Predikasyon portanport—Akoz i enportan la konmela?

“Toulezour zot ti kontinyen prese dan Tanp ek dan bann lakaz [oubyen “kaz an kaz,” NW] e anons Zezi konman Mesi.”—AKT 5:42.

1, 2. (a) Bann Temwen Zeova i ganny rekonnet par ki kalite metod predikasyon? (b) Ki nou pou egzaminen dan sa lartik?

PRESKI tou nasyon dan lemonn in vwar zot. De dimoun byen sanze i apros en lakaz e esey zot mye pour partaz en mesaz lo Rwayonm Bondye sorti dan Labib avek sa met lakour. Si i montre lentere dan sa mesaz, zot kapab kit en piblikasyon baze lo Labib avek li e ofer li en letid Labib gratwit. Apre sa, zot al kot lot lakaz. Si ou partisip dan sa travay, sirman menm avan ki ou konmans koze bann dimoun i rekonnet ou konman en Temwen Zeova. I posib, Temwen Zeova i ganny rekonnet par zot predikasyon portanport.

² Nou servi diferan metod pour akonplir sa lord ki Zezi in donn nou pour prese e fer disip. (Mat. 28:19, 20) Nou pres dan bann bazar, dan semen e dan lezot landrwa piblik. (Akt 17:17) Nou kontakte bokou dimoun par telefonn ek let. Nou partaz laverite ki dan Labib avek bann ki nou zwenn dan nou bann aktivite tou le zour. Nou menm annan en sit ofisyel lo Internet ki kapab ed en dimoun ganny bann lenformasyon baze lo Labib dan plis ki 300 langaz. * Tou sa bann metod i anmenn bon rezilta. Parkont, dan laplipar landrwa, pres portanport i sa metod prensipal ki nou servi pour propaz sa bon nouvel. Kote sa metod predikasyon i sorti? Denozour pep Bondye pe servi sa metod en kantite, ki mannyer sa in arive? E akoz i enportan la konmela?

Metod bann zapot

3. Ki lenstriksyon Zezi ti donn son bann zapot an rapor avek predikasyon e ki sa i endike lo lafason zot ti devret prese?

³ Sa metod pour pres portanport i sorti dan Labib. Kan Zezi ti anvoy son bann zapot prese, i ti dir zot: “Kan zot ariv dan en lavil oubyen en vilaz, rode ki sennla ki pare [oubyen “merite,” NW] pour resevwar zot.” Ki mannyer zot ti sipoze rod sa bann ki merite? Zezi ti dir zot al kot lakaz bann dimoun e osi: ‘Kan zot antre dan en lakaz, dir, “Lape i a avek zot.” Si bann zabitan sa lakaz i resevwar zot, zot salitasyon lape i a reste avek sa lakaz.’ Eski zot ti sipoze espere ziska ki en dimoun i envit zot kot li? Remark lezot parol Zezi: “E si dan nenport ki lakaz, dimoun pa resevwar zot, oubyen pa ekout zot, kit sa landrwa e sekwe lapousyer ki avek zot lipye.” (Mat. 10:11-14) Sa bann lenstriksyon i fer kler ki bann zapot ti bezwen pran linisyativ pour vizit bann dimoun kot zot lakaz pandan ki zot “ti ale, e pas dan [bann] vilaz, . .  [pour] anons Bonn Nouvel.”—Lik 9:6.

4. Ki bor dan Labib ki spesifikman mansyonn pres kaz an kaz?

⁴ Labib i spesifikman mansyonnen ki bann disip ti pres kaz an kaz. Par egzanp, Akt 5:42 i dir sa lo zot: “Toulezour zot ti kontinyen prese dan Tanp ek dan bann lakaz [oubyen “kaz an kaz,” NW] e anons Zezi konman Mesi.” (Akt 5:42) Apepre 20-t-an pli tar, zapot Pol ti rapel bann ansyen dan kongregasyon Efez: “Zot konnen ki mon pa’n kasyet nanryen ki kapab itil pour zot, ler mon’n ansennyen an  piblik ek dan zot lakaz [oubyen “kaz an kaz,” NW].” Eski Pol ti vizit sa bann ansyen avan ki zot ti vin krwayan? I evidan ki i ti fer li akoz enn parmi sa bann keksoz ki i ti ansenny zot, ti “pour sanz zot lavi pese e vin kot Bondye, e krwar dan nou Senyer Zezi-Kri.” (Akt 20:20, 21) Komanter Robertson Word Pictures in the New Testament lo Akt 20:20 i dir: “I enportan pour note ki sa bann pli gran predikater ti pres kaz an kaz.”

En larme sotrel dan nou letan

5. Ki mannyer travay predikasyon i ganny dekrir dan profesi Yoel?

⁵ Sa temwannyaz ki ti ganny fer dan premye syek ti zis en avan gou sa pli gran travay ki ti pou ganny fer dan nou letan. Profet Yoel ti konpar predikasyon ki bann Kretyen swazir i fer avek en larme zensek ki pe devore, enkli bann sotrel. (Yoel 1:4) Bann sotrel i bouz parey en larme, zot sirmont nenport lobstak, antre dan bann lakaz e devor tou sa ki dan zot semen. (Lir Yoel 2:2, 7-9) Pa sa i vreman dekrir perseverans ki zot annan ek prekosyon ki pep Bondye i pran kan zot pe fer sa travay predikasyon dan nou letan! Predikasyon portanport i sa metod pli enportan ki bann Kretyen swazir ek “lezot mouton” i servi pour akonplir sa legzanp profetik. (Zan 10:16, NW) Ki mannyer nou, konman Temwen Zeova nou’n adopte sa metod predikasyon bann zapot?

6. Ki lankourazman ti ganny donnen an 1922 an rapor avek temwannyaz portanport e ki mannyer serten ti reazir?

⁶ Depi 1919 anmontan, lanfaz ti ganny mete lo responsabilite ki sak Kretyen i annan pour personnelman partisip dan predikasyon. Par egzanp, en lartik ki annan pour tit “Service Essential” (Servis enportan) dan Latour Veyer le 15 Out 1922 an Angle, ti rapel bann Kretyen swazir sa lenportans pour “partisip aktivman dan sa travay pour partaz sa mesaz lo papye avek bann dimoun e koz avek zot devan zot laport e rann temwannyaz ki rwayonm lesyel i pros pour vini.” I ti annan bann prezantasyon byen detaye dan Bulletin (konmela Nou Minister Rwayonm) ki ti ganny donnen. Kantmenm sa, o konmansman ti  napa bokou dimoun ki ti pe pres portanport. Serten ti ezite pour fer li. Zot ti soulev diferan lobzeksyon, me problenm prensipal i ki zot ti konsider zot tro enportan pour pres portanport. Vi ki plis lanfaz ti ganny mete lo predikasyon, bokou parmi ti kit lorganizasyon Zeova.

7. Ki bezwen ki ti vin evidan boner pandan lannen 1950 anmontan?

⁷ Pandan sa bann deseni ki ti swiv, bokou plis ti zwenn ansanm avek lezot dan sa travay predikasyon. Parkont, i ti evidan ki ti neseser pour annan en formasyon personnel pour pres portanport. Pran par egzanp sitiasyon Leta-z-ini. Boner pandan lannen 1950 anmontan, 28 poursan Temwen dan sa pei ti partisip dan predikasyon zis par donn bann papye baze lo Labib ouswa debout lo semen avek bann magazin. Plis ki 40 poursan ti iregilye dan predikasyon, zot ti les serten mwan pase san ki zot ti rann en temwannyaz. Ki ti kapab ganny fer pour ed sa bann Kretyen pour pres portanport?

8, 9. Ki progranm formasyon ti konmanse an 1953 e avek ki rezilta?

⁸ Dan en lasanble enternasyonal ki ti ganny fer dan lavil New York an 1953, latansyon spesyal ti ganny mete lo predikasyon portanport. Frer Nathan Knorr ti dir ki bann sirveyan i premyerman annan sa devwar pour ed sak Temwen pour vin en minis regilye dan temwannyaz portanport. I ti dir: “Tou dimoun i devret kapab pres sa bon nouvel portanport.” Dan lemonn antye, en formasyon ti konmanse pour atenn sa lobzektif. Bann ki pa ti ankor konmans pres portanport ti ganny bann formasyon lo konman pour apros dimoun se zot, rezonn avek zot dapre Labib e reponn zot kestyon.

⁹ Rezilta ki sa progranm formasyon ti anmennen ti vreman remarkab. Dan lespas en deseni, lakantite proklanmater dan lemonn antye ti ogmante par 100 poursan. Lakantite retourn vizit ti ogmant par 126 poursan e lakantite letid Labib par 150 poursan. Ozordi, dan lemonn antye, pros set milyon proklanmater Rwayonm pe pres sa bon nouvel. Sa ogmantasyon remarkab i en levidans ki Zeova pe beni zefor son pep dan sa travay predikasyon portanport.—Iza. 60:22.

Mark bann dimoun ki pou sirviv

10, 11. (a) Parey i ganny rikorde dan Ezekyel sapit 9, ki vizyon Ezekyel ti gannyen? (b) Ki mannyer sa vizyon pe ganny akonplir dan nou letan?

¹⁰ Nou kapab trouv lenportans predikasyon portanport dan en vizyon ki profet Ezekyel ti gannyen. Dan sa vizyon, Ezekyel ti vwar sis zonm avek zarm dan zot lanmen e osi en setyenm zonm ki ti abiye dan lenz linenn avek en pti po lank ki sekreter ti servi, dan son kote. Sa setyenm zonm ti ganny demande pour “pas dan milye lavil” e “met en mark lo fron sa bann zonm ki pe zemir e plennyen akoz sa bann keksoz repinyan ki pe arive dan milye sa lavil.” Apre sa travay met mark lo fron, sa sis zonm avek bann zarm ti ganny lord pour detrir tou bann ki ti napa sa mark.—Lir Ezekyel 9:1-6.

¹¹ Nou konpran ki dan lakonplisman sa profesi, sa zonm ki “abiye dan lenz linenn” i reprezant bann manm Kretyen swazir ki ankor lo later. Par mwayen predikasyon ek sa travay fer disip, bann manm Kretyen swazir i met en mark senbolik lo bann ki form parti “lezot mouton” Kris. (Zan 10:16, NW) Ki sa mark? Dan en sans senbolik sa mark lo fron i levidans ki sa bann mouton i bann disip Kris ki’n dedye zot lavi, ki’n batize e ki’n met sa nouvo personnalite parey pour Kris. (Efe. 4:20-24) Sa bann mouton i vin en sel troupo ansanm avek bann Kretyen swazir e ed zot  dan sa travay enportan pour mark lezot ankor.—Rev. 22:17.

12. Ki mannyer vizyon Ezekyel konsernan mark bann fron i met lanfaz lo lenportans pour kontinyen rod bann ki resanble mouton?

¹² Vizyon Ezekyel i met lanfaz lo en rezon akoz i irzan pour nou kontinyen rod bann dimoun ki pe “zemir e plennyen.” I annan pour fer avek lavi bann dimoun. Byento, larme Zeova ki dan lesyel e ki ganny reprezante par sa sis zonm avek zarm, pou detrir tou bann ki napa sa mark senbolik. Konsernan sa zizman ki pe vini, zapot Pol ti ekrir ki Senyer Zezi ansanm avek “bann lanz pisan,” pou anmenn “vanzans lo bann ki pa konn Bondye ek bann ki pa obei levanzil [oubyen “bon nouvel,” NW] ki konsern nou Senyer Zezi.” (2 Tesa. 1:7, 8) Remarke ki bann dimoun pou ganny zize dapre lafason ki zot reazir anver sa bon nouvel. Alor, mesaz Bondye i merit kontinyelman ganny anonse san arete ziska lafen. (Rev. 14:6, 7) Tou serviter Zeova ki’n dedye zot lavi i annan sa gro responsabilite pour fer li.—Lir Ezekyel 3:17-19.

13. (a) Ki santiman zapot Pol ti annan anver son responsabilite e akoz? (b) Ki santiman ou annan anver ou responsabilite anver bann dimoun ki dan ou teritwar?

¹³ Zapot Pol ti santi ki i annan en gro responsabilite pour partaz sa bon nouvel avek lezot. I ti ekrir: “Mon konsider li mon devwar pour vizit bann Grek konman bann etranze, bann savan, konman bann inyoran. Pour sa menm rezon ki mon annan sa gran dezir pour vin anons zot osi Levanzil, zot ki reste Ronm.” (Rom. 1:14, 15) Pol ti demontre rekonnesans pour sa mizerikord ki ti’n ganny demontre anver li par fer son mye pour ed lezot pour benefisye avek labonte ekstraordiner Bondye zis parey li i ti’n benefisye. (1 Tim. 1:12-16) I ti paret konmsi i ti drwa lavi sak dimoun ki i ti zwenn, en det ki ti selman kapab ganny peye par pres sa bon nouvel avek sa dimoun. Eski ou santi sa det anver bann dimoun dan ou teritwar?—Lir Akt 20:26, 27.

14. Ki rezon prensipal nou annan pour pres piblikman e portanport?

¹⁴ I vre, sov lavi bann dimoun i enportan, me i annan plis rezon ankor pour nou pres portanport. Dan sa profesi ki ganny rikorde dan Malaki 1:11, Zeova i deklare: “Depi soley leve ziska soley kouse, mon non pou gran parmi bann nasyon . . . en lofrann pou ganny fer pour mon non, wi en lofrann pir, akoz mon non pou gran parmi bann nasyon.” Bann serviter Zeova pe akonplir sa profesi par loue non Zeova piblikman lo later antye ­pandan ki zot kontinyen akonplir zot minister avek limilite. (Ps. 109:30; Mat. 24:14) Sa ki pli enportan pour nou se “rann glwar Bondye” par pres an piblik e portanport.—Ebr. 13:15.

Bann levennman enportan pe vini

15. (a) Ki mannyer bann Izraelit ti entansifye zot aktivite pandan ki zot ti mars otour Zeriko lo setyenm zour? (b) Ki sa i endike lo travay predikasyon?

¹⁵ Ki nouvo devlopman pou annan an rapor avek travay predikasyon? Destriksyon Zeriko ki ganny rikorde dan liv Zozye i donn en legzanp. Rapel byen ki avan Bondye ti detrir Zeriko, bann Izraelit ti ganny lord pour mars toultour lavil en fwa par zour pour sis zour. Parkont, lo setyenm zour zot ti pou bezwen  entansifye sa aktivite. Zeova ti dir Zozye: “Zot devret mars set fwa otour lavil e bann pret i devret soufle korn. E i devret arive ki kan zot soufle korn mal mouton, . . . pep antye i devret kriye pour fer en gro tapaz lager; e miray lavil pou tonm en sel kou aplat ater.” (Zoz. 6:2-5) I kapab ki nou travay predikasyon pou entansifye zis avan lafen sa sistenm. Antouleka, ler destriksyon sa sistenm i vini, nou pou’n vwar sa pli gran temwannyaz konsernan non Bondye ek son Rwayonm dan listwar sa lemonn.

16, 17. (a) Kwa ki pou’n ganny akonplir avan “gran ladetres” i fini? (b) Ki nou pou egzaminen dan lot lartik?

¹⁶ Sa letan pou kapab arive kot sa mesaz ki nou pe anonse pou vin parey en “tapaz lager.” Dan liv Revelasyon bann mesaz zizman ki tre pwisan i ganny dekrir konman “bann gro lagrel ki pez ziska karant kilo . . . sorti dan lesyel.” * Revelasyon 16:21 i dir ki “i ti en fleo vreman terib.” Nou pa konnen ziska aprezan ki rol predikasyon portanport pou zwe dan deklarasyon sa bann dernyen mesaz zizman. Me nou kapab asire ki avan “gran ladetres” i fini, non Zeova pou’n ganny proklanmen plis ki zanmen oparavan dan listwar imen.—Rev. 7:14, NW; Ezek. 38:23.

¹⁷ Pandan ki nou esper sa bann levennman eksitan ki pe vini byento, fotespere ki nou kontinyen anons sa bon nouvel Rwayonm avek devouman. Kan nou pe fer sa travay, ki serten defi nou rankontre dan predikasyon portanport? Ki mannyer nou kapab sirmont sa bann defi? Sa bann kestyon pou ganny reponn dan sa lartik ki swiv.

[Not anba lo paz]

Ki ou pou reponn?

• Dan Labib, kote predikasyon portanport i sorti?

• Ki mannyer lanfaz ti ganny mete lo predikasyon portanport dan nou letan?

• Akoz bann serviter Zeova i annan sa responsabilite pour prese?

• Ki levennman enportan ki pe vini byento?

[Kestyon]

[Portre lo paz 12]

Parey zapot Pol, eski ou santi ki ou annan en responsabilite pour pres avek lezot?

[Portre lo paz 13]

Frer Knorr, 1953