Pa “perdi ou premye lanmour”
Pa “perdi ou premye lanmour”
“Gard byen for sa ki ou posede.”—REV. 3:11.
1, 2. Ki ou ti resanti ler ou ti konvenki ki sa ki ou ti pe aprann lo Zeova ti laverite?
ESKI ou ankor rapel premye fwa ou ti aprann lo sa lespwar merveye ki Zeova in promet limanite obeisan? Si avan sa ou ti dan en lot larelizyon, ki mannyer ou ti resanti ler ou ti konmans konpran pli byen plan Bondye dan Labib e osi serten lansennyman ki ou ti vwar difisil pour konpran avan sa? Petet ou ti realize ki ou ti’n ganny anbete. Me pa ou vreman kontan ki laverite i evidan pour ou konmela! Kekfwa ou’n ganny elve par bann paran Kretyen, eski ou rapel konman ou ti santi ler ou ti konvenki ki sa ki ou ti pe aprann lo Zeova ti laverite e ou ti fer sa desizyon pour viv an armoni avek sa ki ou ti pe aprann?—Rom. 12:2.
2 Plizyer ou bann frer ek ser dan lafwa pou dir ou ki mannyer zot ti kontan, zot ti santi zot pros avek Zeova e ere ki i’n atir zot. (Zan 6:44) Sa lazwa ti pous zot pour partisip dan nou aktivite Kretyen. Sa santiman ti telman for ki zot ti anvi koz avek tou dimoun lo sa ki zot ti resanti. Eski ou osi ou’n santi parey?
3. Ki ti sitiasyon kongregasyon Efez ler Zezi ti donn zot en konsey?
3 Dan premye syek, bann Kretyen dan kongregasyon Efez ti resevwar en konsey sorti kot Zezi, i ti koz lo sa “premye lanmour” ki zot ti annan. Bann frer ek ser Efez ti annan plizyer zoli kalite, me selman zot ti’n perdi sa premye lanmour ki zot ti annan o konmansman pour Zeova. Alor, Zezi ti dir zot: “Mon konn tou ou bann laktivite, mon konn ou travay ek ou perseverans. Mon konnen ki ou pa kapab toler bann move dimoun. Ou’n teste bann ki apel zot lekor zapot, me ki an realite pa vre, e ou’n dekouver ki zot manter. Mon konnen ki ou annan perseverans, e ou’n soufer tou akoz mwan, e ki ou pa’n dekouraze. Me sa ki mon annan kont ou, ki ou’n perdi ou premye lanmour.”—Rev. 2:2-4.
4. Akoz konsey Zezi pour bann Efezyen i adapte pour nou osi?
4 Konsey ki Zezi ti donnen dan liv Revelasyon pour bann Efezyen ek lezot kongregasyon ti adapte avek sitiasyon ki bann Kretyen swazir ti ladan pour en serten letan apartir 1914. (Rev. 1:10) Me selman, i posib ki menm ozordi serten Kretyen i kapab ‘perdi zot premye lanmour’ pour Zeova ek laverite. Pour sa rezon, annou revwar e medite atraver ou prop leksperyans konman nou kapab gard, agrandir e batir plis ankor nou lanmour ek devouman ki nou ti annan o konmansman pour Zeova ek laverite.
Kwa ki ti fer ou konvenki ki ou’n aprann laverite?
5, 6. (a) Ki tou Kretyen i bezwen arive prouve? (b) Kwa ki ti konvenk ou ki Temwen Zeova i ansenny laverite? (c) Kwa ki kapab ed en dimoun pour rebatir sa lanmour ki i ti annan o konmansman?
5 Ler en dimoun i deside pour dedye son lavi avek Zeova, premyerman i bezwen “konpran” ouswa arive prouve ki si sa ‘lavolonte Bondye ki bon, ki fer li plezir e ki parfe.’ (Rom. 12:1, 2) En laspe ladan, se etidye sa ki Labib i vreman dir. Sa ki pou konvenk en dimoun ki Temwen Zeova i ansenny laverite pa toultan parey pour tou dimoun. Serten i dir ki sa ki ti tous zot se ler zot ti vwar non Bondye dan Labib oubyen ler zot ti konpran ki lanmor i vreman ete. (Ps. 83:18; Ekle. 9:5, 10) Lezot ti ganny touse par lanmour ki egziste parmi pep Bondye. (Zan 13:34, 35) Serten ti osi konmans konpran ki savedir pa form parti lemonn. Zot ti ariv lo konklizyon ki en vre Kretyen pa kapab partisip dan lalit politik oubyen dan okenn lager ant nasyon.—Iza. 2:4; Zan 6:15; 17:14-16.
6 Pour plizyer dimoun, se sa bann rezon ki nou fek mansyonnen ek lezot ankor ki ti fer zot konmans kontan Bondye. Mazin en kou sa ki ti konvenk ou ki sa i laverite. Ou en endividi inik, savedir ki ou personnalite ek sirkonstans i diferan avek lezot Kretyen, alor bann rezon akoz ou kontan Zeova e ou krwar dan son bann promes i kapab diferan osi avek pour lezot. I tre probab ki sa bann rezon ki ti konvenk ou pa’n sanze. Laverite i ankor parey. Alors, kan ou revwar sa bann pwen ek santiman ki ou ti annan o konmansman sa i kapab dan en sans renouvle oubyen rebatir ou premye lanmour pour laverite.—Lir Psonm 119:151, 152; 143:5.
Batir lo sa premye lanmour
7. Akoz nou bezwen kontinyen batir lo nou premye lanmour pour laverite e ki mannyer nou kapab fer sa?
7 I kapab ki bokou keksoz in sanze depi ler ou ti dedye ou lavi avek Zeova. Ou premye lanmour pour laverite ti vreman for, me avek letan ou’n bezwen devlop en lanmour pli profon pour ou kapab fer fas avek bann sitiasyon ki teste ou lafwa. Me Zeova in toultan la pour soutenir ou. (1 Kor. 10:13) Alors, avek letan sa bann leksperyans ki ou’n pas atraver dan lavi i presye pour ou osi. Zot in ed ou pour kontinyen batir lo sa premye lanmour, sa i en fason pour ou kontinyen prouve ki si sa lavolonte Bondye ki bon e agreab.—Zoz. 23:14; Ps. 34:8.
8. Ki mannyer Zeova ti idantifye li avek Moiz e konman bann Izraelit ti arive konn Bondye ankor pli byen?
8 Annou pran legzanp bann Izraelit ler Zeova ti dir zot ki zot pou ganny delivre konman lesklav Lezip. Bondye ti idantifye li avek Moiz an dizan: “Mon pou vin sa ki mon oule vini.” (Egz. 3:7, 8, 13, 14) Anfet, Zeova ti pe dir son pep ki i ti pou zwe nenport rol ki neseser pour li delivre zot. Dapre sitiasyon ek sirkonstans, bann Izraelit ti vwar diferan laspe dan personnalite Zeova. Par egzanp, Zeova ti vin sa Enn tou pwisan, en Ziz, en Lider, en Sover, en Gerye e Sa Enn ki fourni tou keksoz.—Egz. 12:12; 13:21; 14:24-31; 16:4; Nee. 9:9-15.
9, 10. Ki sitiasyon ki kapab ed en dimoun pour pli byen konn Zeova e akoz i bon pour mazin bann tel leksperyans?
9 Ou sitiasyon pa parey avek bann Izraelit. Toudmenm, ou’n sertennman eksperyans serten sitiasyon kot ou’n vwar lentere personnel Zeova e sa in fortifye ou lafwa. Petet Zeova ti donn ou serten keksoz oubyen i ti rekonfort ou ouswa ansenny ou dan en serten fason. (Lir Izai 30:20b, 21.) I kapab osi ki ou ti vwar li pe vreman reponn ou lapriyer. Kekfwa ou ti pe fer fas avek en serten defi e la en lot Kretyen parey ou in ed ou. Letid personnel in kapab zwe en rol pour ou remark bann verse dan Labib ki adapte avek ou sitiasyon.
10 Si ou ti bezwen rakont sa bann leksperyans, petet lezot pa ti pou vwar li sitan eksepsyonnel akoz sa pa ti bann mirak. Me ou, ou ti vwar zot konman tre spesyal. Akoz? Akoz Zeova ti vin egzakteman sa ki ou ou ti bezwen. Mazin en pe tou sa letan ki ou dan laverite. Eski ou kapab rapel enn de keksoz kot ou ti vwar ki Zeova i enterese avek ou personnelman? Si i leka, tanzantan mazin sa bann keksoz e vwar konman ou ti santi dan sa moman pour ki sa i ava kapab batir plis ankor sa lanmour ki ou ti resanti pour Zeova o konmansman. Pa bliy sa bann souvenir spesyal. Medit lo zot. Tou sa la i en laprev ki Zeova i enterese avek ou personnelman e personn pa pou vol sa konviksyon.
Egzamin ou lekor
11, 12. Akoz lanmour en Kretyen pour laverite in kapab diminyen e ki konsey Zezi ti donnen lo sa size?
11 Si ou nepli santi sa menm lanmour pour Bondye ek laverite parey avan, sa pa akoz Bondye in sanze. Zeova pa zanmen sanze. (Mal. 3:6; Zak 1:17) Dan lepase, Bondye ti enterese avek ou e konmela i annan menm santiman anver ou. Alors, kwa ki’n kapab sanze dan ou relasyon avek Zeova? Eski kekfwa ou pli anba presyon oubyen preokipe avek bann traka lavi? Eski ou lapriyer ek ou letid ti pli profon sa letan, eski ou ti medite pli souvan? Ouswa eski ou ti annan plis devouman dan predikasyon e ou ti pli regilye dan bann renyon kongregasyon ki konmela?—2 Kor. 13:5.
12 Petet ou pa vwar ki ou’n sanz ou bann labitid, me si i leka, kwa ki’n fer ou sanze? Eski i kapab ki ou’n telman konsernen avek bann bon rezon parey pran swen avek ou fanmir oubyen ou lasante ek lezot keksoz parey ki finalman ou’n anvoy zour Zeova pour pli tar? Zezi ti dir son bann zapot: “Fer byen atansyon zot menm, pangar zot vizilans i ganny detournen avek festen, labwason ek traka lavi. Fer atansyon sa zour i sirprann zot parey en pyez. Parski sa bann levennman pou tonm lo tou zabitan later. Veye alor e priye tou letan, pour zot ganny lafors pour pas atraver tou sa bann keksoz ki pou arive, e ki zot ava tenir debout devan Fis-de-Lonm.”—Lik 21:34-36.
13. Zak ti konpar Parol Bondye avek kwa?
13 Anba lenspirasyon Bondye, Zak ti ankouraz bann Kretyen pour analiz zot lekor onnetman atraver Parol Bondye. Dan Labib, i ti ekrir: “Pa bezwen tronp ou lekor, pa zis ekout laparol me osi met li an pratik. Sa ki zis ekout laparol, me pa met li an pratik, i parey en zonm ki get son figir dan laglas. Apre ki i’n byen war li dan laglas, i ale e oubliy deswit konman i ti ete. Me sa ki egzamin byen lalwa parfe, lalwa laliberte e ki persevere, e ki pa zis ekoute pour oubliye apre, me ki met an pratik, Bondye pou beni li dan tou son laktivite.”—Zak 1:22-25.
14, 15. (a) Ki mannyer Labib i kapab ed ou pour amelyor ou spirityalite? (b) Lo ki kestyon ou kapab reflesir?
14 En dimoun i kapab servi en laglas pour fer sir ki son laparans i akseptab. Par egzanp, en msye i kapab gete si i’n byen anmar son kravat, si i pa leka i pou aranz li. En madanm osi i get dan laglas pour li kapab aranz son seve si i neseser. I parey avek Labib, i ed nou pour egzamin sa ki nou ete. Ler nou servi Labib pour vwar sa ki nou sipoze ete, an realite nou pe servi li konman en laglas. Me ki litilite i annan si nou get dan laglas epi nou pa fer nanryen pour aziste sa ki merite? I pou pli saz si nou fer keksoz dapre sa ki nou’n vwar dan “lalwa parfe,” alor nou pou vin en dimoun ki “met an pratik.” Pour sa rezon, si nou vwar ki nou premye lanmour pour Zeova e pour laverite in diminyen, pa i lemoman pour demann nou lekor sa bann kestyon: ‘Ki presyon mon pe fer fas avek dan lavi e ki mon reaksyon? Ki ti mon reaksyon dan lepase? Eski serten keksoz in sanze?’ Si ou larepons i montre ki i annan serten sanzman, pran li an konsiderasyon. Si ou bezwen fer serten azisteman, silvouple pa tarde pour azir.—Ebr. 12:12, 13.
15 Si ou pran letan pour demann ou lekor bann tel kestyon, sa i kapab ed ou pour annan bann lobzektif ki adapte avek ou progre spirityel. Dan Labib, zapot Pol ti donn en konsey avek son frer spirityel Timote pour li amelyor son minister. Pol ti ankouraz sa zennonm pour: “Pran byen a-ker sa responsabilite [oubyen “reflesir lo sa bann keksoz,” NW] e met tou ou zefor ladan, pour ki tou dimoun i a war ou progre.” Nou osi nou kapab reflesir avek led Parol Bondye pour vwar kote nou kapab fer progre.—1 Tim. 4:15.
16. Ki danze ou bezwen veye ler ou egzamin ou lekor atraver Labib?
16 Si ou onnet avek ou lekor, ler ou egzamin ou spirityalite, sa pou sertennman fer resorti serten febles. Sa i kapab dekouraz ou, me pa les sa arive. Akoz en tel egzaminasyon i annan pour bi montre nou kote nou kapab progrese. I vre ki Satan i anvi fer nou santi ki nou pa vo naryen akoz bann defo ki nou annan. Anfet, i’n touzour akiz Bondye ki I napa okenn lentere dan bann zefor ki son serviter i fer. (Zob 15:15, 16; 22:3) Zezi ti fer byen kler ki sa i en mansonz. Bondye i vwar sak dimoun konman presye. (Lir Matye 10:29-31.) Parkont, ler nou realize ki nou annan serten lenperfeksyon, avek limilite nou devret esey amelyore avek led Zeova. (2 Kor. 12:7-10) Si ou pa kapab fer bokou akoz maladi oubyen lavyeyes, alor annan bann lobzektif ki adapte avek ou sitiasyon, me pa aret dan semen ouswa les ou lanmour diminyen dousman dousman.
Nou annan en kantite rezon pour nou rekonesan
17, 18. Ki byenfe nou gannyen ler nou kontinyen batir lo sa premye lanmour?
17 I annan en kantite byenfe ler nou kontinyen batir lo sa premye lanmour. Nou konnesans lo Bondye ek nou lapresyasyon pour son bon gidans pou deplizanpli agrandir. (Lir Proverb 2:1-9; 3:5, 6.) En Psonm i dir: “Obeir [bann rapel Zeova] i anmenn en gran rekonpans.” “Rapel Zeova i diny konfyans, i fer sa ki napa leksperyans saz” e osi “byennere bann ki zot fason viv i san defo, bann ki mars dapre lalwa Zeova.”—Ps. 19:7, 11; 119:1.
18 Ou pou dakor ki ou annan en kantite keksoz ki fer ou rekonesan. Ou konpran akoz sa lemonn i dan boulvers. Ou benefisye avek swen ek konsey spirityel ki Bondye i donn son pep denozour. Sirman osi, ou vreman kontan ki Zeova in atir ou pour form parti son kongregasyon enternasyonal e ki i’n donn ou sa privilez pour vin enn son bann Temwen. Medit lo lafason ki ou’n ganny beni. Si ou ti pou fer en lalis, tre probab i ti pou en gran lalis. Si ou reflesir lo sa lalis tanzantan, sa pou ed ou swiv sa konsey: “Gard byen for sa ki ou posede.”—Rev. 3:11.
19. Ki lezot keksoz apard ki reflesir lo nou relasyon avek Bondye ki kapab ed nou reste an bonn sante spirityelman?
19 Kan ou medite lo konman ou lafwa in devlope avek letan, sa i en fason ki kapab ed ou pour gard byen for sa ki ou posede. Latour Veyer in toultan montre ki lezot keksoz esansyel nou bezwen fer pour reste an bonn sante spirityelman. Sa i enkli lapriyer, asiste e partisip dan bann renyon Kretyen e partisip avek devouman dan predikasyon. Sa bann keksoz i kapab ed nou kontinyen gard, agrandir e batir sa premye lanmour.—Efe. 5:10; 1 Pyer 3:15; Zid 20, 21.
Ki ou pou reponn?
• Ki mannyer bann rezon ki’n fer ou kontan Zeova i kapab ankouraz ou konmela?
• Ler ou mazin lo bann leksperyans ki ou’n pas atraver dan ou lavi, ki sa i kapab montre ou?
• Akoz ou devret analiz ou lanmour pour Bondye?
[Kestyon]
[Portre lo paz 29]
Kwa dan laverite ki’n atir ou e konvenk ou?
[Portre lo paz 31]
Eski ou vwar dan ou menm bann keksoz ki ou bezwen aziste?