Akoz Noe ti ganny laprouvasyon Bondye?—Akoz i devret enteres nou?

LAPLIPAR nou i touzour rapel bann moman kot nou ti tann en nouvel enportan. Nou mazin tou detay parey, pa zis kote nou ti ete e ki nou ti pe fer, me osi ki mannyer nou ti reazir. San dout, Noe pa ti zanmen oubliy sa zour ki i ti ganny sa nouvel avek Souvren liniver, Zeova. Napa en nouvel ki ti pli enportan ki sa enn. Zeova ti dir ki i ti’n determinen pour detrir “tou sa ki annan lafors lavi.” Noe ti pou konstrir en gro lars ki ti pou protez li, son fanmir ek bann zannimo dan sak lespes.—Zenez 6:9-21.

Ki mannyer Noe ti reazir? Eski i ti rezwir apre ki i ti’n tann sa nouvel ouswa eski i ti konplent? Ki mannyer i ti anons sa nouvel avek son madanm ek son fanmir? Labib pa dir, me i dir nou sa: “Noe ti fer tou dapre sa ki Bondye ti’n donn li lord pour fer. I ti fer egzakteman parey.”—Zenez 6:22.

Sirman sa i en pwen enportan akoz sa fraz i eksplike ki Noe ti ganny laprouvasyon Bondye akoz i ti volonterman fer sa ki Bondye ti demann li pour fer. (Zenez 6:8) Ki lezot keksoz ki ti fer Noe ganny laprouvasyon Bondye? Larepons i enportan pour nou akoz si nou anvi sirviv kan Bondye i detrir bann move dimoun ankor enn fwa lo later, nou devret imit Noe. Premyerman, annou egzaminen ki mannyer lavi ti ete pour Noe avan Deliz.

Bann demon ti vin lo later

Noe ti viv boner dan listwar imen. I ti ne apepre mil an apre ki premye zonm ti’n ganny kree. Bann dimoun sa letan pa ti reste dan kavern parey serten i prezimen. Zot pa ti bann kreatir ki ti annan en ta pwal, bet, bosi e mars avek en bout dibwa dan lanmen. Sa letan ti annan bann zouti ki ti ganny fer avek feray ek kwiv e i kapab ki Noe ti servi sanmenm pour konstrir lars. I ti osi annan bann lenstriman lanmizik. Bann dimoun ti marye, fer zanfan, kiltiv later e zot ti sonny zannimo. Zot ti aste e vann bann keksoz. Dan sa fason, lavi sa letan ti parey avek lavi ozordi.—Zenez 4:20-22; Lik 17:26-28.

Me keksoz ti diferan dan lezot fason. En diferans i ki bann dimoun ti viv pli lontan. I pa ti drol si en dimoun ti viv plis ki 800-z-an. Noe ti viv 950 an, son granpapa Metousela  ti viv 969 an e Adan li ti viv 930 an. *—Zenez 5:5, 27; 9:29.

En lot diferans i ganny dekrir dan Zenez 6:1, 2, ki dir: “Kan lakantite zonm ti konmans ogmante lo sirfas later e ki zot bann fiy ti ne, apre bann garson sa vre Bondye ti remarke ki bann fiy lo later ti zoli. Zot ti swazir serten e pran zot konman zot madanm.” Sa bann “garson sa vre Bondye” ti bann lanz dan lesyel ki ti transform zot dan lekor imen e mars lo later parey bann zonm. Pa Bondye ki ti’n anvoy zot lo later e zot pa ti ni menm anmenn byenfe pour bann imen. O kontrer, zot ti “abandonn zot prop demer” dan lesyel pour zot annan relasyon seksyel avek bann zoli madanm lo later. Alor, zot ti vin bann demon.—Zid 6.

Sa bann demon rebel e degoutan ti annan plis lentelizans ek pouvwar ki bann imen e zot ti annan en move lenfliyans lo bann imen. I kapab ki zot ti domin e kontrol bann imen. Zot travay pa ti enn ki ti ganny fer dan kasyet parey nenport ki kriminel ki ti pou esey kasyet son lidantite kan i pe fer son move aksyon. O kontrer, zot ti azir san okenn laont e rebel kont laranzman Bondye.

Sa bann garson Bondye ti annan relasyon avek bann madanm e zot madanm ti donn nesans bann zanfan ki ti annan lafors vreman ekstraordiner. An Ebre zot ti ganny rekonnet par sa mo “Nefilim.” Nou ganny dir: “Bann Nefilim ti lo later sa lepok, e osi apre sa, kan bann garson sa vre Bondye ti kontinyen annan relasyon avek fiy bann imen, sa bann fiy ti donn nesans zot garson, e zot ti bann zonm pwisan ki ti renonmen dan letan lontan.” (Zenez 6:4) I ti annan bon rezon pour per sa bann Nefilim. Sa mo “Nefilim” i vedir “fer tonbe” ouswa bann ki fer tonbe lezot. Zot ti bann kriminel ki zot aksyon vyolan ti posibleman ganny reflekte dan bann ero ki ganny dekrir dan bann vye lezann ek zistwar envante.

Sagrinasyon bann dimoun drwat

Labib i dekrir sa zenerasyon konman enn kot koripsyon ti’n byen anrasinen e ti partou. I dir: “Sa kantite mesanste ki zonm ti pe fer lo later e tou sa ki i ti panse dan son leker ti toultan move. . . . Later ti ranpli avek vyolans. . . . Tou dimoun lo later ti pe azir dan en fason koronpi.”—Zenez 6:5, 11, 12.

Noe ti viv dan sa kalite lemonn. Kontrerman avek bann ki ti viv otour li, “Noe ti en zonm drwat” ki ti “mars avek sa vre Bondye.” (Zenez 6:9) I pa fasil pour en zonm drwat viv parmi en sosyete enzis. Pa Noe ti’n bezwen vreman sagren par sa ki bann dimoun ti pe dir e fer! Petet i ti santi parey Lot, en lot zonm drwat ki ti viv apre Deliz. Lot ki ti viv parmi bann zabitan imoral Sodonm, ti “byen sagrinen par kondwit deregle bann move dimoun” e i “ti soufer ler i ti war e tann zot bann move laksyon.” (2 Pyer 2:7, 8) I bezwen ki Noe ti santi parey.

 Eski ou sagrinen kan ou vwar sa bann levennman sokan dan nouvel ouswa kondwit deregle ki bann dimoun ki pa pe servi Bondye i fer toultour ou? Si wi, ou kapab konpran santiman Noe. Noe ti annan 600-z-an kan Deliz ti arive. Zis esey mazinen ki kantite difisil i ti bezwen ete pour li fer fas avek en lemonn enzis pandan tou sa letan. I bezwen ki i ti vreman enpasyan pour vwar en lafen avek tou sa mesanste.—Zenez 7:6.

Noe ti annan kouraz pour li diferan

Noe “ti montre li san defo parmi son bann kontanporen.” (Zenez 6:9) Remarke ki Labib i dir ki i ti san defo parmi e non pa dapre pwennvi son bann kontanporen. Andotmo, Noe ti san defo dan lizye Bondye me bann dimoun dan sa lemonn avan deliz ti vwar li drol. Nou kapab asire ki i pa ti dakor avek pwennvi ki lamazorite dimoun ti annan. I pa ti ni partisip dan zot bann divertisman ki Bondye pa ti aprouve e ni dan zot bann aktivite lavi tou le zour. Zis mazinen, ki mannyer bann dimoun ti vwar li kan i ti konmans konstrir lars! Petet zot ti riy li e sikann li. Zot pa ti pran li o serye.

Deplis, krwayans dan Bondye ki Noe ti annan ti for e sa ti pous li pour partaz li akoz Labib i dir ki Noe ti “en predikater lazistis.” (2 Pyer 2:5) San dout Noe ti konnen ki i ti pou rankontre lopozisyon. Son aryer granpapa, Enok ti en zonm zis ki ti predir ki Bondye ti pou egzekit zizman kont bann move dimoun. I evidan ki sa ti fer Enok sibir persekisyon, me Bondye pa ti permet son bann lennmi touy li. (Zenez 5:18, 21-24; Ebre 11:5; 12:1; Zid 14, 15) Noe ti bezwen kouraz ek lafwa dan abilite ki Zeova i annan pour protez li vi ki Satan, bann demon, bann Nefilim ek laplipar imen ti swa pa enterese avek sa mesaz ouswa ti opoz li.

Bann ki pa servi Zeova in touzour opoz bann ki servi li. Bann dimoun ti menm annan laenn pour Zezi ek bann ki ti swiv li. (Matye 10:22; Zan 15:18) Noe ti annan sa kouraz pour servi Bondye, menm si lezot dimoun pa ti pe fer li. I ti konpran ki ganny laprouvasyon Bondye i definitivman pli enportan ki ganny laprouvasyon bann ki opoz Li. E Noe ti annan laprouvasyon Zeova.

Noe ti pran kont

Parey nou’n deza vwar, Noe ti pres avek lezot avek kouraz. Ki mannyer zot ti reazir anver sa mesaz ki i ti pe prese? Labib i dir ki avan Deliz, bann dimoun ti pe ‘manze e bwar, dimoun ti pe marye e zot ti pe fer marye zot fiy, ziska zour Noe ti antre dan lars. Zot pa ti pran kont nanryen ziska deliz ti vini e balye zot tou.’ Zot pa ti ekout sa lavertisman.—Matye 24:38, 39.

Zezi ti dir ki i pou parey dan nou letan. Pour plis ki san-t-an, bann Temwen Zeova pe anonse ki Zeova pou pran aksyon sever e akonplir son promes par etablir en nouvo lemonn kot pou annan lazistis. Menm si plizyer milyon dimoun in byen reazir, plizyer bilyon zabitan later pa pe pran kont. “Zot oubliye par ekspre” e zot inyor larealite ek sinifikasyon Deliz.—2 Pyer 3:5, 13.

Parkont, Noe li i ti pran kont. I ti krwar dan sa ki Zeova ti dir li. I ti ganny delivrans atraver son lobeisans. Zapot Pol ti ekrir: “Par lafwa, Noe ti ekout lavertisman ki Bondye ti donn li konsernan keksoz ki ziska prezan personn pa ti ankor war. Noe ti obei e konstri en lars pour sov son fanmir.”—Ebre 11:7.

En legzanp pour imite

Sa lars ki Noe ti konstrir ti vreman gro. I ti pli gran ki en laplenn foutbol e pli o ki en batiman trwa letaz. I ti plis ki 30 met pli long ki Wyoming, sa pli gran bato lavwal ki’n ganny fer avek dibwa ki’n deza ganny konstrir. Byensir, lars pa ti en bato, sa ki ti neseser se ki i ti flote. Toudmenm, i ti bezwen ganny konstrir avek teknik avanse. Tar  ti bezwen ganny servi pour kouver anndan e an deor lars. I kapab ki i ti pran plis ki 50 an pour konstrir li.—Zenez 6:14-16.

Anplis ki sa, Noe ti bezwen anmas lavaler manze pour li, son fanmir ek bann zannimo pour enn an. I ti pou bezwen rasanble bann zannimo ansanm e met zot dan lars avan ki Deliz ti arive. “Noe ti fer tou dapre sa ki Zeova ti’n demann li pour fer.” Pa i ti bezwen en gran soulazman kan tou keksoz ti’n pare e Zeova ti ferm laport lars!—Zenez 6:19-21; 7:5, 16.

Apre sa Deliz ti arive. Lapli ti tonm pour 40 zour e 40 lannwit. Zot tou zot ti bezwen reste dan lars pour enn an ziska ki delo ti desann. (Zenez 7:11, 12; 8:13-16) Tou bann move dimoun ti mor. Zis Noe ek son fanmir ki ti sirviv apre ki later ti’n ganny netwaye.

Labib i dir ki sa Deliz dan letan Noe i en legzanp konsernan sa ki pou arive alavenir. Dan ki fason? Nou lir: “Lesyel ek later in ganny prezerve par sa menm parol, pour ganny detri par dife. I’n ganny garde pour sa zour zizman kan bann move dimoun pou ganny detri.” Parkont, parey dan letan Noe, pou annan bann ki pou sirviv. Annan lasirans ki Zeova “i konnen ki mannyer i pou delivre bann dimoun ki atase avek li dan difikilte.”—2 Pyer 2:5, 6, 9; 3:7.

Noe ti en zonm ki ti annan en latasman avek Bondye, en zonm drwat parmi en move zenerasyon. I ti konpletman obeir Bondye. I ti annan sa kouraz pour fer sa ki byen, menm si i ti konnen ki sa ti pou anmenn mepri ek laenn sorti kot bann ki pa ti swete servi Bondye. Par imit Noe dan sa bann fason, nou osi nou kapab ganny laprouvasyon Bondye e annan lespwar pour ganny delivrans dan sa nouvo lemonn ki pe vini byento.—Psonm 37:9, 10.

[Not anba lo paz 5]

[Pwen adisyonnel]

I kapab ki aksyon vyolan bann Nefilim ti ganny reflekte dan bann vye lezann

[Portre lo paz 7]

Par imit lafwa Noe, nou kapab ganny laprouvasyon Bondye