Se “Bondye ki fer pouse”!
Se “Bondye ki fer pouse”!
“Pa sa ki plante ek sa ki aroze ki enportan, me Bondye ki fer pouse.”—1 KOR. 3:7.
1. Dan ki sans “nou pe travay ansanm [avek] Bondye”?
“NOU pe travay ansanm [avek] Bondye.” Se sa ki zapot Pol ti dir lo sa privilez ki nou tou nou kapab annan. (Lir 1 Korentyen 3:5-9.) Sa travay ki Pol ti pe koz lo la i ed dimoun vin bann disip Zezi. I ti konpar sa travay avek plante e aroz bann lagrenn. Nou bezwen led Zeova si nou oule reisi dan sa travay tre enportan. Pol i rapel nou ki se “Bondye ki fer pouse.”
2. Vi ki nou konnen se “Bondye ki fer pouse,” akoz sa i ed nou annan en pwennvi apropriye lo nou minister?
2 Avek limilite, nou realize ki lefet ki nou travay avek Zeova sa i devret ed nou annan en pwennvi apropriye lo nou minister. Menm si nou prese e ansenny dimoun avek bokou devouman, an realite se Zeova ki devret ganny felisite si i annan bann bon rezilta. Akoz? Akoz i pa fasil pour nou konpran parfetman sa ki fer en dimoun progrese pour vin en disip e i pli difisil ankor pour nou kapab kontrol son progre. Lerwa Salomon ti eksprim byen sa pwen ler i ti ekrir: “Ou pa konn travay sa vre Bondye, li ki fer tou keksoz.”—Ekle. 11:5.
3. Kwa ki parey ant senm lagrenn e fer disip?
3 Eski nou devret fristre akoz nou pa vreman konpran egzakteman ki mannyer en dimoun i progrese pour vin en disip? Non, o kontrer i fer li pli enteresan. Lerwa Salomon ti dir: “Dan bomaten senm ou lagrenn e ziska aswar pa les ou lanmen repoze; parski ou pa konnen kote i pou reisi, si isi oubyen laba, ouswa si tou le de pou bon menm.” (Ekle. 11:6) I vre ler nou senmen, nou pa konnen kote sa plant pou pouse oubyen si i pou pouse. I annan plizyer fakter ki nou pa kapab kontrole. I preski parey avek sa travay pour fer disip. Zezi ti met lanfaz lo sa pwen dan de parabol ki nou kapab lir dan Levanzil selon Mark sapit 4. Annou gete ki nou kapab aprann atraver sa de parabol.
Diferan kalite later
4, 5. Eksplik an bref parabol Zezi lo en senmer?
4 Dan Mark 4:1-9, Zezi ti dekrir en senmer ki pe senm lagrenn ki tonm dan diferan landrwa: “Ekoute, en senmer ti sorti pour senm lagrenn. Ler i ti pe senmen en bann lagrenn ti tonm obor semen, e bann zwazo ti vini e ti manz tou. Lagrenn ti osi tonm parmi bann ros, kot ti napa bokou later. Zot ti pous vit akoz later pa ti profon. Kan soley ti tape zot ti fletri, akoz zot ti napa gran rasin e bann plant ti sek. En lot bann lagrenn ti tonm parmi bann pikan; sa bann pikan ti pous vit e ti touf sa bann plant e zot pa ti raporte. Lezot lagrenn ti tonm dan bon later; zot ti pouse e grandi, e zot donn bann zepi ki ti raport trant, swasant, e san.”
5 Dan letan ki Labib ti ganny ekrir, dimoun ti senmen par fann lagrenn. Sa dimoun ti met sa bann lagrenn dan son lenz oubyen dan en sak e i ti anvoy lagrenn par fer en gran mouvman avek son lanmen. Alor sa i ed nou konpran ki sa dimoun pa ti zis anvoy lagrenn dan diferan later par ekspre. Plito, sa bann lagrenn ti tonm dan diferan landrwa.
6. Ki mannyer Zezi ti eksplik sa parabol senmer?
6 Nou pa bezwen esey konpran nou menm ki sinifikasyon sa parabol. Zezi ti donn leksplikasyon. Parey nou kapab lir dan Mark 4:14-20: “Senmer i senm Laparol. Bann dan bor semen kot Laparol in tonbe, se bann ki osito ki zot tann Laparol, Satan i vini e i aras Laparol ki’n senmen dan zot. E pareyman bann ki’n ganny senmen, dan later ros, osito ki zot tann Laparol zot aksepte li avek lazwa. Me zot napa rasin; zot aksepte li zis pour en pti moman. E kan difikilte ek persekisyon akoz Laparol i arive, deswit zot tonbe. En lot bann ki’n ganny senmen parmi bann pikan, se bann ki’n tann Laparol, me traka lavi, plezir larises . . . ek tou lezot dezir i penetre dan zot e touf Laparol, ki alor pa prodwi okenn fri. Bann ki’n ganny senmen dan bon later, se bann ki’n tann Laparol, zot aksepte li e zot raport bann fri, i annan trant, i annan swasant e i annan san.”
7. Ki sa lagrenn ek sa bann diferan kalite later i reprezante?
7 I enteresan pour remarke ki Zezi pa ti mansyonn diferan kalite lagrenn. O kontrer, i koz lo en sel kalite lagrenn ki tonm lo diferan kalite later e sakenn i prodwir diferan rezilta. Premye later i vin dir, dezyenm napa ase later, trwazyenm i annan en ta pikan e katriyenm i en bon later ki raport bokou. (Lik 8:8) Ki sa lagrenn i reprezante? Sa mesaz konsernan Rwayonm ki ganny trouve dan Parol Bondye. (Mat. 13:19) Ki sa bann diferan kalite later i reprezante? Dimoun avek diferan kondisyon leker.—Lir Lik 8:12, 15.
8. (a) Lekel sa senmer? (b) Akoz pa tou dimoun ki reazir parey ler zot tann sa bon nouvel lo Rwayonm?
8 Lekel sa senmer? I reprezant bann ki travay ansanm avek Bondye, setadir bann ki anons sa bon nouvel Rwayonm. Parey Pol ek Apolos, zot plante e aroze. Me menm si zot travay dir, rezilta ki zot gannyen i diferan. Akoz? Akoz dimoun ki ekout sa mesaz i annan diferan kondisyon leker. Dan sa parabol, sa senmer napa kontrol lo rezilta. Pa sa i ankourazan, sirtou pour nou bann frer ek ser ki travay fidelman pour plizyer lannen oubyen dizenn lannen pour ganny sa ki paret en ptigin rezilta! * Akoz nou dir sa?
9. Kwa ki Zezi ek Pol ti dir ki ankourazan?
9 Fidelite sa enn ki senmen pa ganny determinen par rezilta son travay. Pol ti refer avek sa pwen ler i ti dir: “Sakenn pou ganny son saler dapre son travay.” (1 Kor. 3:8, nou ki’n met an italik.) Saler oubyen rekonpans i vin dapre travay e pa dapre rezilta sa travay. Zezi osi ti met lanfaz lo sa pwen ler son bann disip ti retournen sorti en kanpanny predikasyon. Zot ti vreman kontan akoz demon ti soumet avek zot onon Zezi. I vre sa ti en bon rezilta, me selman Zezi ti dir zot: “Pa rezoui akoz bann lespri in soumet avek zot, me rezoui akoz zot non in ganny ekri dan lesyel.” (Lik 10:17-20) Menm si en senmer pa vwar bokou progre dan son travay, sa pa vedir ki i’n travay pli mwens ki en lot oubyen i pa osi fidel ki sa lot. Dan bokou ka, rezilta i depan lo kondisyon leker sa enn ki ekout sa mesaz. Me finalman, se Bondye ki fer pouse!
Responsabilite sa bann ki tann sa mesaz
10. Kwa ki determinen si en dimoun ki tann sa mesaz i parey sa bon later oubyen non?
10 Be ki nou pou dir lo bann ki tann sa mesaz? Eski lefet ki zot refiz oubyen ekout sa mesaz in ganny determinen davans? Non. Si zot en bon later oubyen non, i tou depan lo zot. An realite, kondisyon leker en dimoun i kapab sanze pour vin bon ouswa move. (Rom. 6:17) Dan son parabol, Zezi ti dir ki serten, “osito ki zot tann Laparol,” Satan i vini e i aras li avek zot. Me sa pa en lobligasyon. Dan Zak 4:7, bann Kretyen i ganny ankouraze pour “reziste kont Dyab” e i pou sov lwen avek zot. Zezi ti koz lo lezot ankor ki premye kou i aksepte Parol Bondye avek lazwa e ki tonbe apre akoz zot “napa rasin.” Me bann serviter Bondye i ganny ankouraze pour ganny “anrasinen e byen etabli” lo fondasyon pour zot kapab byen konpran “larzer, longer, oter e profonder lanmour Kris” ki depas konnesans.—Efe. 3:17-19; Kol. 2:6, 7.
11. Ki mannyer en dimoun i kapab anpes traka lavi ek larises touf mesaz Rwayonm?
11 Dan sa parabol, lezot ankor ki tann mesaz Rwayonm i les bann ‘traka lavi ek plezir larises’ penetre e touf sa mesaz. (1 Tim. 6:9, 10) Ki mannyer zot kapab evit sa? Zapot Pol i donn larepons: “Pa les lanmour pour larzan domin zot lavi, me kontant zot avek sa ki zot annan, parski Bondye ti dir: ‘Mon pa pou zanmen negliz ou, mon pa pou zanmen abandonn ou.’”—Ebr. 13:5.
12. Akoz bann dimoun ki ganny reprezante par bon later pa raport menm kantite?
12 Finalman, Zezi ti dir ki lagrenn ki tonm lo sa bon later i “raport bann fri, i annan trant, i annan swasant e i annan san.” Menm si bann ki annan en bon kondisyon leker i aksepte mesaz Rwayonm e raport fri, lakantite ki zot fer pour anons sa bon nouvel i depan lo zot sirkonstans. Par egzanp, lavyeyes ek serten maladi ki fer ou fay i kapab limit sa ki serten i fer dan predikasyon. (Konpar Mark 12:43, 44.) Pareyman, sa senmer napa bokou kontrol lo la, me i kontan ler i vwar ki Zeova i fer pouse.—Lir Psonm 126:5, 6.
Sa senmer ki pe dormi
13, 14. (a) Rakont an bref sa parabol Zezi lo sa senmer. (b) Lekel sa senmer ek ki sa lagrenn i reprezante?
13 Dan Mark 4:26-29, nou vwar en lot parabol konsernan en senmer: “Rwayonm Bondye i parey en zonm ki’n senm lagrenn dan later. Ki i dormi, ki i leve bann lagrenn i zermen e grandi tousel. [“Zis ki mannyer i arive i pa konnen,” NW]. Later par limenm i prodwi premyerman son tiz, apre zepi e apre lagrenn dan zepi. E kan dible i mir, deswit sa zonm i pran fosiy parski i’n ariv ler pour fer rekolt.”
14 Lekel sa senmer? Serten dan bann larelizyon Kretyen i panse ki sa i Zezi. Me lekel ki kapab dir Zezi i dormi e i pa konnen ki mannyer sa lagrenn i pouse? I evidan ki Zezi i konn byen ki mannyer keksoz i devlope! Plito, sa senmer parey dan sa lot parabol avan i reprezant dimoun ki anons sa bon nouvel Rwayonm, se bann ki pe devoue dan predikasyon pour senm lagrenn Rwayonm. Sa lagrenn ki zot semen se sa mesaz lo Rwayonm ki zot prese. *
15, 16. Dan parabol sa senmer, kwa ki Zezi ti met lanfaz lo la kot i konsern devlopman fizik oubyen spirityel?
15 Zezi ti dir ki aswar sa senmer i “dormi” e lizour i “leve.” Sa senmer pa pares, i pe zis viv en lavi normal parey laplipar dimoun. Dan sa verse, ou konpran ki sa dimoun pe swiv en routin regilye pour en serten letan, lizour i travay e aswar i dormi. Zezi ti eksplike kwa ki ti arive pandan sa letan: “Lagrenn i zermen e grandi tousel” e i ti azoute: “Zis ki mannyer i arive i pa konnen.” Zezi ti pe met lanfaz lo lefet ki sa lagrenn i pouse “par limenm.” *
16 Ki Zezi ti pe esey dir? I ti pe met lanfaz lo devlopman e konman sa devlopman i pran plas gradyelman. “Later par limenm i prodwi premyerman son tiz, apre zepi e apre lagrenn dan zepi.” (Mark 4:28, nou ki’n met an italik.) Sa plant i devlope ptitapti e i annan diferan staz. Ou pa kapab fors oubyen akseler son devlopman. Sa i aplik osi avek devlopman spirityel. Progre spirityel i ganny fer par staz anmezir ki Zeova i les laverite devlope dan leker en dimoun ki annan en bon kondisyon leker.—Akt 13:48; Ebr. 6:1.
17. Ki mannyer sa enn ki senmen i pran par dan rekolt?
17 Kan sa senmer i rekolte? “Kan dible i mir,” deswit i fer li. Ler Zeova i fer laverite konsernan Rwayonm grandi dan leker bann nouvo disip, i pou ariv letan kot zot santi sa lanvi pour dedye zot lavi avek Bondye akoz zot kontan li. Zot batize pour demontre ki zot in dedye zot lavi. Bann frer ki kontinyen progrese e devlop plis matirite i kapab avek letan annan plis responsabilite dan kongregasyon. Sa enn ki ti senmen e osi lezot proklanmater Rwayonm ki pa ti personnelman enplike avek sa nouvo disip, zot tou zot rekolte. (Lir Zan 4:36-38.) Vreman, “sa ki senmen e sa ki rekolte zot ganny kontantman ansanm.”
Leson pour nou ozordi
18, 19. (a) Ki mannyer revwar sa de parabol Zezi in ankouraz ou? (b) Ki nou pou vwar dan lot lartik?
18 Ki nou’n aprann atraver sa de parabol dan Mark sapit 4? Nou kapab vwar klerman ki nou annan en travay, sa se senmen. Nou pa zanmen devret rod leskiz oubyen les problenm ek difikilte anpes nou fer sa travay. (Ekle. 11:4) Toudmenm, nou realize ki i en privilez ekstraordiner pour travay ansanm avek Bondye. Se Zeova ki fer bann dimoun vin disip e i beni nou zefor ek zefor bann ki ekout sa mesaz. Nou realize ki nou pa kapab fors personn pour vin en disip. Osi, nou pa devret dekouraze oubyen demoralize si napa bokou progre oubyen progre i dousman. Pa i vreman ankourazan ki nou sikse i depan lo nou fidelite avek Zeova e lo si nou fidel avek sa privilez ki i’n donn nou pour pres sa “Bonn Nouvel Rwayonm . . . pour tou dimoun konnen.”—Mat. 24:14.
19 Ki lezot keksoz Zezi ti ansennyen lo progre en nouvo disip e travay predikasyon? Nou pou vwar larepons dan lezot parabol ki ou kapab trouve dan Levanzil. Nou pou vwar sa dan lot lartik.
[Not anba lo paz]
^ par. 8 Ou kapab vwar leksperyans frer Georg Fjölnir Lindal an Islann dan Yearbook of Jehovah’s Witnesses, 2005 paz 210-211 ek leksperyans bann proklanmater ki ti fidel pour bokou lannen an Irlann avek ptigin rezilta o konmansman dan 1988 Yearbook of Jehovah’s Witnesses paz 82-99.
^ par. 14 Dan lepase, Latour Veyer ti eksplike ki sa lagrenn i reprezant bann kalite dan personnalite en Kretyen ki bezwen ganny amelyore pour ariv lo matirite e ki ganny enfliyanse par lanvironnman kot sa dimoun i viv. Toutfwa, i bon pour note ki dan parabol Zezi, lagrenn pa vin en move lagrenn ouswa en lagrenn pouri. I zis vin mir.—Vwar Latour Veyer le 15 Zen 1980 paz 17-19 an Angle oubyen Franse.
^ par. 15 Sa lekspresyon “par limenm” i aparet zis en lot fwa dan Akt 12:10, kot sa resi i dir ki baro ti ouver “tou sel.”
Eski ou rapel?
• Kwa ki parey ant senm lagrenn e anons sa bon nouvel Rwayonm?
• Kwa ki fer Zeova konsider en proklanmater Rwayonm fidel?
• Kwa ki parey ant devlopman fizik e spirityel parey Zezi ti montre?
• Ki mannyer “sa ki senmen e sa ki rekolte zot ganny kontantman ansanm”?
[Kestyon]
[Portre lo paz 21]
Akoz Zezi ti konpar en proklanmater Rwayonm avek en senmer?
[Portre lo paz 23]
Bann ki ganny reprezante par sa bon later i partisip avek tou zot leker dan sa travay predikasyon dapre zot sirkonstans
[Portre lo paz 24]
Se Bondye ki kontinyen fer pouse