Eski i enportan lafason ki nou ador Bondye?

“LARELIZYON i form parti natir imen” sanmenm ki profeser Alister Hardy i dir dan son liv The Spiritual Nature of Man. I paret ki rezilta en serve ki’n ganny fer resaman i tonm dakor avek sa ki sa profeser in dir. Dapre sa serve zot in vwar ki apepre 86 poursan popilasyon lemonn i dir ki zot annan zot larelizyon.

Sa serve in osi fer remarke ki sa bann krwayan i sorti dan 19 pli gran larelizyon e sa bann ki dir zot Kretyen i form parti avek 37,000 diferan lorganizasyon relizye. Eski pa sa i fer ou demann ou lekor si Bondye i kapab aksepte tou sa bann diferan fason adore san fer okenn distenksyon? Anfet, eski i enportan lafason ki nou ador li?

Dan sa domenn vreman enportan, nou rekonnet ki nou pa kapab pran en desizyon ki baze zis lo nou prop santiman oubyen lopinyon. I kler, ki nou bezwen rod pwennvi Bondye lo sa size. Pour sa rezon nou devret tourn ver Parol Bondye, Labib. Akoz? Akoz dan en lapriyer ki i ti pe fer avek Bondye, Zezi Kri li menm ti dir: “Ou parol i laverite.” (Zan 17:17) E Pol ki ti en zapot fidel ti dir: “Tou Lekritir i enspire par Bondye e i itil pour ansennyen, pour koriz lerer, pour remet drwat, e pour formen pour viv byen selon Bondye.”—2 Timote 3:16.

Labib i montre ki pa tou ladorasyon ki Bondye i aksepte. Nou vwar legzanp bann diferan form ladorasyon dan lepase ki Bondye ti aksepte e bann ki i ti rezete. Si nou egzamin byen sa bann legzanp, nou pou kapab aprann ki nou bezwen fer oubyen pa fer pour ki nou ladorasyon i fer plezir Bondye.

En legzanp dan lepase

Atraver profet Moiz, Zeova ti donn bann Izraelit bann lalwa ki ti montre zot ki mannyer zot devret ador li dan sa fason ki i aksepte. Ler sa pep ti azir dapre bann lalwa, ki ti souvan ganny apele Lalwa Moiz, Bondye ti aksepte zot konman son pep e i ti beni zot. (Egzod 19:5, 6) Me menm si zot ti ganny sa bann benediksyon sorti kot Bondye, nasyon Izrael pa ti gard sa form ladorasyon ki Bondye ti aksepte. Plizyer fwa zot ti aret ador Zeova e zot ti swiv bann lezot form ladorasyon ki ti pe ganny pratike par bann zabitan dan zot zalantour.

Dan setyenm syek A.N.L., dan lepok profet Ezekyel ek Zeremi, en kantite Izraelit pa ti swiv Lalwa Bondye e zot ti devlop en gran lanmitye avek lezot nasyon dan zalantour. Lefet ki zot ti pe swiv koutim sa bann nasyon e partisip dan zot bann lafet, bann Izraelit ti annan en ladorasyon ki ti melanze avek diferan krwayans relizye. En kantite Izraelit ti pe dir: “Annou vin parey sa bann nasyon, parey sa bann fanmir dan sa bann pei, pour ador dibwa ek ros.” (Ezekyel 20:32; Zeremi 2:28) Zot ti dir ki zot ti pe ador Zeova, me an menm tan zot ti pe ador “bann zidol degoutan” menm sakrifye zot garson avek sa bann zidol.—Ezekyel 23:37-39; Zeremi 19:3-5.

Bann arkeolog i apel sa kalite form ladorasyon religious syncretism, setadir ladorasyon plizyer bondye an menm tan. Oubyen zot senpleman konsider sa kalite ladorasyon konman larelizyon popiler. Ozordi, bokou dimoun i santi ki dan nou sosyete kot plizyer group dimoun avek diferan pwennvi i kapab egziste, nou devret aksepte tou keksoz, enkli larelizyon. Alors, zot santi ki napa nanryen mal avek ador Bondye dan nenport ki fason ki fer zot plezir. Eski sa i vreman leka? Eski sa i annan pour fer zis avek vin toleran oubyen pare pour aksepte tou keksoz? Annou egzamin serten laspe kon sernan larelizyon popiler ki ti ganny pratike par bann Izraelit enfidel e vwar kot sa bann pratik ti anmenn zot.

Ladorasyon nasyon Izrael ti en melanz diferan krwayans relizye

Bann sant kot bann Izraelit ti pratik zot ladorasyon ki ti en melanz diferan krwayans relizye ansanm ti “bann oter” oubyen lasapel ki ti annan bann lotel, bann lotel pour lansan, pilye sakre ki ti ganny fer avek ros ek poto sakre ki ti ganny fer avek dibwa ki ti aparaman reprezant en bondye Kananeen pour fertilite ki ti apel Asera. I ti annan en kantite sa bann sant Zida. Dezyenm Lerwa 23:5, 8 i mansyonn “bann oter dan bann lavil Zida e dan zalantour Zerizalenm, . . . depi Geba [frontyer nor] ziska Ber-seba [frontyer sid].”

Lo sa bann oter, bann Izraelit ti fer “lafimen sakrifisyel pour Baal, pour soley, pour lalin, pour konstelasyon e pour tou bann larme dan lesyel.” Zot ti annan bann lakaz pour “bann msye ki ti servi konman prostitye dan tanp . . . dan lakaz Zeova” e ti sakrifye zot bann zanfan “dan dife avek Molek.”—2 Lerwa 23:4-10.

Dan Zerizalenm ek Zida sirtou dan bann debri kot bann propriyete prive, bann arkeolog in trouv plizyer santenn stati ki ganny fer avek larzil ki’n ganny kwi dan four. Laplipar sa bann stati ti bann madanm touni avek tete ki ti vreman gro. Bann spesyalis i relye sa bann stati avek bondye fertilite Astoret ek Asera. Dimoun i krwar ki sa bann stati ti “bann port boner ki ti ed dimoun pour kapab fer zanfan.”

Ki mannyer bann Izraelit ti vwar sa bann sant kot zot ti pratik ladorasyon ki ti en melanz diferan krwayans relizye ansanm? Profeser Ephraim Stern dan en liniversite Ebre ti dir ki en kantite sa bann oter ti probableman “ganny dedye avek Yahweh [Zeova].” I paret ki lekritir ki’n ganny trouve dan bann landrwa kot bann arkeolog in fer dekouvert i siport sa pwennvi. Par egzanp, enn i dir: “Mon beni ou par Yahweh ki sorti Samari e par son Asera” e en lot i dir, “Mon beni ou par Yahweh sorti Teman e par son Asera.”

Sa bann legzanp i montre ki mannyer bann Izraelit ti’n melanz sa vre ladorasyon Zeova avek bann pratik ki fer onte dan sa bann larelizyon payen. Sa ti fer ki standar moral ti deteryore e dimoun ti dan fernwanr spirityel. Ki mannyer Bondye ti vwar sa kalite ladorasyon kot bann Izraelit ti fer konpromi?

Reaksyon Bondye vizavi sa melanz diferan krwayans relizye

Bondye ti eksprim son lakoler e i ti denons sa kalite ladorasyon degradan ki bann Izraelit ti pe pratike atraver profet Ezekyel, par dir: “Dan bann landrwa kot zot reste bann lavil pou ganny devaste e sa bann oter pou reste vid, zot pou reste devaste e zot bann lotel pou reste vid e vreman ganny kraz kraze, zot bann zidol  degoutan pou disparet, zot bann lotel lansan pou ganny kase e zot bann travay pou nepli egziste.” (Ezekyel 6:6) San okenn dout Zeova pa ti aksepte e i ti rezet sa kalite ladorasyon.

Zeova ti osi predir ki mannyer sa destriksyon ti pou arive. “La mon pe anvoy . . . Neboukadrezar lerwa Babilonn, mon serviter e Mon pou les zot vin lager avek sa pei, avek son bann zabitan e avek tou bann nasyon dan zalantour e vreman Mon pou dedye zot pour ki zot ganny detrir . . . E fodre ki tou sa bann pei i vin en landrwa ki’n ganny devaste.” (Zeremi 25:9-11) Parey i ti ganny predir, an 607 A.N.L., bann Babilonnyen ti al lager avek Zerizalenm e zot ti detrir konpletman sa lavil ek son tanp.

An rapor avek destriksyon Zerizalenm, profeser Stern ki’n ganny mansyonnen pli anler ti fer remarke ki bann restan ki zot in trouve dan bann lafouy arkeolozik “ti egzakteman parey sa ki Labib i dir (2 Lerwa 25:8; 2 Kronik 36:18-19) ler i ti dekrir sa destriksyon, kot dife ti pe brile e kot bann lakaz ek miray ti pe tonbe.” I ti osi fer remarke: “Bann levidans arkeolozik an rapor avek sa peryod letan dan listwar Zerizalenm . . . i kapab ganny konsidere konman pli enpresyonan ki sa ki nou’n deza vwar kot nenport ki lezot landrwa biblik.”

Ki leson pour nou?

Sa leson pli enportan pour nou i ki Bondye pa aksepte ladorasyon ki esey melanz bann lansennyman baze lo Labib avek bann doktrin, tradisyon oubyen koutim lezot larelizyon. Sa i en leson ki zapot Pol ti klerman konpran e aksepte fasilman. I ti en Zwif ki ti ganny elve konman en Farizyen, edike e formen dan lalwa sa sekt. Finalman ler i ti aprann e aksepte ki Zezi ti sa Mesi promiz, ki i ti fer? I ti dir: “Keksoz ki mon ti krwar ti en gen pour mwan, aprezan mon konsider zot konman en pert akoz Kris.” I ti abandonn son bann fason viv lepase e i ti vin en disip fidel Kris.—Filipyen 3:5-7.

Konman en misyonner, Pol ti konn byen bann pratik relizye ek filozofi diferan pep. Alors, i ti ekrir bann Kretyen Korent: “Ki linyon i kapab annan ant lalimyer avek fernwanr? Ki mannyer Kris i kapab tonm dakor avek Dyab? Ki mannyer en krwaryan i kapab partisip avek en non-krwaryan? Ki Tanp Bondye i annan an komen avek bann zidol? . . . ‘Pour sa rezon, sorti parmi zot, e separe avek zot, Senyer i dir. Pa tous okenn keksoz enpir, e mon a resevwar zot.’”—2 Korentyen 6:14-17.

Aprezan ki nou’n realize ki pour Bondye i vreman enportan ki mannyer nou ador li, nou kapab demann nou lekor sa bann kestyon: ‘Ki kalite ladorasyon Bondye i aksepte? Ki mannyer mon kapab vin pros avek Bondye? E ki mon devret fer personnelman pour ador Bondye dan sa fason ki i aksepte?’

Temwen Zeova i vreman kontan pour ed ou trouv larepons sa bann kestyon ensi ki lezot an rapor avek Labib. Nou envit ou pour kontakte bann Temwen kot Lasal Rwayonm oubyen pour ekrir editer sa magazin pour demann en letid Labib gratwit nenport ler ek landrwa ki konvenab pour ou.

[Portre lo paz 9]

En ansyen lasapel pour ladorasyon zidol, Tel Arad, Izrael

[Portre lo paz 9]

Bann stati Astoret dan bann lakaz Zwif dan lepase