Kestyon sorti kot nou lekter

 Eski dezas natirel i en pinisyon sorti kot Bondye?

BONDYE pa servi dezas natirel pour pini bann dimoun inosan. I pa’n deza fer li e i pa pou zanmen fer sa. Akoz? Akoz Labib i dir dan 1 Zan 4:8 ki “Bondye i lanmour.”

Lanmour i pous Bondye an aksyon. Lanmour pa fer ditor bann inosan akoz Labib i dir ki “lanmour pa fer ditor son prosen.” (Romen 13:10) Dan Zob 34:12, Labib i dir: “Wi vreman, Bondye li pa fer sa ki mal.”

I vre, Labib ti predir ki ti pou annan “gran tranblemandeter” dan nou letan. (Lik 21:11) Zis parey en meteolozis ki predir en siklonn dan previzyon letan pa responsab pour dezas ki sa siklonn i fer, pareyman Zeova pa responsab pour bann dezas natirel. Alor, si Bondye pa responsab pour soufrans ki imen i gannyen atraver dezas natirel, lekel ki responsab?

Labib i revele ki “lemonn antye i dan pouvwar dyab,” setadir Satan. (1 Zan 5:19) I en kriminel depi son rebelyon apre ki imen ti’n ganny kree ziska ozordi. (Zan 8:44) Satan i krwar ki lavi imen pa vo nanryen e napa lenportans. I azir dapre son lanbisyon egois, alors i pa drol ki i’n kree en sistenm mondyal ki promot legoizm. Dan sa lemonn egois ozordi ki sitan abiz lo bann dimoun san defans, plizyer napa swa apard ki al viv dan bann landrwa kot zot an danze ki swa dezas natirel ouswa dezas ki ganny okazyonnen par zonm. (Efezyen 2:2; 1 Zan 2:16) Alors, se sanmenm sa bann zonm egois ki merit ganny blanmen pour sa bann maler ki bann viktim i eksperyanse. (Eklezyast 8:9) Ki mannyer?

Nou kapab sirprann pour konnen ki zonm i responsab pour en bon pe sa bann dezas. Nou kapab mansyonn sa maler ki ti frap bann zabitan New Orleans Leta-z-ini kot en siklonn ti fer fraka e okazyonn linondasyon ouswa sa deboulir later ki ti arive lo lakot pros avek bann montanny Venezwela kot bokou lakaz ti ganny detrir. Dan sa de ka ek lezot ankor, bann fenomenn natirel parey lapli ek divan in okazyonn bokou dega akoz move planifikasyon imen. Sa i enkli pa pran kont lanvironnman, bann fot dan konstriksyon, planing, oubyen dan ladministrasyon labita e osi pa pran o serye serten lavertisman.

Egzamin en dezas ki ti arive dan letan Labib. Dan letan Zezi, en latour ti tonm en sel kou e sa ti okazyonn lanmor 18 dimoun. (Lik 13:4) I kapab ki sa dezas ti’n arive swa par lafot imen ouswa par “letan ek levennman san ekspekte” ouswa tou le de, me nou kapab asire ki i pa ti en zizman sorti kot Bondye.—Eklezyast 9:11.

Eski Bondye in deza fer okenn dezas arive? Wi, me lekontrer avek dezas natirel ouswa dezas okazyonnen par zonm, sa bann dezas ti annan en bi, i ti vreman rar e Bondye ti sov bann dimoun drwat. Deliz dan letan Noe ek destriksyon Sodonm ek Gomor dan letan Lot i de legzanp. (Zenez 6:7-9, 13; 18:20-32; 19:24) Sa bann zizman ki ti sorti kot Bondye ti detrir bann move dimoun ki pa ti oule repantir e bann ki ti drwat dan lizye Bondye ti ganny sove.

Anfet, Zeova i annan sa abilite, dezir ek pouvwar pour met en lafen avek soufrans e anmenn soulazman kont lefe ki dezas natirel i anmennen. An rapor avek Zezi Kri, sa Lerwa ki Bondye in swazir, Psonm 72:12 ti predir: “I pou delivre sa enn pov ki pe kriy o sekour, osi sa enn ki pe soufer e nenport ki ki napa personn pour vin ed li.”