Eski ou zalou parfwa? Bann frer Zozef ti zalou
ANSENNY OU ZANFAN
Eski ou zalou parfwa? Bann frer Zozef ti zalou
ANNOU eksplike ki savedir zalouzi. Eski ou’n deza vwar li difisil pour kontan en dimoun akoz lezot i dir ki i bon zoli oubyen malen? *— Sanmenm sa ki kapab arive ler nou zalou.
I kapab annan zalouzi dan en fanmir si paran i prefer en zanfan plis ki en lot. Labib i koz konsernan en fanmir kot zalouzi ti kree en gro problenm. Annou egzamin sa problenm e ki leson nou kapab aprann avek sa ki ti arive.
Zozef ti sa onzyenm garson Zakob e son bann demi frer ti zalou li. Eski ou konnen akoz?— Akoz Zozef ti son garson prefere. Par egzanp, Zakob ti fer koud en zoli kot a re pour Zozef. Zakob ti pli kontan Zozef “akoz i ti sa garson ki i ti gannyen dan son vyeyes” e son premye zanfan avek Rasel, son madanm ki i ti byen kontan.
Labib i dir ki ‘ler bann frer Zozef ti vwar ki zot papa ti pli kontan li, zot ti ay Zozef.’ En zour Zozef ti rakont sa ki i ti reve avek son fanmir, dan sa rev zot tou zot ti pe salye li, menm son papa Zakob. Labib i dir: “Son bann frer ti zalou li” e menm son papa ti dispit avek li akoz i ti’n rakont sa rev.—Zenez 37:1-11.
En pe letan pli tar, ler Zozef ti annan 17 an, son bann frer ti al en bon distans pour pran swen avek troupo kabri ek mouton ki ti pour zot fanmir. Alor Zakob ti anvoy Zozef pour vwar si son bann frer ti byen. Eski ou konnen ki laplipar son bann frer ti oule fer ler zot ti vwar li pe vini?— Zot ti oule touy li! Me de parmi zot, Ribenn ek Zida, pa ti oule fer sa.
Ler serten marsan ki ti pe al Lezip ti pase, Zida ti dir: “Annou vann li.” E se sa ki zot ti fer. Apre zot ti touy en kabri e tranp kot Zozef dan son disan. Pli tar, ler zot ti montre sa kot zot papa, i ti dir: ‘en bebet feros in bezwen manz Zozef!’—Zenez 37:12-36.
Avek letan, Zozef ti ganny faver dirizan Lezip Faraon. Sa ti akoz avek led Bondye i ti kapab eksplik sinifikasyon de rev Faraon. Sa enn premye ti konsernan set bef gra swivi par set bef meg. Sa dezyenm ti konsernan set zepi sereal plen e mir avek set zepi sereal sek. Zozef ti dir ki sa de rev ti vedir ki i ti pou annan en bon rekolt pandan set lannen swivi par set lannen lafamin. Faraon ti met Zozef ansarz pour anmas manze pandan sa bann lannen pour prepar pour sa lafamin ki ti pe vini.
Ler lafamin ti arive, fanmir Zozef ki ti reste byen lwen, ti napa manze. Zakob ti anvoy sa dis frer Zozef ki ti pli aze pour al rod manze Lezip. Ler zot ti ariv devan Zozef, zot pa ti rekonnet li e Zozef pa ti fer zot konnen lekel li. I ti teste son bann frer e i ti vwar ki zot ti vreman regrete akoz zot ti’n mal azir anver li. Apre Zozef ti dir zot lekel li. Pa zot ti vreman kontan pour revwar kanmarad ankor!—Zenez, sapit 40 ziska 45.
Ki ou kapab aprann konsernan zalouzi dapre sa zistwar Labib?— Zalouzi i kapab kree bann gro problenm, menm fer en dimoun anvi fer ditor son prop frer! Annou lir Akt 5:17, 18 ek Akt 7:54-59 e vwar ki bann dimoun ti fer anver bann disip Zezi akoz zot ti zalou.— Apre ki ou’n lir sa bann verse, eski ou’n vwar akoz nou bezwen fer atansyon pour pa vin en dimoun zalou?—
Zozef ti viv ziska 110-z-an. I ti annan zanfan, pti zanfan e aryer pti zanfan. Nou kapab asire ki Zozef ti souvan ansenny zot pour kontan kanmarad e pour evite zalou.—Zenez 50:22, 23, 26.
[Not anba lo paz]
^ par. 3 Si ou pe lir avek en zanfan, sa tre in ganny mete pour ou mazinen fer en poz e permet sa zanfan eksprim son lekor.
Kestyon:
○ Ki savedir zalouzi?
○ Ki zalouzi ti fer bann frer Zozef fer?
○ Akoz Zozef ti pardonn son bann frer?
○ Ki nou kapab aprann atraver sa zistwar?