Prezerv “en lakord ki’n tres an trwa” dan maryaz

“En lakord ki’n tres an trwa pa fasil pour kas an de.”—EKLE. 4:12.

1. Lekel ki ti ini sa premye koup imen dan maryaz?

APRE kreasyon bann plant ek zannimo, Zeova ti kree sa premye zonm, Adan. Pli tar Bondye ti fer Adan tonm dan en profon sonmey e I ti pran en kot avek li pour kree en madanm konman en led parfe pour li. Ler Adan ti vwar li, i ti dir: “La la anfen lezo sorti dan mon lezo e laser sorti dan mon laser.” (Zen. 1:27; 2:18, 21-23) Zeova ti montre ki i ti satisfe avek sa kreasyon. I ti montre sa par ini sa premye koup imen ansanm dan maryaz e i ti beni zot.—Zen. 1:28; 2:24.

2. Ki mannyer Satan ti senm divizyon ant Adan ek Ev?

² Malerezman pa bokou letan apre, en keksoz ti arive ki ti afekte sa laranzman maryaz ki Bondye ti’n etablir. Ki mannyer? En lanz ki pli tar ti vin move e ganny apele Satan, ti anbet Ev pour fer li manz sa fri lo sa pye dibwa ki Bondye ti defann sa koup manze. Pa bokou letan apre, Adan ti pran kote avek son madanm. Par fer sa an realite zot ti pe rebel kont drwa Bondye pour dirize e rezet son bon gidans. (Zen. 3:1-7) Kan Zeova ti demann zot ki zot ti’n fer, i ti kler ki zot ti pe deza rankontre problenm dan zot maryaz. Adan ti blanm son madanm an dizan: “Sa madanm ki ou’n donn mwan, li ki’n donn mwan fri lo sa pye dibwa e alor mon’n manze.”—Zen. 3:11-13.

3. Ki move pwennvi serten Zwif ti devlope?

³ Depi sa, tou dilon bann syek, Satan in servi en kantite riz pour anmenn diskord dan maryaz. Par egzanp, defwa i’n servi bann sef relizye pour promot bann pwennvi konsernan maryaz ki pa baze lo Labib. Serten sef Zwif ti inyor serten standar Bondye e zot ti permet bann msye pour divorse avek zot madanm pour bann rezon ki pa ti enportan tel parey met tro bokou disel dan manze. Me Zezi ti fer resorti: “Si en zonm i divors son madanm pour okenn rezon, eksepte si i’n tronp li, e i marye avek en lot madanm, i komet adilter.”—Mat. 19:9.

4. Ki mannyer sa laranzman maryaz pe ganny afekte ozordi?

⁴ Satan pe touzour fer tou sa ki i kapab pour kas sa lyen ki egziste dan maryaz. Maryaz ant omoseksyel, bann koup ki viv ansanm san marye ek divors ki dimoun i kapab gannyen fasilman, i montre ki i pe fer sikse dan sa domenn. (Lir Ebre 13:4.) Konman Kretyen, ki nou kapab fer pour evite ganny enfliyanse par sa move pwennvi ki egziste partou lo maryaz? Annou egzamin serten laspe ki fer en maryaz ere e reisi.

Gard Zeova dan nou maryaz

5. An rapor avek maryaz, ki sa lekspresyon “en lakord ki’n tres an trwa” i vedir?

⁵ Pour en maryaz reisi, Zeova i bezwen dan sa relasyon. Son Parol i dir: “En lakord ki’n tres an trwa pa fasil pour kas an de.” (Ekle. 4:12) “En lakord ki’n tres an trwa” i en lekspresyon senbolik. Kan sa legzanp i ganny aplike an rapor avek maryaz, sa msye ek madanm i sa de premye lakord ki’n ganny tres ansanm avek sa lakord prensipal, setadir Zeova. Kan en koup i gard Bondye dan zot maryaz, sa i donn zot lafors spirityel pour fer fas avek problenm e sa i lakle pour eksperyans sa pli gran boner dan maryaz.

6, 7. (a) Ki bann Kretyen i kapab fer pour asire ki Bondye i prezan dan zot maryaz? (b) Kwa ki en ser i pli apresye dan son msye?

⁶ Me ki en koup marye i kapab fer pour fer sir ki zot maryaz i parey sa lakord ki’n tres an  trwa? Psalmis David ti sante: “O mon Bondye, mon’n pran plezir pour fer ou lavolonte, e ou lalwa i o profon dan mwan.” (Ps. 40:8) Pareyman, nou lanmour pour Bondye i pous nou pour servi li avek tou nou leker. Alors, tou le de konzwen i devret devlop en relasyon personnel e entim avek Zeova e pran plezir pour fer son lavolonte. Bann dimoun ki’n marye i devret fer bokou zefor pour ranforsi lanmour zot konzwen pour Bondye.—Prov. 27:17.

⁷ Nou pou demontre bann kalite tel parey lafwa, lesperans ek lanmour si lalwa Bondye i vreman o profon dan nou e sa pou ede ranforsi sa lyen dan maryaz. (1 Kor. 13:13) En Kretyen ki apel Sandra ki’n marye pour 50 an i dir: “Sa ki mon pli apresye dan mon msye i son gidans ek konsey baze lo Labib, ensi ki son lanmour pour Zeova ki pli for ki son lanmour pour mwan.” Zot bann msye, eski pareyman sa parol i kapab aplik pour zot?

8. Ki en koup i bezwen fer pour resevwar “en bon rekonpans” dan maryaz?

⁸ Konman en koup, eski zot relasyon avek Zeova e zot bann aktivite Kretyen i premye dan zot lavi? Deplis, eski ou vreman konsider ou konzwen konman ou konpanyon dan ou servis pour Zeova? (Zen. 2:24) Lerwa Salomon ki ti saz ti ekrir: “De i pli bon ki enn, akoz zot annan en bon rekonpans pour travay dir ki zot in fer.” (Ekle. 4:9) Byensir, en msye ek son madanm i bezwen travay dir pour ganny “en bon rekonpans” setadir en maryaz dirab kot i annan lanmour e ki ganny benediksyon Bondye.

9. (a) Ki responsabilite bann msye i annan? (b) Dapre Kolosyen 3:19, ki mannyer en msye i devret tret son madanm?

⁹ En keksoz ki endike si Bondye i prezan dan en maryaz i sa zefor ki msye ek madanm i fer pour viv an armoni avek Son bann prensip. Bann msye i annan sa responsabilite prensipal pour pran swen avek bezwen materyel e spirityel zot fanmir. (1 Tim. 5:8) Zot osi ganny ankouraze pour pran an konsiderasyon bezwen emosyonnel zot madanm. Kolosyen 3:19 i dir: “Bann mari, kontan zot madanm e pa tret zot dir.” En spesyalis Labib ti eksplike ki sa lekspresyon “tret zot dir” i vedir “dir zot bann parol blesan oubyen bat zot, pa donn zot ni lafeksyon, led, proteksyon e pa ni pran swen avek zot bann bezwen.” I kler ki i pa pou apropriye pour annan en latitid koumsa dan en fanmir Kretyen. En msye ki servi son lotorite avek lanmour i ankouraz son madanm pour anvi soumet avek son lotorite.

10. Ki kalite latitid bann madanm Kretyen i devret demontre?

¹⁰ Bann madanm Kretyen ki fer zefor pour gard Zeova dan zot maryaz i bezwen osi viv an armoni avek prensip Bondye. Zapot Pol ti ekrir: “Bann madanm, zot devre obei zot mari, parey zot obei Senyer. Parski en mari i sef son madanm parey Kris i sef [kongregasyon]. (Efe. 5:22, 23) Satan ti tronp Ev e i ti promot sa mansonz, ki viv san gidans Bondye ti pou anmenn boner dirab. I kler, dan bokou maryaz ozordi nou kapab vwar sa leta lespri pour viv san gidans Bondye. Me pour bann madanm Kretyen i pa en dezonner pour zot soumet avek zot msye ki demontre lanmour. Zot pa bliye ki Zeova ti donn Ev sa privilez pour vin “en led” pour son msye e Bondye ti vreman konsider sa pozisyon konman onorab. (Zen. 2:18) En madanm Kretyen ki volonterman korpere avek sa laranzman i vreman “en kouronn” pour son msye.—Prov. 12:4.

11. Ki konklizyon en frer ti tire lo sa ki’n ed li dan son maryaz?

¹¹ En lot keksoz ki kapab ed bann ki’n marye pour kontinyen gard Bondye dan maryaz, se ki zot bezwen etidye Parol Bondye ansanm. Gerald, ki’n marye pour 55 an i dir: “Lir e etidye Labib ansanm i sa keksoz pli enportan pour fer en maryaz reisi.” I azoute: “Ler bann koup marye i fer keksoz ansanm, sirtou bann keksoz spirityel, sa i fer zot vin pli pros avek kanmarad e avek Zeova.” Etidye Labib ansanm i ed en fanmir gard bann standar Bondye byen antet, i ranforsi zot relasyon avek Li e i ed zot pour kontinyen progrese.

12, 13. (a) Akoz i sitan enportan pour en koup priy ansanm? (b) Ki lezot aktivite spirityel ki kapab fer en maryaz vin pli solid?

 ¹² Bann koup ki ere dan zot maryaz i osi priy ansanm. Ler en msye ‘i devid son leker’ par fer bann demann spesifik ki relye avek zot sityasyon, sa pou sirman fer zot maryaz vin pli solid. (Ps. 62:8) Par egzanp, pa i ti pou pli fasil pour met dekote okenn dezakor ki ou gannyen avek ou konzwen apre ki ansanm zot in enplor sa enn ki Tou Pwisan pour ganny gidans ek direksyon! (Mat. 6:14, 15) An rapor avek sa lapriyer, pa i ti pou byen ki tou le de konzwen i devlop sa determinasyon pour ed kanmarad e pour kontinyen “siport kanmarad, pardonn kanmarad sak fwa ki enn ant zot i ofans en lot.” (Kol. 3:13) Pa bliye ki lapriyer i demontre ki nou depan lo Bondye. Lerwa David ti dir: “Tou lizye i get ou avek lespwar.” (Ps. 145:15) Ler nou tourn ver Zeova avek lespwar, dan lapriyer, nou annan mwens lenkyetid akoz nou konnen ki ‘i pran swen avek nou.’—1 Pyer 5:7.

¹³ En lot fason enportan pour kontinyen enplik Zeova dan en maryaz, i ler zot asiste renyon kongregasyon e travay ansanm dan predikasyon. Dan nou bann renyon, bann koup i aprann ki mannyer pour fer fas avek “bann taktik anba anba” ki Satan pe servi pour diviz bann fanmir. (Efe. 6:11, NW, not anba lo paz.) En msye ek en madanm ki regilyerman pres ansanm i aprann pour “reste ferm e solid.”—1 Kor. 15:58.

Kan i annan difikilte

14. Ki fakter ki kapab kontribye pour anmenn presyon dan maryaz?

¹⁴ Petet i pa fer premye fwa ki ou tann sa bann sizesyon, alors akoz ou pa diskit fransman avek ou konzwen lo la? Esey vwar si i annan lezot domenn kot ou merit fer serten sanzman dan ou maryaz. Me Labib i montre ki menm bann ki gard Bondye dan zot maryaz “pou ganny problenm dan [zot] lavi.” (1 Kor. 7:28) Akoz lenperfeksyon imen, move lenfliyans dan sa move lemonn ek pyez Dyab, i kapab arive ki menm bann serviter Bondye i fer fas avek bokou presyon dan zot maryaz. (2 Kor. 2:11) Me Zeova i kapab ed nou pour fer fas avek bann tel presyon. Wi i posib. Zob en zonm fidel ti perdi son bann zannimo, son bann serviter ek son bann zanfan. Me Labib i dir: “Kantmenm sa, Zob pa ti fer pese oubyen dir nanryen mal lo Bondye.”—Zob 1:13-22.

15. Ki mannyer dimoun i kapab reazir ler zot anba presyon e ki mannyer bann konzwen i kapab fer fas avek bann tel reaksyon?

¹⁵ De lot kote, madanm Zob ti dir avek li: “Eski ou ankor pe reste fidel? Modi Bondye e mor!” (Zob 2:9) Anfet, ler en dimoun i fer fas avek maler oubyen lezot difikilte, bann lenkyetid ki sa i anmennen, i kapab fer zot azir san reflesir. Sa zonm saz ti fer remarke ki “lopresyon i kapab fer ki en dimoun saz i azir parey en dimoun fou.” (Ekle. 7:7) Si ou konzwen i koz avek lakoler e dir bann parol blesan akoz i pe fer fas avek bann difikilte oubyen akoz “lopresyon,” esey reste kalm. Si ou reazir parey li, sa i kapab fer enn ant zot oubyen zot tou le de dir keksoz ki pou fer sityasyon vin pli pir. (Lir Psonm 37:8.) Alors pa pran kont avek okenn “parol” ki en dimoun i kapab dir ler i fristre oubyen dekouraze.—Zob 6:3.

16. (a) Ki mannyer sa parol ki Zezi ti dir dan Matye 7:1-5 i aplik avek maryaz? (b) Akoz i telman enportan pour annan en bon balans dan maryaz?

¹⁶ Bann koup marye i bezwen annan en pwennvi balanse lo sa ki zot ekspekte avek kanmarad. En konzwen i kapab remark serten manni ki lot i annan e mazinen: ‘Mon kapab sanz li.’ Avek lanmour ek pasyans petet ou kapab ed ou konzwen pour amelyore gradyelman. Me pa bliye ki Zezi ti konpar en dimoun ki tir lizye lo bann pti defo ki lezot i annan konman en dimoun ki vwar “lapay” dan lizye son frer me ki pa remark sa “poto” dan son prop lizye. Zezi ti donn nou sa lankourazman: “Pa zize e ou pa ava ganny zize.” (Lir Matye 7:1-5.) Sa pa vedir ki bann koup i devret inyor bann gro defo ki zot annan. Robert ki’n marye pour apepre 40 an ti dir: “Lefet ki bann koup i koz fran e answit pare pour aksepte bann remark valab lo sa ki zot in obzerve lo kanmarad, zot pou bezwen  petet fer serten sanzman dan zot latitid.” Alor zot bezwen annan balans. Olye dezapwente, akoz ou pa trouv sa bann kalite ki ou ti a voudre ou konzwen i annan, plito esey aprann apresye e trouv lazwa dan bann bon kalite ki ou msye oubyen madanm i annan la konmela.—Ekle. 9:9.

17, 18. Ler problenm i ogmante, kote ou kapab rod led?

¹⁷ Ler sirkonstans dan lavi en dimoun i sanze, sa i kapab anmenn bann leprev. En koup i kapab rankontre problenm ler zot annan zanfan. En konzwen oubyen en zanfan i kapab tonm gravman malad. Bann paran aze i kapab bezwen latansyon spesyal. Bann zanfan ki’n vin adilt i kapab kit lakour pour al reste pli lwen. Lezot sanzman i kapab arive ler en dimoun pe desarz bann responsabilite ek privilez dan kongregasyon. Tou sa bann sanzman i kapab anmenn serten presyon ek lenkyetid dan en relasyon.

¹⁸ Si sa presyon dan ou maryaz i fer ou santi ki ou nepli kapab kontinyen, ki ou kapab fer? (Prov. 24:10) Pa dekouraze! Napa keksoz ki ti pou fer Satan pli kontan ki vwar en serviter Bondye abandonn sa vre ladorasyon. I ti pou pli kontan ankor si en koup ki fer sa. Alors, fer tou sa ki ou kapab pour fer sir ki ou maryaz i reste parey en lakord ki’n tres an trwa. Dan Labib i annan bokou resi konsernan bann ki’n reste fidel malgre bann gro leprev. Par egzanp, en fwa David ti devid son leker avek Zeova, an dizan: “Demontre faver anver mwan, O Bondye, akoz zonm . . . pe kontinyen fer mwan soufer.” (Ps. 56:1) Eski okenn “zonm” in deza fer ou soufer? Ki swa en dimoun ki ou pa pros avek oubyen enn ki ou pros avek pe met ou anba presyon, pa bliye ki David ti ganny lafors pour andire alors ou osi ou kapab. David ti dir: “Mon’n priy Zeova e i’n reponn mwan, i’n delivre mwan kont tou mon bann lafreyer.”—Ps. 34:4.

Lezot benediksyon

19. Ki mannyer nou kapab evite ki latak Satan i fer nou ditor?

¹⁹ Dan sa letan lafen, bann dimoun ki’n marye i bezwen kontinyen “ankouraz e fortifye kanmarad.” (1 Tesa. 5:11) Pa bliye ki Satan i touzour ensiste lo sa lide ki nou fidelite anver Zeova i baze lo bann dezir egois. I pou servi  nenport kwa ki i kapab, enkli kas en maryaz pour fer nou kas nou fidelite avek Bondye. Pour nou protez nou kont bann latak Satan, nou bezwen met tou nou konfyans dan Zeova. (Prov. 3:5, 6) Pol ti ekrir: “Mon kapab fer fas avek tou par Kris ki donn mwan lafors.”—Fili. 4:13.

20. Ki benediksyon nou gannyen ler Bondye i prezan dan nou maryaz?

²⁰ Nou ganny bokou benediksyon kan Bondye i dan nou maryaz. Sa in vin vre pour Joel ek son madanm ki annan 51 an. I ti dir: “Mon toultan remersye Zeova pour sa kalite madanm ki mon annan e lefet ki nou ere dan nou relasyon maryaz. I sa konzwen ideal.” Ki zot sekre? “Nou touzour fer bokou zefor pour demontre labonte, pasyans ek lanmour anver kanmarad.” Napa personn parmi nou ki pou kapab fer tousala dan en fason parfe dan sa sistenm. Malgre sa, annou travay dir pour aplik bann pren­sip Labib e donn Zeova en plas dan nou maryaz. Si nou fer sa, alors nou maryaz pou parey en “lakord ki’n tres an trwa [ki] pa fasil pour kas an de.”—Ekle. 4:12.

Eski ou rapel?

• Ki sa i vedir ler Zeova i dan en maryaz?

• Ki bann koup marye i devret fer ler i annan problenm dan maryaz?

• Ki mannyer nou konnen ki Bondye i dan en maryaz?

[Kestyon]

[Portre lo paz 23]

Lapriyer ki bann koup marye i fer ansanm i kapab ed zot pour fer fas avek bann sityasyon difisil