Eski ou konn ou Papa ki dan lesyel?
Eski ou konn ou Papa ki dan lesyel?
KI KANTITE ou konn ou papa? Sa kestyon i kapab paret en pe drol si ou’n grandi dan en fanmir kot i annan en bon latmosfer familyal ranpli avek lanmour. Petet ou kapab reponn: ‘Byensir, mon konn li byen!’ I vre ki laplipar dimoun i konn sa ki zot papa i kontan oubyen pa kontan, fason ki i reazir dan en serten sityasyon e konman i pran swen avek son fanmir.
Parkont, i kapab annan bann moman kot ou ti sirprann pour vwar ou papa reazir dan en fason ki ou pa ti pe ekspekte. Par egzanp, en garson i kapab konn son papa konman en dimoun kalm e dous, ziska sa zour kot i bezwen fer fas avek en ka irzan. En sel kou i vwar son papa azir avek en gran determinasyon pour protez son fanmir.
Me ki kantite ou konn nou Kreater? Konsernan li Labib i dir: “Atraver li nou ganny lavi, nou kapab mouvmante e nou egziste.” (Akt 17:28) Vi ki Bondye ki’n donn nou lavi, sa i vedir ki i Papa tou kreatir vivan. (Izai 64:8) Petet ou osi ou santi parey anver Bondye e sa i byen parski koumsa menm ki nou devret santi anver li. Parkont i annan bokou plis ankor ki nou devret konnen e aprann lo li. Sa pou anmenn byenfe ek satisfaksyon.
Lafason ki ou santi anver ou papa e respe ki ou annan pour li i tou depan lo ki kantite ki ou konn li. Pareyman pli ou konn Bondye pli ou pou vin pli pros avek li. Bondye i kapab ed ou fer fas avek bann leprev ek difikilte dan lavi tou le zour si ou aprann konn li byen e fer son lavolonte.
Ki kalite personnalite Bondye i annan? Ki mannyer son bann kalite i kapab annan en lefe lo ou santiman anver li? Kan ou pe aprann konn li, eski sa i enplik serten responsabilite? Ou pou trouv larepons sa bann kestyon dan sa lartik swivan.
[Pwen adisyonnel]
Ou santiman pour lezot i kapab ganny enfliyanse par ki kantite ou konn zot