Apresye rol Zezi ki inik dan plan Bondye

“Se mwanmenm semen, laverite ek lavi. Personn pa kapab ariv kot mon Papa san pas par mwan.”—ZAN 14:6.

1, 2. Akoz nou devret enterese pour egzamin rol inik ki Zezi i annan dan plan Bondye?

DIRAN bann lannen ki’n pase, bokou dimoun in fer zefor pour zot diferan avek lezot, me sa pa leka. Pli ptigin dimoun ankor i kapab dir ki zot vreman inik dan en laspe enportan. Me pourtan Zezi Kri, Garson Bondye i inik dan plizyer fason.

 ² Zezi i inik dan plizyer fason, akoz sa i devret enteres nou? Parski sa i annan pour fer avek nou relasyon personnel avek nou Papa ki dan lesyel, Zeova. Zezi ti dir: “Se mwanmenm semen, laverite ek lavi. Personn pa kapab ariv kot mon Papa san pas par mwan.” (Zan 14:6; 17:3) Annou egzamin serten fason ki Zezi i inik. Ler nou fer sa, nou lapresyasyon pour rol ki i zwe dan plan Bondye pou ogmante.

“Sel Garson Bondye”

3, 4. (a) Akoz nou kapab dir ki rol Zezi konman sa sel Garson Bondye i inik? (b) Ki mannyer rol Zezi dan kreasyon i inik?

³ Satan ti refer avek Zezi konman ‘en Garson Bondye’ kan i ti pe tant li, me Zezi pa zis en garson Bondye. (Mat. 4:3, 6) Zezi i ganny apele sa “sel Garson Bondye.” (Zan 3:16, 18) Sa mo Grek ki’n ganny tradwir “sel garson” i donn sa lide “zis enn dan sa kalite oubyen group” ouswa “inik.” Zeova i annan plizyer santenn milye garson spirityel. Alor dan ki sans Zezi i “inik”?

⁴ Zezi i inik dan sa sans ki i sa sel kreasyon ki son Papa ti kree li tousel. I sa Garson premye ne. Anfet i “premye-ne tou kreasyon.” (Kol. 1:15) I “konmansman kreasyon Bondye.” (Rev. 3:14) Rol ki sa sel Garson Bondye ti annan dan travay kreasyon i osi inik, i pa ti sa Loter oubyen Kreater. Me atraver li Zeova ti kree tou lezot keksoz. (Lir Zan 1:3.) Zapot Pol ti ekrir: “Pour nou i annan en sel Bondye, Papa, kot tou keksoz i sorti, e pour ki nou egziste. E i annan en sel Senyer, Zezi-Kri, par ki tou keksoz i egziste e par ki nou egziste.”—1 Kor. 8:6.

5. Ki mannyer Labib i montre ki serten rol ki Zezi i annan i inik?

⁵ Parkont, Zezi i inik dan plizyer lezot fason. Labib i donn li plizyer tit oubyen deskripsyon ki met lanfaz lo son rol inik dan plan Bondye. Aprezan annou egzamin senk lezot sa bann tit ki aplik avek Zezi dan Lekritir Grek. *

“Laparol”

6. Akoz i apropriye pour Zezi ganny apele “Laparol”?

⁶ Lir Zan 1:14. Akoz Zezi i ganny apele “Laparol” oubyen Logos an Grek? Sa tit i idantifye travay ki i ti fer apre ki lezot kreatir entelizan ti ganny kree. Zeova ti servi son Garson pour pas lenformasyon ek lenstriksyon avek lezot garson spirityel zis parey i ti servi sanmenm sa Garson pour pas Son mesaz avek bann imen lo later. Zezi i Laparol oubyen portparol Bondye, sa i ganny konfirmen par sa ki Kris ti dir avek bann Zwif ki ti pe ekout li: “Lansennyman ki mon donnen i pa mon prop lansennyman, me i sorti kot Bondye ki’n anvoy mwan. Tou dimoun ki dakor pour fer sa ki Bondye i oule, i pou konnen si mon lansennyman i sorti kot Bondye oubyen si mon koz par mon prop lotorite.” (Zan 7:16, 17) Zezi i ankor annan sa tit “Parol Bondye” menm apre ki i’n retourn dan lesyel.—Rev. 19:11, 13, 16.

7. Ki mannyer nou kapab imit sa limilite ki Zezi i demontre dan son rol konman “Laparol”?

⁷ Zis mazin sa ki sa tit i enplike. Menm si Zezi i sa enn ki pli saz parmi tou lezot kreasyon Zeova, i pa depan lo son prop lasazes. I dir sa ki son Papa i dir li dir. I touzour atir latansyon lo Zeova e non pa lo li menm. (Zan 12:50) Pa sa i en zoli legzanp pour nou imite! Nou osi nou’n ganny sa privilez spesyal pour “anons bonn nouvel” lo bann bon keksoz. (Rom. 10:15) Si nou apresye legzanp limilite ki Zezi in kite, sa pou motiv nou pour evite koz dapre nou prop pwennvi. Ler i’n ariv ler pour transmet sa mesaz ki sov lavi ki dan Labib, nou pa anvi ‘al pli lwen ki sa ki’n ganny ekrir.’—1 Kor. 4:6.

 “Amenn”

8, 9. (a) Ki savedir sa mo “amenn” e akoz Zezi i ganny apele “Amenn”? (b) Ki mannyer Zezi ti akonplir son rol konman “Amenn”?

⁸ Lir Revelasyon 3:14. Akoz Zezi i ganny apele “Amenn”? Sa mo “amenn” i lekspresyon en mo Ebre ki vedir “dakor” oubyen “sirman.” Sa mo Ebre i sorti dan en lot mo ki vedir “reste fidel” oubyen “diny konfyans.” Sa menm mo i ganny servi pour dekrir fidelite Zeova. (Det. 7:9; Iza. 49:7) Alor, dan ki fason Zezi i inik kan i ganny apele “Amenn”? Remarke ki mannyer 2 Korentyen 1:19, 20 i reponn: “Garson Bondye, Kris-Zezi, ki [ti ganny] . . . anonse parmi zot pa ti ‘Wi’ ek ‘Non.’ Me o[ ]kontrer dan li i annan zis ‘Wi.’ Tou bann promes Bondye i trouv dan li zot ‘Wi’ dan Zezi-Kri. Se pour sa rezon ki se par Zezi-Kri ki nou dir Amenn pour rann glwar Bondye.”

⁹ Zezi i “Amenn” dan tou bann promes ki Bondye in fer. Son lavi san defo lo later enkli son lanmor konman en sakrifis ti konfirmen e fer li posib pour tou bann promes Zeova ganny akonplir. Atraver son fidelite, Zezi ti osi prouve ki sa lakizasyon Satan ki ganny trouve dan liv Zob i fo, konsernan si en serviter i mank keksoz debaz, soufer oubyen ganny teste i pou modi Bondye. (Zob 1:6-12; 2:2-7) Parmi tou sa ki Bondye in kree, zis sa Garson premye ne ki ti kapab donn en larepons definitif avek fo lakizasyon Satan. Deplis, Zezi ti kit sa pli bon levidans ki i ti siport son Papa lo sa kestyon pli enportan ki enplik drwa Zeova konman souvren liniver.

10. Ki mannyer nou kapab imit Zezi dan son rol inik konman “Amenn”?

¹⁰ Ki mannyer nou kapab imit Zezi dan son rol inik konman “Amenn”? Nou kapab fer li par reste fidel avek Zeova e siport son souvrennte iniversel. Ler nou fer sa, nou pou azir an armoni avek sa demann ki dan Proverb 27:11: “Vin saz, mon garson, e rezwir mon leker, pour ki mon a kapab reponn sa enn ki pe provok mwan.”

“Med[y]ater en nouvo lalyans”

11, 12. Ki mannyer rol Zezi konman “Medyater” i inik?

¹¹ Lir 1 Timote 2:5, 6. Zezi i sa “sel ­medyater ant Bondye ek zonm.” I “med[y]ater en nouvo lalyans.” (Ebr. 9:15; 12:24) Parkont, Moiz osi i ganny apele en medyater, i ti medyater lalyans Lalwa. (Gal. 3:19) Alor, ki mannyer rol Zezi konman Medyater i inik?

¹² Dan langaz orizinal sa mo, ki’n ganny tradwir “medyater” i en term legal. I refer avek Zezi konman en Medyater legal (oubyen dan en sans konman en avoka) sa ­nouvo lalyans ki fer li posib pour sa nouvo nasyon setadir “Izrael Bondye” vin an ­egzistans. (Gal. 6:16, NW) Bann Kretyen swazir ki form sa nasyon i en “group pret rwayal” dan lesyel. (1 Pyer 2:9; Egz. 19:6) Lalyans Lalwa, avek Moiz konman en medyater pa ti kapab fer en nasyon koumsa vin an egzistans.

13. Kwa ki enplike dan rol Zezi konman Medyater?

¹³ Ki rol Zezi konman Medyater i enplike? Anfet, Zeova i aplik valer disan Zezi avek sa bann ki form par sa nouvo lalyans. Dan sa fason, Zeova i legalman konsider zot drwat. (Rom. 3:24; Ebr. 9:15) Apre sa Bondye i kapab konsider zot diny pour antre dan sa nouvo lalyans avek lespwar pour vin bann pret ek lerwa dan lesyel. Konman zot Medyater, Zezi i ed zot pour gard zot pir devan Bondye.—Ebr. 2:16.

14. Akoz tou bann Kretyen, nenport ki lespwar zot annan zot devret vreman apresye rol Zezi konman Medyater?

 ¹⁴ Me ki arive avek bann ki pa dan sa nouvo lalyans e ki annan lespwar pour viv pour touzour lo later e non pa dan lesyel? Menm si zot pa bann partisipan dan sa nouvo lalyans, zot benefisye avek li. Zot ganny pardonnen zot pese e zot ganny konsidere drwat konman bann zanmi Bondye. (Zak 2:23; 1 Zan 2:1, 2) Ki swa nou annan lespwar pour viv dan lesyel ouswa lo later, nou tou nou annan sa bon rezon pour apresye rol ki Zezi i annan konman Medyater sa nouvo lalyans.

‘Gran Pret’

15. Ki mannyer rol Zezi konman Gran Pret i diferan avek pour lezot zonm ki ti servi konman gran pret?

¹⁵ Dan lepase, bokou zonm in servi konman gran pret, me pourtan rol Zezi konman gran pret i vreman inik. Ki mannyer? Pol i eksplike: “I pa bezwen ofer sakrifis toulezour, parey sa bann Gran-Pret, premyerman pour son prop pese, answit pour pese lepep. I’n ofer son lekor an sakrifis en sel fwa pour tou. Annefe, lalwa i etabli bann zonm dan zot febles konman Gran-Pret, me parol serman ki’n vin apre lalwa, i etabli en Garson ki’n vin parfe pour leternite.”—Ebr. 7:27, 28. *

16. Akoz sakrifis Zezi i vreman inik?

¹⁶ Zezi ti en zonm parfe, i ti egzakteman parey Adan avan ki i ti fer pese. (1 Kor. 15:45) Savedir, Zezi ti sa sel zonm parfe ki ti kapab ofer son lekor konman en sakrifis parfe e konplet. Sa kalite sakrifis pa ti pou bezwen ganny refer. Anba Lalwa Moiz, sakrifis ti ganny ofer tou le zour. Tou sa bann kalite sakrifis e sa bann servis ki bann pret ti fer ti zis en avangou sa ki Zezi ti pou akonplir. (Ebr. 8:5; 10:1) Alors, lefet ki Zezi i kapab akonplir plis ki sa ki lezot gran pret ti fer e i annan sa rol lo en baz permanan, sa i fer ki son rol konman Gran Pret i inik.

17. Akoz nou devret apresye rol Zezi konman nou Gran Pret e ki mannyer nou kapab fer sa?

 ¹⁷ Nou bezwen sa bann servis ki Zezi i ofer konman Gran Pret akoz sa i ed nou ganny laprouvasyon Bondye. Pa nou vreman annan en Gran Pret ki merveye! Pol ti ekrir: “Nou Gran-Pret i pa enn ki pa kapab senpatiz avek nou febles, me enn ki’n ganny tante dan tou keksoz, parey nou, pourtan san fer pese.” (Ebr. 4:15) Apre ki nou konn sa, en lapresyasyon senser i devret motiv nou pour ‘pa viv zis pour nou menm me pour li ki’n mor pour nou.’—2 Kor. 5:14, 15; Lik 9:23.

Sa “desandans” ki ti ganny predir

18. Ki profesi ki ti ganny prononse apre ki Adan ti fer pese e kwa ki ti ganny revele plitar konsernan sa profesi?

¹⁸ Dan zarden Edenn, kan i ti paret ki bann imen ti’n perdi tou keksoz setadir laprouvasyon Bondye, lavi eternel, boner ek Paradi, Zeova ti promet ki ti pou annan enn ki ti pou sov nou. Sa enn ti ganny refer avek konman en “desandans.” (Zen. 3:15) Pour plizyer lannen, bokou profesi Labib ti koz lo sa Desandans ki ti en mister. I ti pou en desandans sorti dan fanmir Abraam, Izaak ek Zakob. I ti pou osi sorti dan laliny desandans Lerwa David.—Zen. 21:12; 22:16-18; 28:14; 2 Sam. 7:12-16.

19, 20. (a) Lekel sa Desandans ki ti ganny promet? (b) Akoz i kapab ganny dir ki sa desandans ki’n ganny predir i enplik plis ki zis Zezi?

¹⁹ Lekel sa Desandans ki ti ganny promet? Larepons sa kestyon i kapab ganny trouve dan Galat 3:16. (Lir.) Me plitar dan sa menm sapit, zapot Pol ti dir bann Kretyen swazir: “E si zot pour Kris, alor zot bann desandan[s] Abraam, e zeritye promes Bondye.” (Gal. 3:29) Zezi i sa desandans ki ti ganny promet me dan ki sans i annan ankor lezot ki enplike?

²⁰ I ti annan plizyer milyon dimoun ki ti dir ki zot bann desandans Abraam e serten ti menm azir konman bann profet. Serten larelizyon i ensiste ki zot bann profet i sorti dan desandans Abraam. Me eski zot tou zot sa Desandans ki ti ganny promet? Non. Parey zapot Pol ti fer resorti anba lenspirasyon, pa tou bann desandans Abraam ki kapab dir ki zot sa Desandans ki ti ganny promet. Zanfan lezot garson Abraam pa ti ganny servi pour beni limanite. Sa desandans ki ti pou anmenn benediksyon ti pou sorti zis dan desandans Izaak tousel. (Ebr. 11:18) Finalman, zis en zonm, Zezi Kri ki son laliny desandans depi Abraam in ganny rikorde dan Labib, i li menm parti prensipal sa desandans ki ti ganny promet. * Tou lezot ki pou plitar vin dezyenm parti desandans Abraam i osi bann desandans ki’n ganny promet parski “zot pour Kris.” Wi, rol Zezi pour akonplir sa profesi i vreman inik.

21. Kwa ki enpresyonn ou dan lafason ki Zezi in akonplir son rol inik dan plan Zeova?

²¹ Ki nou’n aprann dan sa pti revizyon lo rol inik ki Zezi i annan dan plan Zeova? Depi ki i ti ganny kree, sa sel Garson Bondye in touzour inik. Parkont, sa Garson Bondye ki inik e ki ti vin Zezi in touzour servi son Papa avek limilite e an armoni avek lavolonte son Papa, i pa’n zanmen rod son prop laglwar. (Zan 5:41; 8:50) Pa sa i en legzanp eksepsyonnel pour nou ozordi! Parey Zezi, annou fer li en lobzektif pour fer “tou pour laglwar Bondye.”—1 Kor. 10:31.

[Not anba lo paz]

Eski ou rapel?

• Ki ou’n aprann atraver rol inik ki Zezi i annan par son bann tit ek deskripsyon? (Vwar bwat.)

• Ki mannyer ou kapab imit legzanp sa Garson inik Zeova?

[Kestyon]

[Bwat lo paz 23]

Serten tit ki reflekte rol inik ki Zezi i annan dan plan Bondye

▪ Sel Garson Bondye. (Zan 1:3) Zezi i sa sel Kreasyon ki Bondye ti kree li tousel.

▪ Laparol. (Zan 1:14) Zeova i servi son Garson konman portparol pour transmet lenformasyon ek lenstriksyon avek bann imen ek lanz.

▪ Amenn. (Rev. 3:14) Lavi Zezi ki ti san defo lo later enkli son lanmor konman en sakrifis ti konfirmen e fer li posib pour bann promes Zeova ganny akonplir.

▪ Medyater sa nouvo lalyans. (1 Tim. 2:5, 6) Konman sa Medyater legal, Zezi in fer li posib pour en nouvo nasyon setadir “Izrael Bondye” vin an egzistans. Bann Kretyen swazir ki form sa nasyon e zot form parti en “group pret rwayal” dan lesyel.—Gal. 6:16, NW; 1 Pyer 2:9.

▪ Sa Gran Pret. (Ebr. 7:27, 28) Zezi ti sa sel imen ki ti kapab ofer en sakrifis parfe ki pa ti pou bezwen ganny refer ankor. I kapab efas nou pese e delivre nou avek lanmor.

▪ Sa desandans ki ti’n ganny promet. (Zen. 3:15) Zezi Kri i sa sel zonm ki sa parti prensipal dan sa desandans ki ti ganny promet. Tou bann ki plitar ti pou form dezyenm parti desandans Abraam zot “pour Kris.”—Gal. 3:29.