Ki ou pou donnen an retour pour ganny lavi eternel?

“Ki [en dimoun] i kapab donnen an retour pour son lavi?”—MAT. 16:26.

1. Akoz Zezi ti reazir dan sa fason anver parol Pyer?

ZAPOT Pyer pa ti oule krwar sa ki i ti’n tande. Zezi Kri, son Sef ki i kontan ti pe dir “klerman” ki byento I ti pou soufer e mor! Petet avek en bon lentansyon, Pyer ti reprimann Zezi par dir: “Zanmen Senyer! Sa pa pou zanmen ariv ou.” Zezi ti vir son ledo avek Pyer e i ti get lezot disip. Petet zot osi zot ti annan sa menm move pwennvi avek Pyer. Apre sa i ti dir Pyer: “Ale! Sorti la Satan! Ou en ros dan mon semen, ou pa mazin parey Bondye me konman zonm.”—Mark 8:32, 33; Mat. 16:21-23.

2. Ki mannyer Zezi ti dekrir sa ki i ti ekspekte avek en vre disip?

² Sa parol ki Zezi ti dir answit ti’n kapab ed Pyer pour vwar rezon akoz Zezi ti reprimann li severman. “Zezi ti apel lafoul ek son bann disip e i ti dir zot, ‘Si en dimoun i oule swiv mwan, i bezwen aret mazin son lekor, i bezwen pran son [“poto martir,” NW] e swiv mwan. Tou dimoun ki anvi sov son lavi pou perdi li, me sa ki perdi son lavi pour mwan e pour Bonn Nouvel i pou sov li.’” (Mark 8:34, 35) I kler ki Zezi pa ti pe zis al sakrifye son lavi, i ti osi ekspekte ki bann ki swiv li osi i devret pare pour sakrifye zot lavi dan servis pour Bondye. Si zot ti fer li zot ti pou ganny en gran rekonpans.—Lir Matye 16:27.

3. (a) Ki kestyon Zezi ti demann son lodyans? (b) Sa dezyenm kestyon Zezi ti’n kapab fer son lodyans rapel kwa?

³ Pandan sa menm lokazyon, Zezi ti demann de kestyon ki fer reflesir: “Ki profi i annan pour en zonm ganny lemonn antye si i perdi son lavi?” e “Ki en zonm i kapab donnen an retour pour son lavi?” (Mark 8:36, 37) Dapre pwennvi en imen, larepons pour sa  premye kestyon i evidan. I napa okenn profi pour en dimoun si i ganny lemonn antye me i perdi son lavi. En dimoun i selman kapab benefisye avek son bann posesyon materyel letan i ankor vivan. Sa dezyenm kestyon Zezi: “Ki en zonm i kapab donnen an retour pour son lavi?” ti’n kapab fer son lodyans rapel sa lakizasyon ki Satan ti fer dan letan Zob: “Tou sa ki en zonm i annan i pou donnen pour son lavi.” (Zob 2:4) Sa parol i kapab vre pour serten dimoun ki pa ador Zeova. I annan bokou dimoun ki pou fer nenport kwa, menm rezet nenport ki prensip zis pour zot reste vivan, me tandis ki bann Kretyen zot zot vwar keksoz dan en lot fason.

4. Akoz sa bann kestyon ki Zezi ti demande i annan en pli gran sinifikasyon pour bann Kretyen?

⁴ Sirman nou konnen ki Zezi pa ti vin lo later pour li donn nou lasante, larises ek en lavi pli long dan sa lemonn. I ti vini pour donn nou sa loportinite pour viv pour touzour dan en nouvo lemonn e sa lespwar pour ganny lavi eternel, sa i en keksoz ki vreman presye pour nou. (Zan 3:16) En Kretyen ti pou konpran sa premye kestyon Zezi koumsa: “Ki profi i annan pour en zonm ganny lemonn antye si i perdi son lespwar pour ganny lavi eternel?” Larepons i ki pou napa okenn profi. (1 Zan 2:15-17) Pour ed nou reponn sa dezyenm kestyon ki Zezi ti demande i pou byen si nou demann nou lekor, ‘Ki kantite sakrifis mon pare pour fer la konmela pour ki mon lespwar pour ganny lavi dan nouvo lemonn i asire?’ Nou larepons pour sa kestyon, ki evidan dan nou fason viv i montre ki kantite gran nou lespwar i ete dan nou leker.—Konpar Zan 12:25.

5. Ki mannyer nou kapab ganny lavi eternel?

⁵ Byensir, Zezi pa ti pe dir ki nou kapab otomatikman ganny lavi eternel. Lavi i en kado menm si i kourt dan sa lemonn konmela. Nou pa kapab aste li oubyen fer okenn keksoz pour dir ki nou merite ganny li. Sel fason nou kapab ganny lavi eternel i si nou met nou “lafwa dan Kris Zezi” e dan Zeova sa enn “ki rekonpans tou bann ki rod li.” (Gal. 2:16; Ebr. 11:6) Toudmenm, nou lafwa i devret ganny demontre par aksyon vi ki “lafwa san bann laksyon i mor.” (Zak 2:26) Alor, kan nou medit ankor en pe plis lo kestyon Zezi, i pou byen pour nou reflesir seryezman lo ki kantite nou pare pour donn sa lemonn e ki nou pare pour donnen dan servis pour Zeova pour montre ki nou lafwa i vreman vivan.

“Kris li pa ti esey rod sa ki ti fer li plezir”

6. Ki Zezi ti met konman priyorite?

⁶ Dan son letan, olye konsantre lo sa ki lemonn ti annan pour ofer, Zezi ti konsantre lo bann keksoz enportan e reziste sa tantasyon pour ganny bann keksoz materyel ki ti kapab fer son lavi pli konfortab. I ti viv en lavi sakri fis e i ti obeir tou sa ki Bondye ti dir li. Olye fer plezir son lekor, i ti dir: “Mon touzour fer sa ki fer [Bondye] plezir.” (Zan 8:29) Ki kantite Zezi ti pare pour fer pour fer plezir Bondye?

7, 8. (a) Ki sakrifis Zezi ti fer e ki mannyer i ti ganny rekonpanse? (b) Ki kestyon nou devret demann nou lekor?

⁷ En fwa, Zezi ti dir son bann disip: “Fis-de-Lonm pa’n vin pour ganny servi, me pour servi e donn son lavi konman pri pour liberasyon bokou dimoun.” (Mat. 20:28) Pli boner kan Zezi ti konmans averti son disip ki byento i ti pou bezwen “donn son lavi,” Pyer ti dir li ki i pa ti neseser pour li mor. Kantmenm sa, Zezi ti tenir ferm. Konman en imen parfe i ti volonterman donn son lavi pour bann imen. Lefet ki i pa ti viv en lavi egois, sa ti fer ki son lavenir ti enn ki ti asire. I ti ganny resisite e “ganny plase adrwat Bondye.” (Akt 2:32, 33) E se pour sa rezon ki i’n vin en legzanp merveye pour nou.

⁸ Zapot Pol ti konsey bann Kretyen Ronm pour zot “pa rod [zot] prop plezir” e i ti rapel zot ki “Kris li pa ti esey rod sa ki ti fer li plezir.” (Rom. 15:1-3) Alor, ziska ki degre nou pare pour aplik konsey sa zapot e ki kantite nou pare pour sakrifye pour imit Kris?

Zeova i anvi nou donn li nou meyer

9. An realite, ki en Kretyen i fer kan i dedye son lavi avek Bondye?

⁹ Dan ansyen Izrael, Lalwa Moiz ti endik klerman ki bann lesklav Ebre ti devret ganny large swa apre ki zot ti’n servi zot met pour set an ouswa pandan lannen Zibile. Parkont zot ti annan en lot swa. Si en lesklav ti kontan son met, i ti kapab swazir pour reste en lesklav kot lakour son met tou son lavi. (Lir Deterononm 15:12, 16, 17.) Nou osi nou fer en swa parey kan nou dedye nou lavi avek Bondye. Volonterman nou dakor pour fer son lavolonte e non pa sa ki nou anvi. Kan nou fer sa, nou montre ki nou annan en gran lanmour pour Zeova e en gran dezir pour servi li pour touzour.

10. Dan ki fason Bondye i vin nou Met e ki mannyer sa i devret annan en lefe lo nou fason panse ek aksyon?

¹⁰ Si ou pe etidye Labib avek Temwen ­Zeova, partisip dan predikasyon sa bon nouvel e asiste bann renyon Kretyen, nou felisit ou. Nou swete ki byento ou pou santi ou ­motive pour dedye ou lavi avek Zeova e dir sa menm parol ki sa Etyopyen ti dir avek Filip: “Napa okenn rezon ki anpes mwan ganny ­batize.” (Akt 8:35, 36) Ou relasyon avek ­Bondye pou parey avek sa ki pour sa bann Kretyen ki Pol ti ekrir: “Zot pa pour zotmenm; parski zot in ganny aste pour en pri.” (1 Kor. 6:19, 20) Ki swa nou annan lespwar pour viv dan lesyel oubyen lo later, si nou’n dedye nou lavi avek Zeova, i vin nou Met. Pa i enportan alor ki nou aret satisfer nou dezir egois e “pa . . . les [nou] vin lesklav zonm”! (1 Kor. 7:23) Pa i en gran privilez pour vin en serviter ki fidel avek Zeova e les Li servi nou lafason i ti a voudre!

11. Ki sakrifis bann Kretyen i ganny ankouraze pour ofer e ki sa i vreman vedir parey bann sakrifis anba Lalwa Moiz i montre?

¹¹ Pol ti konsey son bann frer ek ser Kretyen: “Ofer zot lekor konman en sakrifis vivan, sen e agreab devan Bondye, [“setadir en servis sakre avek zot abilite pour rezonnen,”NW].” (Rom. 12:1) Sa bann parol ti’n kapab rapel bann Kretyen Zwif bann sakrifis ki ti form parti zot ladorasyon avan ki zot ti vin bann disip Zezi. Zot ti konnen ki anba Lalwa Moiz, bann zannimo ki ti ganny ofer lo lotel Zeova ti devret bann pli meyer zannimo ki ti disponib. En zannimo ki ti annan serten defo pa ti akseptab. (Mal. 1:8, 13) I parey kan nou ofer nou lekor konman “en sakrifis vivan.” Nou donn Zeova tou nou meyer e non pa sa ki reste apre ki nou’n satisfer tou nou dezir personnel. Kan nou dedye nou lavi avek Zeova, nou donn li nou “lavi” san rezerv enkli nou lafors, posesyon materyel e finansyel, ensi ki nou abilite. (Kol. 3:23) Ki mannyer nou aplik sa dan nou lavi?

 Servi byen ou letan

12, 13. Nonm en fason nou kapab donn Zeova nou meyer.

¹² En fason nou kapab donn Zeova nou meyer i kan nou servi byen nou letan. (Lir Efezyen 5:15, 16.) Pour fer sa nou bezwen annan kontrol lo nou lekor. Lenfliyans sa lemonn ensi ki lenperfeksyon ki nou’n erite i kapab enfliyans nou pour mal servi nou letan, petet zis dan lanmizman ouswa pour bann benefis personnel. I vre “pour tou keksoz i annan en letan fikse” e sa i enkli bann moman pour detann ensi ki nou travay ki ed nou akonplir nou lobligasyon konman en Kretyen. (Ekle. 3:1) Me en Kretyen ki’n dedye son lavi avek Bondye i devret reste ekilibre e servi byen son letan.

¹³ Kan Pol ti vizit Atenn, i ti remarke ki bann “Atenyen ek bann etranze ki ti viv parmi zot ti pas zot letan zis pour rakont bann dernyen nouvel e ekout lezot rakonte.” (Akt 17:21) Parey sa bann Atenyen, bokou dimoun ozordi i gaspiy zot letan. Bann distraksyon denozour i enplik get televizyon, zwe bann zwe video e Internet. Deplizanpli i annan plis keksoz ki distrer nou e zot fer nou gaspiy nou letan. Si nou les zot domin nou, nou pou kapab vwar nou pe negliz bann bezwen spirityel. I kapab ki nou pou menm krwar nou tro okipe pour fer bann keksoz “ki pli enportan,” ki relye avek servis ki nou ofer Zeova.—Fili. 1:9, 10 NW.

14. Ki kestyon nou merit seryezman reflesir lo la?

¹⁴ Konman en Kretyen ki’n dedye son lavi avek Zeova demann ou lekor, ‘Eski mon progranm tou le zour i enplik letan pour lir Labib, meditasyon ek lapriyer?’ (Ps. 77:12; 119:97; 1 Tesa. 5:17) ‘Eski mon met letan dekote pour prepar mon bann renyon? Eski mon ankouraz lezot par fer komanter pandan renyon?’ (Ps. 122:1; Ebr. 2:12) Parol Bondye i dir ki Pol ek Barnabas ti “pas en bon pe letan pour koz avek lardyes par pouvwar Zeova.” (Akt 14:3, NW) Eski ou kapab aziste ou progranm pour ki ou ava pas plis oubyen “en bon pe letan” dan predikasyon, petet menm pran servis pionye?—Lir Ebre 13:15.

15. Ki mannyer bann ansyen i servi byen zot letan?

¹⁵ Kan zapot Pol ek Barnabas ti al vizit kongregasyon Antyos “zot ti reste la avek bann krwayan ase lontan” pour zot kapab ankouraz sa bann krwayan. (Akt 14:28) Denozour osi, bann ansyen i pare pour servi zot letan pour fortifye lezot. Apard predikasyon, bann ansyen i travay dir pour pran swen avek kongregasyon, zot al rod bann ki’n perdi, ed bann ki malad e desarz bokou lezot responsabilite dan kongregasyon. Si ou en frer ki’n batize, eski ou sirkonstans i permet ou pour fer zefor pour kalifye pour ganny sa bann kalite responsabilite?

16. Nonm serten fason nou kapab “fer dibyen . . . nou bann frer dan lafwa.”

¹⁶ I annan bokou ki’n ganny lazwa kan zot in ed bann ki’n ganny afekte swa par dezas natirel ouswa dezas koze par zonm. Par egzanp, en ser ki’n marye, ki annan anviron 65 an e ki servi dan Betel ti vwayaz en gran zistans pour ede volonterman konman en travayer sekour dan plizyer lokazyon. Akoz i ti servi son letan  vakans dan sa fason? I dir: “Menm si mon napa okenn abilite spesyal, i ti en privilez pour mwan fer nenport kwa ki ti devret ganny fer. Mon ti ganny bokou lankourazman kan mon ti vwar lafwa for ki mon bann frer ek ser ki ti’n perdi bokou keksoz materyel ti annan.” I annan bokou dimoun atraver lemonn ki ede pour konstrir bann Lasal Rwayonm ek Lasal Lasanble. Ler nou partisip dan sa bann aktivite, nou pe “fer dibyen . . . nou bann frer dan lafwa” dan en fason zenere.—Gal. 6:10.

“Mon avek zot toulezour”

17. Personnelman, ki ou pou donnen an retour pour ganny lavi eternel?

¹⁷ Sa sosyete imen ki elwannyen avek Bondye i pros pour ganny detrir. Nou pa konnen kan sa pou arive egzakteman. Kantmenm sa, nou konnen ki “letan i kourt” e ki “senn sa lemonn pe sanze.” (Lir 1 Korentyen 7:29-31, NW.) Kan nou konn sa, sa i fer sa kestyon ki Zezi ti demande annan plis sans: “Ki [en dimoun] i kapab donnen an retour pour son lavi?” Sirman nou pou fer nenport sakrifis ki Zeova i demann nou pour ki nou ganny sa “vre lavi.” (1 Tim. 6:19) I vreman enportan ki nou pran aker parol Zezi pour kontinyen ‘swiv li’ e pour “rod plito Rwayonm Bondye.”—Mat. 6:31-33; 24:13.

18. Ki konfyans nou kapab annan e akoz?

¹⁸ Nou kapab dakor ki i pa touzour fasil pour swiv Zezi e zis parey i ti averti, serten in perdi zot lavi dan sa lemonn. Kantmenm sa, nou swiv legzanp Zezi e evite dir ki nanryen mal pa pou zanmen ariv nou ler nou servi Bondye. Nou annan lafwa dan sa parol ki i ti dir avek son bann disip dan premye syek: “Mon avek zot toulezour, ziska lafen [oubyen “konklizyon sa sistenm,” NW]. (Mat. 28:20) Alor annou servi plennman nou letan ek abilite dan servis sakre. Anmezir ki nou fer sa, nou montre ki nou annan konfyans ki Zeova pou prezerv nou kan sa gran ladetres i vini oubyen redonn nou lavi dan nouvo lemonn. (Ebr. 6:10) Dan sa fason nou pou’n montre ki lavi i annan en gran valer pour nou.

Ki ou pou reponn?

• Ki mannyer Zezi ti vreman montre ki i ti pare pour servi Bondye ek imen?

• Akoz en dimoun i devret aret mazin son lekor e ki mannyer i kapab fer sa?

• Dan ansyen Izrael, ki kalite sakrifis Zeova ti aksepte e ki mannyer sa i donn nou gidans ozordi?

• Nonm serten fason nou kapab servi nou letan avek lasazes.

[Kestyon]

[Portre lo paz 26]

Zezi ti touzour fer sa ki fer plezir Bondye

[Portre lo paz 28]

Bann Izraelit ki ti rekonesan ti donn zot meyer pour siport vre ladorasyon

[Portre lo paz 29]

Nou fer Bondye plezir kan nou servi nou letan avek lasazes