Noe ek Deliz larealite e non pa en zistwar

ESKI ou ti a kontan viv dan en lemonn pli meyer kot dimoun i viv anpe antre zot? En lemonn kot napa ni lager, krim ek labi pouvwar? Si wi, ou kapab ganny ankouraze avek sa resi istorik ki petet ou konn tre byen. Sa i resi lo Noe, en zonm vreman bon ki ti konstrir en lars pour sov li menm ek son fanmir dan sa gran deliz ki ti detrir bann move dimoun.

Napa bokou zistwar ki byen renonmen parey sa enn. Labib i rakont sa ki ti arive avek Noe dan Zenez sapit 6 ziska sapit 9. I osi ganny reakonte dan Koran e dan bokou lezann atraver lemonn. Eski Deliz ti vreman arive ouswa i zis en zistwar senbolik pour ankouraz bann dimoun pour fer sa ki byen? Bann profeser ek syantis in fer bokou deba lo sa size pour plizyer syek. Pourtan, Parol Bondye, Labib i fer kler ki sa resi i vre. Reflesir lo sa bann rezon ki asir nou ki sa resi dan Zenez i vre:

Sa resi dan liv Zenez i mansyonn dat, mwan ek zour egzakt ki Deliz ti konmanse. I osi dir kan e kote lars ti enstale apre deliz e kan ki later ti sek. I kontyen bann detay presi lo lars li menm, son plan, son mezir ek materyo ki ti ganny servi pour konstrir li. Parkont, normalman deskripsyon bann lezann pa sitan presi.

Dan Labib i annan de resi ki koz lo bann laliny desandans ki prouve ki Noe ti vreman egziste. (1 Kronik 1:4; Lik 3:36) Ezra ek Lik ti bann bon serser e zot ti rasanble sa bann laliny desandans ansanm. Lik ti tras laliny zanset Zezi Kri ziska kot Noe.

Profet Izai, Ezekyel ek bann zapot parey Pol ek Pyer ti fer referans avek Noe ouswa Deliz.—Izai 54:9; Ezekyel 14:14, 20; Ebre 11:7; 1 Pyer 3:19, 20; 2 Pyer 2:5.

Zezi Kri ti refer avek Deliz kan i ti dir: “Sa ki ti arive dan letan Noe, i pou arive parey dan lepok Fis-de-Lonm. Bann dimoun ti manze, bwar, marye e ganny maryaz ziska zour ki Noe ti antre dan lars e deliz ti arive e detri zot tou.” (Lik 17:26, 27) Si Deliz pa ti’n arive, alor sa parol ki Zezi ti dir lo “lepok Fis-de-Lonm” pa ti pou fer sans.

Zapot Pyer ti dir ki ti pou annan bann “moker” ki ti pou rezet sa ki Labib i dir. Pyer ti ekrir: “Zot oubliye par ekspre, ki . . . lemonn ansyen [dan letan Noe] ti ganny detri par delo, sa gran deliz.” Eski nou devret oubliy sa laverite? Definitivman non! Pyer ti kontinyen: “Lesyel ek later in ganny prezerve par sa menm parol, pour ganny detri par dife. I’n ganny garde pour sa zour zizman kan bann move dimoun pou ganny detri.”—2 Pyer 3:3-7.

Ankor enn fwa, Bondye pou detrir bann move dimoun e ankor enn fwa pou annan bann ki pou sirviv. Par imit legzanp Noe, nou pou kapab parmi sa bann dimoun drwat ki pou ganny sove pour viv dan en lemonn meyer.