Sirmont bann defi dan predikasyon portanport
Sirmont bann defi dan predikasyon portanport
“Nou ti annan kouraz [oubyen “lardyes,” NW] dan nou Bondye pour anons zot Levanzil Bondye devan gran lopozisyon.”—1 TESA. 2:2.
1. Ki defi Zeremi ti rankontre e ki mannyer i ti kapab sirmont zot?
ZEREMI ti en dimoun ki ti annan santiman parey nou menm. Kan Zeova ti enform li konsernan sa lord pour vin “profet bann nasyon,” i ti kriye: “A, Souvren Senyer Zeova! Vreman, mon pa konn koze, akoz mon ankor tro zenn.” Kantmenm sa, i ti aksepte sa travay e met son konfyans dan Zeova. (Zer. 1:4-10) Pandan sa plis ki 40 an, i ti annan ki pa ti ekout Zeremi e ki ti rezet li. I ti osi fer fas avek vyolans fizik ek sikannri. (Zer. 20:1, 2) Parfwa i ti anvi arete. Me i ti persevere pour anons sa mesaz ki pa ti popiler avek en nasyon ki laplipar pa ti byen reazir. Avek lafors Zeova, Zeremi ti akonplir sa ki i pa ti pou’n kapab akonplir lo li menm.—Lir Zeremi 20:7-9.
2, 3. Ki mannyer defi ki serviter Bondye i fer fas avek ozordi i parey avek pour Zeremi?
2 Bokou serviter Zeova i kapab annan menm santiman avek Zeremi. Kan nou ti mazin partisip dan predikasyon portanport bokou nou ti panse, ‘Mon pa pou zanmen kapab fer sa mwan.’ Parkont, kan nou ti realize ki i lavolonte Zeova pour anons sa bon nouvel, nou ti sirmont sa lenkyetid e nou ti konmans partisip plennman dan predikasyon. Toudmenm, bokou parmi nou in fer fas avek bann sirkonstans dan nou lavi ki’n fer li difisil en serten moman, pour nou kontinyen prese. Pour konmans pres portanport e kontinyen prese ziska lafen i vreman en defi.—Mat. 24:13.
3 Me si ou’n konmans etidye Labib avek Temwen Zeova e asiste bann renyon pour serten letan me ou ezite pour konmans pres portanport? Oubyen ou en Temwen batize ki vwar li difisil pour partisip dan travay portanport menm si ou lasante fizik i permet ou pou fer li? Nou kapab asire ki dimoun sorti dan diferan kiltir pe sirmont menm defi dan predikasyon portanport. Avek led Zeova ou osi ou pou kapab.
Devlop lardyes
4. Kwa ki ti ed Pol pour anons sa bon nouvel avek lardyes?
4 San dout ou rekonnet ki sa travay predikasyon ki pe ganny fer dan lemonn antye pa pe ganny akonplir par lafors ouswa lasazes zonm, me plito par lespri Bondye. (Zeka. 4:6) E sa i vre dan ka minister sak Kretyen. (2 Kor. 4:7) Egzamin legzanp zapot Pol. Kan i ti pe mazin lo en letan kan li ek son bann konpanyon misyonner ti ganny maltrete par bann opozan, i ti ekrir: “Apre ki nou ti’n premyerman soufer e ganny maltrete dan lavil Filip . . . nou ti annan kouraz [oubyen “lardyes,” NW] dan nou Bondye pour anons zot Levanzil Bondye devan gran lopozisyon.” (1 Tesa. 2:2; Akt 16:22-24) Nou kapab vwar li difisil pour mazinen ki en predikater devoue parey Pol ti fer fas avek bann moman kot i ti bezwen lite pour li prese. Parkont, parey nou tou, Pol ti bezwen depan lo Zeova pour li kapab anons sa bon nouvel avek lardyes. (Lir Efezyen 6:18-20.) Ki mannyer nou kapab imit legzanp Pol?
5. Dan ki fason nou kapab ganny lardyes pour prese?
5 En fason nou kapab ganny lardyes pour prese i par lapriyer. En ser pionye ti dir: “Mon priye pour mwan kapab koz avek konfyans. Mon priye pour arive tous leker bann dimoun e mon priye pour ki mon kapab trouv lazwa dan mon minister. Anfet, sa travay pa pour nou me i pour Zeova, alor nou pa kapab fer nanryen san son led.” (1 Tesa. 5:17) Nou tou nou devret kontinyen priye pour ganny led lespri sen Bondye pour nou kapab pres avek lardyes.—Lik 11:9-13.
6, 7. (a) Ki vizyon Ezekyel ti gannyen e ki i ti vedir? (b) Ki bann serviter Bondye i kapab aprann atraver vizyon Ezekyel?
6 Liv Ezekyel i revel en lot keksoz ki kapab ed nou pour koz avek lardyes. Dan en vizyon, Zeova ti donn Ezekyel en roulo ki ti’n ganny ekrir lo tou le de kote avek “bann kantik dey ek sagrinasyon ek leokri” e i ti dir li manz li an dizan: “Garson zonm, ou devret fer ou vant manze, pour ki ou kapab ranpli ou lentesten avek sa roulo ki mon pe donn ou.” Ki sa vizyon ti vedir? Ezekyel ti devret anmas tou sa lenformasyon dan sa mesaz ki i ti pou anonse. Parey ti leka, sa mesaz ti pou oprofon dan li e i ti pou annan lefe lo son bann santiman. Sa profet ti kontinyen rakonte: “E mon ti konmans manze, e dan mon labous i ti vin dou parey dimyel.” Ezekyel ti vwar li konman en plezir pour anons mesaz Bondye an piblik, i ti parey konmsi i ti pe gout dimyel. I ti santi ki i ti annan en privilez spesyal pour reprezant Zeova e akonplir sa travay ki i ti’n gannyen avek Bondye, menm si sa ti enplik anons bann mesaz pwisan avek sa pep ki pa ti enterese.—Lir Ezekyel 2:8–3:4, 7-9.
7 Sa vizyon i kontyen bann leson enportan pour bann serviter Bondye ozordi. Nou osi nou annan en mesaz pwisan pour anons bann dimoun ki pa touzour apresye nou zefor. Pour ki nou kontinyen vwar nou minister Kretyen konman en privilez ki Bondye in donn nou, nou devret kontinyen etidye Labib. Bann letid alalezer ouswa iregilye pa pou sifi pour ed nou pour byen absorb Parol Bondye. Eski ou kapab amelyor kalite ouswa regilarite ou lektir ek letid Labib? Eski ou kapab medit plis lo sa ki ou lir?—Ps. 1:2, 3.
Konmans konversasyon lo Labib
8. Ki metod ki’n ed serten proklanmater Rwayonm pour konmans en konversasyon dan predikasyon portanport?
8 Pour bokou proklanmater sa ki zot pou konmans dir avek sa met lakour i sa keksoz pli difisil pour fer dan predikasyon portanport. I vre, dan serten teritwar i difisil pour konmans en konversasyon. Serten proklanmater i santi zot pli konfortab pour koz avek bann dimoun devan laport si zot konmans zot prezantasyon avek detrwa parol ki’n ganny byen swazir e apre sa donn sa met lakour en trak parey i ganny montre dan sa bwat. Tit oubyen portre sa trak i kapab kapte latansyon sa met lakour e sa i donn nou loportinite pour koz an bref lo bi nou vizit e pour demann en kestyon. En lot metod ki kapab ganny servi i pour montre sa met lakour trwa oubyen kat trak e envit li pour swazir enn ki enteres li. Byensir, nou bi pa zis senpleman plas bann trak ouswa servi zot kot sak lakaz, me plito pour konmans konversasyon lo Labib ki pou diriz ver en letid Labib.
9. Akoz en bon preparasyon i enportan?
9 Nenport ki lapros ou servi, en bon preparasyon pou ed ou pour annan lasirans ek lantouzyasm dan predikasyon portanport. En frer pionye ti obzerve: “Mon ganny plis lazwa kan mon byen prepare. I fer mwan anvi fer mon prezantasyon.” En lot frer pionye ti dir: “Kan mon konn konteni sa piblikasyon ki mon pe al ofer, mon annan plis lantouzyasm pour servi li.” Menm si ou ganny byenfe kan ou repas dousman lo sa ki ou pe al dir, bokou i vwar ki sa i ed zot plis ler zot repet zot prezantasyon aotvwa. Kan zot fer sa, sa i ed zot pour donn Zeova zot meyer.—Kol. 3:23; 2 Tim. 2:15.
10. Kwa ki kapab ganny fer pour fer renyon predikasyon efikas e byen pratik?
10 Renyon predikasyon ki byen pratik i kontribye anver nou lefikasite ek lazwa dan predikasyon portanport. Si teks pour lazournen i koz spesifikman lo aktivite predikasyon, i kapab ganny lir e eksplike an bref. Parkont, sa frer ki pe kondwir renyon predikasyon i devret pran ase letan pour diskit ouswa fer en senp demonstrasyon ki apropriye pour sa teritwar ouswa vwar lezot lenformasyon pratik ki kapab ganny servi sa zour. Sa pou pli byen ekip bann ki prezan pour rann en bon temwannyaz efikas. Avek en bon preparasyon davans, bann ansyen ek lezot ki kondwir sa renyon i kapab akonplir sa e konklir sa renyon aler.—Rom. 12:8.
Ekoute i annan en gran lefe
11, 12. Ki mannyer ekout avek konpasyon i ede pour tous leker bann dimoun avek sa bon nouvel? Donn legzanp.
11 Pa zis bon preparasyon ki ede pour konmans en konversasyon lo Labib avek en dimoun dan predikasyon, me en gran lentere personnel dan sa dimoun. En fason nou kapab demontre sa lentere i par lafason ki nou ekoute. En sirveyan rezyonal ti fer sa remark: “Annan pasyans e montre ki ou anvi ekout sa dimoun i annan en lefe vreman remarkab pour fer zot osi ekout sa bon nouvel e i en zoli fason pour eksprim lentere personnel dan sa dimoun.” Demontre konpasyon kan ou pe ekoute i kapab sa lakle ki ouver leker sa met lakour, parey sa leksperyans ki swiv i montre.
12 Dan en let ki ti ganny pibliye dan zournal Le Progrès, Lafrans, en madanm ki ti dan en gran sagrinasyon ti dekrir vizit de dimoun ki ti tap son laport en pe letan apre ki i ti’n perdi son pti baba trwa mwan dan lanmor. I ti ekrir, “Mon ti deswit rekonnet zot konman bann Temwen Zeova. Mon ti’n pare pour fer zot ale byen zantiman, me apre sa mon ti port latansyon lo sa brosir ki zot ti pe ofer mwan. I ti pe koz lo akoz Bondye i permet soufrans. Alors mon ti deside pour envit zot avek lentansyon pour montre zot ki zot mal. . . . Sa de Temwen ti reste kot mwan en pti pe plis ki enn erdtan. Zot ti ekout mwan avek gran konpasyon e kan zot ti pe ale, mon ti santi mwan pli byen ki mon ti dakor pour en lot vizit.” (Rom. 12:15) Avek letan sa madanm ti aksepte en letid Labib. Nou kapab aprann en kantite lo sa ki sa madanm ti mazinen apre sa premye vizit. I pa ti mazin sa ki sa bann ser ti dir, me plito lafason zot ti ekout li.
13. Ki mannyer nou kapab adapte nou prezantasyon lo sa bon nouvel avek sak dimoun ki nou zwenn?
13 Annefe, kan nou ekout bann dimoun avek konpasyon, nou pe aktyelman permet zot dir nou akoz zot bezwen sa Rwayonm. Sa i met nou dan en pli bon pozisyon pour partaz sa bon nouvel avek zot. Petet ou’n remarke ki bann bon evanzelizater i normalman bann ki ekout byen. (Prov. 20:5) Zot demontre en lentere senser dan dimoun ki zot zwenn dan predikasyon. Zot pa zis pran non ek ladres bann dimoun me zot osi not son lentere ek bezwen. Kan serten i eksprim en keksoz ki preokip li, zot fer resers e retournen deswit pour partaz sa ki zot in trouve. Parey zapot Pol, zot adapte zot prezantasyon lo sa mesaz Rwayonm avek bann dimoun ki zot zwenn. (Lir 1 Korentyen 9:19-23.) Sa bann kalite lentere senser i atir bann dimoun avek sa bon nouvel e i demontre tandres ek “konpasyon nou Bondye” dan en fason merveye.—Lik 1:78.
Gard en latitid pozitif
14. Pandan ki nou akonplir nou minister, ki mannyer nou kapab reflekte bann kalite Zeova?
14 Zeova in montre ki i konsider nou presye par donn nou liberte pour swazir. Menm si i Bondye Tou Pwisan, i pa fors personn pour servi li me i atir bann dimoun lo baz son lanmour e i beni bann ki apresye son bann provizyon merveye. (Rom. 2:4) Konman son bann minis, nou devret pare pour prezant sa bon nouvel dan en fason ki pou fer plezir nou Bondye mizerikord sak fwa ki nou rann en temwannyaz. (2 Kor. 5:20, 21; 6:3-6) Pour ki sa i arive, nou devret gard en bon latitid pozitif anver bann dimoun dan nou teritwar. Kwa ki kapab ed nou sirmont sa defi?
15. (a) Ki lord Zezi ti donn son bann disip an ka dimoun i rezet zot mesaz? (b) Kwa ki kapab ed nou konsantre lo rod bann dimoun ki merite?
15 Zezi ti demann son bann disip pour pa tro fatig zot si serten i rezet sa mesaz me plito kontinyen rod bann ki merite. (Lir Matye 10:11-15.) En fason ki nou kapab ede i par etablir bann pti lobzektif ki kapab ganny atenn. En frer i konpar son lekor avek en dimoun ki fouy bann landrwa pour rod keksoz ki annan valer. Sa frer i annan en moto ki dir, “Mon esper avek enpasyans sa moman ozordi ki mon pou bat avek en lor.” En lot frer i annan en lobzektif “pour zwenn omwen en dimoun zantiy sak semenn e retournen pour pourswiv son lentere dan lespas enn de zour.” Serten proklanmater i esey zot mye pour lir omwen en verse Labib avek sak met lakour si i posib. Ki lobzektif rezonnab ou kapab etablir pour ou menm?
16. Ki rezon nou annan pour kontinyen prese?
16 Sikse ki predikasyon portanport i anmennen pa depan zis lo reaksyon bann dimoun dan teritwar. I vre, predikasyon i zwe en gran rol dan delivrans bann ki annan en leker senser, me i annan ankor lezot bi enportan. Minister Kretyen i donn nou loportinite pour demontre nou lanmour pour Zeova. (1 Zan 5:3) I anpes nou drwa lavi bann dimoun. (Akt 20:26, 27) I avertir bann mesan ki ‘ler zizman Bondye in arive.’ (Rev. 14:6, 7) Deplis, atraver predikasyon sa bon nouvel, non Zeova i ganny loue lo later antye. (Ps. 113:3) Alors, ki swa dimoun i ekout nou ouswa non, nou devret kontinyen anons sa mesaz Rwayonm. Vreman, tou nou zefor pour anons sa bon nouvel i annan valer dan lizye Zeova.—Rom. 10:13-15.
17. Ki bann dimoun pou forse rekonnet byento?
17 Menm si bokou dimoun ozordi pa kontan nou travay predikasyon, byento zot pou annan en lot pwennvi. (Mat. 24:37-39) Zeova ti asir Ezekyel ki ler son zizman ki i ti pe anonse i vin vre, pep Izrael rebel pou “sirman konnen osi ki ti annan en profet parmi zot.” (Ezek. 2:5) Pareyman, kan Bondye pou anmenn son zizman lo sa sistenm, bann dimoun pou forse rekonnet ki sa mesaz ki bann Temwen Zeova ti pe prese an piblik e portanport, ti vreman sorti kot sa vre Bondye Zeova e ki son bann Temwen ti vreman son bann reprezantan. Pa i en privilez pour port son non e anons son mesaz dan sa bann letan enportan! Fotespere ki avek son led, nou kontinyen sirmont bann defi ki nou gannyen dan predikasyon portanport.
Ki ou pou reponn?
• Ki mannyer nou kapab ganny lardyes pour prese?
• Kwa ki kapab ed nou konmans en konversasyon lo Labib dan predikasyon portanport?
• Ki mannyer nou kapab demontre lentere senser dan lezot?
• Kwa ki kapab ed nou pour gard en latitid pozitif anver bann dimoun dan nou teritwar?
[Kestyon]
[Bwat lo paz 17]
Pour konmans en konversasyon lo Labib
Pour konmanse:
▪ Apre ki ou’n dir bonzour sa met lakour, ou kapab donn li en trak e dir: “Bi mon vizit ozordi i pour partaz en panse ankourazan lo sa size enportan.”
▪ Ouswa ou kapab ofer sa trak e dir: “Mon pe fer en pti vizit ozordi akoz mon enterese pour konnen ki ou panse lo sa size.”
Si i aksepte sa trak:
▪ San fer en gran poz, demann li en kestyon pour konn son pwennvi baze lo tit sa trak.
▪ Ekout atantivman e esey konpran akoz sa met lakour i pans koumsa. Remersye li pour son komanter e enkli li dan ou konversasyon.
Pour kontiny sa diskisyon:
▪ Lir e diskit enn oubyen de verse Labib, aziste ou prezantasyon avek lentere ouswa bezwen sa dimoun.
▪ Si i demontre lentere, ofer li en piblikasyon e si i posib montre li ki mannyer en letid Labib i ganny fer. Fer laranzman pour retournen.