Ki mannyer nou Papa dan lesyel i vreman ete?

BOKOU dimoun i kapab resit sa lapriyer Notreper par ker. Sa i model lapriyer ki Zezi ti ansenny son bann disip. (Matye 6:9-13) Sak fwa ki zot resit sa lapriyer, zot apel Bondye “Nou Papa.” Alor, ki kantite dimoun ki kapab dir ki i konn li byen?

Me ou? Ki kantite ki ou konn Bondye? Eski ou annan en relasyon pros avek li? Eski ou koz avek li e partaz ou bann moman lazwa ek latristes avek li? Ki i vreman vedir konn Bondye?

“Son non i Zeova”

I kapab ki sa sel keksoz ki en pti zanfan i konnen lo son papa i sa pti non, ‘dadi’. Parkont, anmezir ki i grandi, i arive konn non son papa ek repitasyon ki i annan. I tre probab ki sa i fer li fyer. Me ki nou pou dir konsernan sa Enn ki’n donn nou lavi? Eski ou konn son non e sa ki son non i vedir?

Menm si bokou dimoun i mansyonn sa lekspresyon “Ki ou non sen i ganny glorifye” ler zot pe resit sa lapriyer Notreper, zot kapab pa konn larepons kan zot ganny demande: “Lekel sa non?” En lesyel ranpli avek zetwal, en zoli montanny, en laliny koray byen kolore ranpli avek bann kreatir, tousala i levidans ki Bondye i egziste. Me parkont, zot pa kapab fer nou konn son non. Pour konn sa non, nou bezwen egzamin Labib. Labib i dir klerman: “I apel Zeova.”—Egzod 15:3.

Bondye i anvi ki nou konn li par son non, Zeova. Akoz? Akoz son non i reprezant sa personnaz ki i ete. Sa non i vedir “I fer arive.” Setadir, i vin nenport kwa ki neseser pour li kapab akonpli son plan. Mazin li koumsa: Pour ki en papa i kapab pran swen avek bezwen son fanmir i bezwen travay, vin en konseye, en ziz, en medyater, en protekter e en ansennyan. Sa i tou depan lo bezwen ek sirkonstans sa fanmir. Dan sa menm fason, sa non Zeova i donn nou sa lasirans ki nenport kwa ki kapab arive dan lavenir, Bondye pou akonpli son lavolonte ki pou anmenn benediksyon pour tou bann ki servi li.

Annou egzamin sa bann diferan rol ki nou Bondye ranpli avek lanmour i annan an rapor avek sa ki son non i vedir. Sa pou ed ou apresye ki kalite Bondye Zeova i ete e ou pou konnen ki ou pou bezwen fer pour vin pros avek li.

“En Bondye lanmour ek lape”

Zapot Pol ti apel nou Kreater “Bondye lanmour ek lape.” (2 Korentyen 13:11) Akoz? Pli boner Zezi Kri ti’n dir: “Bondye in telman kontan lemonn ki i’n donn son sel Garson, pour ki nenport ki, ki krwar dan li, pa pou mor, me i a ganny lavi eternel.” (Zan 3:16) Parski i’n telman kontan bann imen, Bondye in donn son sel Garson konman en sakrifis, ki fer li posib pour bann ki krwar dan li pou ganny lavi eternel kot pou nepli annan douler ek soufrans ki pese i anmennen. Se pour sa rezon alors Pol ti dir: “Rekonpans pour pese i lanmor, me don gratwit ki Bondye i donnen i lavi eternel dan Kris-Zezi nou Senyer.” (Romen 6:23) Eski pa sa i devret pous nou pour kontan Bondye e vin pros avek li?

Bondye i eksprim son lanmour pa zis pour limanite an zeneral me osi pour sak endividi  ki fidel. Avek bann Izraelit ki detanzaot ti pe rebel, Moiz ti dir: “Eski avek Zeova ki zot pe kontinyen azir dan sa fason, O pep bet e ki mank lasazes? Eski pa li menm li zot Papa ki’n donn zot lavi, li ki’n fer zot e ki’n donn zot stabilite?” (Deterononm 32:6) Eski ou konpran ki sa i vedir? Parey en Papa ranpli avek lanmour, Zeova ti pran swen avek son pep kantmenm i ti okouran zot febles. I ti donn zot, zot bann bezwen materyel ek emosyonnel ki zot ti vreman bezwen. I ti osi donn zot bann keksoz ki ti neseser pour gard en bon relasyon avek li.

Nou tou nou eksperyans bann sanzman dan lavi e an rezilta sa, parfwa nou enkyet e menm dekouraze. Nou bezwen en dimoun pour ed nou pour aziste nou fason panse konsernan nou sityasyon ek nou bann problenm. Lekel ki kapab ed nou? Atraver son Parol Labib, Zeova i montre ki i en Konseye e i sa Enn ki pran swen avek nou. Sa Liv Sakre i eksplike akoz nou pe eksperyans en kantite soufrans e ki mannyer nou kapab reisi fer fas avek soufrans. Zis parey en papa ranpli avek lanmour i pran swen avek son garson ki’n tonbe e ganny dimal, Zeova i demontre son gran lanmour pour nou par donn nou sa led ki nou bezwen. Zeova i definitivman anvi e i kapab ed bann ki annan lafwa dan li.—Izai 59:1.

Lanmour ki Bondye i annan pour nou i ganny demontre par lefet ki i “ekout lapriyer.” (Psonm 65:2) Lefet ki i ekout nou lapriyer, ki mannyer sa i montre ki i kontan nou? Zapot Pol i eksplike: “Pa bezwen enkyet pour nanryen, me dan tou sirkonstans par lapriyer ek siplikasyon demann Bondye tou sa ki zot bezwen avek en leker rekonnesan. Ki lape Bondye ki depas tou konpreansyon imen i ava gard zot leker ek zot lespri dan Kris-Zezi.” (Filipyen 4:6, 7) Si ou senserman apros Bondye dan lapriyer e swiv son gidans ki trouve dan son Parol, ou pou kapab eksperyans “lape Bondye ki depas tou konpreansyon imen.”

“En Bondye ki konn tou”

Dan Labib, Zeova i ganny dekrir konman sa enn ki annan en “konnesans parfe.” Konman “en Bondye ki konn tou” i konpran bann imen e i konn bezwen bann imen pli byen ki okenn lezot dimoun. (Zob 36:4; 1 Samyel 2:3) I ti fer konnen atraver son serviter Moiz ki “zonm pa viv zis lo dipen tousel me lo tou parol ki sorti dan labous Zeova.” (Deterononm 8:3; Matye 4:4) Sa i vedir ki pour ganny sa vre satisfaksyon dan lavi, nou bezwen plis ki zis bann keksoz materyel.

Nou Kreater i donn nou bon gidans ek konsey dan son Parol Labib. Kan nou etidye Labib e aplik son konsey dan nou lavi, nou tir bokou byenfe atraver “tou parol ki sorti dan labous Zeova.” Par egzanp, Zuzanna, en ser Kretyen ti dir konsernan son lavi fanmir: “Kan nou lir Labib ansanm, asiste renyon ansanm e koz avek lezot konsernan nou krwayans, sa in fer nou relasyon maryaz vin pli for. Gras a gidans sorti kot Bondye, nou annan menm bi dan lavi e nou relasyon i pli solid.”

Ki mannyer ou kapab tir byenfe dan konsey ek gidans ki Bondye i fourni? Kan ou etidye Labib regilyerman e aplik sa bann konsey ki trouve ladan, ou pou kapab ganny bokou benediksyon sorti kot li.—Ebre 12:9.

En “Bondye delivrans”

Sa lemonn ozordi i ranpli avek konfli. Nou pa konnen ki pou arive dan lavenir. Si ou viv dan en pei kot i annan lager, i kapab ki ou ti a kontan trouv lape. Dan plizyer parti lemonn, dimoun i viv dan lafreyer akoz krim, vyolans, problenm ekonomik ek menas teroris. Lekel ki pou sov nou dan tousala? Ozordi, plis ki  zanmen oparavan imen i bezwen proteksyon ek delivrans.

Labib i dir ki: “Non Zeova i en latour for. Bann dimoun drwat i tay ladan e zot ganny proteksyon.” (Proverb 18:10) Kan nou konn non Bondye e nou met nou konfyans dan li, sa i kapab fer nou mazin sa ki i’n fer e ki i pou fer pour delivre bann ki demontre lafwa dan li. Zeova in san dout prouve ki i kapab delivre son pep. Par egzanp, i ti sov pep Izrael par detrir bann saret lager ek lafors militer Faraon. Zeova in prouve ki i en Bondye fidel, sa Bondye ki pa oubliy bann ki soufer e i annan sa dezir pour azir dan zot faver.—Egzod 15:1-4.

Nou lavenir i osi depan lo si nou annan lafwa dan Zeova konman nou Sover. Dan ansyen Izrael, Lerwa David ki ti bezwen fer fas avek plizyer difikilte, ti demontre sa kalite lafwa parski i ti ekrir konsernan Zeova: “Ou mon Bondye delivrans.” (Psonm 25:5) Avek konfyans zapot Pyer ti dir: “Bondye i konnen ki mannyer i pou delivre bann dimoun ki atase avek li dan difikilte.”—2 Pyer 2:9.

Konsernan en dimoun ki tourn ver li pour ganny led, Bondye in promet: “Mon pou protez li parski i’n arive konn mon non.” (Psonm 91:14) Dan ka bann serviter Bondye ozordi, sa promes in vin vre. An Lapolonny, Henryk in servi Zeova fidelman malgre difikilte ek persekisyon pour 70 an. Kan Henryk ti annan zis 16 an, son papa ti ganny mete dan kan konsantrasyon Auschwitz. Henryk ek son gran frer ti ganny anmennen dan en landrwa kot bann Nazi ti esey enfliyans bann zenn. Apre sa, i ti ganny mete dan diferan kan konsantrasyon, sorti dan enn pour al dan en lot. Kan Henryk i mazin sa bann moman, i dir: “Dan tou mon bann sityasyon difisil, Zeova pa’n zanmen abandonn mwan. I’n toultan ed mwan pour reste fidel avek li, menm si plizyer fwa mon ti pros pour perdi lavi.” Wi, Zeova i donn son bann serviter lafwa ek lafors pour andire.

Byento, Bondye pou sov tou dimoun ki demontre lafwa dan li e ki met konfyans dan li pour ganny delivrans. I dir: “Mwan, mon Zeova e napa okenn sover apard mwan.” (Izai 43:11) Kan “sa gran zour Bondye Toupisan pou arive,” i pou detrir bann move dimoun lo later e delivre bann ki drwat. (Revelasyon 16:14, 16; Proverb 2:21, 22) Zeova i donn nou sa lasirans: “Bann dimoun ki annan limilite pou posed later, e zot pou sirman trouv bokou plezir dan labondans lape.”—Psonm 37:11.

Vin bann “zanfan Bondye”

Dan letan profet Malaki, bann Izraelit ti swadizan dir ki Zeova i zot Papa. Me, kan ti lemoman pour demontre loner ek devosyon anver li, zot ti ofer sakrifis dipen ki ti’n ganny polye ek bann zannimo ki ti aveg e bwate. Se pour sa rezon ki Zeova ti demann zot: “Si mon en papa, oli sa loner ki mon merite?”—Malaki 1:6.

Pa bezwen fer sa menm fot parey sa bann Izraelit ki ti enfidel. O kontrer, nou ankouraz ou pour aprann konn Zeova e vin pros avek li.  Disip Zak i ankouraz nou pour “apros avek Bondye, e i ava apros avek zot.”—Zak 4:8.

Pour annan Zeova konman nou Papa, sa i met serten responsabilite lo nou. Si ou fer zefor pour donn loner Bondye par fidelman gard son bann standar dan tou laspe ou lavi, i pa pou zanmen oubliy ou zefor. O kontrer, i pou ed ou mars dan sa semen drwat ki anmenn ver sa nouvo lemonn ki i’n promet kot “lanmor pou nepli egziste. Pou nepli annan ni dey, ni plere, ni soufrans.” (Revelasyon 21:4) Dan sa letan, tou bann imen obeisan “pou ganny libere . . . avek pouvwar destrikter ki pe gard [zot] dan lesklavaz, pour partisip dan laliberte ek laglwar bann zanfan Bondye.”—Romen 8:21.

[Pwen adisyonnel]

Bondye i anvi ki nou konn li par son non, Zeova, ki vedir “I fer arive”

[Pwen adisyonnel]

“Dan tou mon bann sityasyon difisil, Zeova pa’n zanmen abandonn mwan.”—HENRYK

[Pwen adisyonnel]

“Kan nou lir Labib ansanm, asiste renyon ansanm e koz avek lezot konsernan nou krwayans, sa in fer nou relasyon maryaz vin pli for.”—ZUZANNA