Zeova i vey nou pour nou prop dibyen

“Lizye [Zeova] pe ale vini partou lo later pour li montre son lafors an faver bann ki zot leker i tou pour li.”—2 KRON. 16:9.

1. Akoz Zeova i egzamin nou?

ZEOVA i sa Papa ki parfe. I konn tou nou devire tournen e i menm “konn tou [nou] panse ek lentansyon.” (1 Kron. 28:9) Parkont i pa egzamin nou zis pour rod nou bann fot. (Ps. 11:4; 130:3) O kontrer, avek lanmour i anvi protez nou kont okenn keksoz ki kapab met an danze nou relasyon avek li ouswa nou lespwar pour ganny lavi eternel.—Ps. 25:8-10, 12, 13.

2. An faver lekel Zeova i servi son lafors?

² Zeova i tou pwisan e i vwar tou keksoz. Se pour sa rezon ki ler bann ki fidel avek li i rod son led, I kapab ed e siport zot kan zot rankontre bann leprev. 2 Kronik 16:9 i dir: “Lizye [Zeova] pe ale vini partou lo later pour li montre son lafors an faver bann ki zot leker i tou pour li.” Remarke, Zeova i servi son lafors an faver bann ki servi li avek tou zot leker setadir avek en leker pir e senser ki annan bon motivasyon. Me i pa montre sa kalite lentere dan bann dimoun ki malonnet e ipokrit.—Zoz. 7:1, 20, 21, 25; Prov. 1:23-33.

Mars avek Bondye

3, 4. Ki savedir ‘mars avek Bondye’ e ki legzanp dan Labib ki ed nou konpran sa?

³ Bokou dimoun i vwar li enposib pour krwar ki Kreater sa gran liniver i permet bann imen mars avek li dan en sans senbolik. Me pourtan, sanmenm sa ki Zeova i anvi nou fer. Dan letan lontan, Enok ek Noe ti ‘mars avek Bondye.’ (Zen. 5:24; 6:9) Moiz “ti reste ferm konmsi i ti pe war sa enn ki envizib.” (Ebr. 11:27) Avek limilite, Lerwa David ti mars kot a kot avek son Papa ki dan lesyel. I ti dir: “Parski [Zeova] i dan mon kote drwat, mon pa pou drive.”—Ps. 16:8.

⁴ Byensir, i enposib pour tyonbo lanmen Zeova e mars avek li dan en sans literal. Me nou kapab fer li dan en sans senbolik. Ki mannyer? Psalmis Azaf ti ekrir: “Mon toultan avek ou; ou’n tyonbo mon lanmen drwat. Avek ou konsey ou pou gid mwan.” (Ps. 73:23, 24) Nou senpleman kapab dir ki nou mars avek Zeova kan nou swiv son konsey ki nou premyerman gannyen dan son Parol e atraver “lesklav fidel e pridan.”—Mat. 24:45, NW; 2 Tim. 3:16.

5. Ki mannyer Zeova i zet en koudey lo son bann serviter konman en Papa ranpli avek lanmour e ki mannyer nou devret santi anver li?

⁵ Lefet ki Zeova i kontan bann ki mars avek li, i zet en koudey lo zot parey en papa ki kontan son zanfan. I pran swen avek zot, i protez zot e i ansenny zot. Bondye ti dir: “Mon pou fer ou annan bon zizman e mon pou enstrir ou dan sa semen ki ou devret pran. Mon lizye pou lo ou pour konsey ou.” (Ps. 32:8) Demann ou lekor: ‘Eski mon vwar mwan pe mars avek Zeova lanmen dan lanmen setadir, eski mon pe rod lasazes sorti kot Li e konpran ki i pe egzamin mwan parey en Papa ki annan lanmour pour son zanfan? Lefet ki mon rekonnet son prezans, eski sa i annan lefe lo mon fason panse, parol ek aksyon? Si mon fer fot, eski mon vwar Zeova konman sa Papa lanmour ek mizerikord ki anvi ed bann ki repantir pour reganny zot relasyon avek li ouswa mon vwar li konman en Bondye ki sever e serye?’—Ps. 51:17.

6. Ki lavantaz Zeova i annan lo bann paran imen?

 ⁶ Parler, Zeova i kapab ed nou menm avan ki nou pran en move semen. Par egzanp, lefet ki nou leker i tret, Zeova i kapab remarke si nou pe konmans devlop en dezir pour bann move keksoz. (Zer. 17:9) Dan en sityasyon parey, son reaksyon pou menm pli vit ki en paran imen akoz son “lizye kler” i annan sa abilite pour egzamin nou o profon e i kapab vwar sa ki nou pe panse dan nou leker. (Ps. 11:4; 139:4; Zer. 17:10) Remark reaksyon Bondye dan en sityasyon ki ti devlope dan lavi sekreter ek bon zanmi Zeremi ki ti apel Barouk.

I ti en vre Papa pour Barouk

7, 8. (a) Lekel Barouk e ki move dezir ti’n kapab konmans devlope dan son leker? (b) Ki mannyer Zeova ti azir parey en papa pour Barouk?

⁷ Barouk ti en sekreter profesyonnel ki ti en serviter fidel akote Zeremi dan en latas difisil ki ti annan pour fer avek anons mesaz zizman Zeova lo Zida. (Zer. 1:18, 19) En serten moman dan son lavi, Barouk ti konmans rod “bann gran keksoz” pour li menm e i tre probab ki sa ti akoz i ti sorti dan en fanmir enportan. Petet i ti konmans les bann lanbisyon egois ouswa dezir pour ganny bokou keksoz materyel devlope dan li. An tou le ka, Zeova ti vwar ki sa kalite move dezir ti pe devlope dan leker Barouk. Alor, pour adres sa sityasyon, Zeova ti imedyatman koz avek Barouk atraver Zeremi: “Ou’n dir: ‘Maler pour mwan aprezan, parski Zeova in azout sagrinasyon avek mon douler! Mon’n fatige soupire e mon pa’n trouv okenn landrwa repo.’” Apre sa Bondye ti dir: “Ou kontinyen rod bann gran keksoz pour ou menm. Aret rod sa bann keksoz.”—Zer. 45:1-5.

⁸ Menm si Zeova ti azir dan en fason ferm avek Barouk, I pa ti reazir dan lakoler me I ti azir konman en papa ki senserman enterese avek son zanfan. I kler ki Zeova ti vwar ki dezir Barouk pa ti reflekte ni en move leker, ni en leker antete. Zeova ti osi konnen ki Zerizalenm ek  Zida ti dan zot bann dernyen zour e i pa ti anvi ki Barouk i tonbe pandan sa moman difisil. Alor, pour fer Barouk reflesir e retourn dan son bon sans, Bondye ti rapel li ki I ti “pou anmenn en maler lo tou dimoun” e i ti osi azoute ki si Barouk ti azir avek lasazes, i ti pou sirviv. (Zer. 45:5) Anfet, Bondye ti dir: ‘Eski i fer sans Barouk? Gard antet sa ki pou arive byento avek bann move zabitan Zida ek Zerizalenm. Reste fidel e ou ava viv! Mon pou protez ou.’ I evidan ki parol Zeova ti tous leker Barouk akoz i ti aziste son fason panse e i ti sirviv destriksyon Zerizalenm ki ti arive 17 an pli tar.

9. Ki mannyer ou pou reponn sa bann kestyon ki ganny souleve dan paragraf?

⁹ Pandan ki ou reflesir lo sa resi konsernan Barouk, egzamin sa bann kestyon ek verse Labib ki swiv: Lafason ki Bondye ti tret Barouk i revel kwa lo Zeova ek son santiman anver son bann serviter? (Lir Ebre 12:9.) Lefet ki nou pe viv dan bann letan difisil, ki nou kapab aprann avek sa konsey ki Bondye ti donn Barouk ek reaksyon Barouk? (Lir Lik 21:34-36.) Par imit Zeremi, ki mannyer bann ansyen i kapab reflekte sa lentere ki Zeova i annan dan son bann serviter?—Lir Galat 6:1.

Garson i imit lanmour Papa

10. Ki mannyer Zezi i byen ekipe pour okip son pozisyon konman Sef kongregasyon Kretyen?

¹⁰ Pandan letan avan lepok bann Kretyen, Zeova ti revel son lanmour pour son pep atraver bann profet ek lezot serviter fidel. Parey nou kapab vwar, ozordi Zeova i avan tou demontre son lanmour atraver Sef kongregasyon Kretyen, Zezi Kri. (Efe. 1:22, 23) Se pour sa rezon ki liv Revelasyon i dekrir Zezi konman en Lanyo ki annan “set lizye, ki ti sa set lespri Bondye, anvoye partou lo later.” (Rev. 5:6) Wi, lefet ki i’n ganny lespri sen Bondye, sa i fer ki Zezi i kapab egzamin tou keksoz parfetman. Li osi i vwar sa ki nou ete anndan e napa nanryen ki i pa kapab vwar.

11. Ki rol Kris i annan e ki mannyer son latitid anver nou i reflekte latitid son Papa?

¹¹ Toudmenm, parey Zeova, Zezi pa en lapolis anler dan lesyel. Li osi i egzamin nou parey en Papa ki kontan son zanfan. Zezi i annan sa tit “Papa Eternel” e sa i fer nou rapel son rol ki i pou zwe pour donn lavi eternel tou bann ki demontre lafwa dan li. (Iza. 9:6) Deplis, konman Sef kongregasyon Kretyen, Kris i kapab motiv bann Kretyen ki matir spirityelman, sirtou bann ansyen pour rekonfort oubyen konsey sa bann ki dan bezwen.—1 Tesa. 5:14; 2 Tim. 4:1, 2.

12. (a) Let pour sa set kongregasyon Lazi Miner i revel kwa lo Zezi? (b) Ki mannyer bann ansyen i reflekte latitid Kris anver troupo Bondye?

¹² Lentere senser ki Kris i annan pour kongregasyon i ganny reflekte dan bann let ki i ti adres pour bann ansyen dan sa set kongregasyon Lazi Miner. (Rev. 2:1–3:22) Dan sa bann let, Zezi ti endike ki i ti okouran sa ki ti pe pase dan sak sa bann kongregasyon e profonder sa lentere senser ki i ti annan pour son bann disip. Sa i aplikab osi ozordi e menm plis, parski vizyon Revelasyon pe ganny akonplir pandan “Zour Senyer.” * (Rev. 1:10) Lanmour Kris i souvan ganny eksprimen atraver bann ansyen ki servi konman bann berze spirityel pour kongregasyon. Vi ki i “ti donn bann zonm konman bann kado,” i servi zot menm pour rekonfort, ankouraz e donn konsey lezot kan i neseser. (Efe. 4:8, NW; Akt 20:28; lir Izai 32:1, 2.) Eski ou vwar zefor sa bann ansyen konman en fason ki Kris i eksprim son lentere dan ou personnelman?

Led dan sa bon moman

13-15. Ki mannyer Bondye i kapab swazir pour reponn nou lapriyer? Donn enn de legzanp.

¹³ Eski ou’n deza sipliy Bondye en kantite dan lapriyer pour ganny son led e ou’n ganny son larepons atraver en vizit ankourazan avek en Kretyen ki matir spirityelman? (Zak 5:14-16) Oubyen petet ou ti ganny led atraver en diskour dan renyon ouswa lenformasyon dan enn nou bann piblikasyon. Souvan Zeova i reponn nou lapriyer dan sa bann fason. Par egzanp, en ser ki ti viktim en gro lenzistis detrwa semenn avan, ti apros en frer apre ki i ti’n donn en diskour. Olye konplent  lo son problenm, sa ser ti eksprim son gran lapresyasyon pour serten pwen sorti dan Labib ki sa frer ti’n fer resorti dan son diskour. Sa bann verse ti aplik avek son sityasyon e sa ti rekonfort li en kantite. I ti vreman kontan ki i ti’n asiste renyon sa zour.

¹⁴ Konsernan led atraver lapriyer, egzamin legzanp trwa zonm ki ti dan prizon. Zot ti ganny konnesans lo laverite ki dan Labib dan prizon e zot ti vin bann proklanmater non batize. Apre ki en lensidan vyolan ti arive, tou bann prizonnyen ti perdi en kantite lezot privilez dan sa fasilite. Sa ti swiv par en rebelyon. Pour montre zot mekontantman, bann prizonnyen ti deside ki zot pa ti pou rann zot lasyet apre pti dezennen son lannmen bomaten. Sa trwa proklanmater ti vwar zot dan en sityasyon difisil. Si zot ti partisip dan sa rebelyon zot ti pou vyol konsey Zeova dan Romen 13:1. Si zot pa ti partisipe, lezot prizonnyen ankoler ti pou pran revanz kont zot.

¹⁵ Lefet ki i ti enposib pour zot kominik avek kanmarad, sa trwa zonm ti priye pour ganny lasazes. Son lannmen bomaten, zot ti dekouver ki zot tou le trwa zot ti’n fer menm desizyon; zot ti senpleman pa pran pti dezennen. Plitar, kan bann gard prizon ti vini pour anmas lasyet, sa trwa zonm ti napa pour zot rann. Zot ti vreman kontan ki sa Enn “ki ekout lapriyer” ti pros avek zot.—Ps. 65:2.

Get lavenir avek konfyans

16. Ki mannyer Zeova i demontre konsern pour bann dimoun senser atraver sa travay predikasyon?

¹⁶ Sa travay predikasyon ki pe ganny fer dan lemonn antye i en lot levidans ki montre konsern ki Zeova i annan dan bann dimoun ki annan en leker senser, nenport ki landrwa zot kapab reste. (Zen. 18:25) Zeova i souvan servi son lanz pour gid son bann serviter ver bann dimoun ki annan en leker senser menm si sa bann dimoun i viv dan bann landrwa kot laverite pa’n deza ganny prese. (Rev. 14:6, 7) Par egzanp, atraver en lanz, Bondye ti gid Filip ki ti en evanzelizater dan premye syek ver en zofisye Etyopyen pour eksplik li sa ki Labib i dir. Avek ki rezilta? Sa zonm ti aksepte sa bon nouvel, i ti batize e vin en disip Zezi. *—Zan 10:14; Akt 8:26-39.

17. Akoz nou pa devret tro enkyet pour lavenir?

¹⁷ Anmezir ki sa sistenm ki nou pe viv ladan i apros ver son lafen, sa “premye douler” ki ti ganny predir pou kontinyen. (Mat. 24:8) Par egzanp, pri manze i riske ogmante, ki swa akoz lakantite demann ki kontinyen ogmante, move kondisyon letan ouswa lekonomi ki pa stab. I kapab ki i pou pli difisil pour trouv en lanplwa e bann anplwaye pou petet vwar zot anba presyon pour travay plis erdtan ki labitid. Nenport kwa ki kapab arive, tou bann ki met zot servis pour Zeova premye e ki viv en lavi senp pa devret tro enkyet pour nanryen. Zot konnen ki Bondye i kontan zot e i pou pran swen avek zot. (Mat. 6:22-34) Egzamin par egzanp, ki mannyer Zeova ti pran swen avek Zeremi pandan bann moman difisil avan destriksyon Zerizalenm an 607 A.N.L.

18. Ki mannyer Zeova ti prouv son lanmour pour Zeremi pandan letan ki Zerizalenm ti ganny anserkle?

 ¹⁸ Pandan bann dernyen moman apre ki bann Babilonnyen ti anserkle Zerizalenm, Zeremi ti ganny anprizonnen dan Lakour Gard. Ki mannyer i ti pou ganny son manze? Si i ti lib, i ti pou kapab al rode li menm. Me plito i ti depan antyerman lo bann ki ti otour li ki laplipar ti ay li. Kantmenm sa, Zeremi pa ti met son konfyans dan zonm, me dan Bondye ki ti promet li ki i ti pou pran swen avek li. Eski Zeova ti fer sa ki i ti promet? Byensir! I ti fer sir ki tou le zour Zeremi ti ganny “en bar dipen ron . . . ziska ki ti nepli annan dipen dan sa lavil.” (Zer. 37:21) Zeremi, Barouk, Ebed-melek e lezot ankor ti sirviv sa letan lafamin, maladi ek lanmor.—Zer. 38:2; 39:15-18.

19. Pandan ki nou get lavenir, ki nou determinen pour fer?

¹⁹ Wi, “lizye [Zeova] i fikse lo bann zis. E son zorey i ouver pour ekout zot lapriyer.” (1 Pyer 3:12) Eski ou kontan ki ou Papa ki dan lesyel pe obzerv ou? Eski ou santi ou sen e sof e an sekirite pour konnen ki Zeova i vey ou pour ou prop dibyen? Alor, reste determinen pour kontinyen mars avek Bondye, malgre nenport kwa ki kapab arive alavenir. Nou kapab asire ki Zeova pou touzour vey bann ki fidel avek li e kit son regar konman en papa lo zot.—Ps. 32:8; lir Izai 41:13.

[Not anba lo paz]

Eski ou kapab eksplike?

• Ki mannyer nou kapab montre ki nou pe ‘mars avek Bondye’?

• Ki mannyer Zeova ti demontre son lanmour pour Barouk?

• Konman Sef kongregasyon, ki mannyer Zezi i reflekte bann kalite son Papa?

• Dan ki fason nou kapab montre ki nou annan konfyans dan Bondye pandan sa bann letan difisil?

[Kestyon]

[Portre lo paz 15]

Parey Zeremi ti fer avek Barouk, bann ansyen ozordi i reflekte lentere senser Zeova

[Portre lo paz 19]

Ki mannyer Zeova i kapab fourni led dan sa bon moman?