Bann kalite ki nou bezwen devlope
Bann kalite ki nou bezwen devlope
“Fer tou ou posib pour atas ou avek lazistis, atas ou avek Bondye, gard lafwa dan Kris, annan lanmour pour lezot ek perseverans e tret lezot avek [“ladouser,” NW].”—1 TIM. 6:11.
1. Donn en legzanp pour montre ki sa mo “fer tou ou posib” i vedir.
KWA ki vin dan ou lespri ler ou tann sa mo “fer tou ou posib”? Petet ou mazin dan letan Moiz ler larme Ezipsyen “ti tay deryer” bann Izraelit, zis pour fini par ganny detrir dan Lanmer Rouz. (Egz. 14:23) Oubyen petet ou mazin sa danze ki en dimoun dan ansyen Izrael ti pas atraver si i ti’n touy en lot par aksidan. I ti pou bezwen depese pour al dan enn parmi sa sis lavil ki ti’n ganny swazir konman lavil refiz. Sankwa “sa enn ki ankoler e ki pe tay deryer sa kriminel pour revanze [i a kapab] zwenn li e touy li.”—Det. 19:6, Tanakh
2. (a) Ki pri Bondye ti ankouraz serten Kretyen pour tay for pour gannyen? (b) Ki lespwar Zeova in donn lamazorite Kretyen ozordi?
2 Kontrerman avek sa bann legzanp dan Labib ki nou fek vwar pli anler, annou egzamin sa latitid pozitif ki zapot Pol ti annan: “Mon tay for pour mwan ariv lo bit, pour ganny sa pri, ki Bondye par Kris-Zezi, in apel nou pour resevwar lao.” (Fili. 3:14) Labib i montre ki an tou i annan 144,000 Kretyen swazir, enkli Pol ki resevwar sa pri pour viv dan lesyel. Zot pou diriz lo later ansanm avek Zezi pandan mil an. Pa i en bi vreman ekstraordiner ki Bondye in ankouraz bann Kretyen swazir pour tay for pour atenn! Me lamazorite vre Kretyen ozordi, i annan en lespwar oubyen en bi diferan. Avek lanmour Zeova i ofer zot sa ki Adan ek Ev ti perdi, setadir sa posibilite pour viv pour touzour avek en lasante parfe dan paradi lo later.—Rev. 7:4, 9; 21:1-4.
3. Ki nou kapab fer pour demontre lapresyasyon pour labonte ekstraordiner Bondye?
3 Bann imen enparfe pa kapab ganny lavi eternel par zot prop zefor pour fer sa ki byen. (Iza. 64:6) I posib pour nou ganny lavi eternel si zis nou annan lafwa dan sa dispozisyon ranpli avek lanmour ki Bondye in pran pour delivre nou atraver Zezi Kri. Ki nou kapab fer pour demontre nou lapresyasyon pour sa labonte ekstraordiner Bondye? Nou kapab fer en keksoz, par obeir sa lord: “Fer tou ou posib pour atas ou avek lazistis, atas ou avek Bondye, gard lafwa dan Kris, annan lanmour pour lezot ek perseverans e tret lezot avek [“ladouser,” NW].” (1 Tim. 6:11) Si nou egzamin sa bann kalite sa i kapab ed nou pour annan plis determinasyon pour fer tou nou posib pour devlop zot “pli byen ankor.”—1 Tesa. 4:1.
“Fer tou ou posib pour atas ou avek lazistis”
4. Akoz nou kapab annan lasirans ki rod “lazistis” i enportan e ki bann premye pa en dimoun i bezwen pran pour fer sa?
4 Dan sa de let ki zapot Pol ti ekrir Timote, i ti donn en lalis bann kalite ki nou devret fer tou posib pour annan e a sak fwa i ti mansyonn “lazistis” an premye. (1 Tim. 6:11; 2 Tim. 2:22) Deplis, sa lankourazman pour fer tou nou posib pour annan lazistis i ganny repete dan lezot pasaz Labib. (Prov. 15:9; 21:21; Iza. 51:1) En fason pour konmans fer sa i par pran konnesans egzakt lo sa “sel vre Bondye ek Zezi-Kri ki [i’n] anvoye.” (Zan 17:3) Ler en dimoun i fer tou son posib pour annan lazistis, sa pou pous li pour azir, setadir repantir konsernan bann fot ki i’n komet dan lepase e “revin ver Bondye” pour fer son lavolonte.—Akt 3:19.
5. Ki nou devret fer pour ganny e mentenir laprouvasyon Bondye?
5 Plizyer milyon dimoun senser ki pe fer tou zot posib pour annan lazistis pe dedye zot lavi avek Zeova e demontre sa ve piblikman par batenm. Si aprezan ou en Kretyen batize, eski ou’n reflesir ki lafason ou viv ou lavi i devret montre ki ou pe kontinyen fer tou posib pour annan lazistis? En laspe dan sa domenn i lefet ki ou pe rekonnet dapre Labib sa ki “byen ek sa ki mal” ler ou annan bann gro desizyon pour fer an rapor avek ou lavi. (Lir Ebre 5:14.) Par egzanp, si ou en Kretyen selibater ki annan laz pour marye, eski ou determinen pour evite annan okenn relasyon romantik avek en dimoun ki pa ankor batize? Ou pe fer sa si ou pe fer tou ou posib pour annan lazistis.—1 Kor. 7:39.
6. Kwa ki enplike kan nou vreman fer tou nou posib pour annan lazistis?
6 I annan en diferans ant annan lazistis e “vin tro zis.” (Ekle. 7:16) Zezi ti averti nou pour pa fer vantar konsernan sa kalite lazistis zis pour paret pli bon ki lezot. (Mat. 6:1) Nou leker i enplike kan nou vreman fer tou nou posib pour annan lazistis, setadir koriz bann move panse, latitid, motif ek dezir. Si nou kontinyen fer zefor pour fer sa, i pou difisil pour nou komet bann pese grav. (Lir Proverb 4:23; konpar Zak 1:14, 15.) Deplis, Zeova pou beni e ed nou ler nou fer tou nou posib pour devlop lezot kalite Kretyen ki enportan.
“Fer tou ou posib pour atas ou avek . . . Bondye”
7. Ki i vedir pour ‘atase avek Bondye’?
7 Ler en dimoun i atase oubyen annan devosyon anver en lot dimoun, sa i vedir ki i vreman dedye li avek sa dimoun e fidel anver li. En diksyoner baze lo Labib i fer remarke ki sa mo Grek ki’n ganny tradwir par ‘atase avek Bondye’ i dekrir “sa dibyen ek sa bon latitid pour fer sir ki nanryen pa diminyen oubyen afebli lakrent ki nou annan pour Bondye.” Souvan bann Izraelit pa ti reisi demontre sa kalite latasman, parey nou kapab vwar atraver zot dezobeisans menm apre ki Bondye ti’n liber zot Lezip.
8. (a) Ki kestyon pese Adan ti souleve? (b) Ki mannyer larepons konsernan sa “sen sekre” ti ganny revele?
8 Plizyer milye lannen apre ki sa zonm parfe Adan ti fer pese, sa kestyon pa ti ankor ganny reponn: “Eski okenn imen i kapab demontre ki i annan en latasman parfe oubyen konplet anver Bondye?” Pandan tou sa bann letan, napa okenn imen enparfe ki ti kapab viv en lavi ki demontre en latasman parfe avek Bondye. Me dan sa letan ki i ti’n fikse, Zeova ti revel larepons konsernan sa “sen sekre.” I ti transfer lavi son sel Garson ki ti dan lesyel, dan vant Mari pour ki i ne konman en imen parfe. Tou dilon son lavi lo later enkli son lanmor ki i ti sibir avek laont, Zezi ti demontre ki i ti vedir pour vreman dedye nou lavi avek Bondye e reste fidel anver li. Son bann lapriyer ti demontre sa gran respe ki i ti annan pour son Papa dan lesyel ki ranpli avek lanmour. (Mat. 11:25; Zan 12:27, 28). Deplis, Zeova ti enspir Pol pour koz konsernan ‘latasman avek Bondye’ par dekrir sa bon legzanp ki Zezi ti demontre ler i ti lo later.—Lir 1 Timote 3:16.
9. Ki mannyer nou kapab fer tou nou posib pour atase avek Bondye?
9 Lefet ki nou enparfe, nou pa kapab demontre en latasman parfe avek Bondye. Me nou kapab fer tou nou posib pour annan sa kalite latasman. Pour arive fer sa nou bezwen swiv legzanp Kris pli byen ki nou kapab. (1 Pyer 2:21) Alors, nou pa pour parey bann ipokrit ki “montre en laparans lapiete, me rezet son vre pisans.” (2 Tim. 3:5) Sa pa vedir ki sa vre latasman avek Bondye napa nanryen pour fer avek laparans. Byensir, nou laparans osi i enplike dan sa vre latasman. Par egzanp, ki swa nou pe swazir en rob maryaz oubyen pe deside ki nou pou mete ler nou pe al fer konmisyon, nou laparans i devret touzour annakor avek lefet ki nou dir nou “annan respe pour Bondye”. (1 Tim. 2:9, 10, NW) Wi, si nou anvi fer tou nou posib pour atase avek Bondye nou bezwen pran an konsiderasyon son bann prensip drwat dan nou lavi.
“Fer tou ou posib pour atas ou avek . . . Lafwa”
10. Ki nou bezwen fer pour gard nou lafwa for?
10 Lir Romen 10:17. Pour devlop e gard en lafwa for, en Kretyen i devret kontinyen medit lo bann laverite presye ki dan Parol Bondye. “Lesklav fidel e pridan” in fourni nou avek en kantite bon piblikasyon. Sa trwa liv eksepsyonnel, The Greatest Man Who Ever Lived, Ekout sa Gran Ansennyan ek “Come Be My Follower,” in ganny fer pour ed nou konn pli byen Kris e pour nou kapab pli byen imit li. (Mat. 24:45-47, NW) Sa lesklav i osi fer laranzman pour bann renyon ek diferan lasanble, kot laplipar ditan i met lanfaz lo “lansennyman Kris.” Eski ou vwar okenn fason kot ou kapab pli byen benefisye par “port en pli gran latansyon” avek sa bann dispozisyon ki sorti kot Bondye?—Ebr. 2:1.
11. Ki rol lapriyer ek lobeisans i zwe ler nou fer tou nou posib pour annan lafwa?
11 Lapriyer i en lot mwayen ki ede devlop en lafwa for. En fwa bann disip Zezi ti sipliy li: “Fer nou ganny plis lafwa!” Avek limilite nou kapab sipliy Bondye pour fer sa menm keksoz. (Lik 17:5) Pour annan plis lafwa nou devret priy Bondye pour ganny led son lespri sen vi ki lafwa i form parmi bann “fri lespri.” (Gal. 5:22) Deplis, ler nou obeir bann komannman Bondye nou lafwa i vin pli for. Par egzanp, nou kapab fer plis zefor pour ogmant nou partisipasyon dan travay predikasyon. Sa pou sirman donn nou en gran lazwa. E anmezir ki nou mazin konsernan bann byenfe ki nou gannyen par “rod plito Rwayonm Bondye ek son lazistis” nou lafwa pou vin pli for.—Mat. 6:33.
“Fer tou ou posib pour atas ou avek . . . lanmour”
12, 13. (a) Ki sa nouvo komannman ki Zezi ti donnen? (b) Dan ki fason i enportan pour fer tou nou posib pour annan lanmour parey Kris?
12 Lir 1 Timote 5:1, 2. Pol ti donn bann konsey pratik lo ki mannyer bann Kretyen i kapab demontre lanmour anver kanmarad. Nou latasman anver Bondye i devret enkli osi lobeisans anver nouvo komannman Zezi ki demann nou pour “kontan kanmarad” parey i kontan nou. (Zan 13:34) Zapot Zan ti fer resorti: “Me si en dimoun i posed bann byen later, e i trouv son frer dan bezwen e i ferm son leker, e i pa ed li, ki mannyer lanmour Bondye i kapab reste dan son leker.” (1 Zan 3:17) Eski ou kapab mazin bann lokazyon kan ou ti demontre lanmour dan en fason pratik?
13 En lot fason ki nou kapab fer tou nou posib pour annan lanmour i ler nou pare pour pardonnen e pa gard rankin kont nou bann frer ek ser. (Lir 1 Zan 4:20.) Nou plito anvi swiv sa konsey enspire pour kontinyen “siport kanmarad, pardonn kanmarad sak fwa ki enn ant zot i ofans en lot. Parey Senyer ti pardonn zot, zot osi pardonn kanmarad.” (Kol. 3:13) Eski i annan en dimoun dan kongregasyon anver ki ou kapab aplik sa konsey? Eski ou pou pardonn li?
“Fer tou ou posib pour atas ou avek . . . perseverans”
14. Ki nou kapab aprann avek sa kongregasyon ki ti dan Filadelfi?
14 I annan en diferans ant fer nou mye pour reisi atenn en lobzektif ki dir pour en pti moman ek ler i vin difisil oubyen pran plis letan ki nou ti pe ekspekte pour atenn sa lobzektif. I kler ki nou bezwen perseverans pour fer tou nou posib pour arive atenn sa lobzektif pour ganny lavi eternel. Zezi ti dir avek sa kongregasyon dan Filadelfi: “Parski ou’n obei mon lord avek perseverans, mon pou protez ou pandan bann letan maler.” (Rev. 3:10, NW; not anba lo paz.) Wi, Zezi ti ansenny konsernan sa nesesite pour annan landirans oubyen perseverans, setadir en kalite ki ed nou pour pa bes lebra ler nou pe fer fas avek bann leprev ek tantasyon. Bann frer dan premye syek dan kongregasyon Filadelfi ti’n bezwen demontre en perseverans ekstraordiner ler zot ti pas atraver sa kantite leprev ki ti teste zot lafwa. Alors, Zezi ti donn zot sa lasirans ki i pou donn zot plis led pandan sa pli gran leprev ki ti pou vini.—Lik 16:10.
15. Ki Zezi ti ansennyen konsernan perseverans?
15 Zezi ti konnen ki son bann disip ti pou fer fas avek laenn delapar zot fanmir ki pa ti krwayan ek lemonn an zeneral, se pour sa alors ki omwen de fwa i ti ankouraz zot dan sa fason: “Sa ki persevere ziska lafen pou ganny sove.” (Mat. 10:22; 24:13) Zezi ti osi demontre ki mannyer dan sa letan son bann disip ti pou kapab ganny lafors pour andire. Dan en legzanp i ti konpar sa later kot i annan ros avek bann dimoun ki “tann laparol [Bondye], zot resevwar li avek lazwa” me ki tonbe ler zot lafwa i ganny teste. De lot kote, i ti konpar son bann disip fidel avek sa bon later akoz zot “gard” Parol Bondye e “avek perseverans zot prodwi bokou fri.”—Lik 8:13, 15.
16. Ki sa provizyon ranpli avek lanmour ki’n ed plizyer milyon dimoun pour persevere?
16 Eski ou’n remark sa sekre ki kapab ed nou andire? Nou devret “gard” Parol Bondye, par kontinyen gard li vivan dan nou leker ek lespri. Vi ki nou annan New World Translation of the Holy Scriptures, ki presi, kler, fasil pour lir e disponib dan plizyer langaz, sa in fer li posib pour fer sa. Si sak zour nou medit lo en porsyon Parol Bondye, sa pou ed nou trouv sa lafors ki nou bezwen pour kontinyen prodwir fri “avek perseverans.”—Ps. 1:1, 2.
‘Fer tou ou posib pour atas ou avek . . . ladouser’ ek lape
17. (a) Akoz ‘ladouser’ i vreman enportan? (b) Ki mannyer Zezi ti demontre ki i ti annan ladouser?
17 Personn pa kontan ganny akize pour en keksoz ki i pa’n dir oubyen fer. Dimoun i souvan reakte avek lakoler ler zot ganny kritike dan en fason enzis. Pa i bokou pli meyer pour demontre “ladouser”! (Lir Proverb 15:1.) I demann bokou zefor pour azir avek ladouser ler nou ganny kritike dan en fason enzis. Zezi ti kit en bon legzanp dan sa domenn. “Kan zot ti ensilte li, i pa ti reponn par lensilt. Dan son soufrans, i pa’n fer okenn menas; me i ti met tou dan lanmen Bondye ki rann lazistis.” (1 Pyer 2:23) Nou pa ekspekte pour azir parey Zezi dan sa domenn, me nou kapab fer zefor pour amelyor ankor plis lafason ki nou demontre ladouser.
18. (a) Ki dibyen nou eksperyanse ler nou demontre ladouser? (b) Ki lezot kalite nou ganny ankouraze pour fer tou nou posib pour annan?
18 Parey Zezi, fotespere ki nou “touzour pare pour donn en repons” konsernan nou krwayans, “me fer li avek [“ladouser,” NW] ek respe.” (1 Pyer 3:15, 16) Wi, ler nou annan ladouser sa i kapab anpese ki bann gro dispit i leve avek dimoun ki nou zwenn dan predikasyon oubyen avek bann frer ek ser akoz nou napa menm pwennvi. (2 Tim. 2:24, 25) Ladouser i ed nou pour annan lape. Petet i pour sa ki Pol, dan son dezyenm let pour Timote ti mansyonn “lape” parmi bann kalite ki Timote ti devret fer zefor pour devlope. (2 Tim. 2:22; konpar 1 Timote 6:11.) Wi, “lape” i en lot kalite ki Labib i ankouraz nou pour fer zefor pour annan.—Ps. 34:14; Ebr. 12:14.
19. Apre ki ou’n egzamin sa set kalite Kretyen, ki ou determinen pour fer tou ou posib pour annan e akoz?
19 An bref nou’n egzamin set kalite Kretyen ki nou ganny ankouraze pour fer tou nou posib pour annan setadir ladrwatir, latasman avek Bondye, lafwa, lanmour, perseverans, ladouser ek lape. Pa i gou ler bann frer ek ser dan bann kongregasyon i fer zefor pour demontre sa bann kalite presye plis ankor! Sa pour rann loner Zeova e permet li pour form sakenn parmi nou afen ki nou loue li.
Kestyon pour refleksyon
• Kwa ki enplike ler nou fer tou nou posib pour annan ladrwatir ek latasman avek Bondye?
• Kwa ki pou ed nou pour fer tou nou posib pour annan lafwa ek perseverans?
• Ki mannyer lanmour i devret enfliyans lafason ki nou azir anver lezot?
• Akoz nou bezwen fer tou nou posib pour annan ladouser ek lape?
[Kestyon]
[Portre lo paz 20]
Zezi ti averti nou pour pa fer vantar konsernan nou lazistis zis pour enpresyonn bann zonm
[Portre lo paz 21]
Nou kapab fer tou nou posib pour annan lafwa par medit lo laverite dan Parol Bondye
[Portre lo paz 23]
Nou kapab fer tou nou posib pour annan lanmour ek ladouser