Byento later pou vin en Paradi!

“Nou Papa ki dan lesyel Ki ou non sen i ganny glorifye; Ki ou Renny i ganny etabli; Ki ou lavolonte i ganny akonpli lo later parey dan lesyel.”—Matye 6:9, 10.

SA LAPRIYER ki bokou dimoun i konnen konman lapriyer ‘Notreper,’ i donn en lespwar limanite. Ki mannyer?

Parey sa lapriyer ‘Notreper’ i fer resorti, Rwayonm Bondye pou fer lavolonte Bondye ganny fer lo later zis parey i pe sirman ganny fer dan lesyel. I lavolonte Bondye pour reetabli Paradi lo later. (Revelasyon 21:1-5) Ki si sa Rwayonm Bondye e konman ki i pou reetabli Paradi lo later?

En gouvernman etabli par Bondye

Rwayonm Bondye i en vre gouvernman ki’n ganny etabli par Bondye. Nenport gouvernman ki o pouvwar, i bezwen annan bann dirizan, lalwa ek sitwayen. Eski dan Rwayonm Bondye i annan sa bann eleman ki ganny mansyonnen la? Remark larepons ki Labib i donnen pour sa trwa kestyon swivan:

Lekel ki pou rennyen dan Rwayonm Bondye? (Izai 33:22) Zeova in apwent son Garson Zezi Kri, pour ansarz son Rwayonm. (Matye 28:18) Anba gidans Zeova, Zezi in swazir en pti group dimoun sorti dan “tou ras, tou langaz, tou pep ek tou nasyon” ki pou rennyen avek li lo later.—Revelasyon 5:9, 10.

Ki bann lalwa Rwayonm Bondye in etabli pour son bann sitwayen obeir? Serten sa bann lalwa oubyen komannman, i demann son bann sitwayen pour fer bann aksyon spesifik. Zezi ti fer resorti sa lalwa pli enportan parmi bann lalwa kan i ti dir: “‘Kontan Senyer ou Bondye avek tou ou leker, avek tou ou lam, e avek tou ou lespri.’ Sa se premye e pli gran komannman. E dezyenm komannman i parey li: ‘Kontan ou prosen parey ou kontan ou prop lekor.’”—Matye 22:37-39.

Lezot lalwa i demann bann sitwayen Rwayonm Bondye pour evite fer serten aksyon. Par egzanp, Labib i klerman fer sa deklarasyon swivan: “Pa les zot ganny anbete, ni bann ki pratik bann akt imoral, ni bann ladorater zidol, ni bann adilter, ni bann omoseksyel, ni bann voler, ni bann anvye, ni bann soular, ni bann ki fer kalomni, ni bann ki akapar byen zot prosen, pa pou erit Rwayonm Bondye.”—1 Korentyen 6:9, 10.

Lekel bann sitwayen Rwayonm Bondye? Zezi ti konpar bann sitwayen Rwayonm Bondye avek bann mouton. I ti dir: “Zot a ekout mon lavwa. Alor i ava annan en sel troupo e en sel berze.” (Zan 10:16) Pour vin en sitwayen Rwayonm Bondye, en dimoun pa devret senpleman dir ki i pe swiv sa Bon Berze, Zezi,  me i devret osi fer sa ki i komande. Zezi ti dir: “Pa tou sa ki apel mwan Senyer, Senyer ki pou antre dan Rwayonm lesyel, me zis bann ki fer lavolonte mon Papa ki dan lesyel.”—Matye 7:21.

Alors, bann sitwayen Rwayonm Bondye i servi e onor non Bondye, Zeova, zis parey Zezi ti fer. (Zan 17:26) Zot obeir lord Zezi pour ansenny lezot konsernan “Sa Bonn Nouvel Rwayonm.” (Matye 24:14; 28:19, 20) Zot osi demontre lanmour senser pour kanmarad.—Zan 13:35.

“Detri bann ki detri later”

Bann kondisyon ki egziste dan sa lemonn ozordi i endike ki Rwayonm Bondye pou byento pran aksyon pour anmenn bann sanzman enportan lo later. Ki mannyer nou konn sa? De mil an pase, Zezi ti dekrir en siny ki ti enkli plizyer laspe, ki ti pou endike ki “Rwayonm Bondye i pros.” (Lik 21:31) Parey in ganny montre dan lartik avan, bann laspe sa siny i klerman evidan ozordi partou dan lemonn.

Ki pou arive apre? Zezi i reponn: “Sa pou en lepok gran soufrans [oubyen “gran ladetres,” NW], pli terib ki tou sa ki’n deza annan avan, depi konmansman lemonn ziska konmela, e pa pou zanmen ariv ankor.” (Matye 24:21) Sa i pa pou en dezas koze par zonm, me i plito Bondye ki pou pran aksyon “pour detri bann ki detri later.” (Revelasyon 11:18) Bann move dimoun egois ki par zot aksyon pe detri later “pou ganny retire lo later.” Me bann ki drwat, ki servi Bondye dan sa fason ki i ekspekte “pou reste lo la.”—Proverb 2:21, 22.

Zeova i annan bann rezon valab pour pran en tel aksyon. Akoz? Konsider sa legzanp: Mazinen si ou ti annan en pti apartman. Serten sa bann lokater ki pe lwe ou apartman i annan bon konportman, zot pran byen swen avek zot lakour e zot pey zot lokasyon. Me parkont, lezot i azir dan en fason egois, zot andomaz sa batiman e refize pey zot lokasyon. Menm si ou’n averti zot plizyer fwa, zot kontinyen azir dan en move fason. Ki ou ti pou fer? Lefet ki ou ki met sa apartman ou ti pou sirman fer sa bann move lokater ale.

Pareyman, Zeova, konman Kreater later ek tou sa ki lo la, i annan sa drwa pour deside lekel ki i pou permet viv lo sa plannet. (Revelasyon 4:11) Zeova in dir ki son lavolonte se pour retir bann move dimoun ki pa fer son lavolonte e abiz drwa lezot lo later.—Psonm 37:9-11.

Paradi pou ganny reetabli

Byento, Rwayonm Bondye anba dominasyon Zezi Kri pou rennyen lo later. Zezi ti apel sa nouvo konmansman en moman kot “tou keksoz pou ganny refer a-nef.” (Matye 19:28, New International Version) Ki kalite kondisyon ki pou egziste? Remark sa bann promes ki sorti dan Labib:

Psonm 46:9. “I pe fer arete lager ziska dan bann landrwa pli lwen lo later.”

Izai 35:1. “Dezer ek rezyon ki napa delo pou rezwir, e laplenn dezerte pou dan lazwa e i pou fleri parey safran.”

Izai 65:21-23. “Sa bann ki mon’n swazir pou profit plennman travay zot lanmen. Zot pa pou rente pour nanryen, e zot pa pou ganny zanfan pour donn problenm.”

Zan 5:28, 29. “Sa ler pe arive kan tou bann mor ki dan tonbo pou tann . . . lavwa [Zezi], e zot pou sorti.”

Revelasyon 21:4. “[Bondye] pou eswiy tou larm dan zot lizye. Lanmor pou nepli egziste. Pou nepli annan ni dey, ni plere, ni soufrans.”

Bann rezon pour krwar

Eski ou krwar dan bann promes Labib? Labib in predir ki bokou dimoun pa pou krwar.  I dir: “Dan dernyen zour pour annan bann moker . . . an swivan zot prop dezir. Zot pou dir, ‘Oli sa promes, ki i pe vini? Depi ki nou bann zanset in mor, tou i reste parey depi kreasyon lemonn.’” (2 Pyer 3:3, 4) Me sa bann moker pe vreman anbet zot prop lekor. Konsider zis kat rezon akoz ou kapab krwar dan sa ki Labib i dir:

(1) Bondye ti pran aksyon kont bann move dimoun lo later dan lepase. Sa Deliz dan letan Noe i en legzanp remarkab.—2 Pyer 3:5-7.

(2) Parol Bondye i egzakt ler i ti predir bann kondisyon ki egziste dan lemonn ozordi.

(3) Tou keksoz pa pe “reste parey depi kreasyon lemonn.” Dan domenn sosyal, moral ek lanvironman, nou plannet pe ganny afekte dan en fason ki pa’n zanmen deza arive oparavan.

(4) Sa “Bonn Nouvel Rwayonm” ki pe ganny anonse partou dan lemonn i endike ki “lafen pou arive” byento.—Matye 24:14.

Bann Temwen Zeova i envit ou pour etidye Parol Bondye, Labib, avek zot pour ou kapab aprann plis konsernan sa lespwar pour ganny lavi eternel anba dominasyon Rwayonm Bondye. (Zan 17:3) Wi, en lavenir merveye i devan limanite. En moman pli meyer pe vini byento! Eski ou pou la?

[Pwen adisyonnel]

Bann dimoun ki dir ki keksoz pou reste egzakteman parey i ete pe vreman anbet zot prop lekor

[Portre lo paz 8]

Eski ou pou form par dan sa lavenir?