Avek tandres Zeova i pran swen avek son bann serviter aze

“Bondye pa enzis pour oubliy travay ki zot in fer, ni lanmour ki zot in montre pour li.”—EBR. 6:10.

1, 2. (a) Ler ou vwar en dimoun avek seve blan, ki sa i kapab fer ou mazinen? (b) Ki mannyer Zeova i vwar bann Kretyen aze?

LER ou vwar bann aze avek zot seve blan dan kongregasyon, eski sa i fer ou mazin en resi dan Labib ki ganny trouve dan liv Danyel? Dan en vizyon ki Bondye ti fer Danyel vwar, Zeova ti dekrir li avek seve blan. Danyel ti ekrir: “Mon ti kontinyen gete ziska ki bann tronn ti ganny mete e Ansyen bann Zour ti asize. Son lenz ti blan parey lanez, e son seve ti blan parey lalenn pir.”—Dan. 7:9.

² Dan son leta natirel, laplipar ditan lalenn i normalman annan en kouler blan. Alors, seve blan ek sa tit “Ansyen bann Zour” i atir latansyon lo kantite lannen ki Bondye i egziste ek son gran lasazes ki i annan, de keksoz ki fer li merit nou profon respe. Ki mannyer alor Zeova, Ansyen bann Zour, i vwar son bann serviter fidel ki aze? Parol Bondye i dir ki  “seve blan i en kouronn labote kan i ganny trouve dan semen ladrwatir.” (Prov. 16:31) Wi, si en Kretyen fidel i annan seve blan, en tel laparans i endik matirite e i en labote dan lizye Bondye. Eski ou annan menm pwennvi ki Zeova konsernan ou bann frer ek ser aze?

Akoz zot vreman ganny apresye?

3. Akoz bann frer ek ser aze i vreman presye pour nou?

³ Parmi bann serviter Bondye ki aze ki vreman ganny apresye i bann manm Konsey Direkter, bann frer ki’n deza sirveyan rezyonal oubyen distrik dan lepase ek bann ki sirveyan ozordi, bann pionye devoue, bann proklanmater matir setadir bann frer ek ser ki pe servi fidelman dan nou bann kongregasyon. Petet ou konn serten frer ek ser ki’n pres sa bon nouvel pour plizyer lannen e ki zot bon legzanp in ede pour motiv bann zenn par annan en lenfliyans lo zot lavi. Serten frer ek ser aze in desarz bann gro responsabilite e andir persekisyon akoz sa bon nouvel. Zeova ek “lesklav fidel e pridan” i vreman apresye tou sa ki zot in fer dan lepase e pe kontinyen kontribye pour fer avanse sa travay Rwayonm.—Mat. 24:45, NW.

4. Akoz nou devret annan respe pour bann Kretyen aze e priy pour zot?

⁴ Lezot serviter Zeova i devret demontre rekonnesans ek respe anver sa bann frer ek ser aze. Anfet, Lalwa Bondye ki ti ganny donnen par lentermedyer Moiz i relye konsiderasyon ek respe pour bann frer ek ser aze avek lakrent pour Zeova. (Lev. 19:32) Nou devret regilyerman priy Bondye pour sa bann serviter fidel e remersye li pour sa gran travay ki zot fer avek lanmour. Zapot Pol ti priy pour son bann konpanyon travay ki i ti byen apresye, zenn konman vye.—Lir 1 Tesalonisyen 1:2, 3.

5. Ki byenfe nou kapab gannyen ler nou asosye avek bann adorater Zeova ki aze?

⁵ Deplis, tou dimoun dan kongregasyon i kapab tir byenfe ler zot asosye avek bann Kretyen aze. Atraver letid, obzervasyon ki zot in fer ek leksperyans ki zot in gannyen bann adorater fidel Zeova ki aze in ganny en kantite konnesans vreman presye. Zot in aprann pour annan pasyans e montre ki zot konpran santiman lezot. E kan zot ansenny sa ki zot in aprann avek sa zenerasyon ki vin apre zot, sa i donn zot bokou lazwa ek satisfaksyon. (Ps. 71:18) Zenn, fodre ki zot vin saz e tir byenfe atraver sa sours konnesans zis parey ou ti pou tir delo dan en pwi profon.—Prov. 20:5.

6. Ki mannyer ou kapab montre bann dimoun aze ki ou vreman kontan zot?

⁶ Eski ou fer bann dimoun aze konnen ki ou kontan zot parey Zeova i kontan zot? En fason ki ou kapab fer sa i par dir zot ki kantite ou kontan zot pour zot fidelite e ki kantite valer zot lopinyon i annan pour ou. Deplis, par aplik sa ki ou aprann avek zot, ou pou demontre ki ou vreman annan respe pour zot. En kantite Kretyen aze i kapab rapel sa konsey saz ki zot ti gannyen avek bann Kretyen fidel ki ti aze e lefet ki zot in aplik sa konsey konman ki sa in anmenn byenfe pour zot tou dilon zot lavi. *

Demontre lafeksyon dan bann fason pratik

7. Avek lekel Zeova in premyerman donn sa responsabilite pour pran swen avek bann dimoun aze?

⁷ Bondye i donn sa responsabilite premyerman avek fanmir bann dimoun aze pour pran swen avek zot. (Lir 1 Timote 5:4, 8.) Zeova i apresye ler bann fanmir i desarz zot responsabilite anver zot manm fanmir ki aze e sa i demontre ki zot enterese avek bann dimoun aze parey li. Bondye i siport sa bann fanmir e i beni zot pour zot zefor ek sakrifis. *

8. Akoz bann frer ek ser dan kongregasyon i devret demontre lentere anver bann Kretyen aze?

⁸ Pareyman, Zeova i apresye ler kongrega syon i pran swen avek bann frer ek ser aze ki dan bezwen me ki napa fanmir ki Temwen Zeova oubyen ki oule pran swen avek zot. (1 Tim. 5:3, 5, 9, 10) Dan sa fason alors bann dimoun dan kongregasyon i demontre ki zot ‘kontan kanmarad konman frer e annan konpasyon’ pour bann aze. (1 Pyer 3:8) Zot lentere pour bann ki aze dan kongregasyon i ganny byen dekrir par Pol ler i ti fer resorti ki si parti lekor en dimoun i soufer, “tou lezot parti i soufer avek li.” (1 Kor. 12:26) Par fer bann keksoz pratik ki demontre konpasyon an faver bann dimoun aze i montre ki nou pe aplik sa prensip ki trouve dan sa konsey ki Pol ti donnen: “Anmenn fardo kanmarad, parski an fezan sa zot obei lalwa Kris.”—Gal. 6:2.

9. Ki difikilte lavyeyes i kapab anmenn lo en dimoun?

⁹ Ki fardo bann Kretyen aze i annan? Bokou zot i fatig vitman. Zot kapab santi ki menm bann keksoz dan lavi tou le zour, par egzanp al kot dokter, pey bil, ekrir e poste let, netway lakaz e kwi manze i difisil pour zot arive fer. Vi ki avek laz zot perdi lapeti e pa santi zot swaf, zot kapab mazinen ki zot pa bezwen manze oubyen bwar sa kantite parey zot devret. Zot kapab santi parey anver bann keksoz spirityel. Lavyeyes i annan en lefe lo zot lizye ek zorey ki kapab fer li difisil pour lir e ekoute dan bann renyon Kretyen. E zis pour prepare pour al renyon i kapab fatigan pour bann Kretyen aze. Alors, ki lezot i kapab fer pour ed sa bann Kretyen aze?

Sa ki zot kapab fer pour ede

10. Ki bann ansyen i kapab fer pour fer sir ki bann Kretyen aze i resevwar led dan en fason pratik?

¹⁰ Dan bokou kongregasyon bann frer ek ser i vreman donn en bon legzanp dan lafason ki zot pran byen swen avek bann ki aze. Bann frer ek ser ki ranpli avek lanmour i al fer zot konmisyon, kwi zot manze e netway zot lakour. Zot ed bann frer ek ser aze pour etidye, prepar pour renyon e pour reste aktif dan predikasyon. Bann zenn Temwen i akonpanny zot e donn zot pasaz. Si sa bann Kretyen aze pa kapab sorti kot lakour, laranzman i ganny fer pour zot ekout renyon par  telefonn oubyen lanrezistreman i ganny fer pour zot. Sak fwa ki i posib, bann ansyen i fer sir ki bann laranzman pratik i ganny fer pour pran swen avek bezwen bann dimoun aze dan kongregasyon. *

11. Rakonte ki mannyer en fanmir ti ed en frer aze.

¹¹ Lo en baz personnel bann Kretyen i kapab osi ofer lospitalite e demontre zenerozite anver bann aze. Apre ki en frer aze ti perdi son madanm dan lanmor, i ti nepli kapab pey sa landrwa kot i ti pe lwe san larzan pansyon son madanm. Li ek son madanm ti’n etidye Labib avek en fanmir ki ti annan de fiy adolesan e zot ti annan en gran lakaz. Zot ti donn li en plas reste kot zot. Pandan 15-z-an zot ti manz ansanm, pas bann bon moman e demontre lafeksyon pour kanmarad. Bann zenn ti tir bokou byenfe atraver gran leksperyans ek lafwa ki sa frer aze ti annan e li an retour ti pas en bon moman avek zot. Sa frer aze ti viv avek zot ziska ki i ti mor a laz 89 an. Sa fanmir i touzour remersi Bondye pour sa kantite benediksyon ki zot in resevwar atraver zot lanmitye avek sa frer. Zot pa’n ‘perdi zot rekonpans’ lefet ki zot in ed en disip Zezi Kri.—Mat. 10:42. *

12. Ki ou kapab fer pour demontre lafeksyon anver bann frer ek ser aze?

¹² Petet ou napa sa posibilite pour ed en frer oubyen ser aze dan sa fason ki sa fanmir ti fer, me petet ou kapab ed bann Kretyen aze pour al renyon e pour sorti dan predikasyon. Ou kapab osi envit zot kot ou e enkli zot ler ou fer bann pti aktivite. Ou kapab vizit zot, sirtou ler zot malad e zot pa kapab sorti kot zot. Deplis, ou kapab e ou devret touzour tret zot konman bann adilt matir. Osi lontan ki zot lespri i ankor bon, nou devret enkli zot dan tou desizyon ki annan pour fer avek zot. Menm sa bann ki’n perdi en kantite zot abilite pour konpran e reflesir, zot kapab santi si zot dinyite pe ganny respekte.

Zeova pa pou oubliy ou travay

13. Akoz i enportan pour demontre konsiderasyon pour santiman bann Kretyen aze?

¹³ I vreman enportan pour demontre konsiderasyon pour santiman bann dimoun aze. Souvan bann dimoun aze i santi zot fristre akoz zot nepli kapab fer sa ki zot ti kapab fer ler zot ti ankor zenn e ti annan en pli bon lasante. Par egzanp, en ser ki’n servi Zeova aktivman pour apepre 50 an e ki ti en pionye ti ganny en maladi ki ti gradyelman afeblir li. Sa ti fer li ganny bokou difikilte pour asiste renyon. Ler i ti konpar sa ki i ti kapab fer avan dan son minister ek sa ki i pa kapab fer la konmela, i ti konmans plere. I ti bes son latet e an pleran i ti dir: “Mon nepli kapab fer naryen ankor.”

14. Ki lankourazman bann Kretyen aze i kapab gannyen atraver bann psonm?

¹⁴ Si ou en dimoun aze, eski ou santi koumsa? Oubyen eski parler ou santi ki petet Zeova in abandonn ou? Petet sa psalmis ti santi parey dan son bann vye zour, akoz i ti sipliy Zeova: “Pa rezet mwan pandan letan lavyeyes; Zis letan mon lafors in afeblir, pa kit mwan. . . . Menm ziska lavyeyes ek seve blan, O Bondye, pa kit mwan.” (Ps. 71:9, 18) Byensir, Zeova pa ti pou abandonn sa enn ki ti konpoz sa psonm e I pa pou abandonn ou. Dan en lot psonm, David ti eksprim son konfyans dan sipor ki Zeova i kapab donn li. (Lir Psonm 68:19.) Si ou en Kretyen fidel ki aze ou kapab annan konfyans ki Zeova i avek ou e I pou kontinyen soutenir ou zour apre zour.

15. Kwa ki kapab ed bann dimoun aze pour gard en leta lespri pozitif?

¹⁵ Tou sa ki zot, bann serviter Zeova ki aze, pe fer e pe kontinyen fer pour laglwar Bondye i reste grave dan son memwar. Labib i dir: “Bondye pa enzis pour li oubliy travay ki zot  in fer, ni lanmour ki zot in montre pour li.” (Ebr. 6:10) Alors, pa adopte en pwennvi negatif, par mazinen ki akoz ou byen aze ou nepli itil pour Zeova. Esey fer bokou zefor pour ranplas sa bann panse negatif ki fer ou dekouraze par bann ki pozitif. Apresye sa bann benediksyon ek sa lespwar ki ou annan pour lavenir. Nou annan sa pli bon ‘lavenir ek lespwar,’ e sa i en lasirans ki nou Kreater in donn nou. (Zer. 29:11, 12; Akt 17:31; 1 Tim. 6:19) Mazin lo ou lespwar, fer zefor pour reste zenn dan ou leker ek lespri e pa zanmen panse ki ou prezans pa konte dan kongregasyon. *

16. Akoz en frer aze ti mazinen ki i ti devret aret servi konman en ansyen, me ki mannyer konsey ansyen ti ankouraz li?

¹⁶ Pran legzanp Johan ki a laz 80-z-an i bezwen toultan la pour pran swen avek son madanm Sannie ki aprezan in vin envalid. * Bann ser i fer laranzman pour sakenn son tour reste avek Sannie pour Johan kapab al renyon ek predikasyon. Me resaman, Johan ti santi li fatige emosyonnelman e i ti konmans mazinen ki i devret aret servi konman en ansyen dan kongregasyon. I ti demande avek larm dan son lizye: “Akoz mon pe servi konman en ansyen? Mon nepli fer okenn travay itil dan kongregasyon.” Lezot ansyen dan son kongregasyon ti asir li ki son leksperyans ek lopinyon i annan bokou valer. Zot ti ankouraz li pour kontinyen servi konman en ansyen, menm si i pa kapab fer otan ki avan. Sa ti vreman ankouraz Johan ki pe kontinyen servi konman ansyen pour anmenn benediksyon pour sa kongregasyon.

Zeova i vreman pran swen avek son bann serviter

17. Ki lasirans Labib i donn bann Kretyen aze?

¹⁷ Labib i fer kler ki bann dimoun aze i kapab kontinyen prospere lo kote spirityel malgre bann problenm ki lavyeyes i anmennen. Sa psalmis ti dir: “Bann ki’n ganny plante dan lakaz Zeova . . . pou ankor kontinyen prospere kan zot seve in vin blan, zot pou kontinyen reste gra e fre.” (Ps. 92:13, 14) Zapot Pol ki petet ti pe fer fas avek en maladi ‘pa ti perdi kouraz menm si son lekor ti pe dousman dousman ganny detrir.’—Lir 2 Korentyen 4:16-18.

18. Akoz bann Kretyen aze ek bann dimoun ki pran swen avek zot i bezwen led lezot?

¹⁸ En kantite legzanp dan nou letan i montre ki bann Kretyen aze pe “kontinyen prospere.” Me maladi ek lavyeyes i kapab dekouraz zot menm si zot fanmir i desarz byen zot responsabilite e pran swen avek zot. Bann ki pran swen avek zot i kapab osi eksperyans lafatig. Kongregasyon i annan sa privilez ek responsabilite pour demontre zot lanmour dan en fason pratik anver sa bann Kretyen aze ek bann dimoun ki pran swen avek zot. (Gal. 6:10) En tel led i montre ki nou pa pe dir zot ale e “gard [zot] so, e manz byen” san ki nou ed zot dan en fason pratik.—Zak 2:15-17.

19. Akoz bann Kretyen fidel ki aze i kapab vwar lavenir avek konfyans?

¹⁹ Ler en dimoun pe vye sa i kapab anmenn serten sanzman dan son bann aktivite Kretyen, me letan pa diminyen lanmour ki Zeova i annan pour son bann serviter fidel ki aze. O kontrer, tou sa bann Kretyen fidel i presye dan son lizye e i pa pou zanmen kit zot. (Ps. 37:28; Iza. 46:4) Zeova pou soutenir e gid zot tou dilon zot vye zour.—Ps. 48:14.

[Not anba lo paz]

Ki ou pou reponn?

• Akoz ou vwar bann Kretyen fidel ki aze presye?

• Ki mannyer nou kapab demontre lafeksyon anver bann frer ek ser aze?

• Kwa ki kapab ed bann serviter Zeova ki aze annan en leta lespri pozitif?

[Kestyon]

[Portre lo paz 23]

Bann frer ek ser dan kongregasyon i apresye bann Kretyen aze en kantite