Ed zot pour pa tarde retournen!

“Kot lekel nou pou ale? Ou annan parol lavi eternel.”—ZAN 6:68.

1. Ki Pyer ti dir ler en kantite disip ti kit Zezi?

EN FWA en kantite disip Zezi Kri ti kit li e ti rezet enn son bann lansennyman. I ti demann avek son bann zapot: “Zot pa anvi ale, zot osi?” Pyer ti reponn: “Senyer, kot lekel nou pou ale? Ou annan parol lavi eternel.” (Zan 6:51-69) I ti napa okenn par ankor pour ale. Dan sa letan larelizyon Zwif ti napa okenn “parol lavi eternel” e definitivman, ozordi nou pa kapab trouv sa bann parol kot Gran Babilonn, savedir tou bann fo larelizyon. Me pour okenn dimoun ki’n elwannyen avek troupo Bondye, ki anvi fer ­plezir Zeova, “i’n plis ki ler pour leve” e retourn dan kongregasyon.—Rom. 13:11, King James Version.

2. Ki nou devret gard antet an rapor avek bann pese grav?

² Zeova ti demontre lentere anver bann mouton perdi Izrael. (Lir Ezekyel 34:15, 16.) Pareyman, bann ansyen i annan sa dezir e devwar pour ed en dimoun ki’n elwannyen avek kongregasyon. Si zot demann en proklanmater pour etidye avek en dimoun ki inaktif ki anvi ganny ede, ki sa proklanmater i devret fer si i okouran ki sa dimoun inaktif in fer en pese grav? Olye donn okenn konsey an rapor avek sa sityasyon serye e konfidansyel, sa proklanmater i devret ankouraz sa dimoun pour koz avek bann ansyen. Si i pa fer li sa proklanmater i devret enform bann ansyen.—Lev. 5:1; Gal. 6:1.

3. Ki mannyer en zonm ki ti annan 100 mouton ti reakte ler i retrouv enn ki ti’n perdi?

³ Dan lartik presedan, nou ti refer avek legzanp Zezi ki ti pe koz konsernan en zonm ki ti annan 100 mouton. Ler enn parmi sa bann mouton ti manke dan troupo, i ti kit deryer sa 99 mouton pour al rod sa enn ki ti’n perdi. Pa sa zonm ti kontan ler i ti retrouv li! (Lik 15:4-7) Pareyman, nou annan sa menm lazwa ler en mouton Bondye ki ti’n perdi dan troupo i retournen. Akoz zot kontan sa dimoun petet bann ansyen ek lezot manm kongregasyon in rann li vizit. Zot anvi vwar sa dimoun retourn dan kongregasyon e ganny sipor, proteksyon ek benediksyon Bondye. (Det. 33:27; Ps. 91:14; Prov. 10:22) Si zot ganny sa loportinite pour ed en dimoun retourn dan kongregasyon, ki zot kapab fer?

4. Ki sa bann verse dan Galat 6:2, 5 i fer resorti?

⁴ Pour ankouraz en dimoun pour retourn dan kongregasyon petet ou kapab montre li byen zantiman ki Zeova i kontan Son bann mouton e i pa demann nou pour fer plis ki sa ki nou kapab fer. Sa i enkli etidye Labib, asiste renyon kongregasyon e pres sa bon nouvel Rwayonm. I kapab apropriye petet pour lir Galat 6:2, 5 e eksplik li ki bann Kretyen i kapab ed kanmarad pour anmenn serten fardo, me “sakenn i devre anmenn son prop fardo” setadir son prop responsabilite spirityel. Napa personn ki kapab demontre fidelite anver Bondye dan nou plas.

Eski i’n elwannyen akoz “traka lavi”?

5, 6. (a) Akoz i enportan ki nou ekout byen en dimoun ki’n vin inaktif ler i eksprim li? (b) Ki mannyer ou kapab fer bann ki’n vin inaktif vwar ki lefet ki zot in aret asosye avek pep Bondye sa i kapab afekte zot spirityalite?

⁵ Pour konnen ki mannyer zot devret ed bann frer ek ser ki’n vin inaktif, bann ansyen ek bann proklanmater matir i bezwen byen ekoute ler zot eksprim sa ki dan zot leker. Fer konmsi ou en ansyen ki pe vizit en koup marye ki nepli vin lasal e zot in vin inaktif akoz “traka lavi.” (Lik 21:34) Petet, problenm finansyel oubyen plis responsabilite fanmir ki’n fer zot aret zot bann aktivite spirityel. Zot kapab santi ki zot bezwen pran en brek avek bann aktivite spirityel. Ou kapab montre zot ki si zot izol zot lekor sa pa pou  en bon solisyon. (Lir Proverb 18:1.) Avek ladouser ou kapab demann zot: “Eski zot pli ere depi ki zot in aret asiste renyon? Eski zot lavi fanmir in vin pli meyer? Eski zot touzour annan sa lazwa ki nou gannyen kan nou met nou konfyans dan Zeova?”—Nee. 8:10.

⁶ Par reflesir lo sa bann kestyon nou kapab ed bann ki’n vin inaktif vwar, ki akoz zot in aret asosye avek kongregasyon zot spirityalite in afebli e zot annan mwens lazwa. (Mat. 5:3; Ebr. 10:24, 25) Petet i ti a byen pour ed zot realize ki lefet ki zot in aret pres sa bon nouvel, zot in perdi zot lazwa. (Mat. 28:19, 20) Kwa ki i ti pour saz pour dimoun ki’n vin inaktif fer?

7. Ki nou kapab ankouraz bann ki’n elwannyen avek kongregasyon pour fer?

⁷ Zezi ti dir: “Fer byen atansyon zot menm, pangar zot vizilans i ganny detournen avek festen, labwason ek traka lavi. . . . Veye alor e priye tou letan, pour zot ganny lafors pour pas atraver tou sa bann keksoz ki pou arive.” (Lik 21:34-36) Nou kapab ankouraz bann ki’n elwannyen avek kongregasyon me ki anvi resanti sa lazwa ki zot ti annan oparavan pour priye pour ganny lespri sen ek led Bondye e pour azir an armoni avek zot lapriyer.—Lik 11:13.

Eski i’n tonbe akoz en dimoun oubyen en keksoz?

8, 9. Ki mannyer en ansyen i kapab rezonn avek en dimoun ki’n tonbe?

⁸ Lefet ki imen i enparfe sa i kapab anmenn bann dezakor ki fer tonbe serten dimoun. I annan ki’n tonbe ler en dimoun ki zot ti respekte dan kongregasyon ti rezet bann prensip Labib. Si en dimoun ki’n vin inaktif in ganny afekte dan sa fason, sa ansyen ki vizit li i kapab montre li ki i pa lafot Zeova si en dimoun i tonbe. Alors, akoz en dimoun pour kas son relasyon avek Bondye ek Son pep? O kontrer, pa sa dimoun i devret kontinyen servi Bondye, par annan konfyans ki i “sa Ziz lo later antye,” ki konn sa ki’n arive e i pour regle sa sityasyon dan sa pli bon fason? (Zen. 18:25; Kol. 3:23-25) Si en dimoun i bat dan en keksoz e tonbe, i pa pou reste ekspre ater san fer okenn zefor pour leve.

⁹ Pour donn led spirityel, sa ansyen i kapab fer sa dimoun ki’n vin inaktif remarke ki avek ­letan serten ti nepli vwar sa sityasyon sokan parey avan. An realite sa problenm ti nepli egziste. Si en dimoun in tonbe akoz i’n ganny disiplinen, meditasyon avek lapriyer i kapab ed li konpran ki i ti merit ganny sa konsey e ki i pa ti devret les sa disiplin fer li tonbe.—Ps. 119:165; Ebr. 12:5-13.

Eski i’n tonbe akoz en problenm konsernan lansennyman?

10, 11. Ki mannyer nou kapab rezonn avek en dimoun ki annan en konprenezon diferan lo serten lansennyman Labib?

¹⁰ I kapab ki serten in kit troupo Bondye akoz zot pa dakor avek serten lansennyman Labib. Bann Izraelit ki ti ganny libere Lezip ti ‘oubliy bann aksyon Bondye’ e “pa ti esper son konsey.” (Ps. 106:13) I ti a byen pour sa enn ki inaktif rapel ki “lesklav fidel e pridan” pe donn bann bon nouritir spirityel. (Mat. 24:45, NW) Se koumsa menm ki i ti konn laverite o konmansman. Alors pa i devret determinen pour rekonmans mars dan laverite?—2 Zan 4.

¹¹ Ler en ansyen pe ed bann ki’n elwannyen avek troupo Bondye, i kapab refer avek bann disip Zezi ki ti kit li akoz zot ti rezet son lansennyman. (Zan 6:53, 66) Lefet ki zot ti aret asosye avek Kris ek son bann disip, zot ti aret apresye bann keksoz spirityel e perdi zot lazwa. Eski sa bann ki’n aret asosye avek kongregasyon in trouv en lot landrwa kot i annan nouritir spirityel annabondans? Non, akoz napa!

Eski i’n fer en pese grav?

12, 13. Si en dimoun ki’n elwannyen avek kongregasyon i admet ki i’n komet en pese grav, ki mannyer nou kapab ed li?

¹² Serten dimoun in aret prese e asiste renyon akoz zot in fer en pese grav. Petet zot krwar ki si zot konfes zot fot avek bann ansyen, zot pou ganny ekskli dan kongregasyon. Me zot pa pou ganny ekskli si zot in aret pratik sa ki Labib i kondannen e ki zot in vreman repantir. (2 Kor. 7:10, 11) O kontrer, zot pou ganny byen akeyir e bann ansyen pou donn zot led spirityel ki zot bezwen.

¹³ Si ou sa proklanmater matir ki’n ganny demande pour ed en dimoun ki’n vin inaktif, ki ou devret fer si i dir ou ki i’n fer en pese grav? Parey i ti ganny mansyonnen pli boner olye ki ou kontinyen enplik ou plis dan sa zafer, ankouraz li pour koz avek bann ansyen. Si i pa oule fer li, ou pou montre ki non Zeova e byennet spirityel kongregasyon i pli enportan pour ou par obeir lenstriksyon sorti kot Bondye konsernan bann sityasyon koumsa. (Lir Levitik 5:1.) Bann ansyen pou konnen ki mannyer pour ed en dimoun ki anvi retourn dan kongregasyon viv an armoni avek lavolonte Bondye. Petet i pou bezwen ganny disiplinen avek lanmour. (Ebr. 12:7-11) Si sa dimoun i admet ki i’n fer pese kont Bondye me ki i’n aret fer sa ki mal e ki i’n vreman repantir, bann ansyen pou ed li. I kapab resevwar pardon Zeova.—Iza. 1:18; 55:7; Zak 5:13-16.

 I annan lazwa ler en garson i retournen

14. Dan ou prop mo, rakont sa legzanp konsernan sa parabol garson perdi.

¹⁴ Ler nou pe fer zefor pour ed en dimoun ki’n elwannyen avek kongregasyon, sa enn ki ganny demande pour fer li i kapab refer avek legzanp Zezi ki’n ganny rikorde dan Lik 15:11-24. Dan sa parabol, en zennonm ti gaspiy tou son leritaz par viv en move lavi. Finalman i ti degout sa lavi dezordonnen ki i ti pe viv. I ti lafen e anvi vwar son fanmir alors i ti deside pour retourn kot li. I ti ankor ase lwen avek lakour, ler son papa ti vwar li. Son papa ti taye pour al zwenn li, ti ser li dan son lebra e anbras li. Sa papa ti vreman dan lazwa. Par reflesir lo sa legzanp petet sa i kapab motiv sa enn ki’n elwannyen pour retourn dan kongregasyon. Vi ki sa sistenm i pros pour ganny detrir, i pa devret tarde pour ‘retourn dan lakour.’

15. Akoz serten in elwannyen avek kongregasyon?

¹⁵ Laplipar frer ek ser ki’n elwannyen avek kongregasyon, pa vreman parey sa garson perdi. Serten in elwannyen gradyelman, zis parey en bato ki drive dousman dousman lwen avek later. Lezot in les traka lavi met zot anba presyon e fer zot negliz zot relasyon avek Zeova. Lezot ankor in tonbe akoz zot in soke par latitid en manm kongregasyon oubyen zot in kit kongregasyon akoz zot pa tonm dakor avek serten lansennyman. Serten in tonm dan bann move kondwit ki kontrer avek lansennyman Labib. Me, sa bann konsey ki’n ganny donnen an rapor avek sak sityasyon i kapab ed ou pour ed sa bann ki’n kit kongregasyon akoz sa bann rezon oubyen lezot, pour retournen avan i tro tar.

“Byenveni, mon garson!”

16-18. (a) Ki mannyer en ansyen ti ed en frer ki ti’n vin inaktif pour plizyer lannen? (b) Kwa ki ti fer sa frer vin inaktif, ki mannyer i ti ganny ede e ki mannyer bann frer ek ser ti akeyir li dan kongregasyon?

¹⁶ En ansyen i dir: “Bann ansyen dan nou kongregasyon i fer bokou zefor pour vizit bann ki’n vin inaktif. Mon mazin en frer ki mon ti etidye avek e ki mon ti ede pour ganny en konnesans egzakt lo laverite. I ti’n vin inaktif pour apepre 25 an e ti pe pas atraver en sityasyon difisil. Alors mon ti eksplik li ki si i aplik bann prensip Labib sa i kapab ed li. Apre en serten letan, i ti konmans vin Lasal e aksepte en letid Labib pour ed li ranforsi son determinasyon pour retourn dan troupo.”

¹⁷ Kwa ki ti fer sa frer vin inaktif? I dir: “Mon ti konmans annan plis lentere dan bann keksoz ki dan lemonn ki bann keksoz spirityel. Apre mon ti aret etidye, prese e asiste renyon. San realize mon ti’n aret asosye avek kongregasyon. Me  mon ti ganny led pour retournen atraver lentere senser e personnel ki sa ansyen ti demontre anver mwan.” Bann problenm ki sa frer ti annan ti konmans diminyen apre ki i ti aksepte en letid Labib. I dir: “Mon ti realize ki sa ki ti manke dan mon lavi, ti sa lanmour e gidans Zeova ek son lorganizasyon.”

¹⁸ Ki mannyer sa frer ti ganny akeyir dan kongregasyon? I dir: “Mon ti santi parey sa garson perdi ki Zezi ti koz lo la. Anfet, enn parmi nou bann ser aze ki dan kongregasyon depi 30-t-an e ki ankor en serviter fidel ti dir mwan: ‘Byenveni dan lakour mon Garson!’ Sa ti vreman tous mon leker. Mon ti santi ki mon ti vreman kot mwan. Mon ti pou kontan eksprim mon rekonesans pour lanmour, lafeksyon, pasyans e lentere ki sa ansyen enkli bann frer ek ser dan kongregasyon ti demontre anver mwan. Lanmour ki zot annan pour Zeova e zot prosen ti vreman ed mwan pour retourn dan kongregasyon.”

Ankouraz zot pour azir konmela menm!

19, 20. Ki mannyer ou kapab ankouraz bann ki’n vin inaktif pour pa tarde retourn dan kongregasyon e ki mannyer ou kapab montre zot ki Bondye pa espekte ki zot fer plis ki sa ki zot kapab?

¹⁹ Nou pe viv dan bann dernyen zour e sa sistenm pour ganny detrir byento. Alors, ankouraz sa bann ki’n vin inaktif pour asiste bann renyon. Ankouraz zot pour fer li konmela menm. Fer zot vwar ki Satan pe esey detrir zot relasyon avek Bondye e fer zot krwar ki zot kapab ganny soulaze avek zot bann difikilte si zot abandonn sa vre ladorasyon. Ou kapab asir zot ki zot pour ganny sa vre rekonfor selman par vin bann disip fidel Zezi.—Lir Matye 11:28-30.

²⁰ Fer bann ki’n vin inaktif rapel ki Bondye i ekspekte nou pour fer sa ki nou kapab. Ler ser Lazar Mari ti ganny kritike akoz i ti vid delwil byen ser lo latet Zezi en pti pe letan avan son lanmor, Zezi i ti dir: “Les li trankil. . . . I’n fer sa ki i ti kapab.” (Mark 14:6-8) Zezi ti felisit sa vev ki ti dan bezwen, ki ti fer sa pti kontribisyon kot tanp. Li osi i ti fer sa ki i ti kapab. (Lik 21:1-4) Laplipar nou ozordi nou kapab asiste renyon e pres sa bon nouvel Rwayonm. Avek led Zeova, bokou parmi bann ki’n vin inaktif pou kapab fer parey.

21, 22. Ki lasirans nou kapab donn bann ki retourn ver Zeova?

²¹ Si en dimoun ki’n elwannyen avek kongregasyon i per pour rankontre bann frer ek ser ankor, ou kapab fer li rapel sa lazwa ki ti annan ler sa garson perdi ti retourn kot li. I annan sa menm lazwa ler sa bann ki’n elwannyen i retourn dan kongregasyon. Ankouraz zot pour azir konmela menm, pour opoz Dyab e pour apros avek Bondye.—Zak 4:7, 8.

²² Bann ki retourn ver Zeova i kapab asire ki zot pour ganny akeyir avek lazwa. (Lam. 3:40) San okenn dout zot in eksperyans bokou lazwa dan servis Bondye dan lepase. I annan ankor en kantite benediksyon ki pe esper bann ki retourn dan troupo konmela menm!

Ki ou pou reponn?

• Ki mannyer ou kapab ed en Kretyen ki’n tonbe spirityelman e ki’n vin inaktif?

• Ki mannyer nou kapab rezonn avek en dimoun ki’n kit troupo Bondye akoz en pwennvi personnel konsernan en lansennyman?

• Kwa ki posib pour fer pour ed en dimoun ki ezite retourn dan kongregasyon?

[Kestyon]

[Portre lo paz 23]

Par reflesir lo legzanp Zezi konsernan sa garson perdi, sa i kapab motiv serten pour retourn dan kongregasyon