“Rezeste kont Dyab” parey Zezi ti fer

“Reziste kont Dyab e i ava sov lwen avek zot.”—ZAK 4:7.

1. Ki lopozisyon Zezi ti konsyan i ti pou gannyen lo later e avek i rezilta?

ZEZI KRI ti okouran ki i ti pou rankontre lopozisyon avek Dyab. Sa levidans ti kler dapre sa parol ki Bondye ti dir avek sa serpan pour adres sa lanz rebel ki ti pe koz atraver sa serpan: “Mon pou met en laenn ant ou ek sa madanm, [lorganizasyon Zeova dan lesyel] ant ou desandans ek son desandans. I [Zezi Kri] pou kraz ou latet e ou pou kraz son talon.” (Zen. 3:14, 15; Rev. 12:9) Lefet ki Zezi ti pou ganny kraze lo talon, sa ti vedir ki i ti pou zis ganny en soufrans tanporer. I ti pou ganny touye lo later, Zeova ti pou resisit li e donn li laglwar dan lesyel. Parkont, lefet ki sa serpan ti pou ganny kraze lo latet, sa ti vedir ki Dyab ti pou sibir en blesir mortel kot i pa ti pou zanmen kapab rekipere.—Lir Akt 2:31, 32; Ebre 2:14.

2. Akoz Zeova ti asire ki Zezi ti pou reisi reziste Dyab?

² Zeova ti annan lasirans ki Zezi ti pou akonplir son latas avek sikse e opoz Satan pandan ki i ti pou lo later. Akoz Zeova ti kapab annan sa lasirans? Parski i ti’n kree Zezi dan lesyel en kantite letan avan. I ti’n obzerv li e i ti konnen ki sa “zouvriye abil” e “premye-ne tou kreasyon” ti obeisan e fidel. (Prov. 8:22-31; Kol. 1:15) Alor, kan Zezi ti ganny anvoye lo later, Zeova ti permet Dyab teste li menm ziska ki i ti touy li. Bondye ti asire ki Son sel Garson ti pou reisi reziste oubyen opoz Dyab.—Zan 3:16.

 Zeova i protez Son serviter

3. Ki latitid Dyab i annan anver bann serviter Zeova?

³ Zezi ti refer avek Dyab konman ‘sef sa lemonn’ e i ti averti Son bann disip ki zot osi zot ti pou ganny persekite parey li. (Zan 12:31; 15:20) Sa lemonn ki dan pouvwar Satan i ay bann vre Kretyen akoz zot servi Zeova e zot bann predikater ki pres lo ladrwatir. (Mat. 24:9; 1 Zan 5:19) Bann Kretyen swazir ki ankor lo later pou finalman al dirize ansanm avek Zezi dan Rwayonm dan lesyel, alor Dyab i target zot premye. Satan i osi target sa kantite Temwen Zeova ki annan sa lespwar pour viv pour touzour dan paradi lo later. Parol Bondye i averti nou: “Zot lennmi, dyab pe pas partou konman en lyon ki kriye, pe rode ki i pou devore.”—1 Pyer 5:8.

4. Dan nou letan, kwa ki prouve ki pep Bondye in reisi reziste kont Dyab avek sikse?

⁴ Konman en lorganizasyon ki annan sipor Zeova, nou reziste e opoz Dyab avek sikse. Egzamin sa bann fe: Pandan sa 100-t-an ki’n pase, serten parmi bann pli move diktater dan listwar in esey elimin pep Zeova. Me rezilta i ki sa bann move diktater in ganny eliminen e lakantite Temwen Zeova pe kontinyen ogmante. La konmela i annan pros 7,000,000 Temwen dan plis ki 100,000 kongregasyon atraver lemonn.

5. Ki mannyer Izai 54:17 in vin vre pour bann serviter Zeova?

⁵ Ler i ti pe adres ansyen Izrael konman son “madanm,” Bondye ti promet: “Nenport ki zarm ki pou ganny formen kont ou pa pou reisi, e nenport ki lalang ki pou lev kont ou dan zizman ou pou kondannen. Sa i posesyon erediter bann serviter Zeova, e zot ladrwatir i sorti kot mwan.” (Iza. 54:11, 17) Pandan sa “bann dernyen zour,” sa promes in vin vre pour pep Bondye dan lemonn antye. (2 Tim. 3:1-5, 13) Nou pe kontinyen reziste kont Dyab e napa zarm ki i esey servi pour elimin pep Bondye ki pe reisi akoz Zeova i dan nou kote.—Ps. 118:6, 7.

6. Ki sa profesi dan Danyel i dir nou lo lavenir dominasyon Dyab?

⁶ Avek lafen sa move lemonn ki pe aprose byen vit, tou bann ki form parti dominasyon Satan pou ganny eliminen konpletman. Ler i ti pe ekrir anba lenspirasyon, profet Danyel ti predir: “Dan bann zour sa bann lerwa, [bann ki egziste dan nou letan] Bondye lesyel pou etabli en rwayonm [dan lesyel] ki pa pou zanmen ganny detrir. Sa rwayonm li menm pa pou pas avek okenn lezot pep. I pou kraz e met en lafen avek tou sa bann rwayonm, [ki egziste la konmela] e li menm i pou dire pour en letan endefini.” (Dan. 2:44) Ler sa pou arive, dominasyon Satan ensi ki dominasyon bann imen enparfe pou disparet. Tou bann ki form parti lemonn Dyab pou’n ganny eliminen pour touzour e Rwayonm Bondye pou diriz later antye san ganny opoze.—Lir 2 Pyer 3:7, 13.

7. Ki mannyer nou konnen i posib pour bann serviter Zeova reisi reziste Dyab personnelman?

⁷ San okenn dout, lorganizasyon Zeova pou ganny proteze e i pou prospere spirityelman. (Lir Psonm 125:1, 2.) Me nou? Labib i dir nou ki i posib pour nou opoz oubyen reziste Dyab, zis parey Zezi ti fer. Sirman sa profesi ki Kris ti donn zapot Zan i montre ki malgre Satan i opoz nou, “en gran lafoul,” sa bann ki annan lespwar pour viv lo later pou sirviv lafen sa lemonn. Dapre Labib, zot pou kriye avek en lavwa for: “Nou delivrans i sorti kot nou Bondye ki asize lo tronn ek kot Lanyo [Zezi Kri].” (Rev. 7:9-14) Bann Kretyen swazir i ganny dekrir konman bann ki pe konkerir Satan e zot konpanyon, “lezot mouton” osi i opoz li avek sikse. (Zan 10:16, NW; Rev. 12:10, 11) Pour reisi reziste Dyab i demann bokou zefor ek siplikasyon pour ki Bondye i “anpes nou tonm dan le mal.”—Mat. 6:13.

 Sa legzanp parfe pour reziste Dyab

8. Lekel sa premye tantasyon ki’n ganny rikorde ki Dyab ti servi avek Zezi dan dezer e ki mannyer Zezi ti reponn?

⁸ Dyab ti esey kas fidelite Zezi. Dan dezer, Satan ti servi tantasyon dan son zefor pour fer Zezi dezobeir Zeova. Me, Zezi ti kit en legzanp parfe lo konman pour reziste Satan. Apre ki i ti’n zennen pour 40 zour ek 40 lannwit, sirman Zezi ti lafen. Satan ti dir li: “Si ou Garson Bondye donn lord ki sa bann ros a vin dipen.” Me Zezi pa ti servi sa pouvwar ki Bondye ti’n donn li pour benefisye son lekor. O kontrer, Zezi ti dir li: “Dan Lekritir i’n dir: ‘Zonm pa viv zis lo dipen tousel me lo tou parol ki sorti dan labous Bondye.’”—Mat. 4:1-4; Det. 8:3.

9. Akoz nou devret reziste lesey Dyab pour eksplwat nou bann dezir natirel?

⁹ Denozour, Dyab i anvi eksplwat dezir oubyen lanvi natirel ki bann serviter Zeova i annan. Relasyon seksyel imoral i en keksoz ki vreman popiler dan sa lemonn koronpi, alor nou devret fer li en rezolisyon pour reziste okenn tantasyon ki relye avek sa pratik. Parol Bondye i met lanfaz lo la par dir: “Eski zot pa konnen ki bann ki pratik sa ki mal pa pou erit Rwayonm Bondye? Pa les zot ganny anbete, ni bann ki pratik bann akt imoral, ni bann ladorater zidol, ni bann adilter, ni bann omoseksyel . . . pa pou erit Rwayonm Bondye.” (1 Kor. 6:9, 10) I kler alor ki bann dimoun ki viv en lavi imoral e refize sanze pa pou kapab viv dan nouvo lemonn Bondye.

10. Dapre Matye 4:5, 6, ki sa lot tantasyon Satan ti servi pour esey kas fidelite Zezi?

¹⁰ Konsernan en tantasyon ki Zezi ti eksperyanse dan dezer, Labib i dir: “Alor [D]yab ti anmenn Zezi Zerizalenm, Lavil Sent, e ti fer li debout [anler lo miray otour] Tanp. Dyab ti dir li, ‘Si ou Garson Bondye, zet ou lekor anba. I’n ekrir: “I a donn lord son bann lanz lo ou size; E zot pou anmenn ou lo lanmen. Atansyon ki ou konny ou lipye avek ros.”’” (Mat. 4:5, 6) Sa aksyon ti sipoze enn ki spektakiler dapre Satan parski Zezi ti pou kapab demontre son pouvwar konman Mesi. Me an realite, ti pou napa laprouvasyon Bondye dan sa aksyon, alor i ti pou en move aksyon ki pa apropriye. Ankor enn fwa, Zezi ti reste fidel avek Zeova. I ti sit en verse Labib pour reponn Satan. I ti dir: “I’n osi ekri: ‘Ou pa devre tant Senyer ou Bondye.’”—Mat. 4:7; Det. 6:16.

11. Ki mannyer Satan i kapab tant nou e ki rezilta sa i kapab anmennen?

¹¹ Satan i kapab tant nou pour rod laglwar dan diferan fason. I menm kapab esey tant nou pour imit lanmod ek laparans sa le monn ouswa partisip dan bann divertisman ki pa tro apropriye. Me si nou inyor bann konsey Labib e imit sa lemonn, eski nou pou ekspekte ki bann lanz i protez nou avek move lefe sa move swa? Menm si Lerwa David ti repantir pour sa pese ki i ti komet avek Batseba, i pa ti ganny eparnyen avek konsekans son aksyon. (2 Sam. 12:9-12) Annou pa teste Zeova dan bann fason ki pa apropriye, petet par devlop en lanmitye avek sa lemonn.—Lir Zak 4:4; 1 Zan 2:15-17.

12. Ki sa tantasyon ki ganny mansyonnen dan Matye 4:8, 9 e ki mannyer Garson Bondye ti reazir?

¹² I annan ankor en lot tantasyon ki Dyab ti esey servi avek Zezi dan dezer, i ti ofer li pouvwar politik. Satan ti montre Zezi tou rwayonm lo later ek zot laglwar e i ti dir: “Mon a donn ou tousala, si ou azenou e ou ador mwan.” (Mat. 4:8, 9) Pa sa ti vreman en aksyon dezonnet delapar Satan, vi ki i ti pe esey rod sa ladorasyon ki zis Zeova tousel ki merite e tant Zezi pour ki i vin enfidel avek Zeova! Kan i ti pe medit lo sa dezir pour ganny adore, sa lanz ki oparavan ti fidel avek Bondye ti fer pese e vin Satan oubyen Dyab ki sitan move, voras e ki tant lezot. (Zak 1:14, 15) Kontrerman avek Satan, Zezi ti determinen pour reste fidel avek son Papa ki dan lesyel, alor i ti dir: “Sorti la ale Satan! I’n ekri: ‘Se Senyer ou Bondye ki ou devre adore e li tousel ki ou devre servi!’” Alor, ankor enn fwa Zezi ti reziste Dyab dan en fason kler e ferm. Garson Bondye pa ti oule nanryen pour fer avek lemonn Satan e i pa ti pou zanmen ador sa enn ki move.—Mat. 4:10, nou ki’n met an italik; Det. 6:13; 10:20.

“Reziste kont Dyab e i ava sov lwen avek zot”

13, 14. (a) Ki Satan ti pe ofer Zezi kan i ti montre li tou rwayonm lo later? (b) Ki mannyer Satan i esey tronp nou?

¹³ Dyab ti montre Zezi tou bann rwayonm lo later. Par fer sa, Satan ti pe ofer Zezi en lotorite ki okenn imen pa’n deza gannyen oparavan. Satan ti krwar ki Zezi ti pou ganny atire par sa ki i ti vwar e ki i ti pou reisi konvenk li ki i ti pou vin sa dirizan politik pli renonmen lo later. Denozour, Dyab pa pe ofer nou bann Rwayonm, me i pe esey sali nou leker avek bann keksoz ki nou vwar, tande e mazin lo la.

¹⁴ Dyab ki pe kontrol sa lemonn. Alor, li ki annan kontrol lo medya. I pa sirprann nou alor ki bann keksoz ki sa lemonn i ofer pour gete, ekoute e lir i ranpli avek limoralite seksyel ek vyolans. Bann piblisiter atraver lemonn i promot bann piblisite pour esey fer nou devlop sa dezir pour aste bokou keksoz ki nou pa ni menm bezwen. Atraver sa bann metod, Dyab pe kontinyelman servi bann keksoz materyel pour atir nou latansyon lo bann keksoz ki kapab atiran pour nou lizye, zorey ek lespri. Me letan nou refize gete, ekoute e lir bann keksoz ki pa akseptab dapre Labib, anfet nou pe dir: “Sorti la ale Satan!” Ler nou rezet lemonn Satan ki enpir, nou montre ki nou pe imit Zezi vi ki i ti ferm e direk. Nou pa form parti lemonn Satan. Sa i kler par lafason ki nou idantifye nou lekor konman Temwen Zeova ek bann disip Kris dan travay, kot lekol, dan vwazinaz, avek nou fanmir ek bann ki konn nou.—Lir Mark 8:38.

15. Akoz opoz Satan i vedir kontinyen reste vizilan?

¹⁵ Apre ki son trwazyenm lesey pour fer Zezi fer konpromi e kas son fidelite avek Bondye pa ti marse, “dyab ti kit Zezi.” (Mat. 4:11) Parkont, sa pa ti vedir ki Satan ti annan lentansyon pour aret tant Zezi, parski sa resi i dir ki “ler dyab ti’n fini tant Zezi dan tou diferan fason [dan dezer], i ti kit li ziska en pli bon lokazyon.” (Lik 4:13) Kan nou reisi reziste Dyab, nou devret remersye Zeova.  Me nou devret osi kontinyen rod led avek Zeova parski Dyab pou retournen pli tar pour tant nou dan en pli bon lokazyon, andotmo en letan pli favorab pour li, en letan kot nou pa neseserman ekspekte ganny tante. Alor, nou devret toultan reste vizilan e pare pour kontinyen donn Zeova sa servis sakre malgre nenport tes nou kapab rankontre.

16. Ki lafors pwisan Zeova i donn nou e akoz nou devret priye pour ganny li?

¹⁶ Pour ed nou dan nou zefor pour reziste Dyab, nou devret priye pour ganny sa pli gran led pwisan dan liniver e sa i led lespri sen Bondye. Son lespri sen pou permet nou fer bann keksoz ki ti pou enposib pour nou fer lo nou menm. Zezi ti asir son bann disip ki lespri sen Bondye i disponib par dir: “Si, zot, [enparfe e menm] move konman zot ete, zot kapab donn bon keksoz zot zanfan, i annan plis rezon pour ki zot Papa ki dan lesyel pou donn son Lespri Sen tou bann ki demann li?” (Lik 11:13) Annou kontinyen priy Zeova pour nou ganny son lespri sen. Avek sa lafors pli pwisan ki pou avek nou dan nou determinasyon pour reziste dyab, nou pou kapab ranport laviktwar. Apard ki en lapriyer regilye e senser, nou devret osi met tou nou lekipman batay spirityel ki Bondye i donn nou pour ki nou “reziste kont tou bann riz Dyab.”—Efe. 6:11-18.

17. Ki lazwa ki ti ed Zezi reziste Dyab?

¹⁷ I annan en lot keksoz ki ti ed Zezi pour reziste Dyab e sa i kapab ed nou osi. Labib i dir: “[Akoz] lazwa ki i merite, [Zezi] i’n sibir lanmor lo [en “poto martir,” NW] san pran kont laont e la i’n asiz dan kote drwat tronn Bondye.” (Ebr. 12:2) Nou pou annan menm lazwa si nou siport souvrennte Zeova, onor son non sen e konsantre lo sa rekonpans lavi eternel ki devan nou. Pa nou pou ­vreman ganny en gran lazwa kan Satan e tou sa ki i’n fer pou ganny eliminen pour touzour e ‘bann dimoun ki annan limilite pou posed later e zot pou trouv bokou plezir dan labondans lape’! (Ps. 37:11) Alor, kontinyen reziste Dyab parey Zezi ti fer.—Lir Zak 4:7, 8.

Ki ou pou reponn?

• Ki laprev i annan ki Zeova i protez son pep?

• Zezi ti opoz Satan, ki mannyer sa i en legzanp pour nou?

• Dan ki fason ou kapab reziste oubyen opoz Dyab?

[Kestyon]

[Portre lo paz 30]

Lanmitye avek sa lemonn i fer nou vin lennmi Bondye

[Portre lo paz 32]

Zezi ti rezet tou bann rwayonm sa lemonn ki Satan ti ofer li