Larepons Zeova anver en lapriyer senser

“Ki dimoun i konnen ki ou, ki ou non i Zeova, ou tousel ki Tre O lo later antye.”—PS. 83:18.

1, 2. Ki leksperyans bokou dimoun in gannyen e ki kestyon ki kapab ganny demande?

EN PE letan pase, en madanm ti trouble en kantite apre ki en trazedi ti arive dan son vwazinaz. I ti sorti dan en fanmir Katolik Romen, alor i ti al rod led avek pret dan son parwas ki pa ti ni menm anvi koz avek li. Alor i ti priy Bondye: “Mon pa konnen lekel ou . . . , me mon konnen ki ou egziste. Ed mwan pour konn ou silvouple!” En pti pe letan plitar, bann Temwen Zeova ti vizit li e donn li sa rekonfor ek konnesans ki i ti pe rode. Parmi plizyer lezot keksoz, zot ti ansenny li ki Bondye i annan en non e i  apel Zeova. I ti vreman kontan pour aprann sa. I ti dir:“Zis mazinen, Zeova i sa Bondye ki mon ti vreman anvi konnen depi ki mon ti ankor pti!”

² Bokou dimoun in ganny menm leksperyans. Laplipar ditan zot ti vwar non Zeova pour premye fwa kan zot ti lir Psonm 83:18 dan Labib. Dan New World Translation, sa verse i lir koumsa: “Ki dimoun i konnen ki ou, ki ou non i Zeova, ou tousel ki Tre O lo later antye.” Me, eski ou’n deza mazinen akoz Psonm 83 ti ganny ekrir? Ki levennman ki pou fors tou dimoun pour rekonnet ki Zeova i sa sel vre Bondye? Ki mesaz sa psonm i annan pour nou ozordi? Nou pou egzamin sa bann kestyon dan sa lartik. *

En konplo kont pep Zeova

3, 4. Lekel ki ti konpoz Psonm 83 e ki i ti dekrir?

³ Dapre sa pti lentrodiksyon o konmansman, Psonm 83 i “en melodi par Azaf.” I tre probab ki konpoziter sa psonm ti en desandan dan fanmir Levit Azaf, ki ti en mizisyen renonmen pandan renny Lerwa David. Dan sa psonm, sa psalmis i sipliy Zeova pour pran aksyon pour siport Son souvrennte e fer konnen Son non. I paret ki sa Psonm ti ganny konpoze en pe letan apre lanmor Salomon. Akoz? Parski pandan renny David ek Salomon, lerwa Tir pa ti en lennmi Izrael. Ler Psonm 83 ti ganny konpoze, bann zabitan Tir ti’n fini vir kont Izrael e zot ti’n pran kote avek zot bann lennmi.

⁴ Sa psalmis ti idantifye dis nasyon ki ti pe fer konplo pour detrir pep Bondye. Sa ti bann lennmi ki ti toultour Izrael: “Latant Edom ek bann Ismaelit, Moab ek bann Agrit, Gebal, Amonn ek Amalek, Filisti ansanm avek bann zabitan Tir. Lasiri osi ti zwenn ansanm avek zot.” (Ps. 83:6-8) Sa psonm ti pe refer avek ki levennman istorik? Serten i dir ki sa psonm ti pe refer avek sa latak ki bann Amonnit, Moabit ek bann zabitan Montanny Seir ki ti’n ralye ansanm ti fer kont Izrael dan letan Yeosafat. (2 Kron. 20:1-26) Lezot i krwar ki i ti pe koz lo tou bann lopozisyon ki Izrael ti eksperyanse avek son bann pei vwazen tou dilon son listwar.

5. Ki byenfe bann Kretyen i gannyen ozordi atraver Psonm 83?

⁵ An tou le ka, i evidan ki Zeova ti enspir sa psalmis pour ekrir sa psonm pandan en letan kot son pep ti an danze. Lefet ki tou dilon listwar, bann serviter Bondye in sibir bann latak enn apre lot avek zot lennmi ki determinen pour detrir zot, sa psonm i en sours lankourazman pour zot ozordi. Byento, sa psonm pou fortifye nou plis kan Gog sorti Magog pou ralye son bann lafors ansanm dan en dernyen lesey pour detrir tou bann ki ador Bondye an espri e an verite.—Lir Ezekyel 38:2, 8, 9, 16.

En size pli enportan pour sa psalmis

6, 7. (a) Ki sa psalmis ti priy lo la o konmansman Psonm 83? (b) Kwa ki ti pli enportan pour sa psalmis?

⁶ Ekoute pandan ki sa psalmis i eksprim son santiman dan lapriyer: “O Bondye, pa gard silans, dir keksoz e pa reste trankil, O tou pwisan. Parski ou bann lennmi i ankoler e sa bann ki ay ou en kantite in lev zot latet. Zot pe fer konplo konfidansyel kont ou pep. . . . Parski avek zot leker zot in fer lesanz bann konsey; zot in menm fer en lalyans kont ou.”—Ps. 83:1-3, 5.

⁷ Kwa ki ti pli enportan pour sa psalmis? Sirman, i ti enkyet pour son prop sekirite ensi ki sa ki pour son fanmir. Me pourtan, dan son lapriyer i ti konsernen avek sa  repros ki ti pe ganny anmennen lo non Zeova e menas ki bann lennmi ti pe fer kont sa nasyon ki ti port son non. I pou byen si nou tou nou annan sa menm pwennvi anmezir ki nou andir difikilte bann dernyen zour sa lemonn.—Lir Matye 6:9, 10.

8. Akoz sa bann nasyon ti pe fer konplo kont Izrael?

⁸ Sa psalmis ti sit parol ki bann lennmi Izrael ti pe dir: “Vini, annou efas zot pour ki zot nepli en nasyon, pour ki sa non Izrael pou ganny oubliye.” (Ps. 83:4) Pa sa bann nasyon ti vreman annan en laenn pour pep swazir Bondye! Me i annan en lot rezon akoz zot ti fer konplo kont Izrael. Zot ti vreman anvi ganny later Izrael pour zot menm e avek lorgey zot ti dir: “Annou pran sa bann landrwa Bondye pour nou menm.” (Ps. 83:12) Eski en keksoz parey in arive dan nou letan? Wi!

“Landrwa sen Bondye”

9, 10. (a) Dan letan lontan, kote landrwa sen Bondye ti ete? (b) Ki benediksyon bann Kretyen swazir ki ankor lo later ek ‘lezot mouton’ i rezwir ozordi?

⁹ Dan letan lontan, Later Promiz ti ganny apele landrwa sen Bondye. Mazin sa kantik laviktwar ki bann Izraelit ti sante apre ki zot ti’n ganny delivre Lezip: “Dan ou labonte leker ou’n gid sa pep ki ou’n delivre; avek ou lafors ou pou kondwir zot ver sa landrwa sen Bondye.” (Egz. 15:13) Pli tar, dan sa “landrwa” ti annan en tanp ensi ki bann pret e osi en lavil ki ti apel Zerizalenm. Bann lerwa ki ti asiz lo tronn Zeova ti bann desandans David. (1 Kron. 29:23) Zezi ti annan rezon pour dir ki Zerizalenm ti “lavil gran Lerwa.”—Mat. 5:35.

¹⁰ Me dan nou letan? En nouvo nasyon ki apel ‘Izrael Bondye’ ti ne lannen 33 N.L. (Gal. 6:16) Bann frer swazir Zezi ki form sa nasyon in akonplir sa travay ki nasyon Izrael pa ti reisi akonplir, setadir vin bann temwen pour non Bondye. (Iza. 43:10; 1 Pyer 2:9) Zeova ti fer sa menm promes avek zot ki i ti fer avek ansyen Izrael: “Mon pou vin zot Bondye, e zot pou vin mon pep.” (2 Kor. 6:16; Lev. 26:12) An 1919, Zeova ti fer li posib pour bann manm ‘Izrael Bondye’ ki ankor lo later ganny en relasyon spesyal avek li e apartir sa moman zot in ganny en “pei.” Sa “pei” i refer avek zot aktivite spirityel e kan zot fer sa bann aktivite, zot rezwir en paradi spirityel. (Iza. 66:8) Depi 1930, plizyer milyon ‘lezot mouton’ in zwenn ansanm avek zot. (Zan 10:16) Sa lazwa ek prosperite spirityel ki sa bann Kretyen denozour i annan, i en levidans pwisan ki montre ki Zeova i annan drwa pour dirize. (Lir Psonm 91:1, 2.) Sirman sa i fer Satan vreman ankoler!

11. Ki bi prensipal bann lennmi Bondye i touzour annan?

¹¹ Pandan letan lafen, Satan in ensit bann ki siport li lo later pour opoz bann Kretyen swazir ki ankor lo later ek lezot mouton. Sa ti arive dan Was Lerop anba sistenm Nazi e dan Les Lerop anba gouvernman Kominis, Linyon Sovyetik. Sa ti osi arive dan plizyer lezot pei e i pou ariv ankor, sirtou pandan latak final Gog sorti Magog. Dan sa latak, i posib ki bann opozan pou sezi propriyete ek posesyon ki pep Zeova i annan, zis parey bann lennmi ti fer dan letan pase. Parkont bi prensipal ki Satan in toultan annan se pour separ nou konman en pep pour ki sa non ki Bondye in donn nou i ganny oubliye. Ki mannyer Zeova i reazir anver sa kalite rebelyon kont son souvrennte? Egzamin ankor parol sa psalmis.

En model laviktwar Zeova

12-14. Ki sa de batay istorik ki ti arive o bor Megido ki sa psalmis ti ekrir lo la?

¹² Remark lafwa for ki sa psalmis ti annan dan abilite ki Zeova i annan pour anpes plan bann nasyon ki ti lennmi son pep rei si. Dan sa psonm, sa psalmis ti ekrir lo de laviktwar enportan ki bann Izraelit ti ranporte lo zot lennmi o bor ansyen lavil Megido ki ti pli o ki sa vale ki ti annan sa menm non. Pandan lete, Larivyer Kisonn ti sek alor i ti posib pour vwar son fon partou kot i pase lo laplenn ant bann kolin. Apre ki lapli ti tonbe pandan liver, sa larivyer ti deborde e ranpli sa vale. Petet se pour sa rezon ki sa larivyer i osi ganny apele “delo sorti Megido.”—Ziz 4:13; 5:19.

¹³ More i en pti montanny ki apepre 15 kilomet avek vale Megido. Dan letan Ziz Gideonn, bann Madyanit, Amalekit ek bann larme dan Les ti rasanble ansanm laba pour lager. (Ziz 7:1, 12) Dan latroup larme Gideonn ti finalman annan zis 300 zonm, me avek led Zeova zot ti ranport laviktwar lo sa gran group larme lennmi. Ki mannyer? Par swiv gidans Zeova, zot ti anserkle kan zot lennmi pandan lannwit. Dan zot lanmen ti annan en resipyan ki ladan ti annan en flanbo. Kan Gideonn ti donn sinyal, son bann zonm ti kraz sakenn son resipyan e en sel kou zot flanbo ti vin o kler. An menm tan zot ti soufle zot tronpet e kriye: “Lepe Zeova ek Gideonn!” I ti annan en gran konfizyon e zot ti konmans touy kanmarad e bann sirvivan ti sove pour al lo lot kote Larivyer Zourden. Antretan, lezot Izraelit ti zwenn ansanm pour tay deryer zot lennmi. An tou, 120,000 solda lennmi ti ganny touye.—Ziz 7:19-25; 8:10.

¹⁴ Montanny Tabor i apepre 6 kilomet avek montanny More ki 15 kilomet avek Megido. Pli boner ziz Barak ti ralye 10,000 Izraelit laba pour lager kont larme Yabin, sa lerwa Kananeen sorti Azor anba konmann Sisera son komandan militer. Dan larme Kananeen ti annan 900 saret lager ki lo zot larou ti annan bann gran bout feray byen fite ki ti vir ansanm avek larou. Anmezir larme Izraelit ki pa ti byen ekipe ti rasanble lo Montanny Tabor, larme Sisera ti antre dan sa vale lefet ki zot ti konfidan ki zot ti pou ranport laviktwar lo bann Izraelit. Apre sa “Zeova ti fer Sisera, son bann saret ­lager ek tou son kan tonm dan konfizyon.” ­Aparaman, lapli ti tonm en sel kou e sa ti fer ki bann saret ti anfonse dan labou akoz ­Larivyer Kisonn ti deborde. Bann Izraelit ti touy sa larme antye.—Ziz 4:13-16; 5:19-21.

15. (a) Dan son lapriyer, ki sa psalmis ti anvi Zeova i fer? (b) Ki nou rapel ler nou tann non sa lager final ki Bondye pou fer?

¹⁵ Sa psalmis ti sipliy Zeova pour fer en keksoz parey avek bann nasyon ki ti pe menas legzistans Izrael dan son letan. I ti priye:  “Avek zot, fer parey ou ti fer avek Madyann, avek Sisera e avek Yabin kot vale toransyel Kisonn. Zot ti ganny detrir Enn-dor; zot ti vin fimyen pour later.” (Ps. 83:9, 10) I enportan pour konnen ki lager final ki Bondye pou fer avek Satan i apel Armagedon (ki vedir “Montanny Megido”). Sa non i fer nou rapel bann batay enportan ki ti arive o bor Megido. Dan lepase, Zeova ti ranport laviktwar dan sa bann lager e sa i donn nou lasirans ki i pou sorti venker dan lager Armagedon.—Rev. 16:13-16.

Priye pour ki souvrennte Zeova i ganny zistifye

16. Ki mannyer figir bann opozan i ‘ranpli avek dezonner’ ozordi?

¹⁶ Pandan sa “bann dernyen zour,” Zeova in blok tou zefor ki pe ganny fer pour elimin son pep. (2 Tim. 3:1) Avek ki rezilta? Bann ki opoz son pep in onte. Psonm 83:16 ti predir sa kan i dir: “Ranpli zot figir avek dezonner, pour ki bann dimoun i kapab rod ou non, O Zeova.” Dan plizyer pei, bann opozan pa’n reisi dan zot zefor pour fer bann Temwen Zeova reste trankil. Dan sa bann pei, bann adorater sa sel vre Bondye in reste ferm e zot in montre ki zot in andire. Sa i en bon temwannyaz pour bann ki annan sa bon kondisyon leker e sa in fer ki plizyer zot in ‘rod non Zeova.’ Dan bokou pei kot Temwen Zeova ti ganny persekite severman dan lepase, la konmela i annan plizyer milye, menm plizyer santenn milye Temwen ki pe loue Zeova dan lazwa. Pa sa i en gran laviktwar pour Zeova! Sirman, sa i anbarasan pour son bann lennmi!—Lir Zeremi 1:19.

17. Ki swa enportan limanite i bezwen fer e ki parol nou pou rapel byento?

¹⁷ Byensir, nou konnen ki batay pa ankor fini. Nou pou kontinyen pres sa bon nouvel, menm avek bann ki opoz nou. (Mat. 24:14, 21) Bann ki opoz nou i annan en loportinite pour repantir la konmela e ganny delivrans, me byento zot pou nepli annan sa loportinite. I pli enportan pour non Zeova ganny sanktifye ki delivrans bann imen. (Lir Ezekyel 38:23.) Kan bann nasyon pou zwenn ansanm pour esey detrir pep Bondye parey i’n ganny predir, nou pou mazin sa parol dan lapriyer sa psalmis: “O fotespere ki zot onte e trouble pour touzour e ki zot dekonserte e mor.”—Ps. 83:17.

18, 19. (a) Kwa ki pe esper bann ki determinen pour opoz souvrennte Zeova? (b) Lefet ki drwa Zeova pour dirize pou finalman ganny zistifye byento, ki lefe sa i annan lo ou?

¹⁸ Bann imen arogan ki opoz souvrennte Zeova pou finalman ganny imilye. Parol Bondye i dir ki sa “bann ki pa obei levanzil” pou ganny egzekite zour Armagedon e zot pou soufer en “destriksyon eternel.” (2 Tesa. 1:7-9) Lefet ki bann opozan pou ganny detrir e bann ki ador Zeova an verite pou ganny sove, sa pou en levidans konvenkan ki Zeova i sa sel vre Bondye. Dan nouvo lemonn, sa gran laviktwar pa pou ganny oubliye. Bann “bon konman move pou resisite” e zot pou tann koz lo bann aksyon ekstraordiner ki Zeova ti fer. (Akt 24:15) Dan nouvo lemonn, zot pou vwar levidans konkret ki i pli saz pour viv anba dominasyon Zeova. Tou bann ki annan limilite parmi zot pou vitman konvenki ki Zeova i sa sel vre Bondye.

¹⁹ Nou Papa lanmour ki dan lesyel in prepar en lavenir merveye pour son bann adorater fidel, pa i vre? Eski pa sa i motiv ou pour priye ki Zeova pou byento reponn konpletman lapriyer sa psalmis: “Ki [ou lennmi i] onte e trouble pour touzour, e ki zot dekonserte e mor; Ki dimoun i konnen ki ou, ki ou non i Zeova, ou tousel ki Tre O lo later antye”?—Ps. 83:17, 18.

[Not anba lo paz]

Eski ou kapab eksplike?

• Ki sityasyon Izrael ti ladan kan Psonm 83 ti ganny ekrir?

• Kwa ki ti pli enportan pour sa psalmis?

• Anver lekel Satan i annan en laenn ozordi?

• Ki mannyer Zeova pou finalman reponn sa lapriyer ki’n ganny eksprimen dan Psonm 83:18?

[Kestyon]

[Portre lo paz 19]

(For fully formatted text, see publication)

Ki mannyer bann batay o bor ansyen Megido i relye avek nou lavenir?

Larivyer Kisonn

Aroset

Montanny Karmel

Vale Yizreel

Megido

Taanak

Montanny Gilboa

Pwi Arod

Montanny More

Enn-dor

Montanny Tabor

Lanmer Galile

Larivyer Zourden