Sa ki pou arive byento in fini ganny predir

KAN i ti pe koz lo lavenir imen ek later, zapot Pyer ti ekrir: “Me nou, nou pe espere dapre son [Bondye] promes en nouvo lesyel ek en nouvo later kot pou annan lazistis.” (2 Pyer 3:13) Sa premye profesi konsernan en “nouvo lesyel ek en nouvo later” ti ganny ekrir dan liv Izai. (Izai 65:17; 66:22) Kan i ti refer avek sa profesi, Pyer ti montre ki sa pa ti ankor konpletman ganny akonplir dan son letan.

 Plitar, apepre lannen 96 N.L., sa Revelasyon ki ti ganny donnen atraver zapot Zan, ti asosye sa “nouvo later” avek sa bann benediksyon ki pou annan anba dominasyon Rwayonm Bondye. (Revelasyon 21:1-4) Parol ki Zezi ek Pol ti dir konsernan bann kondisyon ki pou egziste dan sa lemonn zis avan dominasyon Rwayonm Bondye pe ganny akonplir dan nou letan. Alor, nou kapab ekspekte ki sa Rwayonm pou byento anmenn sa nouvo lemonn. Ki mannyer sa nouvo lemonn pou ete? Liv Izai dan Labib i dir nou.

Bann benediksyon dan sa nouvo lemonn

Ini dan ladorasyon e lape dan lemonn antye. “Zot pou bezwen forz zot lepe an pyos e zot lans an sizay. Nasyon pa pou lev lepe kont nasyon e zot pou nepli aprann lager.”—Izai 2:2-4.

Imen pou viv anpe avek zannimo. “Lelou pou vreman reste avek en pti mal mouton pour en serten letan e en leopar pou dormi avek en pti kabri. En pti bef, en zenn lyon for ek bann zannimo ki ganny byen nouri, zot tou zot pou ansanm; e en pti garson pou gid zot. En bef ek en lours pou manz ansanm; zot piti pou dormi ansanm. Menm en lyon pou manz lapay zis parey en toro. . . . Zot pa pou fer okenn keksoz mal oubyen koz okenn destriksyon dan tou mon montanny sen, akoz later pou vreman ranpli avek konnesans Zeova zis parey delo i kouver lanmer.”—Izai 11:6-9.

Manze pou annabondans pour tou dimoun. “Zeova bann larme pou sertennman fer pour tou pep, lo sa montanny, en festen avek bann nouritir byen an lwil, en festen avek diven ki’n repoze lo son lanmar, bann nouritir ris an lwil ranpli avek lanmwel lezo, diven ki’n repoze lo son lanmar e filtre.”—Izai 25:6.

Lanmor pou nepli egziste. “I [Bondye] pou anval lanmor pour touzour, e Souvren Senyer Zeova pou sirman eswiy larm lo tou figir. E bann repros kont son pep i pou retire lo later akoz Zeova li menm in dir.”—Izai 25:8.

Bann dimoun mor pou resisite. “Ou bann mor pou reviv, zot pou releve ankor. Bann ki dormi dan later pou leve e zot pou kriye avek lazwa . . ., later pou fer bann mor reviv.”—Izai 26:19, Parole de Vie.

Mesi, en ziz ki zis. “I pa pou ziz selman par laparans, i pa pou ni koriz dapre zis sa ki i’n tande dan son zorey. I pou ziz bann dernyen dimoun dan en fason zis e i pou koriz bann dimoun dous lo later dan en fason ki drwat.”—Izai 11:3, 4.

 Bann dimoun ki aveg e sourd pou ganny geri. “Lizye bann aveg pou ouver e zorey bann sourd pou debouse.”—Izai 35:5.

Bann landrwa dezerte pou vin prodiktif. “Dezer ek rezyon ki napa delo pou rezwir e laplenn dezerte pou dan lazwa e i pou fleri parey safran. I pou vreman fleri e i pou vreman dan lazwa e i pou kriye avek lakontantman.”—Izai 35:1, 2.

En nouvo later. “Mon pe kree en nouvo lesyel [en nouvo gouvernman dan lesyel] ek en nouvo later [en nouvo sosyete imen ki drwat]; e bann keksoz dan lepase pa pou ganny rapel, zot pa pou ni vin dan leker. Me rezwir, zot lepep e trouv lazwa dan sa ki mon pe kree pour touzour. . . . Zot [bann zabitan sa nouvo lemonn ki Bondye in promet] pou konstrir lakaz e zot pou reste ladan; wi, zot pou plant pye rezen e zot pou manz son fri. Zot pa pou konstrir pour en lot reste e zot pa pou plante pour en lot manze. Parski lakantite letan ki mon pep pou viv pou parey lakantite letan ki en pye dibwa i egziste; e sa bann ki mon’n swazir pou profit plennman travay zot lanmen. Zot pa pou rente pour nanryen e zot pa pou ganny zanfan pour donn problenm; akoz zot bann zanfan ki Zeova in beni ensi ki zot desandans. E sa letan avan menm ki zot apel mwan mon pou reponn, menm pandan ki zot ankor pe koze, mon pou tande.” “Sa i sa ki Zeova in dir: ‘Zis parey sa nouvo lesyel ek sa nouvo later ki mon pe fer, i la devan mwan, pareyman, zot bann desandans ek zot non pou reste [pour touzour].’”—Izai 65:17-25; 66:22.

En lavenir merveye in ganny predir

Liv Izai pa sa sel liv Labib ki predir bann benediksyon pour lavenir. Labib i ranpli avek bann profesi ki dekrir sa bann keksoz merveye ki Bondye pou akonpli atraver son Rwayonm anba dominasyon Kris. * Eski ou ti a kontan viv dan paradi dan sa bann kondisyon parey? Wi ou kapab! Vwar pour ou menm ki Labib i vreman dir konsernan plan Bondye pour lavenir e aprann konman ou kapab form par dan son plan. Temwen Zeova pou kontan pour ed ou.

[Not anba lo paz 10]

[Portre lo paz 8]

Imen pou viv anpe avek kanmarad ek bann zannimo

[Portre lo paz 9]

Bann dimoun mor pou resisite

[Portre lo paz 10]

Later antye pou vin en paradi