Parol Zeova i vivan

Bann pwen enteresan dan let pour bann Korentyen

ZAPOT Pol ti vreman enkyet konsernan kondisyon spirityel sa kongregasyon Korent. I ti’n tande ki ti annan diskord parmi bann frer laba. Zot ti pe toler limoralite. Sa kongregasyon ti’n osi ekrir Pol pour demann lenformasyon lo en serten size. An rapor avek tousala, ver lannen 55 N.L., ler i ti Efez pandan son trwazyenm voyaz misyonner, Pol ti ekrir son premye let pour bann Korentyen.

Sa dezyenm let ti en kontinyasyon sa premye let ki ti aparaman ganny ekrir zis detrwa mwan apre. Vi ki sitiasyon anndan e an deor kongregasyon Korent dan premye syek i preski parey ki dan nou letan, sa mesaz dan sa de let Pol pour bann Korentyen i annan en gran valer pour nou.—Ebr. 4:12.

‘RESTE EVEYE, RESTE FERM, VIN FOR’

(1 Kor. 1:1–16:24)

Pol ti konsey zot: “Met zot byen dakor ansanm.” (1 Kor. 1:10) I napa ‘en lot fondasyon ki Zezi Kri’ lo ki nou kapab konstrir bann kalite Kretyen. (1 Kor. 3:11-13) Konsernan en dimoun ki ti pe komet fornikasyon dan sa kongregasyon Pol ti dir: “Sas bann dimoun ki komet sa ki mal parmi zot.” (1 Kor. 5:13) I ti dir: “Nou lekor . . . pa’n fer pour [“fornikasyon,” NW], me pour Senyer.”—1 Kor. 6:13.

Pour reponn “zafer ki zot ti ekrir,” Pol ti donn zot bann bon konsey pratik an rapor avek maryaz e viv en lavi selibater. (1 Kor. 7:1) Apre ki i ti’n koz lo prensip lotorite ek lord dan bann renyon Kretyen e lo lasirans rezireksyon, Pol ti donn sa konsey: “Reste eveye, reste ferm dan lafwa, kondwir zot konman bann zonm, vin for.”—1 Kor. 16:13, NW.

Larepons pour bann kestyon lo Labib:

1:21—Eski Zeova i vreman servi “lafoli” pour sov bann ki krwar? Non, sa i pa leka. Me, “parski lemonn avek son prop lasazes imen pa’n kapab rekonnet Bondye” alors sa ki Bondye i servi pour sov dimoun i paret en lafoli oubyen bet pour sa lemonn.—Zan 17:25.

5:5 (NW)—Ki i vedir pour ‘livre [sa move] zonm avek Satan pour ki laser i ganny detrir me ki lespri i a ganny sove’? Ler en dimoun ki komet en pese grav e i pa repantir i ganny ekskli dan kongregasyon e i form parti sa move lemonn Satan ankor. (1 Zan 5:19) Alors, Labib i koz konsernan sa dimoun konmsi i’n ganny livre avek Satan. Lefet  ki sa dimoun i ganny ekskli i konmsi in ganny detrir setadir son move lenfliyans in ganny tire dan kongregasyon pour ki lespri kongregasyon oubyen latitid dominan i ganny prezerve.—2 Tim. 4:22.

7:33, 34—Ki Pol i oule dir par “bann zafer lemonn” ki fer en msye oubyen en madanm marye enkyet? Pol ti pe refer avek bann keksoz dan lavi tou le zour ki bann Kretyen marye i bezwen konsernen avek. Sa i enkli manze, lenz, lakaz me i pa enkli bann move keksoz ki sorti dan sa lemonn ki bann Kretyen i bezwen evite.—1 Zan 2:15-17.

11:26—Ki kantite “fwa” lanmor Zezi i devret ganny komemore e “ziska” kan? Pol pa ti pe dir ki lanmor Zezi ti pou ganny komemore souvan. Sa mo Grek ki ti ganny servi pour “sak fwa ki” i vedir “osi souvan.” Alors, zapot Pol ti pe dir ki sak fwa ki bann Kretyen swazir i manz sa dipen e bwar sa diven enn fwa par an le 14 Nizan, zot pe “anons lanmor Senyer.” Zot pou fer sa “ziska ki i vini,” setadir ziska ki i resevwar zot par en rezireksyon dan lesyel.—1 Tesa. 4:14-17.

13:13—Dan ki fason lanmour i pli gran ki lafwa ek lespwar? Ler sa bann “keksoz ki ou pe espere” i vin en realite ek “sertitid keksoz ki ou pa’n war” i ganny realize, lafwa ek lespwar i ariv ver zot lafen. (Ebr. 11:1) Lanmour i pli gran ki lafwa ek lespwar lefet ki i reste pour touzour.

15:29 (NW)—Ki i vedir pour ‘ganny batize pour vin bann mor’? Pol pa ti pe sizere ki dimoun vivan i ganny batize dan plas bann ki’n mor san ganny batize. Pol ti pe koz konsernan batenm bann Kretyen swazir pour viv en lavi kot zot reste fidel ziska zot lanmor e apre ganny resisite konman en lespri.

Leson pour nou:

1:26-31; 3:3-9; 4:7. Kan nou pa vant nou prop lekor me avek limilite nou vant nou lekor atraver sa ki Zeova in fer, sa pou promot linite dan kongregasyon.

2:3-5. Ler i ti pe prese Korent dan sa lavil kot filozofi ek lansennyman Grek ti popiler, petet Pol ti pe trakase konsernan si i ti pou kapab persyad son lodyans. Me, i pa ti les okenn febles oubyen lafreyer ki i ti kapab annan anpes li akonplir sa travay predikasyon ki Bondye ti’n konfye li. Pareyman, nou pa devret permet bann sirkonstans difisil anpes nou pres sa bon nouvel Rwayonm. Parey Pol nou kapab tourn ver Zeova avek konfyans pour ganny led.

2:16. Pour en dimoun annan “Lespri Senyer” Zezi i bezwen konn fason panse Kris e konnen akoz i mazin dan sa fason, pour ­mazin parey li, pour kapab vreman byen konpran son personnalite e imit son legzanp. (1 Pyer 2:21; 4:1) Pa i vreman enportan ki nou etidye atantivman lavi ek minister Zezi!

3:10-15; 4:17. Nou devret egzamin e amelyor nou abilite pour ansennyen e fer disip. (Mat. 28:19, 20) Si nou pa ansenny byen, nou etidyan pa pou kapab andire ler son lafwa i ganny teste e sa pou kapab en pert sitan fermal ki nou pou ganny sove “konmsi atraver dife.”

6:18. Pour ‘elwanny nou avek fornikasyon’ i pa vedir pour evit zis bann aksyon ki ganny konsidere konman por·neiʹa me nou bezwen osi evit pornografi, bann keksoz ki pa pir moralman, bann panse imoral, atir latansyon en lot dimoun ki pa menm seks andotmo okenn keksoz ki kapab fer en dimoun komet fornikasyon.—Mat. 5:28; Zak 3:17.

7:29. Bann dimoun ki’n marye i devret fer atansyon pour pa preokip zot zis avek kanmarad e met lentere Rwayonm dan dezyenm plas dan zot lavi.

10:8-11. Zeova ti vreman ofanse ler bann Izraelit ti plennyen kont Moiz e Aaron. Nou pou azir konman bann dimoun saz si nou evite devlop sa menm leta lespri pour plennyen.

 16:2. Nou pou kapab donn nou kontribisyon volonter pour sa travay predikasyon mondyal dan en fason konsistan si nou plàn davans e fer li lo en baz regilye.

‘KONTINYEN KORIZ ZOT FASON PANSE’

(2 Kor. 1:1–13:14)

Pol ti dir avek bann Korentyen ki zot devret “pardonn . . . e ankouraz” en dimoun ki’n repantir apre ki’n ganny reprimande. Menm si son premye let ti fer zot tris, Pol ti eksprim lazwa akoz “zot latristes in anmenn repantans.”—2 Kor. 2:6, 7; 7:8, 9.

Pol ti ankouraz bann Kretyen Korent par sa parol: “Demenm ki zot annan tou sa bann keksoz annabondans, zot devret osi donn annabondans.” Apre ki i ti’n reponn son bann adverser, i ti donn en dernyen konsey avek zot tou: “Kontinyen annan lazwa, koriz zot fason panse, les zot ganny konsole, annan menm panse, viv anpe.”—2 Kor. 8:7; 13:11, NW.

Larepons pour bann kestyon lo Labib:

2:15, 16—Ki mannyer nou “sa bon loder parfen Kris”? Sa i leka akoz nou obeir sa ki Labib i dir e pres son mesaz. En “parfen” koumsa i kapab an menm tan degoutan pour bann dimoun enzis, me en bon loder pour Zeova ek dimoun ki annan leker senser.

5:16—Ki mannyer bann Kretyen swazir ‘nepli konsider personn dapre laser imen’? Zot vwar dimoun parey Zeova i vwar zot setadir zot pa fer lapreferans ni akoz larises, ras ouswa group etnik oubyen nasyonalite en dimoun. Sa ki enportan pour zot i zot relasyon spirityel avek zot bann frer ek ser Kretyen.

11:1, 16; 12:11—Eski Pol pa ti rezonnab avek bann Korentyen? Non. Me pour serten i ti’n kapab paret en dimoun vantar e pa rezonnab akoz sa ki i ti bezwen dir pour eksplike ki i ti vreman en zapot.

12:1-4—Lekel ki “ti monte ziska paradi”? Vi ki Labib pa koz lo okenn lezot dimoun ki ti ganny en vizyon koumsa e ki sa verse i vin zis apre ki Pol ti eksplike ki i ti vreman en zapot, i probab ki i ti pe koz lo son prop leksperyans. I paret ki sa vizyon ki sa zapot ti vwar ti sa paradi spirityel ki bann Kretyen pe viv ladan dan “letan lafen.”—Dan. 12:4.

Leson pour nou:

3:5. An prensip, sa verse i dir nou ki bann Kretyen i ganny zot kalifikasyon pour predikasyon avek Zeova par son Parol, son lespri sen e par son lorganizasyon ki lo later. (Zan 16:7; 2 Tim. 3:16, 17) Ti a byen pour nou etidye seryezman Labib e bann piblikasyon baze lo Labib, persiste dan lapriyer pour ganny lespri sen e pour asiste e partisip dan bann renyon regilyerman.—Ps. 1:1-3; Lik 11:10-13; Ebr. 10:24, 25.

4:16. Vi ki Zeova pe renouvle nou ‘lo kote spirityel de zour en zour’ nou devret regilyerman servi bann provizyon ki Zeova i met a nou dispozisyon setadir pa les pase en zour san fer en keksoz pour fortifye nou relasyon avek li.

4:17, 18. Mazinen ki sa “pti soufrans aktyel” i kapab ed nou reste fidel avek Zeova pandan bann letan difisil.

5:1-5. Pa Pol ti eksprim dan en zoli fason santiman ki bann Kretyen swazir i annan konsernan zot lespwar pour viv dan lesyel!

10:13 (NW). An zeneral, amwen ki nou’n ganny demande pour ede kot i annan plis bezwen, nou devret travay zis dan teritwar nou kongregasyon.

13:5 (NW). Pour ‘teste pour vwar si nou dan lafwa’ nou devret fer sir ki nou kondwit i annakor avek sa ki nou aprann dan Labib. Pour ‘prouv sa ki nou ete’ nou bezwen analiz degre nou spirityalite, sa i enkli nou ‘abilite pour reflesir’ e fer plis aksyon ki demontre nou lafwa. (Ebr. 5:14; Zak 1:22-25) Si nou aplik sa bon konsey ki Pol in donnen, nou pou kontinyen mars dan semen laverite.

[Portre lo paz 30]

Ki sinifikasyon sa parol “sak fwa ki zot manz sa dipen e bwar sa lakoup”?—1 Kor. 11:26