En krwayans popiler

“Mon ti ganny bann kosmar kot mon ti pe brile dan lanfer! Mon ti reve mon ti pe ganny anvoye dan en landrwa kot i annan dife e kan mon ti sote dan mon rev, mon ti pe kriye. Alor, mon ti esey fer tou pour pa fer pese.”—Arline

ESKI ou krwar ki lanfer i en landrwa ki’n ganny rezerve pour bann peser ganny tourmante apre lanmor? Bokou dimoun i krwar sa. Par egzanp, an 2005, en spesyalis ki etidye larelizyon dan Liniversite St. Andrews Lekos in trouve ki en tyer bann sef relizye Lekos i krwar ki bann ki pa enterese avek Bondye pou soufer “mantalman dan lanfer pour touzour” e 20 poursan parmi i krwar ki sa bann ki al dan lanfer pou ganny tourmante fizikman.

Dan plizyer pei, krwayans dan lanfer i komen. Par egzanp, an 2007 en serve ki ti ganny fer Leta-z-ini in montre ki apepre 70 poursan sa bann dimoun ki ti enkli dan sa serve i krwar dan lanfer. Menm dan bann pei kot lamazorite dimoun pa relizye, dimoun i krwar dan lanfer. Dapre en serve ki ti ganny fer an 2004, 42 poursan dimoun Kanada ti krwar dan lanfer e Langleter 32 poursan i dir ki zot asire ki lanfer i ­egziste.

Sa ki bann sef relizye i ansennyen

Plizyer sef relizye in aret ansennyen ki lanfer i en landrwa kot dimoun i ganny tourmante dan dife apre lanmor. Me zot plito promot sa definisyon ki trouve dan sa liv Catechism of the Catholic Church ki ti ganny pibliye an 1994. Sa referans i dir: “Lanfer i kan en dimoun i ganny separe avek Bondye pour touzour e sa i sa pli gran pinisyon.”

Kantmenm sa, bokou dimoun i touzour krwar ki lanfer i en landrwa kot dimoun i ganny tourmante mantalman oubyen ­fizikman. Bann ki promot sa kalite lansennyman i dir ki i baze lo Labib. Albert Mohler, nevyenm prezidan Southern Baptist Theological Seminary i klerman dir sa lo son krwayans: “I senpleman en laverite dan Lekritir.”

Akoz sa ki nou krwar i enportan?

Si lanfer i vreman en landrwa kot dimoun i ganny tourmante apre lanmor, sirman ou annan rezon pour ou per. Parkont, si sa lansennyman pa vre, bann sef relizye ki ansenny sa lansennyman i kree konfizyon e fer bann dimoun per pour nanryen. Zot osi sali repitasyon Bondye.

Ki Labib, Parol Bondye, i dir lo sa size? Sa bann lartik swivan pou servi tradiksyon Labib Katolik ek Protestan pour reponn sa trwa kestyon swivan: (1) Ki vreman arive apre lanmor? (2) Ki Zezi ti ansennyen lo lanfer? (3) Ki lefe aprann laverite lo lanfer i kapab annan lo ou?