Lekel ki kapab konn lavenir?

“Mwan mon Bondye . . . , sa Enn ki depi o konmansman i revel konklizyon, e depi byen lontan bann keksoz ki pa ankor arive.”—Izai 46:9, 10.

DAN sa bann letan difisil, dan zot zefor pour predir lavenir bann eksper dan domenn politik, finansyel e sosyal pe etidye listwar ek bann tandans imen dan nou letan. I annan lezot ki dan zot dezespwar pour konn zot lavenir zot in personnelman tourn ver astrolozi ek pratik demonyak pour ganny larepons. Sa bann tel dimoun i souvan dezapwente avek rezilta ki zot gannyen. Eski i vreman enposib pour konnen ki pou arive avek sa lemonn, nou fanmir ek nou konman bann endividi? Alor eski i annan okenn dimoun ki kapab get dan lavenir?

Dan son parol ki i ti dir avek profet Izai, parey in ganny site anler, Zeova, Bondye Tou pwisan ti dekrir sa abilite ki i annan pour predir lavenir. Atraver Izai, Bondye ti predir liberasyon ansyen pep Izrael ki ti an egzil Babilonn e zot retour pour rekonstrir Zerizalenm ek tanp. Ki kantite presi sa profesi ti presi? Apepre 200-z-an avan, Izai ti mansyonn egzakteman non sa enn ki ti pou konkerir Babilonn dan lavenir e sa ti Siris. An plis ki sa, Izai ti dekrir egzakteman lafason ki Siris ti pou fer sa. I ti dir ki i ti pou sanz direksyon delo dan larivyer Efrat, ki ti pe servi konman en proteksyon pour sa lavil. I ti menm predir ki Siris ti pou trouv baro sa lavil ouver par neglizans sa zour, ki ti kontribye pour Siris fasilman ganny laviktwar.—Izai 44:24–45:7.

Tou lekontrer avek Bondye, zonm napa pouvwar pour get dan lavenir. Lerwa Salomon ki ti saz ti ekrir: “Pa bezwen vant ou lekor konsernan demen. Parski ou pa konnen kwa ki en zour pou anmennen.” (Proverb 27:1) Sa ki i ti dir i ankor vre ozordi. Napa okenn imen ki kapab get dan lavenir, menm son prop lavenir. Ki mannyer Bondye i diferan dan sa laspe? I antyerman konpran tou keksoz ki i’n kree, sa i enkli natir ek bann tandans ki imen i annan. Kan i swazir pour fer li, Bondye i kapab predir egzakteman ki mannyer en endividi oubyen bann nasyon pou reazir. An plis ki sa, i annan en abilite total pour kontrol nenport ki levennman. Kan i predir ki en keksoz pou arive atraver son bann profet, i vin “sa Enn ki fer parol son serviter vin vre e sa Enn ki akonplir konsey son bann mesaze konpletman.” (Izai 44:26) Zis Zeova ki kapab vreman fer sa deklarasyon.

Izai ti viv plis ki 700-z-an avan Mesi. Kantmenm sa, Izai ti predir en kantite detay konsernan larive Mesi. Parkont, partikilyerman depi dizwityenm syek an montan, in annan kritik konsernan si sa liv Izai i egzakt. Zot  in dir ki sa bann profesi konsernan Mesi pa ti’n vreman ganny predir davans me in ganny ekrir plitar apre ki sa bann levennman ti’n fini arive. An 1947, sa bann deklarasyon ti ganny prouve fo kan en kopi sa liv Izai ti ganny dekouver ansanm avek lezot ansyen roulo dan en kavern o bor Lanmer Mor. Bann arkeolog in prouve ki sa kopi ti ganny fer plis ki san-t-an avan nesans Mesi oubyen Kris. Wi, Labib in revel lavenir!

Izai ek lezot ekriven Labib pa ti pou’n kapab predir bann levennman dan lavenir zis par zot prop konnesans. Me o kontrer “se Sent-Espri ki’n pous zonm pour anons mesaz Bondye.” (2 Pyer 1:21) Dan sa bann lartik swivan nou pou konsantre lo serten detay konsernan lavi Zezi ki Izai ti predir. Apre nou pou egzamin bann levennman ki Zezi ek son bann disip in predir pour nou letan e dan lavenir.