Larive Mesi ti ganny predir

VI KI zot ti okouran sa ki Izai ek lezot profet ti’n ekrir konsernan larive Mesi, depi byen lontan sa nasyon Zwif ti pe esper son larive. Pour sa rezon alor dan letan Zezi, bokou Zwif ti “dan lespektasyon” ki larive Mesi ti pe aprose. (Lik 3:15) I enteresan pour note ki bann profesi dan Labib i enkli bann detay remarkab lo lavi Mesi. Napa okenn imen ki ti pou’n kapab predir sa bann tel levennman oubyen aranz sityasyon pour ki tou sa bann detay i ganny akonplir pandan lavi Zezi lo later.

Detay konsernan nesans Mesi. Izai ti predir ki en vyerz ti pou donn nesans Mesi oubyen Kris. Apre ki i ti’n dekrir bann sirkonstans mirakile ki Zezi ti ne ladan, Matye ki ti en zapot ti ekrir: “Tousala ti arive pour ki tou sa ki Senyer ti’n dir par son profet i realize: ‘En vyerz pou ansent e i pou donn nesans en garson.’” (Matye 1:22, 23; Izai 7:14) Izai ti osi predir ki Kris ti pou en desandans David par mansyonn spesifikman Zese papa David. Sirman, Zezi ti direkteman sorti dan desandans David. (Matye 1:6, 16; Lik 3:23, 31, 32) Alor, avan nesans Zezi, lanz Gabriyel ti dir avek manman Zezi, Mari: “Bondye pou donn li tronn son papa, David.”—Lik 1:32, 33, nou ki’n met an italik; Izai 11:1-5, 10; Romen 15:12.

 Detay konsernan lavi Mesi. Kan Zezi ti’n vin en adilt, i ti lir aotvwa profesi Izai dan sinagog Nazaret. Sa ti osi enkli sa bann parol: “Lespri Senyer [oubyen “Zeova,” NW] i lo mwan, akoz in konsakre mwan pour anons Bonn Nouvel pour bann pov.” Zezi ti aplik sa profesi lo li menm par dir: “Ozordi sa parol Lekritir ki zot in tande in akonpli.” (Lik 4:17-21; Izai 61:1, 2) Izai ti osi predir ki Zezi ti pou annan limilite e azir dan en fason zantiy e dous anver bann ki ti pou bezwen ganny geri. Matye ti ekrir: “En gran lafoul ti swiv li. I ti geri tou bann ki ti malad, e i ti defann zot dir ki i ete, pour ki parol Profet Ezai i ganny realize . . . ‘I pa pou dispit oubyen kriy ek personn . . . I pa pou kas bann pti banbou pliye.’”—Matye 8:16, 17; 12:10-21; Izai 42:1-4; 53:4, 5.

Detay konsernan soufrans Mesi. Izai ti predir ki Mesi pa ti pou ganny aksepte par lamazorite dimoun Izrael me i ti pou o kontrer vin “en ros ki pou fer dimoun tonbe.” (1 Pyer 2:6-8; Izai 8:14, 15) Sanmenm ki ti vreman arive. Malgre ki Zezi ti fer plizyer mirak, sa bann dimoun “pa ti krwar dan li, pour ki sa ki profet Ezai ti’n dir ti a kapab realize. ‘[Zeova], lekel ki’n krwar nou mesaz . . .?’” (Zan 12:37, 38; Izai 53:1) En rezon akoz bann Zwif pa ti demontre lafwa dan Zezi konman Mesi, ti en krwayans popiler me parkont enn ki fo. Sa ti sa krwayans ki Mesi ti pou imedyatman retir sa nasyon anba dominasyon bann Romen e reetablir en Rwayonm endepandan lo later, Rwayonm David. Alor lefet ki Zezi ti soufer e mor, laplipar bann Zwif pa ti oule krwar ki li menm ki ti Mesi. Me annefe, Izai ti’n predir ki Mesi ti pou soufer avan ki i vin Lerwa.

Dan liv Izai, sa bann parol profetik ki refer avek Mesi i dir: “Mon ti donn mon ledo avek bann ki ti avek fwet . . . Mon figir mon pa’n kasyet kont bann keksoz imilyan ek lakras.” Matye ti ekrir lo sa ki ti arive pandan ki Zezi ti pe ganny zize: “Zot ti kras dan son figir e tap li. En bann ti kalot li.” (Izai 50:6; Matye 26:67) Izai ti ekrir: “I ti pe les li pas dan soufrans, me i pa ti ouver son labous.” Alor, kan Pilat ti kestyonn Zezi an rapor avek lakizasyon ki bann Zwif ti pe fer kont li, Zezi “pa ti reponn en sel mo lo okenn sarz. Sa ti sirprann Gouverner en kantite.”—Izai 53:7; Matye 27:12-14; Akt 8:28, 32-35.

Detay konsernan lanmor Mesi. Profesi Izai ti kontinyen ganny akonplir ler Zezi ti mor e menm apre sa. Izai ti predir: “I pou fer son landrwa lanterman menm avek bann move dimoun e avek bann dimoun ris zour son lanmor.” (Izai 53:9) Ki mannyer sa profesi ti pou ganny akonplir? Zour ki Zezi ti mor, i ti ganny kloute lo en poto ant de bandi. (Matye 27:38) Me plitar, en zonm ris, Zozef ki sorti Arimate ti depoz lekor Zezi dan son kavo nef ki i ti’n fek fer dekoupe dan ros. (Matye 27:57-60) Finalman, lanmor Zezi ti akonplir enn parmi bann laspe pli enportan dan profesi Izai. Kan i ti pe koz lo Mesi, Izai ti dir: “Sa enn ki drwat, mon serviter, pou fer bokou dimoun ganny vwar drwat; e zot fot i pou anmennen li menm.” San dout, lanmor Zezi in fourni sa sakrifis pour ki lefe pese i ganny retire lo tou bann dimoun ki fidel.—Izai 53:8, 11; Romen 4:25.

 Bann profesi pou sirman ganny akonplir

Pour idantifye lidantite Mesi par servi Lekritir, bann zapot ek Zezi li menm ti sit profesi Izai pli souvan ki tou lezot liv Labib. Parkont, liv Izai pa sa sel liv ki predir lavenir. Bokou lezot profesi dan Lekritir Ebre i osi refer avek Zezi, son Rwayonm ek sa bann bon keksoz ki sa Rwayonm pou akonplir dan lavenir. * (Akt 28:23; Revelasyon 19:10) Ki kantite sir ou sir ki sa bann profesi pou ganny akonpli? Zezi ti dir avek bann zwif ki ti pe ekout li: “Pa krwar ki mon’n vin pour aboli Lalwa ek lansennyman bann profet [setadir Lekritir Ebre]. Mon pa’n vin pour detri me pour akonpli. An verite mon dir zot: Osi lontan ki lesyel ek later i egziste, pa menm en pli pti let, ni en pli pti detay lalwa pa pou ganny detri, ziska ki lafen tou keksoz i a’n ganny akonpli.”—Matye 5:17, 18.

Zezi ti osi fer resorti lakonplisman bann profesi dan Labib an rapor avek bann levennman ki ti pou arive pandan ki i ti pou lo later ek bann levennman ki pou arive byento. (Danyel 9:27; Matye 15:7-9; 24:15) Deplis, Zezi ek son bann disip ti predir bann levennman ki ti pou arive apre zot lepok, enkli plizyer levennman ki nou’n vwar arive dan nou letan. Sa lartik swivan pou diskit konsernan sa bann levennman ek lezot profesi Labib ki pou ganny akonplir dan lavenir.

[Not lo paz 6]

[Portre lo paz 4]

“En vyerz pou . . . donn nesans en garson”

[Portre lo paz 5]

“Mon figir, mon pa’n kasyet kont bann keksoz imilyan”