Bann pwen enteresan dan let pour bann Romen
Parol Zeova i vivan
Bann pwen enteresan dan let pour bann Romen
ZAPOT Pol ti ariv dan lavil Korent apepre lannen 56 N.L. pandan ki i ti lo son trwazyenm vwayaz misyonner. I ti’n aprann ki bann Zwif ek bann ki pa ti Zwif an Ronm pa ti pe partaz menm lopinyon. Vi ki i ti anvi zot ini ansanm totalman dan Kris, alor Pol ti ekrir zot en let.
Dan sa let pour bann Romen, Pol ti eksplike ki mannyer bann imen i ganny konsidere drwat e ki mannyer zot devret viv. Sa let i ogmant nou konnesans lo Bondye ek son Parol, met lanfaz lo labonte ekstraordiner Bondye e onor rol Kris par ki nou ganny delivrans.—Ebr. 4:12.
KONSIDERE DRWAT—KI MANNYER?
Pol ti ekrir: “Tou dimoun in fer pese e pa’n arive ganny laglwar Bondye, zot in ganny zistifye [oubyen “konsidere drwat,” NW] par son lagras ki i’n donn gratwitman, par Kris Zezi ki’n delivre zot” e sa se atraver son sakrifis. I ti osi dir: “En dimoun i ganny zistifye par son lafwa, pa akoz i’n fer sa ki lalwa i ordonn li.” (Rom. 3:23, 24, 28) Atraver lafwa dan en “laksyon zis,” bann Kretyen swazir ek manm “gran lafoul” “lezot mouton” i kapab ganny “konsidere konman zis.” Pour bann Kretyen swazir zot, se par viv dan lesyel konman bann zeritye avek Kris, tandis ki gran lafoul zot konman zanmi Bondye avek ekspektasyon pour sirviv sa “gran ladetres.”—Rom. 5:18; Rev. 7:9, 14, NW; Zan 10:16, NW; Zak 2:21-24; Mat. 25:46.
Pol ti demande: “Eski nou ava fer pese akoz nou pa anba lalwa me anba lagras Bondye?” I ti reponn: “Pa ditou!” I ti eksplike: “Zot vin lesklav . . . swa pese ki anmenn lanmor, ouswa lobeisans ki anmenn lazistis [oubyen “ladrwatir,” NW].” (Rom. 6:15, 16) I ti dir: “Si par Lespri, zot touy bann laksyon zot natir egois, zot a viv.”—Rom. 8:13.
Larepons pour bann kestyon lo Labib:
1:24-32—Eski kondwit imoral ki ganny dekrir la i aplik avek bann Zwif ouswa lezot nasyon? Menm si sa deskripsyon i kapab pe dekrir toulede, Pol ti pe spesifikman refer avek bann Izraelit ki ti aposta pour en bann letan. Menm si zot ti konn konmannman Bondye zot ti “refize rekonnet” oubyen pa ti aksepte konnesans egzakt lo Bondye. Alors zot ti merite ganny pini.
3:24, 25—Ki mannyer bann dimoun ti ganny “delivre” avek bann fot “dan lepase” avan ki Zezi ti pey sa ranson? Sa premye profesi lo Mesi dan Zenez 3:15, ti trouv son lakonplisman dan lannen 33 N.L. kan Zezi ti ganny met amor lo en poto martir. (Gal. 3:13, 16) Parkont, lemoman ki Zeova ti pronons sa profesi, dan son lizye i ti konmsi sa ranson ti’n fini ganny peye akoz napa nanryen ki kapab anpes Bondye akonplir son plan. Alor, sa ti fer ki Zeova ti kapab pardonn pese bann desandan Adan ki ti annan lafwa dan sa promes lo baz sakrifis Zezi Kri ki ti pou arive alavenir. Sa ranson i osi permet ki bann ki’n mor depi lepok avan bann Kretyen i kapab ganny resisite.—Akt 24:15.
6:3-5—Ki savedir batenm dan Kris ek batenm dan son lanmor? Kan Zeova i swazir bann disip Kris avek lespri sen, zot ini ansanm avek Kris e zot vin manm dan sa kongregayon ki reprezant lekor Kris kot li i sa Latet. (1 Kor. 12:12, 13, 27; Kol. 1:18) Se sa batenm dan Kris. Bann Kretyen swazir i osi ganny ‘batize dan lanmor Kris’ dan le sans ki zot viv en lavi sakrifis e rezet okenn lespwar pour viv pour touzour lo later. Alor, zot lanmor i konman en sakrifis parey sa ki pour Zezi me zis ki pour zot napa valer konman ranson. Sa batenm dan lanmor Kris i terminen kan zot mor e ganny resisite pour al viv dan lesyel.
7:8-11—Ki mannyer ‘pese in sezi lokazyon par lentermedyer konmannman’? Lalwa ti ed bann dimoun pour konpran ki si sa pese e fer zot vin pli konsyan ki zot ti pe fer pese. An rezilta sa, zot ti remarke ki zot ti pe komet en kantite pese dan zot aksyon e plis dimoun ti realize ki zot ti pe fer bann pese ki oparavan zot pa ti pran kont. Alors i kapab ganny dir ki pese in sezi lokazyon par lentermedyer konmannman.
Leson pour nou:
1:14, 15. I annan en kantite rezon akoz nou devret anons sa bon nouvel avek devouman. Enn parmi se ki nou andet anver bann dimoun ki’n ganny aste avek disan Zezi e nou oblize ed zot spirityelman.
1:18-20. Bann dimoun ki napa respe pour Bondye e ki enzis i “san okenn lekskiz” akoz bann kalite envizib Bondye i evidan dan kreasyon.
2:28; 3:1, 2; 7:6, 7. Apre ki Pol ti’n dir bann parol ki kapab paret pe ofans bann Zwif, Pol ti fer bann remark dan en fason pli dous ki sa ki i ti’n dir. Sa i en bon legzanp pour ki nou osi nou kapab rezourd bann sitiasyon delika par servi bon zizman ek takt.
3:4. Letan parol zonm i diferan avek sa ki Bondye i dir dan son Parol, nou devret rekonnet ki Bondye i dir laverite par annan konfyans dan son mesaz ki dan Labib e azir an armoni avek Son lavolonte. Par partisip avek devouman dan sa travay predikasyon lo Rwayonm e fer disip, nou kapab ed lezot rekonnet ki Bondye i dir laverite.
4:9-12. Lafwa Abraam ti fer ki i ti ganny konsidere drwat menm avan ki i ti ganny sirkonsi alaz 99 an. (Zen. 12:4; 15:6; 16:3; 17:1, 9, 10) Dan sa fason pwisan Bondye ti montre kwa ki fer li posib pour en zonm paret drwat devan li.
4:18. Lespwar i zwe en gran rol dan nou lafwa akoz nou lafwa i baze lo nou lespwar.—Ebr. 11:1.
5:18, 19. Pol pa ti servi bokou mo pour eksplike ki mannyer Zezi ek Adan ti parey e dan sa fason Pol ti klerman montre ki mannyer en zonm in kapab “donn son lavi konman pri pour liberasyon bokou dimoun.” (Mat. 20:28) Nou devret imit sa metod lansennyman ki ti lozik e bref.—1 Kor. 4:17.
7:23. Nou pa devret mal servi nou bann parti lekor parey lanmen, lipye ek lalang akoz zot kapab ‘fer nou vin prizonnyen lalwa pese.’
8:26, 27. Kan nou rankontre bann sitiasyon ki fer nou konfize e nou pa konnen lo kwa nou pou priye, “lespri i pled pour nou.” Alor, Zeova sa enn ki “ekout lapriyer” pou aksepte en lapriyer apropriye ki dan son Parol konmsi i sorti kot nou.—Ps. 65:2
8:38, 39. Maler, demon ek dirizan imen pa kapab anpes Zeova kontan nou, pareyman zot pa devret anpes nou kontan li.
9:22-28; 11:1, 5, 17-26. Bokou profesi lo restorasyon Izrael ti ganny akonplir par bann Kretyen swazir, ki son bann manm i ganny swazir “pa zis parmi bann Zwif me osi parmi lezot nasyon.”
10:10, 13, 14. Lanmour pour Bondye e pour nou prosen, ansanm avek lafwa dan Zeova ek son bann promes i kapab motiv nou pour partisip dan minister Kretyen avek devouman.
11:16-24, 33. Pa ‘labonte ek severite Bondye’ i byen ekilibre! Wi, “sa Ros, tou sa ki i fer i parfe, parski tou son bann semen i lazistis.”—Det. 32:4.
GANNY KONSIDERE DRWAT PAR LAFASON KI NOU VIV
Pol ti dir: “Alor, mon bann frer, mon sipliy zot par konpasyon Bondye pour nou, ofer zot lekor konman en sakrifis vivan, sen e agreab devan Bondye.” (Rom. 12:1) Sa mo “alor” i fer vwar ki bann Kretyen i ganny konsidere drwat akoz lafwa ki zot annan e sa ki Pol i dir answit i devret annan lefe lo zot latitid anver zot menm, lezot ek lotorite dan gouvernman.
Pol ti ekrir: “Mon dir avek zot tou: pa bezwen ki zot ganny en tro gran lopinyon lo zot menm.” I ti osi konsey zot: “Lanmour i devre san lipokrizi.” (Rom. 12:3, 9) “Tou dimoun i devre soumet li avek lotorite ki gouvernen.” (Rom. 13:1) Dan bann ka ki ti enplik sakenn son konsyans, Pol ti ankouraz bann Kretyen pour ‘aret ziz lezot.’—Rom. 14:13.
Larepons pour bann kestyon lo Labib:
12:20—Dan ki fason nou lennmi i “brile avek laont” oubyen nou met labrez so lo zot latet? Dan lepok Labib, si en dimoun ti anmas en metal dan later, i ti pou met li dan en four e met labrez so anba sa metal ek lo la. Anmezir ki tanperatir lasaler ti ogmante, sa metal ti pou fonn e bann pti salte ki ti’n kol avek ti pou ganny retire. Pareyman, nou lenmi i brile avek laont oubyen nou met labrez so lo latet nou lennmi kan nou fer bann bon keksoz anver zot e sa i fer ki sa laspe dir ki dan zot i fonn e zot konmans demontre bann bon kalite.
12:21—Ki mannyer nou kontinyen “domin lemal par sa ki byen”? En fason nou fer sa se par kontinyen san okenn lafreyer fer sa travay ki Bondye in donn nou pour pres lo Rwayonm ziska ki Zeova i satisfe.—Mark 13:10.
13:1—Dan ki fason bann ki annan lotorite i “ganny etabli par Bondye”? Lotorite dan gouvernman in ganny “etabli par Bondye” dan le sans ki zot pe dirize akoz Bondye i permet zot e dan serten ka zot dominasyon ti’n deza ganny predir par Bondye. Sa i evidan par sa ki Labib in predir lo plizyer dirizan.
Leson pour nou:
12:17, 19. Revanze i enplik pran par dan en keksoz ki zis Zeova ki annan drwa pran par ladan. Pa i pou vreman arogan lo nou par si nou “rann mal pour mal”!
14:14, 15. Nou pa devret fer ditor nou frer ouswa fer li tonbe par sa manze ouswa bwar ki nou ofer li.
14:17. Annan en bon relasyon avek Bondye pa depan lo sa ki nou manze ouswa bwar, ouswa sa ki nou pa manze ouswa bwar. Me plito i annan pour fer avek ladrwatir, lape ek lazwa.
15:7. San fer okenn lapliferans, nou devret akeir tou bann ki senserman rod laverite dan kongregasyon e anons sa mesaz lo Rwayonm avek tou dimoun ki nou zwenn.
[Portre lo paz 13]
Eski sa ranson i kapab aplik avek bann pese ki ti ganny fer avan ki i ti ganny peye?