Akoz ou devret gard ou lentegrite?
Akoz ou devret gard ou lentegrite?
“Ziz mwan O Zeova, . . . dapre mon lentegrite.”—PS. 7:8.
1, 2. Ki serten sityasyon ki kapab prezant en defi pour lentegrite en Kretyen?
MAZIN trwa diferan sityasyon: En garson pe ganny sikannen avek serten son bann kanmarad lekol. Zot pe esey provok li pour ki i perdi son tanperaman, petet par zoure ouswa lager. Eski i pou revanze oubyen i pou kontrol son lekor e ale? En msye marye i tousel kot li e i pe fer serten resers lo Internet. En bwat ki pe fer piblisite en sit pornografi i aparet lo lekran son konpiter. Eski i pou les li ganny tante e al lo sa sit ouswa non? En ser Kretyen pe koze ansanm avek lezot ser e en sel kou rimer lo en ser dan kongregasyon i konmans ganny rakonte. Eski li osi i pou partisip dan sa move konversasyon ouswa i pou esey sanz topik?
2 Menm si sityasyon sak dimoun i diferan avek kanmarad zot annan en keksoz an komen: Zot tou zot bezwen lalit pour gard zot lentegrite konman Kretyen. Eski ou osi ou reflesir lo ou lentegrite anmezir ki ou etablir ou lobzektif dan lavi, fer fas avek ou bann lenkyetid e pran swen avek ou bann bezwen? Zour apre zour dimoun i konsernen avek zot laparans, lasante, defi pour ganny zot bouse manze, problenm avek lezot, lavi fanmir e plizyer lezot keksoz ankor. I kapab ki nou pou donn bokou latansyon sa bann keksoz. Me kwa ki enportan pour Zeova ler i egzamin nou leker? (Ps. 139:23, 24) Nou lentegrite.
3. Ki swa vreman spesyal Zeova i les nou fer e ki nou pou egzaminen dan sa lartik?
3 Zeova, sa Enn ki donn nou “tou don ekselan, [e] tou kado parfe” in donn nou en varyete kado. (Zak 1:17) Gras a li nou annan bann kado parey en lekor, en lespri, en lasante ki ase bon e diferan abilite. (1 Kor. 4:7) Parkont, Zeova pa fors nou pour gard nou lentegrite. I les nou swazir pour nou menm si nou pou devlop sa kalite. (Det. 30:19) I bon alor pour nou egzaminen ki si sa lentegrite. Nou pou osi vwar trwa rezon akoz sa kalite i vreman enportan.
Ki si sa lentegrite?
4. Ki lentegrite i enplike e ki nou kapab aprann avek lalwa Zeova konsernan sakrifis bann zannimo?
4 Bokou dimoun pa tro asire ki si sa lentegrite. Serten i krwar ki lonnekte i en lot mo pour lentegrite. Sa kalite i enportan me i zis en laspe dan sa mo lentegrite. Parey i ganny servi dan Labib, sa mo lentegrite i annan sa lide en keksoz ki konplet e san defo moralman. Bann mo Ebre ki relye avek “lentegrite” i sorti dan en mo ki vedir antye oubyen san defo. Enn parmi sa bann mo i ganny servi an rapor avek sakrifis bann zannimo ki ti ganny ofer avek Zeova. Pour kapab ganny laprouvasyon Zeova, en zannimo ki ti ganny ofer konman sakrifis ti devret konplet oubyen san defo. (Lir Levitik 22:19, 20. *) Zeova ti seryezman reprimann bann dimoun ki ti volonterman dezobeir son lenstriksyon par ofer bann zannimo ki bwet bwete, malad ouswa aveg konman sakrifis.—Mal. 1:6-8.
5, 6. (a) Ki legzanp ki montre ki souvan nou kontan bann keksoz ki konplet e san defo? (b) Eski bann imen i bezwen parfe pour zot gard zot lentegrite? Eksplike.
5 Sa lide rode e apresye bann keksoz ki konplet ouswa san defo pa drol. Par egzanp, mazin en dimoun ki fer koleksyon liv e ki trouv en liv ki annan gran valer zis pour li dekouver ki sa liv i mank plizyer paz enportan. I pou dezapwente e i pou retourn sa liv dan son plas lo letazer. Oubyen mazin en madanm ki pe marse lo lans pour anmas kokiy. I etonnen par labote ek varyete sa bann kreasyon, de tanzantan i bes anba pou egzamin enn. Lekel parmi sa bann kokiy ki i pou garde? Sa bann ki antye ki pa’n kas kase. Pareyman, Bondye pe rod bann dimoun ki annan sa kalite setadir bann ki konplet e san defo.—2 Kron. 16:9.
6 Kantmenm sa ou kapab demande si nou bezwen parfe pour nou annan lentegrite. Vi ki nou enparfe e fer pese, nou kapab panse ki nou en pe parey sa liv ki pa konplet ouswa sa kokiy ki mank bout. Eski parler ou santi ou koumsa? Reste asire ki Zeova pa ekspekte nou parfe dan en sans konplet. I pa zanmen ekspekte nou fer plis ki sa ki nou kapab fer. * (Ps. 103: 14; Zak 3:2) Parkont i ekspekte ki nou gard nou lentegrite. Alor, eski i annan en diferans ant perfeksyon ek lentegrite? Wi. Pour donn en legzanp: En zennonm i kontan en zenn fiy ki i pe al marye avek. Byensir i pa pou ekspekte ki sa fiy i parfe. Me pourtan i pou saz pour li ekspekte ki lanmour ki sa fiy i annan pour li i senser setadir i kontan zis li tousel. Pareyman Zeova i “en Bondye ki demann en devosyon zis pour [li] tousel.” (Egz. 20:5) I pa ekspekte nou parfe, me i ekspekte ki nou kontan li avek tou nou leker e donn li sa ladorasyon ki zis li tousel ki merite.
7, 8. (a) Ki legzanp Zezi in kite lo lentegrite? (b) Dapre Labib ki savedir lentegrite?
7 Sa i kapab fer nou rapel larepons ki Zezi ti donnen kan i ti ganny demande lekel sa pli gran komannman. (Lir Mark 12:28-30.) Zezi pa ti zis donn larepons me i ti viv an armoni avek son larepons. I’n kit sa pli bon legzanp pour kontan Zeova avek tou nou lespri, leker, nanm ek lafors. I ti montre ki lentegrite pa zis ganny eksprimen par parol me par bon aksyon ek motivasyon. Pour nou gard nou lentegrite nou bezwen swiv legzanp Zezi.—1 Pyer 2:21.
8 Alor sa mo lentegrite dapre Labib i vedir: En devosyon senser zis avek Zeova tousel ensi ki avek son lavolonte ek son plan. Gard nou lentegrite i vedir ki dan nou lavi tou le zour nou pou premyerman rod fason pour fer plezir Zeova. Nou bann priyorite dan lavi pou an armoni avek son bann priyorite. Annou vwar trwa rezon akoz sa i vreman enportan.
1. Nou lentegrite ek drwa Zeova konman souvren
9. Ki mannyer nou lentegrite i relye avek drwa Zeova konman souvren iniversel?
9 Drwa Zeova pour dirize pa depan lo nou lentegrite. Son souvrennte i zis, eternel e iniversel. Son souvrennte pou touzour koumsa ki swa bann lanz ek imen i dakor oubyen non. Parkont, souvrennte Bondye ti ganny kestyonnen dan lesyel e lo later. Alor Son drwa pour dirize i bezwen ganny zistifye setadir ganny prouve drwat, zis e enn ki enplik lanmour, devan tou lezot kreatir entelizan. Konman Temwen Zeova nou kontan koz lo souvrennte iniversel Bondye avek nenport dimoun ki anvi ekoute. Me ki mannyer nou kapab pran nou pozisyon lo sa size? Ki mannyer nou montre ki nou swazir Zeova konman nou Souvren? Par gard nou lentegrite.
10. Ki lakizasyon Satan in fer an rapor avek lentegrite bann imen e ki mannyer ou pou anvi reponn sa?
10 Annou vwar ki mannyer sa i enplik ou lentegrite. Satan in touzour dir ki napa personn ki pou siport souvrennte Bondye e ki napa personn ki pou servi li akoz i kontan li senserman. Devan en gran kantite lanz ki ti pe ekoute, Dyab ti dir Zeova: “Lapo pour lapo e tou sa ki en zonm i annan i pou donnen pour son lavi.” (Zob 2:4) Remarke ki Satan pa ti pe dir sa parol zis dan ka Zob sa zonm drwat, me i ti pe koz lo bann imen an zeneral. Labib i apel Satan “lakizater nou bann frer.” (Rev. 12:10) I provok Zeova par dir ki bann Kretyen enkli ou osi, pa pou reste fidel. Satan i pretann ki ou pou trai Zeova pour ou kapab sov ou lavi. Ki mannyer sa bann lakizasyon i fer ou santi? Eski ou kontan pour pran sa loportinite pour prouve ki Satan i en manter? Ou pou fer sanmenm si ou gard ou lentegrite.
11, 12. (a) Ki legzanp ki montre ki desizyon nou fer tou le zour i relye avek nou lentegrite? (b) Akoz i en privilez pour gard nou lentegrite?
11 Alor ou lentegrite i fer ki ou kondwit ek ou bann swa i vreman enportan. Egzamin ankor sa trwa sityasyon ki nou ti mansyonnen pli boner. Ki mannyer sak dimoun pou gard son lentegrite? Sa garson ki pe ganny sikannen avek son bann kanmarad lekol i kapab vreman ganny tante pour tir son lakoler li osi, me i mazin sa konsey: “Pa vanze, me les lakoler Bondye azir. Parski Senyer i dir dan Lekritir: ‘Mwan ki pou fer vanzans, Mwan ki pou fer peye.’” (Rom. 12:19) I vir ledo e ale. Sa msye marye ki pe servi Internet ti’n kapab get sa bann lenformasyon ki eksit dezir seksyel, me i mazin sa prensip ki par deryer parol Zob: “Mon’n fer en lalyans avek mon lizye. Alor ki mannyer mon kapab port latansyon lo en vyerz?” (Zob 31:1) Pareyman sa zonm i refize get bann portre ki sal moralman konmsi pour li sa i en pwazon. Sa ser ki pe koze ansanm avek lezot dan en group i ezite apre ki i tann bann rimer konmans ganny rakonte, i mazin sa konsey: “Sakenn antre nou i devre esey fer plezir son prosen pour fer li vin pli for dan lafwa.” (Rom. 15:2) I kapab ki sa rimer ki petet i pou repete pa pou fortifye lezot. I pa ni pou annan en bon lefe lo son ser Kretyen, ni fer plezir son Papa ki dan lesyel. Alor i deside pour pa partisip dan sa konversasyon e i sanz topik.
12 Dan sak sa bann sityasyon, sak Kretyen in fer en desizyon ki annefe pe dir: ‘Zeova i mon Sef. Mon pou esey fer sa ki fer li plezir dan sa sityasyon.’ Ler ou annan bann swa personnel ek desizyon pour fer, eski ou esey fer plezir Zeova? Si ou fer li ou pe sirman obeir sa parol tousan ki ganny rikorde dan Proverb 27:11: “Vin saz, mon garson e rezwir mon leker, pour ki mon a kapab reponn sa enn ki pe provok mwan.” Pa nou vreman annan en gran privilez pour fer leker Zeova rezwir! Pa i byen alor pour nou fer bokou zefor pour gard nou lentegrite?
2. Zeova i ziz nou dapre nou lentegrite
13. Ki mannyer parol Zob ek David i montre ki Zeova i ziz nou dapre nou lentegrite?
13 Nou’n vwar ki lentegrite i ed nou pour pran pozisyon pour souvrennte Zeova. Alor Zeova i ziz nou dapre nou lentegrite. Zob ti vreman konpran sa laverite. (Lir Zob 31:6. *) Zob ti konnen ki Bondye i pez bann imen dan “en balans ki egzakt.” I ziz dapre standar son lazistis ki parfe pour vwar si nou pe gard nou lentegrite. Pareyman David ti dir: “Zeova li menm pou pas en santans kont bann pep. Ziz mwan O Zeova dapre mon ladrwatir e dapre mon lentegrite ki dan mwan. . . . Bondye ou ki drwat egzamin leker ek ronnyon.” (Ps. 7:8, 9) Nou konnen ki Bondye i kapab get sa ki nou ete anndan, nou “leker ek ronnyon” senbolik. Toudmenm nou devret rapel sa ki i pe rode. Parey David ti dir, Zeova i ziz nou dapre nou lentegrite.
14. Akoz nou pa devret krwar ki nou lenperfeksyon i anpes nou gard nou lentegrite?
14 Mazin Zeova pe egzamin leker sa plizyer bilyon dimoun ozordi. (1 Kron. 28:9) Ki degre souvan i vwar en dimoun pe gard son lentegrite konman en Kretyen? I vreman rar! Parkont nou pa devret prezimen ki lenperfeksyon i anpes nou gard nou lentegrite. O kontrer, parey David ek Zob, nou annan bon rezon pour annan konfyans ki Zeova pou vwar nou pe gard nou lentegrite menm si nou enparfe. Mazinen osi ki perfeksyon pa garanti si nou pou gard nou lentegrite. Zis trwa imen parfe ki’n viv lo later e de parmi, Adan ek Ev pa ti reisi gard zot lentegrite. Me kantmenm sa plizyer milyon imen enparfe in reisi fer sa. Ou osi ou kapab.
3. Lentegrite i esansyel pour nou lespwar
15. Ki mannyer David ti montre ki lentegrite i esansyel pour nou lespwar pour lavenir?
15 Lefet ki Zeova i ziz nou dapre nou lentegrite, sa kalite i osi esansyel pour nou lespwar pour lavenir. David ti konnen ki sa i vre. (Lir Psonm 41:12. *) I ti apresye son lespwar pour ganny laprouvasyon Bondye pour touzour. Parey bann vre Kretyen ozordi David ti annan sa lespwar pour viv pour touzour. I ti kontinyen apros pli pros avek Zeova anmezir ki i ti servi li. David ti konnen ki i ti pou bezwen gard son lentegrite si i ti anvi vwar lakonplisman sa lespwar. Pareyman, Zeova i siport, ansenny, gid e beni nou anmezir ki nou gard nou lentegrite.
16, 17. (a) Akoz ou annan sa gran dezir pour touzour gard ou lentegrite? (b) Ki kestyon sa lot lartik pou diskite?
16 Lespwar i esansyel pour ki nou ere la konmela. I kapab donn nou sa lazwa ki nou bezwen pour siport bann moman difisil. Lespwar i kapab protez nou panse tou. Mazinen, Labib i konpar lespwar avek en kas proteksyon. (1 Tesa. 5:8) Zis parey en kas i protez en solda dan batay, lespwar i protez nou lespri avek bann panse negatif ki Satan i promote dan sa lemonn ki pros pour trouv son lafen. Lavi napa en bi si nou napa lespwar. Nou bezwen egzamin nou lekor onnetman e pran letan pour egzamin leta nou prop lentegrite ek sa lespwar ki vin avek. Pa oubliye ki ler ou gard ou lentegrite ou pe siport souvrennte Zeova e protez ou lespwar vreman presye pour lavenir. Fotespere ki ou touzour gard ou lentegrite!
17 Vi ki lentegrite i vreman enportan nou bezwen egzamin lezot kestyon ankor. Ki mannyer nou kapab batir nou lentegrite? Ki mannyer nou kapab gard li? Kwa ki kapab ganny fer si pour en serten letan en dimoun pa’n gard son lentegrite? Sa lot lartik pou kouver sa bann kestyon.
[Not anba lo paz]
^ par. 4 Levitik 22:19, 20: “Pour zot ganny aprouve, fodre ki sa zannimo i san defo, ki swa i en mal parmi bann gro zannimo, parmi bann zenn mal mouton ouswa parmi bann kabri. Nenport ki keksoz ki annan en defo zot pa devret ofer, akoz i pa pou fer zot ganny laprouvasyon.”
^ par. 6 Zezi ti dir: “Vin parfe parey zot Papa ki dan lesyel i parfe.” (Mat. 5:48) I evidan ki i ti konpran ki menm bann imen enparfe i kapab konplet oubyen parfe dan en serten sans. Nou devret kontan kanmarad e kan nou fer sa nou fer plezir Bondye. Me Zeova i konpletman parfe. Kan pe refer avek li, sa term “lentegrite” i osi enplik perfeksyon.—Ps. 18:30.
^ par. 13 Zob 31:6: “I pou pez mwan dan en balans ki egzakt e Bondye pou kapab konn mon lentegrite.”
^ par. 15 Psonm 41:12: “Tandis ki mwan, akoz mon lentegrite ou’n soutenir mwan e ou pou met mwan devan ou figir pour en letan endefini.”
Ki ou pou reponn?
• Ki si sa lentegrite?
• Ki mannyer lentegrite i relye avek drwa Zeova konman souvren iniversel?
• Ki mannyer nou lespwar i depan lo nou lentegrite?
[Kestyon]
[Portre lo paz 14]
Lavi tou le zour i prezant bann defi lo nou lentegrite