti “ser Pol dan zot lebra e anbras li pour fer zot adye. Zot ti tris sirtou akoz i ti’n dir zot sa parol konmkwa zot pa pou war son figir ankor.” Depar en zonm ki fyer ouswa arogan pa ti pou annan sa kalite lefe.—Akt 20:37, 38.
19. Ki mannyer nou kapab demontre “limilite” dan nou relasyon avek lezot?
19 Tou bann ki swete progrese spirityelman i devret demontre limilite parey Pol. I ti ankouraz bann Kretyen pour “pa fer nanryen par lespri egois e vantar, me avek limilite konsider lezot pli enportan ki ou.” (Fili. 2:3) Ki mannyer nou kapab swiv sa konsey? En fason se par korpere avek bann ansyen dan nou kongregasyon, swiv zot gidans e azir an armoni avek bann desizyon ki zot fer. (Lir Ebre 13:17.) En lot fason se par annan en gran respe pour tou nou bann frer ek ser dan kongregasyon. Souvandfwa dan en kongregasyon Temwen Zeova i annan dimoun ki annan diferan nasyonalite, kiltir, ras ek tradisyon. Alors, eski pa nou devret tret tou dimoun parey, san fer lapliferans e annan en gran lafeksyon pour zot parey Pol? (Akt 17:26; Rom. 12:10a) Nou ganny ankouraze pour “resevwar kanmarad parey Kris in resevwar [nou], pour laglwar Bondye.”—Rom. 15:7.
Tay sa lakours lavi avek landirans
20, 21. Kwa ki pou ed nou tay sa lakours pour lavi avek sikse?
20 Lavi en Kretyen i kapab ganny konpare avek en lakours maraton. Pol ti ekrir: ‘Mon’n fini sa lakours, mon’n gard lafwa. Dezorme kouronn lazistis in rezerve pour mwan, sa ki Senyer sa ziz ki zis pou donn mwan sa zour, pa zis mwan, me osi tou bann ki kontan war li ler i aparet.’—2 Tim. 4:7, 8.
21 Si nou swiv legzanp Pol sa pou ed nou tay sa lakours pour lavi eternel avek sikse. (Ebr. 12:1) Alors, annou kontinyen fer bann progre spirityel par devlop en bon labitid letid personnel, devlop en gran lanmour pour lezot e touzour demontre limilite anver lezot.
Ki ou pou reponn?
• Ki byenfe Pol ti gannyen atraver letid personnel dan Lekritir?
• Akoz annan en gran lanmour pour lezot i enportan pour bann vre Kretyen?
• Ki kalite ki pou ed ou pour tret lezot san fer lapliferans?
• Ki mannyer legzanp Pol i kapab ed ou pour korpere avek bann ansyen dan ou kongregasyon?
[Kestyon]
[Portre lo paz 26]
Fortifye nou atraver Lekritir parey Pol
[Portre lo paz 28]
Demontre lanmour par partaz sa bon nouvel avek lezot
[Portre lo paz 29]
Eski ou konnen kwa ki ti fer bann frer ek ser kontan e apresye Pol?